Umadanika iti Dios
Maysa a Pastor a Maseknan Kenka
‘NAPATEGAK ngata iti Dios?’ Dayta a saludsod ti nalabit simmiplot metten iti panunotmo. Adu kadatayo ti naipasangon kadagiti rigat ken parikut, ket pagduaduaantayo no dadduma no ti mapaspasamak kadatayo ket ammo met laeng ti Namarsua iti daytoy naglawaan nga uniberso. Nasken nga ammuentayo no napategtayo met laeng ken Jehova a Dios kas indibidual. Idi adda ditoy daga ni Jesus, ti kangrunaan a makaam-ammo iti Dios, isu ket nangipaay iti ilustrasion a mangipalgak iti makaparagsak a sungbat.
Kas panangidilig iti panangaywan ni Jehova iti panangaywan ti maysa a pastor kadagiti karnerona, kastoy ti kinuna ni Jesus: “No ti maysa a tao addaan sangagasut a karnero ket maysa kadakuada ti maiwawa, saannanto aya a panawan ti siam a pulo ket siam iti bambantay ket mapanna biroken daydiay maiwawwawa? Ket no mapasamak a masarakanna dayta, pudno unay nga ibagak kadakayo, pagrag-oanna nga ad-adda dayta ngem ti siam a pulo ket siam a di naiwawa. Kasta met a di matarigagayan a banag ken ni Amak nga adda sadi langit a mapukaw ti maysa kadagitoy a babassit.” (Mateo 18:12-14) Kitaentayo no kasano nga inladawan ditoy ni Jesus ti naasi a pannakaseknan ni Jehova iti tunggal maysa kadagiti agdaydayaw kenkuana.
Marikna ti pastor a responsabilidadna nga aywanan ti tunggal karnerona. No naiwawa ti maysa a karnero, ammona no asino kadakuada ti mapukpukaw. Ammona ti tunggal karnero sigun iti impanaganna iti dayta. (Juan 10:3) Saan nga aginana ti maseknan a pastor agingga a saan a naisubli iti arban ti mapukpukaw a karnero. Iti iruruarna tapno sapulenna ti mapukpukaw, saanna a baybay-an nga agpeggad ti 99 a nabati. Masansan nga agkukuyog dagiti pastor ket bay-anda nga agkakadua dagiti arbanda.a Isu a no mapan sapulen ti pastor ti maysa a napukaw a karnero, mabalin a temporario nga ipaaywanna ti arbanna kadagiti padana a pastor. Maragsakan unay ti pastor apaman a masarakanna a di naan-ano ti napukaw a karnero. Ibaklayna ti napabutngan nga animal sana isubli iti arban tapno natalged.—Lucas 15:5, 6.
Iti panangilawlawagna iti ilustrasion, kinuna ni Jesus a ti Dios saanna a kayat a “mapukaw ti maysa kadagitoy a babassit.” Sakbay dayta, impakdaar ni Jesus kadagiti adalanna a saanda nga itibkol ti “maysa kadagitoy a babassit nga addaan pammati” kenkuana. (Mateo 18:6) Ania ngarud ti masursurotayo maipapan ken Jehova babaen dayta nga ilustrasion ni Jesus? Isu ket maysa a Pastor a maseknan unay iti tunggal karnerona, agraman “kadagitoy a babassit”—dagidiay kasla saan unay a napateg iti panangmatmat ti lubong. Wen, iti imatang ti Dios, naisangsangayan ken napateg ti tunggal maysa kadagiti agdaydayaw kenkuana.
No tartarigagayam a maipanamnama kenka a napategka iti Dios, apay a dimo ammuen ti ad-adu pay maipapan iti Naindaklan a Pastor a ni Jehova a Dios ken no kasanoka nga agbalin a nasingsinged kenkuana? No aramidem dayta, maaddaanka iti kompiansa a kas ti adda ken apostol Pedro, nga awan duadua a nakangngeg a mismo iti ilustrasion ni Jesus maipapan iti napukaw a karnero. Insurat ni Pedro idi agangay: “Iyallatiwyo [iti Dios] ti isuamin a pakaringgoranyo, agsipud ta isu maseknan kadakayo.”—1 Pedro 5:7.
[Footnote]
a Saan a parikut no kasano nga ilasin ti tunggal pastor ti arbanna, yantangay mabigbig ti tunggal karnero ti timek ti agay-ayab a pastorna.—Juan 10:4.