“Itultuloymo nga Aluadan ti Ministerio nga Inawatmo iti Apo”
“Itultuloymo nga aluadan ti ministerio nga inawatmo iti Apo, a tungpalem dayta.”—COL. 4:17.
1, 2. Ania ti obligasion dagiti Kristiano kadagiti tattao?
DAKKEL ti obligasiontayo kadagiti tattao. Agpannuray kadagiti aramidenda ita no makalasatda iti “dakkel a rigat” wenno saan. (Apoc. 7:14) Kinuna ti napaltiingan a mannurat iti Proverbio: “Ispalem dagidiay maipampanaw nga agturong ken patay; ket dagidiay agbarbariring nga agturong iti pannakagudas, O igawidmo koma ida.” Nadagsen dagita a sasao! Sungsungbatantayo ti darada no saantayo nga itungpal ti obligasiontayo a mangpakdaar kadakuada. Kinapudnona, kuna met la dayta a teksto: “No kas pagarigan kunaem: ‘Adtoy! Saanmi a naammuan daytoy,’ saanto aya a mailasin dayta daydiay mangtingtingiting kadagiti puso, ken maammuan daydiay mangsalsalimetmet iti kararuam ket pudno unay a supapakanna ti naindagaan a tao sigun iti aramidna?” Nalawag a saan a mabalin nga irason dagiti adipen ni Jehova a ‘saanda nga ammo’ ti peggad a pakaipasanguan dagiti tattao.—Prov. 24:11, 12.
2 Napateg ken Jehova ti biag. Idagdagadagna kadagiti adipenna nga aramidenda ti amin a kabaelanda tapno maispal ti adu a tattao. Tunggal ministro ti Dios rumbeng nga ipakaammona ti mangispal-biag a mensahe ti Sao ti Dios. Mayarig ti annongentayo iti maysa a managwanawan a mangikallangogan iti pakdaar no adda makitana nga um-umay a peggad. Ditay kayat nga adda sungsungbatantayo mainaig iti dara dagidiay agpegpeggad a madadael. (Ezeq. 33:1-7) Napateg ngarud nga itultuloytayo a sipipinget nga ‘ikasaba ti sao’!—Basaenyo ti 2 Timoteo 4:1, 2, 5.
3. Ania ti maadal iti daytoy nga artikulo ken iti dua a sumaganad pay?
3 Usigen daytoy nga artikulo no kasanoyo a madaeran dagiti lapped iti mangispal-biag a ministerio ken no kasanoyo a matulongan ti ad-adu pay a tattao. Usigen ti sumaganad nga artikulo no kasanoyo a mapasayaat ti arte ti panangisuro kadagiti agkakapateg a kinapudno. Ipakita ti maikatlo nga artikulo ti sumagmamano a makaparegta a resulta ti sangalubongan a pannakaikasaba ti Pagarian. Ngem sakbayna, nasayaat a repasuentayo no apay a nakapegpeggad ti tiempotayo.
No Apay nga Adu ti Awanan iti Namnama
4, 5. Ania ti mapaspasaran ti sangatauan, ken ania ti reaksion dagiti tattao?
4 Ipakita dagiti pasamak iti lubong nga agbibiagtayo iti “panungpalan ti sistema ti bambanag” ken nakaas-asidegen ti pannakadadael ti lubong ni Satanas. Mapaspasaran itan ti sangatauan dagiti pasamak ken kasasaad a tinukoy ni Jesus ken dagiti adalanna a mangtanda “kadagiti maudi nga aldaw.” “Dagiti ut-ot ti panagrigat,” agraman dagiti gubat, kinakirang ti taraon, ginggined, ken dadduma pay a kalamidad, parparigatenda ti sangatauan. Nasaknap ti kinadakes, kinaagum, ken di panangikankano iti Dios. Isu nga uray kadagiti tattao a mangikagkagumaan nga agbiag a maitunos kadagiti pagannurotan ti Biblia, agbibiagda ita kadagiti “napeggad a tiempo a narigat a pakilangenan.”—Mat. 24:3, 6-8, 12; 2 Tim. 3:1-5.
5 Ngem saan nga ammo ti kaaduan a tattao ti kaipapanan dagiti pasamak iti lubong. Gapuna, adu ti madanagan iti kinatalged ti biagda ken ti pamiliada. Adu ti malmaldaangan gapu iti ipapatay ti maysa nga ing-ingungoten wenno dadduma pay a trahedia. Gapu ta saanda nga ammo ti pudno a kaipapanan dagiti pasamak ken no ania ti solusion dagitoy, awan ti makita dagiti tattao a namnama.—Efe. 2:12.
6. Apay a saan a natulongan ti “Babilonia a Dakkel” dagiti pasurotna?
6 Ti “Babilonia a Dakkel,” ti sangalubongan nga imperio ti palso a relihion, bassit laeng ti impaayna a liwliwa iti sangatauan. Iti kasumbangirna, nakaad-adu ti inallilawna iti naespirituan a pamay-an babaen ti “arak ti pannakiabigna.” Kas maysa a balangkantis, ginargari ken inturayan pay ti palso a relihion dagiti “ar-ari ti daga,” nga inusarda dagiti palso a sursuro ken espiritistiko nga ar-aramid tapno agtultuloy nga agtalek dagiti tattao kadagiti napolitikaan a liderda. Iti kasta, nagbalin a nabileg ken naimpluensia ti palso a relihion, ngem naan-anay met a tinallikudanna ti kinapudno.—Apoc. 17:1, 2, 5; 18:23.
7. Ania ti mapasamakto iti kaaduan a tattao, ngem kasano a matulongantayo ti dadduma?
7 Kinuna ni Jesus a kaaduan a tattao ti magmagna iti nalawa a dalan nga agturong iti pannakadadael. (Mat. 7:13, 14) Dadduma ti magmagna iti dayta a dalan gapu ta pinilida nga ilaksid dagiti pannursuro ti Biblia, ngem adu met ti magmagna iti dayta gapu ta naallilawda, wenno saan pay a nalawag kadakuada no ania ti makaay-ayo ken Jehova. Mabalin a balbaliwan ti dadduma ti kabibiagda mientras a mailawlawag kadakuada dagiti ibaga ti Biblia a rumbeng nga aramidenda. Ngem saan a maispal inton “dakkel a rigat” dagidiay agtalinaed iti Babilonia a Dakkel ken mangilaksid kadagiti pagalagadan ti Biblia.—Apoc. 7:14.
Itultuloytayo ti Mangasaba
8, 9. Ania ti inaramid dagiti Kristiano idi umuna a siglo idi naipasangoda iti ibubusor, ken apay?
8 Kinuna ni Jesus nga ikasaba dagiti adalanna ti naimbag a damag ti Pagarian ken mangaramidda kadagiti adalan. (Mat. 28:19, 20) Gapuna, ti pannakiramanda iti panangasaba ket ibilang dagiti pudno a Kristiano a panangipakita iti kinasungdoda iti Dios ken napateg a paset ti pammatida. Dayta ti makagapu a nagtultuloy a nangasaba dagiti immuna a pasurot ni Jesus iti laksid ti ibubusor. Nagpannurayda ken Jehova, nga inkararagda a tulonganna ida nga agtultuloy a mangipakaammo iti ‘saona buyogen ti isuamin a kinatured.’ Kas sungbat, imparukpok ni Jehova ti nasantuan nga espirituna isu a situtured a naipakaammoda ti sao ti Dios.—Ara. 4:18, 29, 31.
9 Idi kimmaro ti ibubusor, insardeng kadi dagiti pasurot ni Jesus nga inkasaba ti naimbag a damag? Saan. Dagiti Judio a lider ti relihion ti nangaresto, nangipangta, ken nangkabkabil kadagiti apostol gapu ta marurodda iti panangasaba dagitoy. Kaskasdi, ‘nagtultuloy dagiti apostol a nangisuro ken nangideklara iti naimbag a damag maipapan iti Kristo, a ni Jesus.’ Nalawag a natarusanda a masapul nga ‘agtulnogda iti Dios kas agturay imbes a kadagiti tattao.’—Ara. 5:28, 29, 40-42.
10. Ania dagiti suot a mapaspasaran dagiti Kristiano ita, ngem ania ti resulta ti nasayaat a konduktada?
10 Kaaduan kadagiti adipen ti Dios ita ti saan a naglak-am iti pannakakabkabil wenno pannakaibalud gapu iti panangasaba. Ngem maipaspasango ti amin a pudno a Kristiano iti nagduduma a pannubok ken pakasuotan. Kas pagarigan, gapu iti konsiensiayo a sinanay ti Biblia, mabalin nga aramidenyo ti maysa a banag a saan nga ar-aramiden ti kaaduan wenno mamagbalin kadakayo a naiduma. Mabalin nga ibilangdakayo a karkarna dagiti katrabahuan, kaklase, wenno kaarrubayo gapu ta ibatayyo dagiti pangngeddengyo kadagiti prinsipio ti Biblia. Nupay kasta, dikay koma paupay kadagiti negatibo a reaksionda. Adda ti lubong iti naespirituan a kinasipnget, isu a masapul a dagiti Kristiano “[agsilnagda] kas silsilaw.” (Fil. 2:15) Nalabit a ti dadduma a napasnek nga agpalpaliiw makitada ken maapresiarda ti nasayaat nga aramidyo ket dayawenda ni Jehova.—Basaenyo ti Mateo 5:16.
11. (a) Ania ti mabalin a reaksion ti dadduma a tattao iti panangasabatayo? (b) Ania nga ibubusor ti napasaran ni apostol Pablo, ken ania ti reaksionna?
11 Kasapulantayo ti tured tapno maitultuloytayo a maikasaba ti mensahe ti Pagarian. Adda dagiti tattao, uray kabagianyo, a manglais wenno mangupay kadakayo iti nadumaduma a pamay-an. (Mat. 10:36) Namin-adu a nakabkabil ni apostol Pablo gapu ta simamatalek nga intungpalna ti ministeriona. Imutektekanyo ti reaksionna kadagita nga ibubusor: “Kalpasan nga immuna a nagsagabakami ken sikukuspag a natrato,” insuratna, “nagurnongkami iti kinatured babaen iti Diostayo tapno sawenmi kadakayo ti naimbag a damag ti Dios buyogen ti kasta unay a pannakidangadang.” (1 Tes. 2:2) Sigurado a maysa a karit ti panagtultuloy ni Pablo a mangipakaammo iti naimbag a damag kalpasan ti pannakatiliw, pannakaray-ab ti kawesna, pannakakabkabil, ken pannakaibaludna. (Ara. 16:19-24) Apay a situtured a nakapagtultuloy? Gapu iti nasged a tarigagayna a mangitungpal iti inted-Dios nga annongenna a mangasaba.—1 Cor. 9:16.
12, 13. Ania dagiti karit a pakaipaspasanguan ti dadduma, ken kasano nga ikagkagumaanda a daeran dagita?
12 Maysa met a karit ti panangtaginayon iti regtatayo a mangasaba kadagiti teritoria a manmano ti madanontayo a bumalay wenno manmano ti dumngeg iti mensahe ti Pagarian. Ania ti aramidentayo kadagita a kasasaad? Makatulong no situtured a mangasabatayo iti di pormal. Balbaliwantayo met ti eskediultayo wenno mangbusbostayo iti ad-adu a tiempo a mangasaba kadagiti lugar nga ad-adu ti makasaritatayo.—Idiligyo iti Juan 4:7-15; Ara. 16:13; 17:17.
13 Ti panaglakay, panagbaket, ken panagkapuy ti salun-at mabalin met a limitaranda ti maaramidan ti adu a kakabsat mainaig iti trabaho a panangasaba. Dikay maupay no kasta ti mapaspasaranyo. Pagaammo ni Jehova dagiti limitasionyo ken ipatpategna no ania ti magapuananyo. (Basaenyo ti 2 Corinto 8:12.) Aniaman a pakarigatan ti pakaipaspasanguanyo—ibubusor, panangyaleng-aleng, wenno sakit—aramidenyo ti amin a kabaelanyo a mangiranud iti naimbag a damag.—Prov. 3:27; idiligyo ti Mar. 12:41-44.
‘Itultuloymo nga Aluadan ti Ministeriom’
14. Ania ti inyulidan ni apostol Pablo kadagiti padana a Kristiano, ken ania ti imbalakadna?
14 Sipapasnek nga intungpal ni apostol Pablo ti ministeriona, ken pinaregtana dagiti kapammatianna nga aramidenda met ti kasta. (Ara. 20:20, 21; 1 Cor. 11:1) Ti maysa kadagiti impaayan ni Pablo iti naisangsangayan a pammaregta ket ni Arquipo, maysa a Kristiano idi umuna a siglo. Iti suratna kadagiti taga-Colosas, kinuna ni Pablo: “Ibagayo ken ni Arquipo: ‘Itultuloymo nga aluadan ti ministerio nga inawatmo iti Apo, a tungpalem dayta.’” (Col. 4:17) Ditay am-ammo ni Arquipo wenno no ania ti kasasaadna, ngem agparang nga inawatna ti annongenna a mangasaba. No maysaka a dedikado a Kristiano, adda met annongem a mangasaba. Itultuloymo kadi a saluadan ti ministeriom tapno maitungpalmo dayta?
15. Ania ti kaipapanan ti panagdedikar ti maysa a Kristiano, a mangpataud kadagiti ania a saludsod?
15 Sakbay a nagpabautisartayo, indedikartayo ti biagtayo ken Jehova babaen ti naimpusuan a kararag. Kaipapanan daytoy a determinadotayo a mangaramid iti pagayatanna. Imtuodentayo ti bagitayo, ‘Ti kadi panangaramid iti pagayatan ti Dios ti talaga a kapatgan iti biagko?’ Mabalin nga addaantayo iti nagduduma nga annongen a namnamaen ni Jehova nga ibaklaytayo—kas iti panangipaay iti kasapulan ti pamiliatayo. (1 Tim. 5:8) Ngem kasanotayo nga us-usaren ti dadduma a tiempo ken pigsatayo? Ania dagiti ipangpangrunatayo?—Basaenyo ti 2 Corinto 5:14, 15.
16, 17. Ania dagiti oportunidad a mabalin nga ikabilangan dagiti agtutubo a Kristiano wenno dagidiay bassit ti obligasionda?
16 Maysaka kadi nga agtutubo a dedikado a Kristiano a nagturpos wenno dandanin agturpos nga ageskuela? Mabalin nga awan pay ti dakkel nga obligasionmo iti pamiliayo. Gapuna, ania ti aramidem iti biagmo? Ania ti kasayaatan nga aramidem tapno maitungpalmo ti karim a mangaramid iti pagayatan ni Jehova? Adu ti nangyurnos iti eskediulda tapno makapagpayunirda, ket ap-apitenda itan ti dakkel a rag-o ken pannakapnek.—Sal. 110:3; Ecl. 12:1.
17 Nalabit maysaka nga agkabannuag. Agtartrabahoka iti amin-tiempo ngem nalabit ti bagim la ti supsuportaram. Awan duadua a maragsakanka a makiramraman kadagiti aktibidad ti kongregasion agingga iti ipalubos ti eskediulmo. Ngem kayatmo kadi ti agbalin a naragragsak pay? Pinampanunotmo kadin a palawaen ti ministeriom? (Sal. 34:8; Prov. 10:22) Iti dadduma a teritoria, adu pay ti kasapulan tapno maidanon ti mangted-biag a mensahe ti kinapudno. Mabalinmo kadi ti mangaramid iti panagbalbaliw tapno makapagserbika kadagiti lugar nga agkasapulan iti ad-adu nga agibumbunannag iti Pagarian?—Basaenyo ti 1 Timoteo 6:6-8.
18. Ania a panagbalbaliw ti inaramid ti maysa nga agtutubo a pagassawaan, ken ania ti nagbanaganna?
18 Usigentayo ti ulidan da Kevin ken Elena, manipud iti Estados Unidos.a Kas kadagiti agtutubo a kakaskasar iti lugarda, mariknada a kasapulanda ti gumatang iti balay. Agpadada nga agtartrabaho iti amin-tiempo ken kabaelanda a taginayonen ti nanam-ay a panagbiag. Ngem gapu iti trabahoda iti sekular ken iti pagtaengan, bassit laengen ti panawenda iti ministerio. Naamirisda a naipamaysa kadagiti sanikuada ti dandani amin a tiempo ken pigsada. Ngem idi napaliiwda ti simple a panagbiag ti maysa a naragsak a pagassawaan a payunir, inkeddeng da Kevin ken Elena a baliwan ti nakaisentruan ti biagda. Kalpasan nga inkararagda ti panangiwanwan ni Jehova, inlakoda ti balayda ket immakarda iti maysa nga apartment. Kinissayan ni Elena ti oras ti panagtrabahona ket nagpayunir. Gapu ta naparegta kadagiti kapadasan ni baketna, nagikkat ni Kevin iti amin-tiempo a trabahona ket nagpayunir met. Idi agangay, immakarda iti Abagatan nga Amerika tapno agserbida iti lugar nga agkasapulan iti ad-adu nga agibumbunannag iti Pagarian. “Naragsak ti panagasawami,” kuna ni Kevin, “ngem adayo a naragragsak ti biagmi ita gapu iti panangragpatmi kadagiti naespirituan a kalat.”—Basaenyo ti Mateo 6:19-22.
19, 20. Apay a ti panangikasaba iti naimbag a damag ti kapatgan a trabaho ita?
19 Ti panangikasaba iti naimbag a damag ti kapatgan a trabaho ita ditoy daga. (Apoc. 14:6, 7) Tumulong dayta a mangsantipikar iti nagan ni Jehova. (Mat. 6:9) Ti mensahe ti Biblia pasayaatenna ti biag ti rinibu a mangipangpangag iti dayta iti kada tawen, ken mangituggod daytoy iti pannakaisalakanda. Kaskasdi, “kasano ti pannakangngegdanto no awan ti mangasaba?” inyimtuod ni apostol Pablo. (Roma 10:14, 15) No kasta, apay a dimo ikagumaan nga aramiden ti amin a kabaelam a mangitungpal iti ministeriom?
20 Ti panangpasayaat iti arte ti panangisurotayo ti maysa pay a pamay-an tapno matulongantayo dagiti tattao a mangtarus no apay a napeggad ti panawentayo ken no ania ti ibunga dagiti pangngeddeng nga aramidenda. Mausig iti sumaganad nga artikulo no kasanoyo a maaramidan dayta.
[Footnote]
a Nabaliwan dagiti nagan.
Ania ti Sungbatyo?
• Ania ti obligasion dagiti Kristiano kadagiti tattao?
• Kasanotayo a madaeran dagiti lapped iti panangasabatayo?
• Kasano a maitungpaltayo ti inawattayo a ministerio?
[Ladawan iti panid 5]
Kasapulan ti tured a mangasaba no maipasangotayo iti ibubusor
[Ladawan iti panid 7]
Ania ti mabalinyo nga aramiden no manmano a madanonyo dagiti bumalay iti teritoriayo?