Agtutubo—Paragsakenyo ti Puso Dagiti Dadakkelyo
“AWANEN ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko agtultuloyda a magna iti kinapudno,” insurat ti lakayen a ni apostol Juan. (3 Juan 4) Nupay dagiti annak a nadakamat iti daytoy a bersikulo ti Biblia ket tumukoy kadagiti Kristiano nga adalan, dagiti managbuteng iti Dios a nagannak maawatanda ti narikna ni Juan. No kasano a dagiti nagannak dakkel ti maitulongda iti biag dagiti annakda, kasta met dagiti annak dakkel ti maaramidanda iti biag dagiti nagannak kadakuada.
Napaliiw ni Ari Solomon iti Israel no kasano a dagiti annak maapektaranda dagiti nagannak kadakuada. Insuratna: “Ti masirib nga anak isu daydiay mamagrag-o iti ama, ket ti maag nga anak isu ti ladingit ni inana.” (Proverbio 10:1) No kasta, amin nga annak—uray pay dagiti nataenganen—naimbag nga usigenda ti epekto dagiti tignayda kadagiti ama ken inada. Apay a rumbeng daytoy?
Panunotem ti amin a panangay-aywan kenka dagiti managbuteng iti Dios a nagannakmo tapno mapadakkeldaka! Sakbay pay a naipasngayka, kasta unay ti karkararag ken pannakaseknanda kenka. Idi nayanakka, maragragsakanda a makisinninged kenka. Mabalin a nagyamanda iti Dios iti naragsak ngem serioso a pribilehio ken rebbengenda a mangpadakkel kenka. Masapul nga aywananda itan ti maysa a bassit ken awan gawayna nga ubing. Kas managdaydayaw ken Jehova, sipapasnek nga inaramidda daytoy.
Tangay pudno a Kristiano dagiti dadakkelmo, inusarda ti Biblia ken dagiti naibatay-Biblia a publikasion tapno masiguradoda nga umiso ti panangiwanwanda, ken nagpabalakadda kadagidiay nakapadasen a nangpadakkel kadagiti annak. Kankanayon met nga inkararagda dagiti pakaseknanda iti Dios. (Uk-ukom 13:8) Bayat a dumakdakkelka, ammoda dagiti naimbag a kababalinmo ken dagiti pagkapuyam. (Job 1:5) Idi tin-edyerkan, rimsua manen dagiti baro a parikut. Nalabit nga adda dagiti gundaway a nasukirka, isu nga ad-adda manen ti panagkararag, panagbasa, ken panangpampanunot dagiti dadakkelmo no kasano a tulongandaka nga agtultuloy nga agdayaw iti nailangitan nga Amam, ni Jehova.
Kas ina ken ama, nagtultuloy ti panangiwanwanda kenka. Uray pay no nagmataengankan, agtultuloy a maseknanda iti pisikal, mental, emosional, ken naespirituan a pagimbagam. Ngem kabayatanna, ammo dagiti dadakkelmo nga adda wayawayam nga agpili ken saanda nga ammo no anianto ti pagtungpalan ti biagmo. Ngamin, sikanto ti mangikeddeng no ania ti surotem a dalan.
Ngarud, saan kadi a nainkalintegan a no ‘awanen ti dakdakkel pay a pakaigapuan ti kinamanagyaman’ dagiti nagannak ngem ti mangngegda nga ‘agtultuloy a magna iti kinapudno’ dagiti annakda, kasta met nga awanen ti dakdakkel pay a pagladingitanda no sumiasika iti dayta? Wen, dagiti annak nga agtignay a simamaag pagladingitenda dagiti dadakkelda. Kinuna ni Solomon: “Ti maag nga anak ket pakasemseman iti amana ken kinapait iti daydiay nangipasngay kenkuana.” (Proverbio 17:25) Talaga a nakaro ti panagladingit dagiti nagannak no panawan ti maysa nga anak ti panagdayaw iti pudno a Dios!
Nalawag a dakkel ti epekto ti panagtignaymo iti pamiliam ken iti sabsabali. Ti kababalinmo apektaranna dagiti nagannakmo. No tallikudam ti Dios ken dagiti prinsipiona, agladingit dagiti dadakkelmo. Nupay kasta, agpayso met ti kasungani dayta. No agmatalek ken agtulnogka ken Jehova, agrag-o dagiti dadakkelmo! Ikagumaam ngarud a paragsaken ti puso dagiti dadakkelmo! Ania koma pay ti napatpateg a sagut a maipaaymo kadagidiay nangpadakkel, nangaywan, ken nangayat kenka?