Saludsod Dagiti Agbasbasa
Iti suratna kadagiti Hebreo, dinakamat ni apostol Pablo “ti panangipatay kadagiti ima.” Tuktukoyenna kadi ti panangdutok kadagiti panglakayen wenno ti sabali a banag?—Heb. 6:2.
Awan ti rason nga agbalintayo a dogmatiko, ngem mabalin a tuktukoyen ni Pablo ti panangipatay kadagiti ima tapno mayallatiw dagiti sagut ti espiritu.
Adda met ketdi dagiti pagarigan iti Biblia a mangipakita a ti panangipatay kadagiti ima ket mainaig iti nateokratikuan a panangdutok. Ni Moises ‘impatayna ti imana’ ken Josue idi dinutokanna kas kasunona. (Deut. 34:9) Iti kongregasion Kristiano, dadduma a kualipikado a lallaki ti nadutokan babaen ti panangipatay kadagiti ima. (Ara. 6:6; 1 Tim. 4:14) Namakdaar ni Pablo maibusor iti sidadarasudos a panangipatay iti ima iti maysa a tao.—1 Tim. 5:22.
Nupay kasta, indagadag ni Pablo kadagiti Hebreo a Kristiano nga ‘agreggetda a rumang-ay iti kinanataengan’ yantangay ammodan “ti pagdamdamuan a doktrina.” Dinakamatna ngarud ti “panagbabawi kadagiti natay nga aramid, ken pammati iti Dios, ti sursuro maipapan kadagiti pammautisar ken ti panangipatay kadagiti ima.” (Heb. 6:1, 2) Ti kadi panangdutok kadagiti panglakayen ket pagdamdamuan laeng a banag a masapul a pagreggetan dagiti Kristiano? Saan. Ti pannakadutok kas panglakayen ti kongregasion ket maysa a kalat a rumbeng a ragpaten dagiti nataengan a kakabsat a lallaki ket kalpasanna, matmatanda dayta buyogen ti panangapresiar.—1 Tim. 3:1.
Ngem adda pay sabali a pakausaran ti panangipatay kadagiti ima. Idi umuna a siglo, inlaksid ni Jehova ti nainlasagan nga Israel kas ti ilina ket pinilina ti naespirituan nga Israel, ti kongregasion dagiti napulotan a Kristiano. (Mat. 21:43; Ara. 15:14; Gal. 6:16) Dagiti namilagruan a sagsagut ti espiritu, kas iti panagsao kadagiti nadumaduma a pagsasao, ti pammaneknek iti kasta a panagbalbaliw. (1 Cor. 12:4-11) Idi nagbalin a manamati ni Cornelio ken ti sangakabbalayanna, dagitoy a kabbaro immawatda iti nasantuan nga espiritu, yantangay nabaelanda met ti ‘nagsao kadagiti pagsasao.’—Ara. 10:44-46.
No dadduma, nayallatiw dagiti namilagruan a sagsagut babaen ti panangipatay kadagiti ima. Idi inkasaba ni Felipe ti naimbag a damag idiay Samaria, adu ti nagpabautisar. Ti bagi a manarawidwid imbaonna sadiay da apostol Pedro ken Juan. Apay? Mabasatayo: “Idin [dagiti dua] impatayda kadakuada [dagiti nabiit pay a nabautisaran] ti im-imada, ket nangrugida nga umawat iti nasantuan nga espiritu.” Dayta ti mangipamatmat nga immawatda kadagiti sagsagut ti espiritu, dagiti abilidad a nakadkadlaw iti sabsabali. Ammotayo dayta ta ni Simon, a dati a salamangkero, nakitana daytoy a panagtignay ti espiritu ket siaagum a tinarigagayanna a gatangen ti abilidad a mangipatay iti imana iti sabsabali tapno umawatda iti nasantuan nga espiritu ket agaramidda met kadagiti milagro. (Ara. 8:5-20) Kalpasanna, 12 a tattao idiay Efeso ti nabautisaran. Mabasatayo: “Idi a ni Pablo impatayna kadakuada dagiti imana, ti nasantuan nga espiritu immay kadakuada, ket nangrugida a nagsao kadagiti pagsasao ken nagipadto.”—Ara. 19:1-7; idiligyo ti 2 Timoteo 1:6.
No kasta, iti Hebreo 6:2, nalawag a ti tuktukoyen ni Pablo ket ti panangipatay iti ima a mangyallatiw kadagiti sagsagut ti espiritu kadagiti kabbaro a manamati.