No Kasano ti Pannakaorganisar ti Bagi a Manarawidwid
TI Bagi a Manarawidwid dagiti Saksi ni Jehova ket buklen dagiti dedikado a lallaki a napulotan nga ad-adipen ti Dios. Agserserbida kas pannakabagi ti klase matalek ken masirib nga adipen, a nadutokan a mangipaay iti naespirituan a taraon, mangiwanwan, ken mangiparegta iti trabaho a panangikasaba iti Pagarian iti intero a lubong.—Mat. 24:14, 45-47.
Linawas dagiti miting ti Bagi a Manarawidwid ket kaaduanna a maangay daytoy iti kada Mierkoles. Babaen iti daytoy, makapagtrabaho a sangsangkatunos dagita a kakabsat. (Sal. 133:1) Agserserbi met dagiti kameng ti Bagi a Manarawidwid iti nadumaduma a komite. Iti panangasikasoda kadagiti interes ti Pagarian, adda iwanwanwan ti tunggal komite, kas naibalabala ditoy baba.
◼ COORDINATORS’ COMMITTEE: Daytoy a komite ket buklen dagiti coordinator ti tunggal maysa kadagiti dadduma pay a komite ti Bagi a Manarawidwid ken maysa a sekretario a kameng met laeng ti Bagi a Manarawidwid. Siertuenna a naannayas ken episiente ti panagtrabaho ti amin a komite. Agtignay met no adda dagiti nasken a maasikaso nga emerhensia, panangidadanes, didigra, ken dadduma pay a kasasaad a mangap-apektar kadagiti Saksi ni Jehova iti intero a lubong.
◼ PERSONNEL COMMITTEE: Daytoy a komite ti mangiwanwanwan kadagiti urnos agpaay iti pisikal, naespirituan, ken dadduma pay a kasapulan dagiti miembro ti pamilia ti Bethel iti intero a daga. As-asikasuenna met ti pannakapili ken pannakaayab dagiti baro a miembro ti pamilia ti Bethel ken tamingenna dagiti saludsod mainaig iti serbisioda iti Bethel.
◼ PUBLISHING COMMITTEE: Daytoy a komite ti mangiwanwanwan iti pannakayimprenta, pannakaipablaak, ken pannakaipatulod dagiti naibasar-Biblia a literatura iti intero a lubong. Ay-aywananna dagiti pagimprentaan ken sanikua a kukua ken us-usaren ti nadumaduma a korporasion dagiti Saksi ni Jehova. Daytoy met a komite ti mangyur-urnos iti kasayaatan a pannakausar dagiti pondo a naidonar para iti sangalubongan a trabaho a nainaig iti Pagarian.
◼ SERVICE COMMITTEE: Daytoy a komite ti mangiwanwanwan iti trabaho a panangasaba ken mangas-asikaso kadagiti bambanag a mangap-apektar kadagiti kongregasion, payunir, panglakayen, ken agdaldaliasat a manangaywan. As-asikasuenna ti pannakaisagana Ti Ministeriotayo iti Pagarian. Daytoy met ti mangaw-awis kadagiti ageskuela iti Gilead School ken Ministerial Training School ken mangyur-urnos no sadino ti pagserbiandanto kalpasan ti panagturposda.
◼ TEACHING COMMITTEE: Daytoy a komite ti mangiwanwanwan kadagiti instruksion a maiparang kadagiti asamblea, kombension, ken gimong ti kongregasion. Iyur-urnosna dagiti naespirituan a programa agpaay kadagiti kameng ti pamilia ti Bethel ken iwanwanwanna ti nadumaduma nga eskuelaan, kas iti Gilead School ken Pioneer Service School agraman ti pannakaisagana dagiti audio ken video a programa.
◼ WRITING COMMITTEE: Rebbengen daytoy a komite nga iwanwan ti pannakaisurat ti naespirituan a taraon kas publikasion ken ti pannakaiwaras dagita kadatayo nga agkakapammatian ken iti publiko. Daytoy met ti sumungsungbat kadagiti saludsod mainaig iti Biblia ken mangan-anamong kadagiti manuskrito ti drama ken balabala ti palawag. Iwanwanwanna met ti sangalubongan a trabaho a panagipatarus.
Ti kongregasion dagiti napulotan ket inyasping ni apostol Pablo iti bagi ti tao ken impaganetgetna ti kinapateg ti paset ti amin a kameng agraman ti panagpannuray, panagayat, ken panagtitinnulongda iti maysa ken maysa a mangibanag iti trabaho nga impaannong ti Dios. (Roma 12:4, 5; 1 Cor. 12:12-31) Ti ulo a ni Jesu-Kristo ipapaayna ti kasapulan dagiti kameng ti bagi tapno nasayaat ti kooperasion, koordinasion, ken pannakataraonda iti naespirituan. (Efe. 4:15, 16; Col. 2:19) Iti kasta a pamay-an, naorganisar ti Bagi a Manarawidwid a mangidaulo maitunos iti panangiwanwan ni Jehova kadakuada babaen ti nasantuan nga espirituna.