Tulonganyo Dagidiay Naiwawa Manipud iti Arban

“Makipagrag-okayo kaniak, agsipud ta nasarakak ti karnerok a napukaw.”​—LUC. 15:6.

1. Kasano a pinaneknekan ni Jesus nga isu ket naayat a pastor?

NI Jesu-Kristo a bugbugtong nga Anak ni Jehova ket maawagan iti “naindaklan a pastor dagiti karnero.” (Heb. 13:20) Impadto dagiti Kasuratan ti iyaayna ken insuro dayta nga isu ket naisangsangayan a Pastor a nangsapul kadagiti “napukaw a karnero” iti Israel. (Mat. 2:1-6; 15:24) Kanayonanna, no kasano a ti literal a pastor ket nalabit isakripisiona ti biagna tapno masalakniban dagiti karnerona, natay ni Jesus kas pangsubbot a sakripisio agpaay kadagiti marakarnero a tattao a mangaprobetsar iti sakripisiona.​—Juan 10:11, 15; 1 Juan 2:1, 2.

2. Ania dagiti mabalin a makagapu a nagbalin nga inaktibo ti dadduma a Kristiano?

² Makapaladingit ta adda dadduma a kasla nangapresiar iti sakripisio ni Jesus ken indedikarda pay ti biagda iti Dios ngem saandan a makitimtimpuyog iti kongregasion Kristiano. Bimmaaw ti regtada ken nagbalindan nga inaktibo gapu nalabit iti pannakaupay, sakit, wenno dadduma pay a rason. Ngem nasken nga agsublida iti arban ti Dios ta babaen laeng iti dayta a masagrapda ti talna ken kinaragsak a dinakamat ni David iti maika-23 a Salmo. Kas pagarigan, inkantana: “Ni Jehova ti Pastorko. Saanakto nga agkurang iti aniaman.” (Sal. 23:1) Dagidiay adda iti arban ti Dios ket saanda nga agkurang iti aniaman a naespirituan a kasapulanda, ngem saan a kasta ti kasasaad dagidiay naiwawa a karnero. Asino dagiti makatulong kadakuada? Kasano a matulongan ida? Ania dagiti espesipiko a maaramidantayo tapno matulongantayo ida nga agsubli iti arban?

Asino Dagiti Makatulong?

3. Kasano nga impakita ni Jesus no ania ti kasapulan tapno maalaw dagiti napukaw a karnero iti pagpaaraban ti Dios?

³ Kasapulan ti napasnek a panagregget tapno maalaw ti karnero a naiwawa manipud iti pagpaaraban ti Dios. (Sal. 100:3) Inyilustrar ni Jesus dayta idi kinunana: “No ti maysa a tao addaan sangagasut a karnero ket maysa kadakuada ti maiwawa, saannanto aya a panawan ti siam a pulo ket siam iti bambantay ket mapanna biroken daydiay maiwawwawa? Ket no mapasamak a masarakanna dayta, pudno unay nga ibagak kadakayo, pagrag-oanna nga ad-adda dayta ngem ti siam a pulo ket siam a di naiwawa. Kasta met a di matarigagayan a banag ken ni Amak nga adda sadi langit a mapukaw ti maysa kadagitoy a babassit.” (Mat. 18:12-14) Asino ti makatulong kadagiti marakarnero a naiwawa manipud iti arban?

4, 5. Ania a kababalin ti nasken nga ipakita dagiti panglakayen iti arban ti Dios?

⁴ Tapno matulonganda dagiti naiwawa a karnero, masapul a laglagipen dagiti Kristiano a panglakayen a ti arban ti Dios ket kongregasion dagiti tattao a dedikado ken Jehova​—wen, maysa a napateg nga ‘arban iti pagpaaraban ti Dios.’ (Sal. 79:13) Kasapulan dagita a maipatpateg a karnero ti nadungngo a panangaywan. Kaipapanan dayta a dagiti naayat a pastor ket masapul nga addaanda iti personal a pannakaseknan kadakuada. Epektibo unay ti naayat a panangipastor kadakuada. Ti naayat a pammaregta ti pastor ti mabalin a mangpabileg iti espiritualidadda ken mangparegta kadakuada nga agsubli iti arban.​—1 Cor. 8:1.

⁵ Rebbengen dagiti pastor iti arban ti Dios a biroken dagiti naiwawa a karnero ket ikagumaanda ida a tulongan. Ni apostol Pablo impalagipna kadagiti Kristiano a panglakayen iti nagkauna nga Efeso ti responsabilidadda a mangipastor kadagiti karnero idi kinunana: “Asikasuenyo ti bagbagiyo ken ti isuamin nga arban, a kadakuada dinutokannakayo ti nasantuan nga espiritu kas manangaywan, tapno ipastoranyo ti kongregasion ti Dios, a ginatangna babaen ti dara ti bukodna nga Anak.” (Ara. 20:28) Umasping iti dayta, kastoy ti indagadag ni apostol Pedro kadagiti napulotan a panglakayen: “Ipastoranyo ti arban ti Dios nga adda iti aywanyo, saan a mapilpilit, no di ket situtulok; saan met nga iti panagayat iti nakusit a gunggona, no di ket sigagagar; saan met a kas agturay kadagidiay tawid ti Dios, no di ket agbalinkayo a pagulidanan ti arban.”​—1 Ped. 5:1-3.

6. Apay a nangnangruna a kasapulan ita dagiti karnero ti Dios ti panangaywan dagiti pastor?

⁶ Dagiti Kristiano a pastor masapul a tuladenda “ti nasayaat a pastor” a ni Jesus. (Juan 10:11) Impakitana ti kasta unay a pannakaseknanna kadagiti karnero ti Dios ken impaganetgetna ti kinapateg ti panangaywan kadakuada idi imbagana ken Simon Pedro: “Ipastoram dagiti babassit a karnerok.” (Basaen ti Juan 21:15-17.) Ti kasta a panangaywan ket nangnangruna a kasapulan dagiti karnero ita agsipud ta pakpakaruen ti Diablo dagiti panagreggetna a mangdadael iti kinatarnaw dagiti dedikado iti Dios. Gunggundawayan ni Satanas dagiti nainlasagan a pagkapuyan ken us-usarenna ti lubong iti panangikagumaanna a mangirubo kadagiti karnero ni Jehova kadagiti dakes nga aramid. (1 Juan 2:15-17; 5:19) Dagiti inaktibo ti kangrunaan nga agpegpeggad isu a kasapulanda ti tulong tapno mayaplikarda ti balakad a ‘magnada babaen ti espiritu.’ (Gal. 5:16-21, 25) Tapno matulongan dagita a karnero, napateg ti panangikararag iti tulong ti Dios, ti panangidalan ti nasantuan nga espirituna, ken ti nasigo a panangusar iti Biblia.​—Prov. 3:5, 6; Luc. 11:13; Heb. 4:12.

7. Kasano kapateg kadagiti panglakayen ti panangipastorda kadagiti marakarnero nga adda iti aywanda?

⁷ Iti nagkauna nga Israel, agusar idi ti maysa a pastor iti atiddog ken kurbado ti murdongna a baston tapno maidalanna ti arbanna. No agapon wenno rummuar dagiti karnero iti kulonganda, masapul a ‘lumasatda iti sirok ti baston’ tapno mabilang ida ti pastor. (Lev. 27:32; Mik. 2:12; 7:14) Ti maysa a Kristiano a pastor ket nasken met nga ammuenna a naimbag ti arban ti Dios ken ti kasasaad ti tunggal maysa. (Idilig ti Proverbio 27:23.) Ti ngarud panangipastor ket maysa kadagiti napateg a banag a pagsasaritaan ti bagi dagiti panglakayen. Ramanen dayta ti panagaramid kadagiti urnos tapno matulongan dagiti naiwawa a karnero. Kinuna a mismo ni Jehova a birokenna dagiti karnerona ket ipaayna kadakuada ti panangaywan a kasapulanda. (Ezeq. 34:11) Maragsakan ngarud ti Dios no mangaramid dagiti panglakayen iti umasping a panagregget a tumulong kadagiti naiwawa a karnero nga agsubli iti arban.

8. Kadagiti ania a wagas a makaipaay dagiti panglakayen iti personal nga asikaso kadagiti karnero?

⁸ No agsakit iti pisikal ti maysa a kabsat, maragsakan ken maparegta no sumarungkar kenkuana ti maysa a pastor ti arban ti Dios. Kasta met laeng ti marikna dagiti karnero a maipaayan iti personal a panangasikaso gapu iti panagsakitda iti naespirituan. Ti inaktibo ket mabalin nga ibasaan dagiti panglakayen kadagiti teksto iti Biblia, irepasoda ti maysa nga artikulo, ilawlawagda dagiti napateg a punto a naitampok iti maysa a gimong, ikararaganda, ken dadduma pay. Mabalin nga ibagada kenkuana a maragsakan ti dadduma pay a kameng ti kongregasion no makitada a makigimong manen. (2 Cor. 1:3-7; Sant. 5:13-15) Ti isasarungkar, panagtelepono, wenno panagsurat ket mabalin a makatulong unay! Ad-adda met nga agsagrap iti rag-o ti mannakipagrikna a panglakayen a personal a tumultulong kadagiti karnero nga awan iti arban.

Sangsangkamaysa a Panagregget

9, 10. Apay a makunam a saan laeng a dagiti panglakayen ti rumbeng a mangipakita iti pannakaseknan iti naiwawa a karnero?

⁹ Agbibiagtayo iti okupado ken napeggad a tiempo, isu a mabalin nga adda posibilidadna a ditay madmadlaw a ti maysa a kapammatiantayo ket umad-adayon manipud iti kongregasion. (Heb. 2:1) Nupay kasta, napateg ken Jehova dagiti karnerona. Napateg ti tunggal maysa kadakuada, a kas iti kinapateg ti tunggal paset ti bagi ti tao. Gapuna, amintayo ket nasken a mangipakita iti napudno a pannakaseknan ken panagsisinnakit iti maysa ken maysa. (1 Cor. 12:25) Addaanka kadi iti kasta a kababalin?

¹⁰ Nupay dagiti panglakayen ti mangidaulo iti panangbirok ken panangtulong kadagiti naiwawa a karnero, saan laeng nga isuda ti rumbeng a mangipakita iti pannakaseknan. Ti sabsabali ket mabalin a makitinnulong kadagitoy a pastor. Mabalin ken rumbeng a mangipaaytayo iti pammaregta ken naespirituan a tulong kadagiti naiwawa a kakabsat tapno makasublida iti arban. Kasano a maipaay ti kasta a tulong?

11, 12. Ania a naisangsangayan a gundaway ti mabalin a maipaay kenka tapno matulongam ti maysa nga inaktibo a kapammatiantayo?

¹¹ Iti dadduma a kasasaad, mabalin a kiddawen dagiti panglakayen kadagiti aduan kapadasanen nga agibumbunannag iti Pagarian nga iyadalanda iti Biblia dagiti inaktibo a nangibaga a kayatda ti agpatulong. Ti panggep dagiti kasta a panagregget ket tapno matulongan ida a mangisubli iti “ayat nga adda [kadakuada] idi damo.” (Apoc. 2:1, 4) Mabalin a maparegta ken mapabileg ti espiritualidad dagitoy a kapammatiantayo babaen ti panangirepaso kadakuada ti impormasion a mabalin a nakaikapisanda bayat ti kaawanda iti kongregasion.

¹² No kiddawen dagiti panglakayen nga iyadalam ti kapammatiam nga agkasapulan iti naespirituan a tulong, ikararagmo nga idalan ken bendisionan ni Jehova dagiti panagreggetmo. Wen, “iyadanim dagiti aramidmo ken Jehova a mismo ket dagiti gakatmo maipasdekto a sititibker.” (Prov. 16:3) Utobem dagiti teksto iti Biblia ken dagiti makapabileg iti pammati a punto a mabalin a pagsaritaanyo iti daydiay agkasapulan iti naespirituan a tulong. Usigem ti nagsayaat nga ulidan ni apostol Pablo. (Basaen ti Roma 1:11, 12.) Inil-iliw ni Pablo a makita dagiti kapammatianna idiay Roma tapno mairanudna kadakuada ti naespirituan a sagut a mabalin a mangpabileg kadakuada. Sinegseggaanna met ti panagpipinnaregtada. Saan kadi a rumbeng a kasta met ti mariknatayo no ikagkagumaantayo a tulongan dagiti marakarnero a naiwawa manipud iti arban ti Dios?

13. Ania dagiti mabalinyo a pagsaritaan iti maysa nga inaktibo?

¹³ Bayat ti panangyadalmo iti inaktibo, mabalin nga iyimtuodmo kenkuana, “Kasano a naammuam ti kinapudno?” Tulongam a manglagip iti rag-o a sagsagrapenna idi. Paregtaem a mangisalaysay kadagiti nararagsak a kapadasanna kadagiti gimong, panangasaba, ken kombension. Dakamatem met dagiti nararagsak a panagkaduayo idi iti panagserbi ken Jehova. Ibagam ti rag-o a masagsagrapmo iti iyaadanim ken Jehova. (Sant. 4:8) Iyebkasmo ti panangapresiarmo iti wagas ti panangipaay ti Dios kadagiti kasapulantayo kas ilina nangruna ti panangipaayna kadatayo iti liwliwa ken namnama kadagiti mapaspasarantayo a rigat.​—Roma 15:4; 2 Cor. 1:3, 4.

14, 15. Aniada a bendision a sagsagrapen idi dagiti inaktibo ti mabalin a makatulong no ipalagip kadakuada?

¹⁴ Posible unay a makagunggona no ipalagipmo iti inaktibo ti dadduma kadagiti bendision a tagtagiragsakenna idi gapu iti aktibo a pannakitimpuyogna iti kongregasion. Kas pagarigan, mabembendisionan idi gapu iti irarang-ayna iti pannakaammo iti Biblia ken pangpanggep ti Dios. (Prov. 4:18) Idi isu ket ‘magmagna babaen ti espiritu,’ awan duadua a nalaklakana a labanan dagiti sulisog nga agbasol. (Gal. 5:22-26) Kas resulta, naaddaan iti nadalus a konsiensia a nakatulong kenkuana nga umadani ken Jehova babaen iti kararag ken maaddaan iti ‘talna ti Dios a mangringbaw iti isuamin a panunot ken mangsaluad iti pusotayo ken kadagiti pannakabalin ti isiptayo.’ (Fil. 4:6, 7) Laglagipem dagita a punto, ipakitam ti napasnek a pannakaseknanmo, ken aramidem ti amin a kabaelam a siaayat a mangparegta iti dayta a kapammatiam tapno agsubli iti arban.​—Basaen ti Filipos 2:4.

¹⁵ No maysaka a panglakayen a madama a mangipaspastor iti maysa nga inaktibo a pagassawaan, mabalin a paregtaem ida a manglagip iti nariknada idi damoda a naammuan ti kinapudno manipud iti Sao ti Dios. Nabigbigda idi a nagsayaat, nainkalintegan, makapnek, ken mangwayawaya dayta a kinapudno! (Juan 8:32) Agyamyamanda idi naammuanda ti maipapan ken Jehova, iti ayatna, ken kadagiti nagsayaat a panggepna! (Idilig ti Lucas 24:32.) Ipalagipmo kadakuada a dagiti dedikado a Kristiano ket tagtagiragsakenda ti nasinged a relasion ken Jehova agraman ti naisangsangayan a pribilehio a panagkararag Kenkuana. Sipapasnek a paregtaem dagiti inaktibo a mangipangag manen iti “nadayag a naimbag a damag ti naragsak a Dios” a ni Jehova.​—1 Tim. 1:11.

Itultuloyyo nga Ipakitaan Ida iti Ayat

16. Mangdakamatkayo iti pagarigan a mangipakita a talaga nga epektibo dagiti panagregget a tumulong kadagiti inaktibo.

¹⁶ Talaga kadi nga epektibo dagita a singasing? Wen. Kas pagarigan, maysa a lalaki a nangrugi nga agserbi kas agibumbunannag idi agtawen iti 12 ti nagbalin nga inaktibo idi agtawen iti 15. Ngem idi agangay, nagbalin manen nga aktibo ket nasuroken a 30 a tawennan nga agserserbi iti amin-tiempo. Ti panangtulong kenkuana ti maysa a Kristiano a panglakayen ti kangrunaan a nakatignayanna nga agaktibo. Anian a yamanna iti naipaay kenkuana a naespirituan a tulong!

17, 18. Ania dagiti galad a makatulong kenka a tumulong iti maysa a naiwawa manipud iti arban ti Dios?

¹⁷ Ti ayat ti mangtigtignay kadagiti Kristiano a tumulong kadagiti inaktibo nga agsubli iti kongregasion. Kinuna ni Jesus kadagiti pasurotna: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:34, 35) Wen, ti ayat ti pakabigbigan dagiti pudno a Kristiano. Saan kadi a dayta nga ayat ti rumbeng a maipakita kadagiti bautisado a Kristiano a nagbalin nga inaktibo? Rumbeng laeng! Ngem no tultulongantayo ida, nasken nga ipakitatayo ti nadumaduma a Nakristianuan a galad.

¹⁸ Tapno matulongam ti maysa a naiwawa manipud iti arban ti Dios, aniada a galad ti nasken nga ipakitam? Malaksid iti ayat, mabalin a nasken nga ipakitam ti pannakipagrikna, kinaasi, kinaalumamay, ken mabayag a panagitured. Depende iti kasasaad, mabalin a nasken met nga agbalinka a manangpakawan. Insurat ni Pablo: “Kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”​—Col. 3:12-14.

19. Apay a makagunggona ti panagregget a tumulong kadagiti marakarnero tapno agsublida iti Nakristianuan nga arban?

¹⁹ Iti sumaganad a maadal nga artikulo iti daytoy a ruar, mausig dagiti makagapu no apay a maiwawa ti dadduma manipud iti arban ti Dios. Maammuantayo iti dayta no apay a manamnama dagidiay agsubli a maawatda manen. Bayat nga ad-adalem ti sumaganad nga artikulo ken ut-utobem daytoy, namnamaem a makagunggona ti aniaman nga ar-aramidem a panagregget a tumulong kadagiti marakarnero nga agsubli iti Nakristianuan nga arban. Iti agdama a sistema ti bambanag, adu a tattao ti mangus-usar iti intero a biagda nga agpabaknang, ngem ti biag ti maysa laeng a tao ket napatpateg nga amang ngem iti amin a kuarta ditoy lubong. Impaganetget dayta ni Jesus iti ilustrasionna maipapan iti napukaw a karnero. (Mat. 18:12-14) Sapay koma ta kanayon a sipapanunotka iti dayta bayat nga ikagkagumaam ken sigaganat a tultulongam dagiti patpatgen ni Jehova a naiwawa a marakarnero tapno agsublida iti arban.

Ania ti Sungbatmo?

• Ania ti responsabilidad dagiti Kristiano a pastor kadagiti marakarnero a naiwawa manipud iti arban?

• Kasano a matulongam dagiti inaktibo iti kongregasion?

• Aniada a galad ti mabalin a kasapulam tapno matulongam dagiti naiwawa manipud iti arban?

[Ladawan iti panid 10]

Siaayat nga ikagkagumaan dagiti Kristiano a pastor a tulongan dagidiay naiwawa manipud iti arban ti Dios