Parang-ayem Dagiti Galad a Makatulong Kenka nga Agaramid Kadagiti Adalan
“Inkayo . . . ket mangaramidkayo iti ad-adalan kadagiti tattao iti amin a nasion.”—MATEO 28:19.
1. Aniada a paglaingan ken kababalin ti kasapulan ti dadduma a nagkauna nga adipen ti Dios?
DAGITI adipen ni Jehova masapul a patanorenda dagiti paglaingan ken kababalin a makatulong kadakuada a mangaramid iti pagayatanna. Kas pagarigan, gapu iti bilin ti Dios, da Abraham ken Sara pinanawanda ti narang-ay a siudad ti Ur isu nga idi agangay, kasapulanda dagiti galad ken abilidad a makatulong iti panagnaedda kadagiti tolda. (Hebreo 11:8, 9, 15) Tapno maidauluanna dagiti Israelita a sumrek idiay Naikari a Daga, nasken a maaddaan ni Josue iti kinatured, panagtalek ken Jehova, ken pannakaammo iti Linteg. (Josue 1:7-9) Ken aniaman dagiti datin a paglaingan da Bezalel ken Oholiab, sigurado a naparang-ay dagita gapu iti tulong ti espiritu ti Dios tapno sibaballigi a makatulong ken maiwanwanda ti pannakaipasdek ti tabernakulo ken dadduma pay a nainaig a trabaho.—Exodo 31:1-11.
2. Ania dagiti usigentayo a saludsod a nainaig iti trabaho a panagaramid adalan?
2 Sinigsiglo kalpasanna, kastoy ti imbilin ni Jesu-Kristo kadagiti pasurotna: “Inkayo . . . ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Dayta pay laeng ti kaunaan a gundaway a naikkan dagiti tattao iti pribilehio a mangaramid iti kasta kadakkel a trabaho. Ania dagiti galad a kasapulan iti trabaho a panagaramid adalan? Kasanotay a maparang-ay dagita a galad?
Ipakitam ti Nasged a Panagayatmo iti Dios
3. Ania a gundaway ti ipaay kadatayo ti bilin a mangaramidtayo kadagiti adalan?
3 Nasken nga addaantayo iti nasged a panagayat ken Jehova tapno makasaritatayo dagiti tattao ken makombinsirtayo ida nga agdayaw iti pudno a Dios. Mapaneknekan dagiti Israelita nga adda panagayatda iti Dios babaen ti naimpusuan a panagtulnogda iti bilbilinna, panangidaton kadagiti makaay-ayo a sakripisio, ken panagdayaw kenkuana babaen iti kankanta. (Deuteronomio 10:12, 13; 30:19, 20; Salmo 21:13; 96:1, 2; 138:5) Kas managaramid adalan, tungtungpalentay ti linlinteg ti Dios, ngem ipakpakitatayo met ti ayattayo ken Jehova babaen ti panangisurotayo kadagiti sabsabali iti maipapan kenkuana ken kadagiti panggepna. Masapul nga agsaotayo buyogen ti kombiksion, nga usarentayo dagiti umiso a sasao a mangyebkas kadagiti napasnek a riknatayo maipapan iti namnamatayo nga inted ti Dios.—1 Tesalonica 1:5; 1 Pedro 3:15.
4. Apay a pakaragsakan ni Jesus nga isuro kadagiti tattao ti maipapan ken Jehova?
4 Gapu ta nasged ti panagayatna ken Jehova, pakaragsakan unay ni Jesus nga isarsarita ti maipapan iti pangpanggep ti Dios, maipapan iti Pagarian, ken iti pudno a panagdayaw. (Lucas 8:1; Juan 4:23, 24, 31) Kinapudnona, kinuna ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34) Agaplikar ken Jesus dagitoy a kinuna ti salmista: “Ti panangaramid iti pagayatam, O Diosko, nagragsakak, ket ti lintegmo adda kadagiti makin-uneg a pasetko. Imbagak ti naimbag a damag ti kinalinteg iti dakkel a kongregasion. Adtoy! Dagiti bibigko saanko a medmedan. O Jehova, sika ammom unay dayta.”—Salmo 40:8, 9; Hebreo 10:7-10.
5, 6. Ania ti kangrunaan a galad a nasken a parang-ayen dagiti managaramid adalan?
5 Gapu iti panagayatda iti Dios, adda dagiti gundaway a dagiti kabbaro a nakaammo iti kinapudno ti Biblia isarsaritada ti maipapan ken Jehova ken ti Pagarian buyogen iti kombiksion. Gapuna, epektiboda unay a mangkombinsir iti dadduma a mangusig iti Kasuratan. (Juan 1:41) Ti panagayattayo iti Dios ti kangrunaan a pakagutugotantayo a makipaset iti trabaho a panagaramid adalan. Pagtalinaedentayo ngarud a nasged dayta nga ayat babaen ti regular a panangbasa ken panangutob iti Saona.—1 Timoteo 4:6, 15; Apocalipsis 2:4.
6 Awan duadua a ti panagayatna ken Jehova ti nakatulong ken Jesu-Kristo tapno agbalin a naregta a mannursuro. Ngem saan la a dayta ti rason nga isu ket epektibo a mangiwaragawag iti Pagarian. Ania ngarud ti sabali pay a galad a namagbalin kenkuana a naballigi a managaramid iti adalan?
Ipakitam ti Naayat a Pannakaseknan Kadagiti Tattao
7, 8. Ania ti narikna ni Jesus kadagiti tattao?
7 Maseknan ni Jesus kadagiti tattao ket impakitana ti nasged nga interes kadakuada. Uray pay sakbay ti panagbalinna a tao, kas dinutokan ti Dios a “nasigo a managobra,” kaay-ayonan ti bambanag a nainaig iti sangatauan. (Proverbio 8:30, 31) Idi nagbiag a kas tao ditoy daga, impakita ni Jesus ti asi kadagiti tattao, a pinagin-awana dagidiay immay kenkuana. (Mateo 11:28-30) Inyanninaw ni Jesus ti ayat ken asi ni Jehova, ket dayta ti nangtignay kadagiti tattao tapno dayawenda ti kakaisuna a pudno a Dios. Amin a kita ti tattao ket nagimdeng ken Jesus gapu iti panangipakitana iti naayat a pannakaseknan kadakuada ken kadagiti kasasaadda.—Lucas 7:36-50; 18:15-17; 19:1-10.
8 Idi nagimtuod ti maysa a lalaki no ania ti nasken nga aramidenna tapno matawidna ti biag nga agnanayon, “minatmatan ni Jesus ket nariknana ti panagayat kenkuana.” (Marcos 10:17-21) No maipapan kadagiti indibidual a sinuruan ni Jesus idiay Betania, kastoy ti mabasatayo: “Ni Jesus inayatna ni Marta ken ti kabsatna a babai ken ni Lazaro.” (Juan 11:1, 5) Maseknan unay ni Jesus kadagiti tattao nga uray la saanen a naginana tapno makasabaanna laeng ida. (Marcos 6:30-34) Ti kasta a nasged ken naayat a pannakaseknan kadagiti tattao ti namagbalin ken Jesus nga ad-adda nga epektibo a mangiturong kadagiti tattao iti pudno a panagdayaw.
9. Ania ti kababalin ni Pablo kas managaramid iti adalan?
9 Ni apostol Pablo ket addaan met iti nasged a pannakaseknan kadagiti kinasabaanna. Kas pagarigan, kastoy ti kinunana kadagidiay nagbalin a Kristiano idiay Tesalonica: “Yantangay adda kinalailomi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdungnguenmi.” Gapu iti naayat a panagregget ni Pablo, adda dadduma idiay Tesalonica a ‘bimmaw-ing manipud kadagiti idoloda tapno agpaadipenda iti sibibiag ken pudno a Dios.’ (1 Tesalonica 1:9; 2:8) No addaantayo iti pudno a pannakaseknan kadagiti tattao a kas kada Jesus ken Pablo, agrag-otayo met ta makitatayo a ti naimbag a damag ket tagipatgen “dagidiay siuumiso nga agannayas iti agnanayon a biag.”—Aramid 13:48.
Agsakripisioka
10, 11. Apay a napateg ti kinamanagsakripisio iti panangikagumaantayo a mangaramid kadagiti adalan?
10 Managsakripisio dagiti Kristiano nga epektibo iti panagaramid iti adalan. Sigurado a dida matmatan a ti panagpabaknang ti kapatgan iti biag. Kinapudnona, kinuna ni Jesus kadagiti adalanna: “Anian a nakarigrigatto a banag kadagidiay addaan kuarta ti sumrek iti pagarian ti Dios!” Nasdaaw dagiti adalan iti dayta nga imbagana, ngem innayon ni Jesus: “Annak, anian a nakarigrigat a banag ti sumrek iti pagarian ti Dios! Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios.” (Marcos 10:23-25) Kinuna ni Jesus a pasimplien koma dagiti pasurotna ti panagbiagda tapno maipamaysada ti agaramid iti adalan. (Mateo 6:22-24, 33) Apay a ti kinamanagsakripisio ket makatulong kadatayo nga agaramid adalan?
11 Dakkel a panagregget ti kasapulan iti panangisuro kadagiti amin nga imbilin ni Jesus. Kaaduanna, ti maysa a Kristiano nga agtarigagay a mangaramid iti adalan ikagumaanna a linawas nga iyadalan iti Biblia ti maysa nga interesado. Tapno ad-adu ti gundawayda a makasarak kadagiti napasnek a tattao, dadduma a manangiwaragawag iti Pagarian kinissayanda ti oras ti panagtrabahoda iti sekular. Rinibu a Kristiano ti nagadal iti sabali a lenguahe tapno makasabaanda dagiti dida kailian. Adda met dagidiay managaramid iti adalan a nagnaed iti sabali a lugar wenno pagilian tapno ad-adda a masuportaranda ti panagani. (Mateo 9:37, 38) Nasken ti panagsakripisio tapno maaramidan amin dagita. Ngem adda pay kasapulan tapno agbalintayo nga epektibo iti panagaramid iti adalan.
Agan-anuska Ngem Dimo Sayangen ti Tiempo
12, 13. Apay a nakapatpateg ti kinaanus iti panagaramid kadagiti adalan?
12 Ti kinaanus ket sabali pay a galad a makatulong kadatayo nga agaramid iti adalan. Masapul a sigaganat nga idanontayo ti Nakristianuan a mensahetayo, ngem ti panagaramid iti adalan ket kaaduanna nga agkasapulan iti tiempo ken panaganus. (1 Corinto 7:29) Inan-anusan ni Jesus ti kabsatna iti ina a ni Santiago. Agparang a pamiliar ni Santiago iti panangaskasaba ni Jesus, ngem iti sumagmamano a tiempo, adda nakalapped kenkuana nga agbalin nga adalan. (Juan 7:5) Ngem iti ababa a tiempo manipud ipapatay ni Kristo agingga idi Pentecostes 33 K.P., ni Santiago ket nabatad a nagbalin nga adalan, agsipud ta ipasimudaag dagiti Kasuratan nga isu ket nakikaykaysa iti panagkararag a kadua ni nanangna, dagiti kakabsatna ken dagiti apostol. (Aramid 1:13, 14) Pinarang-ay ni Santiago ti espiritualidadna isu nga idi agangay, imbaklayna dagiti nadagsen a responsabilidad iti kongregasion Kristiano.—Aramid 15:13; 1 Corinto 15:7.
13 Kas kadagiti mannalon, agmulmula dagiti Kristiano kadagiti banag a saan a nalaka a patanoren—kas iti pannakaawat iti Sao ti Dios, panagayat ken Jehova, ken Nakristianuan a kababalin. Kasapulan ti panaganus. Insurat ni Santiago: “Watwatenyo ti kinaanus, kakabsat, agingga iti kaadda ti Apo. Adtoy! Ti mannalon agtultuloy nga agur-uray iti napateg a bunga ti daga, a watwatwatenna ti kinaanus iti dayta agingga a magun-odna ti nasapa a tudo ken ti naladaw a tudo. Watwatenyo met ti kinaanus; patibkerenyo ti puspusoyo, agsipud ta ti kaadda ti Apo ket immasidegen.” (Santiago 5:7, 8) Idagdagadag ni Santiago kadagiti kapammatianna a ‘watwatenda ti kinaanus agingga iti kaadda ti Apo.’ No adda banag a saan a maawatan dagiti adalan, siaanus nga inlawlawag dayta ni Jesus wenno nagusar kadagiti pangngarig. (Mateo 13:10-23; Lucas 19:11; 21:7; Aramid 1:6-8) Ita ta addan ti Apo, kasapulantay met ti panaganus bayat nga ikagkagumaantayo ti agaramid iti adalan. Masapul a naanustayo a mangisuro kadagidiay agbalin a pasurot ni Jesus iti kaaldawantayo.—Juan 14:9.
14. Nupay naanustayo, kasanotayo a nainsiriban a mausar ti tiempotayo kas managaramid iti adalan?
14 Nupay naanustayo, ti Sao ket saan a makapataud iti bungana iti kaaduan nga iyad-adalantayo iti Biblia. (Mateo 13:18-23) Isu a kalpasan a nangaramidtayo iti rasonable a panangikagumaan a tulongan ida, nainsiriban nga isardengtayon ti mangbusbos iti tiempo kadagiti kasta a tattao ket agbiroktayo kadagiti ad-adda a mangipapuso iti kinapudno ti Biblia. (Eclesiastes 3:1, 6) Siempre, uray dagidiay mangipapuso iti ad-adalenda mabalin a kasapulanda pay ti kanayonan a tulong tapno mabalbaliwanda ti panangmatmat, kababalin ken prioridadda iti biag. Isu nga agan-anustayo koma a kas ken Jesus a nangan-anus kadagiti adalanna nga agkasapulan idi iti ad-adu a tiempo tapno mapatanorda ti umiso a kababalin.—Marcos 9:33-37; 10:35-45.
Parang-ayem ti Arte ti Panangisurom
15, 16. Iti panagaramid iti adalan, apay a napateg ti kinasimple ken panagsagana a naimbag?
15 Ti panagayat iti Dios, pannakaseknan kadagiti tattao, kinamanagsakripisio ken kinaanus ket napateg iti naballigi a panagaramid iti adalan. Kasapulantay met a parang-ayen ti abilidadtayo a mangisuro tapno mailawlawagtayo dagiti bambanag iti nabatad ken simple a wagas. Kas pagarigan, epektibo ti adu nga imbaga ti Naindaklan a Mannursuro a ni Jesu-Kristo gapu iti kinasimple dagita. Nalabit a malagipyo dagiti imbaga ni Jesus a kas kadagitoy: “Agurnongkayo maipaay iti bagbagiyo kadagiti gameng idiay langit.” “Dikay ited kadagiti aso no ania ti nasantuan.” “Ti kinasirib mapaneknekan a nalinteg babaen iti ar-aramidna.” “Ibayadyo ken Cesar ti bambanag ni Cesar, ngem iti Dios ti bambanag ti Dios.” (Mateo 6:20; 7:6; 11:19; 22:21) Siempre, saan la nga ababa dagiti sinao ni Jesus. Nalawag ti panangisurona ken ilawlawagna dagiti bambanag no kasapulan. Kasanom a matulad ti pamay-an ni Jesus a mangisuro?
16 Ti panagsagana a naimbag ti kangrunaan a kasapulan tapno makaisurotayo iti simple ken nalawag a wagas. Kaaduanna nga adu ti masao ti di nakasagana nga agibumbunannag. Mabalin a saanna a mapagminar dagiti kangrunaan a punto gapu iti kinaadu ti masaona, a saritaenna ti amin nga ammona maipapan iti maysa a topiko. Maisupadi iti dayta, ti nakasagana nga agibumbunannag ikabilanganna ti maipapan iti tao nga iyad-adalanna, utobenna ti topiko, ken ilawlawagna no ania laeng ti kasapulan. (Proverbio 15:28; 1 Corinto 2:1, 2) Utobenna ti kauneg ti pannakaammo ti iyad-adalanna ken no ania dagiti punto a nasken a maipaganetget kabayatan ti panagadal. Mabalin nga adu ti ammo ti agibumbunannag a makapainteres a detalye maipapan iti topiko, ngem ikkatenna dagiti di kasapulan nga impormasion tapno saan a matikaw ti iyad-adalanna.
17. Kasanotay a matulongan dagiti tattao a makirinnason manipud iti Kasuratan?
17 Imbes a basta nangipaay lattan iti impormasion, tinulongan pay ni Jesus dagiti tattao nga agrason. Kas pagarigan, adda idi tiempo nga inyimtuodna: “Ania ti pagarupmo, Simon? Manipud kadagiti siasino a ti ar-ari ditoy daga umawatda kadagiti impuesto wenno panguluen a buis? Manipud iti annakda wenno manipud kadagiti ganggannaet?” (Mateo 17:25) Mabalin a magusgustuantayo nga ilawlawag ti linaon ti Biblia ngem nasken a kanayon nga agteppeltayo tapno maaddaan ti iyad-adalantayo iti gundaway nga agkomento maipapan iti maad-adal. Siempre, rumbeng a ditay gabsuonan ti maysa a tao iti adu a saludsod. Imbes ketdi, babaen ti kinataktika, nasayaat nga ilustrasion ken naisagana a naimbag a salsaludsod, matulongantay ida a mangtarus kadagiti Nainkasuratan a punto kadagiti naibatay-Biblia a publikasiontayo.
18. Ania ti nairaman iti “arte ti panangisuro”?
18 Dakamaten ti Kasuratan ti maipapan iti “arte ti panangisuro.” (2 Timoteo 4:2; Tito 1:9) Ti kasta nga abilidad iti panangisuro ket saanna la a ramanen ti panangtulong iti maysa nga agbalin a pamiliar kadagiti impormasion. Ikagumaantayo koma a tulongan ti iyad-adalantayo a mangtarus iti nagdumaan ti kinapudno ken kinaulbod, naimbag ken dakes, kinasirib ken kinamaag. (Mateo 6:5, 6) Bayat nga ar-aramidentayo dayta ken ikagkagumaantayo nga itukit ti panagayat ken Jehova iti puso ti maysa a tao, mabalin a maawatanna no apay a rumbeng nga agtulnog Kenkuana.
Sireregta a Makipasetka iti Panagaramid iti Adalan
19. Kasano a makatulong ti amin a Kristiano iti trabaho a panagaramid iti adalan?
19 Ti kongregasion Kristiano ket maysa nga organisasion nga agar-aramid iti adalan. No agbalin nga adalan ti maysa nga interesado, ti agragsak ket saan laeng a ti Saksi ni Jehova a nakasarak ken timmulong kenkuana a mangadal iti isursuro ti Biblia. No mangorganisar dagiti tattao iti maysa a grupo a mangsapul iti napukaw nga ubing, mabalin a maysa laeng a kameng dayta a grupo ti aktual a makasarak iti dayta nga ubing. Ngem inton ti ubing ket maisublin kadagiti dadakkelna, agrag-o ti amin a nakipaset iti panagsapul. (Lucas 15:6, 7) Umasping iti dayta, ti intero a kongregasion ket paset iti panagaramid adalan. Amin a Kristiano ket makipaset iti panangsapul kadagidiay manamnama nga agbalin nga adalan ni Jesus. Ket no ti maysa ket mangrugin a tumabuno kadagiti gimong iti Kingdom Hall, amin a Kristiano a nakigimong ket tumulong kenkuana a mangpabileg iti panangipategna iti pudno a panagdayaw. (1 Corinto 14:24, 25) No kasta, makapagrag-o ti amin a Kristiano gapu iti ginasut a ribu nga agbalbalin a baro nga adalan iti kada tawen.
20. Ania ti rumbeng nga aramidem no kayatmo nga isuro ti kinapudno a nailanad iti Biblia?
20 Maragsakan ti adu a matalek a Kristiano a mangisuro iti maysa a tao maipapan ken Jehova ken iti pudno a panagdayaw. Ngem iti laksid ti kasta unay a panagreggetda, mabalin a saanda a maaramid dayta. No kasta ti kasasaadmo, itultuloymo a pabilgen ti panagayatmo ken Jehova, agbalinka a maseknan kadagiti tattao, agbalinka a managsakripisio, agan-anuska, ken parang-ayem dagiti abilidad iti panangisuro. Kangrunaan iti amin, ikararagmo ti tarigagaymo a mangisuro iti kinapudno. (Eclesiastes 11:1) Maliwliwaka koma iti pannakaammo nga amin nga ar-aramidem iti panagserbi ken Jehova ket adda maitulongna iti trabaho a panagaramid iti adalan a pakaidayawan ti Dios.
Mailawlawagmo Kadi?
• Apay a ti panagaramid iti adalan subokenna ti panagayattayo iti Dios?
• Ania dagiti galad a kasapulan dagiti managaramid iti adalan?
• Ania ti nairaman iti “arte ti panangisuro”?
[Ladawan iti panid 21]
Ipakpakita dagiti Kristiano ti nasged a panagayatda iti Dios babaen ti panagaramidda kadagiti adalan
[Ladawan iti panid 23]
Apay a dagiti agar-agaramid adalan rumbeng a maseknanda iti sabsabali?
[Ladawan iti panid 24]
Ania ti dadduma kadagiti galad a kasapulan dagiti agar-aramid iti adalan?
[Ladawan iti panid 25]
Amin a Kristiano ket maragsakan a makakita kadagiti nagsayaat a resulta ti panagaramid iti adalan