Agbalinka a Maysa Kadagiti Annak ti Dios

AGARUP 30 a tawen kalpasan ti Gubat dagiti Koreano, nangyussuat ti Korean Broadcasting System iti programa a tumulong kadagiti tattao a mangsapul kadagiti kapamiliada a napukaw sipud idi gubat. Ania ti resulta dayta? Nasurok a 11,000 a tattao ti naikaykaysa manen kadagiti ay-ayatenda iti biag​—buyogen ti lulua, sangit, ken arakup. Impadamag ti Korea Times: “Ita pay laeng a naggigiddan a nagsangit dagiti Koreano iti kasta unay gapu iti napalaus a rag-oda.”

Idiay Brazil, ti maladaga idi a ni Cézar ket naibayad iti maysa nga utang. Agarup 10 a tawen kalpasanna, naragsakan unay a nakasarak iti agpayso a nanangna ta uray la a pinanawanna ti nabaknang nga agassawa a nangampon kenkuana tapno makipagnaed ken nanangna.

Anian a ragsak dagiti agkakapamilia no agkikitada manen kalpasan a nasinasinada! Deskribiren ti Biblia no kasano ti nakalkaldaang a pannakaisina dagiti tattao iti pamilia ti Dios. Salaysayenna met no kasanoda itan a siraragsak a naikaykaysa kenkuana. Kasano a napasamak dayta? Ken kasano met a mariknam ti kasta a rag-o?

No Kasano a Nasinasina ti Pamilia ti Dios

Maipapan iti Namarsua a ni Jehova a Dios, kinuna ti salmista: “Adda kenka ti ubbog ti biag.” (Salmo 36:9) Ni Jehova ti Ama ti dakkel a sapasap a pamilia a buklen dagiti matalek nga intelihente a parsua. Addaan dayta a pamilia iti nailangitan a paset a buklen dagiti anghel, nga isuda ti espiritu nga annakna, ken naindagaan a paset a buklen dagiti tattao, nga isuda dagiti annakna ditoy daga.

Kas nadakamat iti napalabas nga artikulo, idi simmukir ni Adan, ti kaunaan a tao nga anak ti Dios, nakalkaldaang ta ti sangatauan ket naisina iti naayat nga Amada ken Namarsua kadakuada. (Lucas 3:38) Ngamin, gapu iti isusukir ni Adan, napukawna agraman dagiti di pay naipasngay nga annakna ti pribilehioda kas annak ti Dios. Babaen ken Moises nga adipenna, kastoy ti panangiladawan ti Dios kadagiti epekto dayta a napasamak: ‘Nagtignayda iti makadadael iti biangda a mismo; saan ida nga annak ti Dios, adda kadakuada a mismo ti pilaw.’ Gapu iti “pilaw,” wenno kinamanagbasol, naisina dagiti tattao iti nasantuan ken perpekto a Dios. (Deuteronomio 32:4, 5; Isaias 6:3) No ngarud an-anagen, ti sangatauan ket nayaw-awan ken naawanan iti ama.​—Efeso 2:12.

Kas panangipaganetget iti kakaro ti pannakaisina ti sangatauan, dagidiay di paset ti pamilia ti Dios ket tukoyen ti Biblia a “kabkabusor.” (Roma 5:8, 10) Gapu ta naisinada iti Dios, sagsagabaen ti sangatauan ti naulpit a panangituray ni Satanas ken dagiti makapapatay nga epekto ti natawid a basol ken kinaimperpekto. (Roma 5:12; 1 Juan 5:19) Posible kadi a dagiti managbasol a tattao ket agbalin a paset iti pamilia ti Dios? Posible kadi a dagiti imperpekto a parsua ket naan-anay nga agbalin nga annak ti Dios, kas iti kasasaad da Adan ken Eva sakbay a nagbasolda?

Panangummong Kadagiti Naisina nga Annak

Siaayat nga inyurnos ni Jehova dagiti pamay-an a pakagunggonaan ti imperpekto a tattao a mangay-ayat kenkuana. (1 Corinto 2:9) Inlawlawag ni apostol Pablo: “Ti lubong inkappia ti Dios iti bagina babaen ken Kristo, saanna nga insingir kadakuada dagiti labsingda.” (2 Corinto 5:19) Kas nailawlawag iti umuna nga artikulo, ni Jehova a Dios impaayna ni Jesu-Kristo kas pangsubbot para kadagiti basoltayo. (Mateo 20:28; Juan 3:16) Siyayaman nga insurat ni apostol Juan: “Kitaenyo no ania a kita ti ayat ti inted kadatayo ti Ama, tapno iti kasta maawagantayo iti annak ti Dios.” (1 Juan 3:1) No kasta, naluktan ti gundaway tapno ti natulnog a sangatauan ket agbalin manen a paset ti pamilia ni Jehova.

Nupay amin a tattao a maummong iti pamilia ti Dios ket agsagrap iti naisangsangayan a panagkaykaysa babaen ti panangaywan ti nailangitan nga Amada, usigem no kasano ti panangdeskribir ti Biblia kadakuada kas maum-ummong iti dua a grupo. Mabasatayo: ‘Maitunos dayta iti pakaragsakan unay ti Dios a pinanggepna a mismo maipaay iti maysa a panangaywan agingga iti naan-anay a pagpatinggaan dagiti naituding a tiempo, awan sabali, tapno ummongenna a sangsangkamaysa manen ken Kristo ti amin a bambanag, ti bambanag iti langlangit ken ti bambanag iti daga.’ (Efeso 1:9, 10) Apay a kasta ti pamay-an ti Dios a mangaywan kadagiti bambanag?

Kinapudnona, ti panangummong ni Jehova kadagiti annakna iti dua a grupo ket makatulong iti panagkaykaysa ti pamiliana. Saan a narigat a maawatan ti makagapu. Nakadakdakkel ti pamilia ti Dios ta mabalin nga iyasping dayta iti maysa a nasion. Iti aniaman a nasion, adda sumagmamano a mapili a mangbukel iti maysa a gobierno tapno ti dadduma pay matagiragsakda ti talna ken kinaurnos. Siempre, awan ti gobierno ti tao a makaipaay iti pudno a talna, ngem nangipasdek ti Dios iti perpekto a gobierno para iti pamiliana. Ti umuna a grupo nga isu “ti bambanag iti langlangit” ket buklen dagiti annak ti Dios a pinili ni Jehova a mangbukel iti maysa a gobierno, wenno Pagarian idiay langit. Sadiay nga “agturayda a kas ar-ari iti daga.”​—Apocalipsis 5:10.

Dagiti Annak ti Dios Ditoy Daga

Madama metten nga um-ummongen ni Jehova “ti bambanag iti daga,” nga isu ti minilion a tattao iti intero a daga tapno agbalinda a naindagaan nga annakna inton agangay. Kas naasi nga Ama, isursurona kadakuada ti daldalanna a mangitandudo iti ayat tapno makapagtutunosda a sangsangkamaysa nupay agnanaedda iti nadumaduma a nasion. Uray dagidiay naranggas, managimbubukodan, imoral, ken nasukir iti Dios ket maaw-awis a ‘makikappia’ kenkuana.​—2 Corinto 5:20.

Anianto met ngay ti pagbanagan dagidiay mangpaay iti awis ti Dios a makikappiada kenkuana kas annakna? Mangaramidto ni Jehova kadagiti nainget nga addang tapno mataginayon ti talna ken panagkaykaysa ti pamiliana. Addanto “aldaw ti panangukom ken ti pannakadadael dagiti di nadiosan a tattao.” (2 Pedro 3:7) Ti Dios pukawennanto dagiti rebelioso ditoy daga. Anian a bang-ar ti ibunga dayta kadagidiay agtultulnog kenkuana!​—Salmo 37:10, 11.

Kalpasanna, agarinto ti talna iti unos ti sangaribu a tawen. Kabayatan dayta, amin nga agayat iti Dios ket in-inut nga agbalin a perpekto kas iti kasasaad ti biag a napukaw ni Adan. Uray dagiti natay ket mapagungarto. (Juan 5:28, 29; Apocalipsis 20:6; 21:3, 4) Tungpalento ngarud ti Dios daytoy a karina: “Ti mismo a [natauan a] sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.”​—Roma 8:21.

Ti Pannakaikaykaysam iti Nailangitan nga Amam

Nasken nga adda idi ti aramiden ni Cézar ken ti rinibu a Koreano a nadakamat iti rugrugi daytoy nga artikulo tapno maikaykaysada manen iti pamiliada. Dagiti tattao idiay Korea nasken a makipasetda iti programa, ken nasken met a panawan ni Cézar ti agassawa a nangampon kenkuana. Umasping iti dayta, masapul a mangaramidka iti napateg nga addang tapno maikaykaysaka iti nailangitan nga Amam a ni Jehova a Dios ken tapno makapagbalinka a paset ti pamiliana. Ania ti rumbeng nga aramidem?

Tapno makaadanika iti Dios kas ti nailangitan nga Amam, masapul nga adalem ti Biblia a Saona iti kasta mapatanormo ti nabileg a pammatim kenkuana ken kadagiti karina. Masursuromto ti agtalek a pagimbagam ti ibagbaga ti Dios nga aramidem. Masapul met nga awatem ti panangilinteg ken panangdisiplina ti Dios ta kuna ti Biblia kadagiti Kristiano: “Makilanglangen kadakayo ti Dios kas iti annak. Ta ania nga anak ti saan a disiplinaen ti maysa nga ama?”​—Hebreo 12:7.

No aramidem dagita, mabalbaliwan ti intero a wagas ti panagbiagmo. Maitunos dayta iti kuna ti Biblia: “Mapabarokayo koma iti puersa a mangtigtignay iti panunotyo, ket ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.” (Efeso 4:23, 24) Kalpasanna, ipangagmo daytoy a balakad ni apostol Pedro: “Kas annak ti kinatulnog: dikay anamongan dagiti dakes a tarigagayyo, idi addakay pay iti kinanengneng.”​—1 Pedro 1:14, Ti Biblia.

Sapulem ti Pudpudno a Pamiliam

Idi nasarakan ni Cézar ni nanangna, naragsakan unay idi naammuanna nga isu ket addaan met iti manong ken manang. Umasping iti dayta, no umadanika iti nailangitan nga Amam, makitamto a nagadu gayam ti kakabsatmo iti kongregasion Kristiano. Iti pannakitimpuyogmo kadakuada, mabalin a mariknam nga agbalindanto pay ketdi a nasingsinged ngem kadagiti mismo a kapamiliam.​—Aramid 28:14, 15; Hebreo 10:24, 25.

Aw-awisendaka a maikaykaysa iti napaypayso nga Amam ken kakabsatmo. Masagrapmonto ti napalaus a rag-o a kas iti narikna ni Cézar ken ti rinibu a Koreano idi a naikaykaysada manen kadagiti kapamiliada.

[Ladawan iti panid 8]

Ni Cézar idi agtawen iti 19 ken ni nanangna

[Dagiti Ladawan iti panid 10]

Mangaramidka kadagiti addang tapno makaadanika iti Dios