Nagkaykaysa iti Ayat​—Report ti Tinawen a Miting

ITI agsapa ti Oktubre 3, 2009, magagaran ti nasurok a 5,000 a nagtataripnong iti Assembly Hall of Jehovah’s Witnesses iti Jersey City, New Jersey, E.U.A. Tinabunuanda ti maika-125 a tinawen a miting ti Watch Tower Bible and Tract Society of Pennsylvania. Rinibu pay ti dimngeg ken nagbuya iti programa babaen ti audio ken video a naikonekta iti tallo a pasilidad ti Bethel iti Estados Unidos ken iti Bethel idiay Canada. Agdagup iti 13,235 dagiti nagkaykaysa iti ayatda ken ni Jehova ken nangtagiragsak iti 3 nga oras a miting.

Nagserbi a tserman ni Geoffrey Jackson a kameng ti Bagi a Manarawidwid. Rinugianna ti programa babaen ti panangyam-ammona iti koro dagiti Bethelite a nangkanta iti sumagmamano a linaon ti baro a pagkantaan. Ni David Splane a kameng ti Bagi a Manarawidwid ti nangidaulo iti koro ken inlawlawagna iti apagbiit ti kinapateg ti musika iti nasin-aw a panagdayaw. Kinanta ti koro ti tallo a baro a kanta; kalpasanna, naawis ti tallaong a makipagkanta kadakuada. Ti panagkanta ti koro ket agpaay laeng iti daytoy nga espesial a taripnong; saan a nairanta dayta a tuladen kadagiti gimong, asamblea, wenno kombension.

Report Manipud Kadagiti Sanga

Lima a naawis a kameng ti Komite ti Sanga ti nagreport maipapan iti pagilianda. Sigun ken Kenneth Little, kaaduan a magasin para iti Estados Unidos ken Canada ket iyimprentanton ti Canada. Iti kasta, umadu iti sangapulo a daras ti iyimprenta dayta a sanga. Tapno maibanag daytoy, masapul nga agandar ti baro a pagimprentaan iti 2 a torno, nga agdagup iti 16 nga oras iti kada aldaw.

Impadamag ni Reiner Thompson ti maipapan iti trabaho mainaig iti Pagarian idiay Dominican Republic. Dineskribir met ni Albert Olih ti aktibidadtayo idiay Nigeria. Ni Emile Kritzinger manipud Mozambique inlawlawagna a kalpasan ti adu a dekada a pannakaidadanes sadiay, legal a nairehistron dagiti Saksi ni Jehova idi 1992. Iti nabiit pay, dakkel ti immaduan dagiti agibumbunannag kadagita a tallo a pagilian. Ni Viv Mouritz manipud iti sanga nga opisina ti Australia impadamagna ti panagrang-ay idiay East Timor, nga imatmatonan dagiti kakabsat idiay Australia.

Dagiti Komite ti Bagi a Manarawidwid

Sipud idi 1976, amin nga aktibidad dagiti Saksi ni Jehova ket imatmatonan ti innem a komite ti Bagi a Manarawidwid. Idi agangay, adda dagiti kameng ti sabsabali a karnero a nadutokan kas katulongan ket 23 ti bilangda itan. Innem kadakuada ti nainterbiu. Agdagup iti 341 a tawen ti binusbosda iti amin-tiempo a panagserbi​—agarup 57 a tawen ti tunggal maysa.

Ni Don Adams, a naayaban iti Bethel idi 1943, inlawlawagna a ti Coordinators’ Committee ket buklen dagiti koordineytor ti lima a komite, a mangsigurado nga agtutunos dagiti lima a komite. Daytoy a komite ti mangtaming kadagiti dadakkel nga emerhensia, pannakaidadanes, kaso iti korte, didigra, ken dadduma pay a naganat a banag a mangapektar kadagiti Saksi ni Jehova iti intero a lubong.

Dineskribir ni Dan Molchan ti trabaho ti Personnel Committee, a mangimatmaton iti naespirituan ken pisikal a pagimbagan dagiti 19,851 a Bethelite iti intero a lubong. Dinakamat ni David Sinclair no kasano nga imatmatonan ti Publishing Committee ti panaggatang kadagiti suplay ken alikamen dagiti sanga. Kalpasanna, ni Robert Wallen a dandani 60 a tawen nga agserserbin iti Bethel, inlawlawagna no kasano nga imatmatonan ti Service Committee ti aktibidad ti ili ni Jehova mainaig iti panangasaba ken kadagiti kongregasion. Imbalabala ni William Malenfant ti kinapinget ti Teaching Committee a mangisagana iti programa ti kombension. Kamaudiananna, dineskribir ni John Wischuk no kasano nga imatmatonan ti Writing Committee ti naannad a pannakaisagana ken pannakaaramid dagiti material a linaon dagiti publikasiontayo.a

Naipamaysa iti Ayat ti Teksto iti Tawen 2010

Impaay dagiti kameng ti Bagi a Manarawidwid ti tallo a simmaruno a palawag. Inrugi ti Gerrit Lösch ti palawagna babaen ti saludsod a “Kayatyo kadi nga ayatendakayo ti sabsabali?” Inlawlawagna a ti ayat ket maysa a kangrunaan a kasapulan ti tao, ken rumang-aytayo amin gapu iti dayta. Napaaddatayo maigapu iti ayat ta ni Jehova pinarsuanatayo buyogen ti di agimbubukodan nga ayat. Ti ayattayo ken Jehova ti kangrunaan a motibotayo a mangasaba ken mangisuro.

Malaksid iti padatayo a tao mangipakitatayo met iti ayat a naibatay iti prinsipio kadagiti bumusbusor kadatayo. (Mat. 5:43-45) Naiparegta iti tallaong nga usigenda no ania ti napasaran ni Jesus maigapu kadatayo​—nasapsaplit, nalalais, natupraan, ken naduyok. Iti laksid dagita, inkararaganna dagiti soldado a nangilansa kenkuana. Saan kadi nga ad-adda a matignaytayo a mangayat kenkuana? Kalpasanna, inyanunsio ni Kabsat Lösch ti teksto iti tawen 2010: 1 Corinto 13:7, 8, ‘Ti ayat ibturanna ti amin a bambanag. Ti ayat saan a pulos aggibus.’ Malaksid iti biag nga agnanayon, addaantayo pay iti namnama nga agayat ken maayat iti agnanayon.

Addaanka Kadi iti Umdas a Pannakaammo?

Inrugi ni Samuel Herd ti palawagna babaen ti maysa nga ilustrasion. Ipapantayo nga ikuyognaka ti gayyemmo iti 50 a kilometro a biahe. Nadlawmo iti fuel gauge a dandanin maibus ti gasolinana isu nga imbagam dayta iti gayyemmo. Kunana nga awan ti rumbeng a pagdanagam ta adda pay maysa a galon iti tangke ti gasolina. Ngem di nagbayag, naibusen dayta. Kayatmo pay kadi ti agbiahe uray ammom a mabalin nga agsardeng ti lugan iti sadinoman? Anian a nasaysayaat nga amang a taginayonen a napno ti tangke ti gasolina! Iti piguratibo a pamay-an, masapul a taginayonentayo a napno ti tangketayo iti gasolina​—ti pannakaammotayo ken Jehova.

Tapno maaddaantayo iti umdas a pannakaammo, masapul nga arigna nga aggasolinatayo a regular. Adda uppat a pamay-an a maaramidtayo dayta. Ti umuna ket ti personal a panagadal, ti panagbalin a pamiliar iti Biblia babaen ti inaldaw a panangbasa iti dayta. Ngem saantay la a basta basaen, masapul a tarusantayo ti basbasaentayo. Ti maikadua ket ti panangaprobetsar iti Panagdaydayaw ti Pamilia. Linawas kadi nga arigna a pumpunnuentayo ti tangketayo wenno bassit laeng ti ikarkargatayo iti dayta? Ti maikatlo isu ti itatabuno kadagiti gimong ti kongregasion. Ti maikapat ket ti naulimek ken naipamaysa a panangutob iti daldalan ni Jehova. Kuna ti Salmo 143:5: “Linagipko dagiti aldaw ti nabayagen a tiempo; minennamennak ti isuamin nga aramidmo.”

“Dagiti Nalinteg Agsilnagdanto”

Ni John Barr ti nangipaay ti maikatlo ken maudi a palawag. Inlawlawagna ti ilustrasion ni Jesus maipapan iti trigo ken dakes a ruot. (Mat. 13:24-30, 38, 43) Tuktukoyen dayta nga ilustrasion ti panawen ti “panagani” bayat a maurnong “ti annak ti pagarian” ken maisina dagiti dakes a ruot tapno mapuoran.

Imbatad ni Kabsat Barr nga adda panagpatingga dayta a panagurnong. Dinakamatna ti Mateo 24:34, a nagkuna: “Daytoy a kaputotan saanto a pulos lumabas agingga a mapasamak amin dagitoy a banag.” Namindua a binasana daytoy a komento: “Agparang a tuktukoyen ni Jesus dagiti napulotan a nakaimatang iti panangrugi ti pannakatungpal ti tanda idi 1914 ken dagiti nakainnabutda a napulotan a makaimatangto iti panangrugi ti dakkel a rigat.” Ditay ammo ti eksakto a kapaut “daytoy a kaputotan,” ngem ramanenna ti dua a grupo a naginnabut ti panagbiagda. Nupay nagdudumada iti edad, dagiti napulotan manipud iti dua a grupo a mangbukel iti dayta a kaputotan ket aginnabut ti panagbiagda bayat ti maysa a panawen ti maudi nga al-aldaw. Anian a makaliwliwa a maammuan a dadduma kadagiti ub-ubing a napulotan a nakainnabut dagiti laklakay a napulotan a nakailasin iti panangrugi ti pannakatungpal ti tanda idi 1914 ket saan a matay sakbay a mangrugi ti dakkel a rigat!

“Ti annak ti pagarian” sigagagar nga ur-urayenda ti nailangitan a gunggonada, ngem masapul nga agtalinaedtayo amin a matalek, nga agsilnagtayo a silalawag agingga iti panungpalan. Anian a pribilehio a makita ti pannakaurnong ti “trigo” iti kaaldawantayo!

Kalpasan ti pangserra a kanta, ni Theodore Jaracz a kameng ti Bagi a Manarawidwid indauluanna ti pangserra a kararag. Anian a makapabileg a programa ti tinawen a miting!

[Footnote]

[Kahon iti panid 5]

PANAGESKUELA DAGITI PANGLAKAYEN

Iti tinawen a miting, ni Anthony Morris a kameng ti Bagi a Manarawidwid impakaammona nga addanto ti agtultuloy a pannakasanay dagiti panglakayen. Maysa nga eskuelaan para kadagiti panglakayen iti Estados Unidos ti nangrugi idi nasapa a paset ti 2008 iti educational center ti Patterson, New York. Kalkalpas laeng ti maika-72 a klase, ket 6,720 a panglakayen ti nasanayen. Adu pay ti masapul a masanay. Iti laeng Estados Unidos, adda nasurok a 86,000 a panglakayen. Gapuna, inaprobaran ti Bagi a Manarawidwid ti kanayonan a panageskuela iti Brooklyn, New York, a mangrugi iti Disiembre 7, 2009.

Iti uneg ti dua a bulan, uppat nga agdaldaliasat a manangaywan ti masanay kas instruktor iti Patterson. Mapanda agisuro iti Brooklyn, ken uppat pay ti masanay. Dagitoy ti agisuro iti eskuelaan iti Brooklyn, ket dagiti immuna nga uppat ti agisuro met iti eskuelaan a maangay kadagiti Assembly Hall ken Kingdom Hall. Maulit daytoy a proseso agingga nga adda 12 a masanay nga instruktor a mangisuro iti 6 a klase kada lawas iti Ingles iti Estados Unidos. Kalpasanna, uppat nga instruktor ti masanay a mangisuro iti Espaniol. Daytoy nga eskuelaan ket saan a kasukat ti agdama a Kingdom Ministry School. Ti panggep dayta a baro nga eskuelaan ket tapno agtultuloy a rumang-ay ti espiritualidad dagiti panglakayen. Mangrugi daytoy a panageskuela iti nagduduma nga Assembly Hall ken Kingdom Hall iti intero a lubong bayat ti 2011 a tawen serbisio.

[Dagiti Ladawan iti panid 4]

Nangrugi ti tinawen a miting babaen ti kanta manipud iti baro a pagkantaantayo a “Kantaanyo ni Jehova”