Ania ti Situtulok nga Isakripisiom Tapno Magun-odam ti Biag nga Agnanayon?
“Anianto ti ited ti maysa a tao a kasukat ti kararuana?”—MAT. 16:26.
1. Apay a linaksid ni Jesus ti pammabalaw ni Pedro?
NASDAAW unay ni apostol Pedro iti nangngegna. “Buyogen ti kinaprangka” nga ibagbaga ti patpatgenna a Lider a ni Jesu-Kristo nga asidegen nga agsagaba ken matay! Awan duadua a gapu iti napalalo a panangisakit ni Pedro a binabalawna ni Jesus. Kinunana: “Kaasiam ta bagim, Apo; saanto a pulos mapasamak kenka daytoy a pagtungpalan.” Timmalikud ni Jesus ken Pedro sana kinita ti dadduma pay nga adalan. Nalabit a kasta met ti di umiso a kapanunotanda. Kalpasanna, kinunana ken Pedro: “Inka iti likudak, Satanas! Maysaka a pakaitibkolak, agsipud ta pampanunotem, saan a ti pampanunot ti Dios, no di ket ti pampanunot ti tattao.”—Mar. 8:32, 33; Mat. 16:21-23.
2. Kasano nga imbuksilan ni Jesus no ania ti mainanama iti maysa a pudno nga adalanna?
2 Dagiti simmaruno nga imbaga ni Jesus ti mabalin a nakatulong tapno maawatan ni Pedro no apay a kasta unay ti reaksion ni Jesus iti pammabalawna. Ni Jesus “inayabanna ita ti bunggoy agraman dagiti adalanna” ket kinunana: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak. Ta siasinoman nga agtarigagay a mangisalakan iti kararuana mapukawnanto dayta; ngem siasinoman a makapukaw iti kararuana maigapu kaniak ken iti naimbag a damag maisalakannanto dayta.” (Mar. 8:34, 35) Ti sao a ‘kararua’ nga inusar ni Jesus ditoy ket tumukoy iti “biag.” Nalawag a saan laeng nga asideg idin nga isakripisiona ti biagna no di ket ninamnamana met a dagidiay sumursurot kenkuana ket sisasaganada a mangisakripisio iti biagda iti panagserbida iti Dios. No aramidenda dayta, umawatda iti naruay a gunggona.—Basaen ti Mateo 16:27.
3. (a) Ania dagiti inyimtuod ni Jesus kadagiti dumdumngeg kenkuana? (b) Ania ti nalabit impalagip ti maikadua a saludsod ni Jesus kadagiti dumdumngeg kenkuana?
3 Iti dayta met la a gundaway, adda dua a makagutugot nga inyimtuod ni Jesus: “Ania ti magunggona ti maysa a tao a magun-odna ti intero a lubong ket mapukawna ti kararuana?” ken “Ania, a pudpudno, ti ited ti maysa a tao a kasukat ti kararuana?” (Mar. 8:36, 37) Nalawag kadagiti tattao ti sungbat ti umuna a saludsod. Awan ti serserbina a magun-odan ti maysa a tao ti intero a lubong no mapukawna met ti biagna nga isu ti kararuana. Mausar ken matagiragsakna laeng dagiti sanikuana no isu ket sibibiag. Ti maikadua a saludsod ni Jesus nga: “Ania, a pudpudno, ti ited ti maysa a tao a kasukat ti kararuana?” ti nalabit nangipalagip kadagiti dumdumngeg kenkuana iti akusasion ni Satanas idi kaaldawan ni Job: “Isuamin nga adda iti maysa a tao itednanto maigapu iti kararuana.” (Job 2:4) Para iti dadduma a saan nga agdaydayaw ken Jehova, nalabit a pudno dagita a kinuna ni Satanas. Adu ti mangaramid iti aniaman, ken manglabsing ti aniaman a prinsipio tapno laeng agtalinaedda a sibibiag. Ngem naiduma iti dayta ti panangmatmat dagiti Kristiano.
4. Apay a dagiti saludsod ni Jesus ket naun-uneg ti kaipapananda kadagiti Kristiano?
4 Ammotayo a saan nga immay ni Jesus ditoy daga tapno pasalun-aten, pabaknangen, ken paundayenna ti biagtayo iti daytoy a lubong. Imbes ketdi, isu ket immay tapno ipaayannatayo iti gundaway nga agbiag nga agnanayon iti baro a lubong, ket nakapatpateg kadatayo dayta a namnama a biag nga agnanayon. (Juan 3:16) Maawatan ngarud ti maysa a Kristiano ti kayulogan ti immuna a saludsod ni Jesus nga, “Ania ti magunggona ti maysa a tao a magun-odna ti intero a lubong ngem mapukawna met ti namnamana a biag nga agnanayon?” Ti sungbat ket, Awan a pulos ti magunggonana. (1 Juan 2:15-17) Tapno masungbatantayo ti maikadua a saludsod ni Jesus, nasayaat no isaludsodtayo iti bagitayo, ‘Kasano kadakkel ti situtulok nga isakripisiok ita tapno sigurado ti namnamak a biag nga agnanayon idiay baro a lubong?’ Ti sungbattayo iti dayta a saludsod, kas makita iti inaldaw a panagbiagtayo, ti mangipalgak iti kinabileg dayta a namnama kadagiti pusotayo.—Idilig ti Juan 12:25.
5. Kasanotay a magun-odan ti sagut a biag nga agnanayon?
5 Siempre, saan nga ibagbaga ni Jesus a ti biag nga agnanayon ket mabalin a mateggedan. Ti biag—uray ti nagababa a biagtayo iti daytoy sistema ti bambanag—ket maysa a sagut. Ditay magatang dayta wenno ditay met makaaramid iti aniaman tapno maikaritayo iti dayta. Ti kakaisuna a pamay-an a magun-odantayo ti sagut a biag nga agnanayon ket no ‘adda pammatitayo ken Kristo’ kasta met ken Jehova a “mananggunggona kadagidiay sipapasnek a mangsapsapul kenkuana.” (Gal. 2:16; Heb. 11:6) Nupay kasta, masapul a paneknekantayo ti pammatitayo babaen kadagiti aramid yantangay “ti pammati nga awanan ar-aramid natay.” (Sant. 2:26) Gapuna, no ad-adda nga utobentayo ti saludsod ni Jesus, nasayaat no usigentayo a naimbag no kasano kadakkel ti situtulok nga isakripisiotayo iti daytoy sistema ti bambanag ken no ania ti situtulok nga aramidentayo iti panagserbitayo ken Jehova tapno mapaneknekantayo a talaga a sibibiag ti pammatitayo.
Ni “Kristo Saanna nga Inay-ayo ti Bagina”
6. Ania ti impamaysa ni Jesus?
6 Imbes nga ipaayanna iti atension dagiti ituktukon ti lubong idi kaaldawanna, impamaysa ni Jesus dagiti napateg a banag ken linaksidna ti sulisog a pananggun-od kadagiti material a banag a mangpanam-ay iti biagna. Impaayna ti biagna iti Dios buyogen ti panagsakripisio ken panagtulnog. Imbes nga ay-aywenna ti bagina, kinunana: “Kankanayon nga aramidek ti bambanag a makaay-ayo [iti Dios].” (Juan 8:29) Kasano kadakkel ti situtulok nga inaramid ni Jesus tapno maparagsakna ti Dios?
7, 8. (a) Ania ti insakripisio ni Jesus, ken kasano a nagunggonaan? (b) Ania ti rumbeng nga isaludsodtayo iti bagitayo?
7 Naminsan, kinuna ni Jesus kadagiti adalanna: “Ti Anak ti tao immay, saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” (Mat. 20:28) Kasakbayanna, idi nga impakpakauna ni Jesus kadagiti adalanna nga asidegen nga “itedna ti kararuana,” indagadag ni Pedro kenkuana a kaasianna ti bagina. Ngem nagtalinaed a natibker ni Jesus. Situtulok nga intedna ti kararuana, ti perpekto a biagna kas tao, agpaay iti sangatauan. Gapu iti di agimbubukodan a panagbiagna, nagbalin a sigurado ti masanguananna. Isu ket napagungar ken “naitan-ok iti makannawan ti Dios.” (Ara. 2:32, 33) Nagbalin ngarud a nagsayaat nga ulidan kadatayo.
8 Binalakadan ni apostol Pablo dagiti Kristiano idiay Roma a ‘dida ay-aywen’ ti bagbagida ken impalagipna kadakuada nga “uray ti Kristo saanna nga inay-ayo ti bagina.” (Roma 15:1-3) Gapuna, kas panangtungpaltayo iti dayta a balakad ni apostol Pablo, kasano kadakkel ti situtulok nga isakripisio ti tunggal maysa kadatayo tapno matuladtayo ni Kristo?
Kayat ni Jehova nga Ipaaytayo Kenkuana ti Kasayaatan
9. Ania ti talaga nga ar-aramiden ti maysa a Kristiano no idedikarna ti bagina iti Dios?
9 Iti nagkauna nga Israel, sagudayen ti Mosaiko a Linteg a dagiti Hebreo nga adipen ket mawayawayaan iti maikapito a tawen ti panagserbida wenno bayat ti tawen ti Jubileo. Ngem adda pay sabali a pagpilianda. No ti maysa nga adipen ket ay-ayatenna ti amona, mabalinna nga ikeddeng ti agtalinaed kas adipen iti sangakabbalayan ti amona iti unos ti panagbiagna. (Basaen ti Deuteronomio 15:12, 16, 17.) Kasta met ti aramidentayo no idedikartayo ti biagtayo iti Dios. Situtulok nga umannugottayo nga aramidentayo ti pagayatan ti Dios, imbes a surotentayo dagiti bukodtayo a pagannayasan. Iti kasta, ipakpakitatayo ti nasged a panagayattayo ken Jehova agraman ti tarigagaytayo nga agserbi kenkuana iti agnanayon.
10. Iti ania a wagas a kukuanatayo ti Dios ket kasano ti rumbeng a panangapektar dayta iti panunot ken ar-aramidtayo?
10 No makipagad-adalka iti Biblia kadagiti Saksi ni Jehova, makipaspasetka iti panangasaba iti naimbag a damag, ken tumabtabunokan kadagiti Nakristianuan a gimong, komendarandaka. Sapay koma ta iti din agbayag, magutugotka a mangidedikar iti bagim kenni Jehova ken mangyimtuod iti insaludsod idi ti Etiope ken Felipe: “Ania ti makalapped kaniak a mabautisaran?” (Ara. 8:35, 36) Ti relasionmo iti Dios ket umasping iti relasion dagiti Kristiano a nangisuratan ni Pablo: “Saanyo a kukua ti bagbagiyo, ta nagatangkayo iti maysa a gatad.” (1 Cor. 6:19, 20) Nailangitan man wenno naindagaan ti namnamatayo, no indedikartayon ti bagitayo ken Jehova, isunan ti Makinkukua kadatayo. Anian a nagpateg ngarud a parmekentayo dagiti agimbubukodan a tarigagaytayo ken ‘isardengtayon ti agpapaadipen kadagiti tattao’! (1 Cor. 7:23) Anian a nagdakkel a pribilehio ti agbalin a nasungdo nga adipen ni Jehova a mausar iti pamay-an a pakaragsakanna!
11. Ania a sakripisio ti naidagadag nga idaton dagiti Kristiano, ken ania a talaga ti kaipapanan dayta, kas iyilustrar dagiti daton nga impaannurot ti Mosaiko a Linteg?
11 Imbalakad ni Pablo kadagiti kapammatianna: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason.” (Roma 12:1) Dagita a sasao ti mabalin a nangipalagip kadagiti Judio a Kristiano maipapan kadagiti sakripisio a paset ti panagdayawda sakbay a nagbalinda a pasurot ni Jesus. Pagaammoda nga iti sidong ti Mosaiko a Linteg, masapul a dagidiay kasayaatan nga animal ti idatonda iti altar ni Jehova. Saan a maawat ti aniaman nga adda depektona. (Mal. 1:8, 13) Pudno met dayta no iparangtayo ti bagitayo kas ‘maysa a sakripisio a sibibiag.’ Ti kasayaatan ti ipaaytayo ken Jehova, saan ket a dagiti tedteddatayo a nangpennek kadagiti personal a tarigagaytayo. No idedikartayo ti bagitayo iti Dios, naan-anay nga ipaaytayon kenkuana ‘ti kararua’ wenno ti biagtayo—agraman ti pigsa, material a kupkupikopantayo, ken abilidadtayo. (Col. 3:23) Kasanotayo nga iyaplikar dayta iti biagtayo?
Usarenyo a Nainsiriban ti Tiempoyo
12, 13. Ania ti maysa a pamay-an tapno maipaaytayo ken Jehova ti kasayaatan nga adda kadatayo?
12 Ti maysa a pamay-an a maipaaytayo ken Jehova ti kasayaatan ket ti nainsiriban a panangusartayo iti tiempotayo. (Basaen ti Efeso 5:15, 16.) Kasapulan ti panagteppel tapno maaramidtayo dayta. Gapu kadagiti impluensia iti lubong agraman iti natawidtayo a kinaimperpekto, agduyostayo a mangusar iti tiempotayo agpaay iti pakaragsakan wenno personal a pagimbagantayo laeng. Agpayso nga “iti tunggal banag adda naituding a tiempo,” ket karaman iti daytoy ti makaparagsak a panagpalpaliwa ken sekular a panagtrabaho tapno matungpaltayo dagiti Nakristianuan nga obligasiontayo. (Ecl. 3:1) Nupay kasta, masapul nga agbalin a balanse ti maysa a dedikado a Kristiano ken usarenna a nainsiriban ti tiempona.
13 Idi sinarungkaran ni Pablo dagiti taga-Atenas, nadlawna nga “amin a taga Atenas ken dagiti ganggannaet nga iti apagbiit agnanaed sadiay awan sabali a pangbusbosanda ti nawaya a tiempoda no di ti panangibaga iti aniaman a banag wenno panagimdeng iti aniaman a banag a baro.” (Ara. 17:21) Iti kaaldawantayo, adu met ti mangsaysayang iti tiempoda. Karaman kadagiti moderno a pakasingaan ket ti panagbuya iti telebision, panagay-ayam kadagiti video game, ken panagsukisok iti Internet. Umad-adu dagiti mabalin a pakasingaantayo ken mangsayang iti tiempotayo. No tumuloktayo kadagita, mabalin a maliwayantayo dagiti naespirituan a kasapulantayo. Nalabit nga ipapantayo pay ketdin a makumikomtayo unay isu nga awanen ti natda a tiempotayo a mangasikaso kadagiti “napatpateg a bambanag”—dagiti bambanag a nainaig iti panagserbitayo ken Jehova.—Fil. 1:9, 10.
14. Ania a salsaludsod ti nasken nga usigentayo a naimbag?
14 Gapuna, kas dedikado nga adipen ni Jehova, saludsodam ti bagim, ‘Nairaman kadi iti inaldaw nga eskediulko ti panagbasak iti Biblia, panagutob, ken panagkararag?’ (Sal. 77:12; 119:97; 1 Tes. 5:17) ‘Adda kadi naituding a tiempok a mangisagana kadagiti Nakristianuan a gimong? Maparparegtak kadi ti sabsabali babaen ti panagkomentok kadagiti gimong?’ (Sal. 122:1; Heb. 2:12) Sigun iti Sao ti Dios, da Pablo ken Bernabe ket nangbusbosda iti “adu a tiempo iti panagsao a situtured babaen ti autoridad ni Jehova.” (Ara. 14:3) Kabaelam met kadi a baliwan ti kasasaadmo tapno maipaayam iti kanayonan a tiempo wenno “adu a tiempo” pay ketdi ti trabaho a panangasaba, a nalabit agserbika kas payunir?—Basaen ti Hebreo 13:15.
15. Kasano ti nainsiriban a panangusar dagiti panglakayen iti tiempoda?
15 Idi sinarungkaran ni apostol Pablo ken ni Bernabe ti kongregasion Kristiano idiay Antioquia, “saan a bassit a tiempo ti binusbosda a kaduada dagiti adalan” tapno paregtaenda ida. (Ara. 14:28) Umasping iti dayta, us-usaren ita dagiti naayat a panglakayen ti adu a tiempoda a mangpabileg iti sabsabali. Malaksid iti pannakiramanda iti tay-ak ti serbisio, sipipinget dagiti panglakayen a mangipastor iti arban, mangsapul kadagiti napukaw a karnero, tumulong kadagiti masakit, ken mangasikaso iti adu pay a responsabilidad iti uneg ti kongregasion. No maysaka a bautisado a kabsat a lalaki, ipalubos kadi ti kasasaadmo a rumagpatka kadagita a kanayonan a pribilehio ti panagserbi?
16. Ania ti sumagmamano a pamay-an a ‘maaramidtayo ti naimbag kadagidiay nainaig kadatayo iti pammati’?
16 Adu ti agsagsagrap iti rag-o iti pannakitinnulongda a mangsaranay kadagiti naapektaran kadagiti natural wenno gapuanan ti tao a didigra. Kas pagarigan, maysa a kabsattayo a babai nga agtawenen iti agarup 65 ken agserserbi iti Bethel ti namin-adu a nagdaliasat iti adayo tapno tumulong iti trabaho a panangsaranay. Apay nga iti kasta ti nangusaranna iti bakasionna? Kinunana: “Nupay awananak kadagiti naisangsangayan a saguday, maysa a pribilehio ti mangipaay iti aniaman a kasapulan a tulong. Napabilegak unay iti pannakakitak iti nabileg a pammati dagiti kapammatiak a napukawan iti adu a material a sanikua.” Rinibu met iti intero a lubong ti tumultulong a mangbangon kadagiti Kingdom Hall ken Assembly Hall. Babaen ti pannakipasettayo kadagita a trabaho, awan panagimbubukodan nga ‘ar-aramidentayo ti naimbag kadagidiay nainaig kadatayo iti pammati.’—Gal. 6:10.
“Addaak Kadakayo iti Amin nga Al-aldaw”
17. Ania ti situtulok nga aramidem tapno magun-odam ti biag nga agnanayon?
17 Asidegen a maikisap ti kagimongan ti tattao a naisina iti Dios. Ditay ammo no kaano ti eksakto a pannakapasamakto dayta. Nupay kasta, ammotayo a “ti tiempo a nabati ket ababan” ken “ti buya daytoy a lubong agbaliwbaliw.” (Basaen ti 1 Corinto 7:29-31.) Dayta ti makagapu a napatpateg pay itan ti kababagas ti insaludsod idi ni Jesus: “Ania, a pudpudno, ti ited ti maysa a tao a kasukat ti kararuana?” Sigurado nga aramidentayo ti aniaman a sakripisio a kidkiddawen ni Jehova kadatayo tapno magun-odantayo “ti pudpudno a biag.” (1 Tim. 6:19) Gapuna, nasken nga ipangagtayo ti balakad ni Jesus nga ‘agtultuloytayo a sumurot’ kenkuana ken ‘sapulentayo nga umuna ti pagarian.’—Mat. 6:31-33; 24:13.
18. Ania ti mainanamatayo ken apay?
18 Siempre, saan a kanayon a nalaka ti panangsurot ken Jesus, ket kas iti impakdaarna, dayta ti nakapukawan ti biag ti dadduma iti daytoy a sistema ti bambanag. Nupay kasta, kas ken Jesus, idiantayo ti sulisog a ‘kaasiantayo ti bagitayo.’ Adda pammatitayo iti impanamnamana kadagiti napulotan a pasurotna idi umuna a siglo: “Addaak kadakayo iti amin nga al-aldaw agingga iti panungpalan ti sistema ti bambanag.” (Mat. 28:20) Aramidentayo ngarud ti amin a kabaelantayo a mangusar iti tiempo ken abilidadtayo agpaay iti sagrado a panagserbi. Bayat nga ar-aramidentayo dayta, pampaneknekantayo nga agtalektayo nga isalakannatayo ni Jehova inton dakkel a rigat wenno pagungarennatayto iti inkarina a baro a lubong. (Heb. 6:10) Iti kasta, ipakpakitatayo nga ipatpategtayo unay ti insagutna a biag.
Ania ti Sungbatmo?
• Kasano nga impakita ni Jesus ti nagpaiduma a kinatulokna nga agserbi iti Dios ken kadagiti tattao?
• Apay a rumbeng a tallikudan ti maysa ti bagina ken kasanona a maaramid dayta?
• Iti nagkauna nga Israel, aniada laeng a kita ti sakripisio ti makaay-ayo ken Jehova, ket ania ti masursurotayo iti dayta?
• Ania dagiti pamay-an tapno nainsiriban a mausartayo ti tiempotayo?
[Dagiti Ladawan iti panid 26]
Kanayon nga inaramid ni Jesus dagiti makaay-ayo iti Dios
[Ladawan iti panid 28]
Dagiti manangapresiar nga Israelita intedda dagiti kasayaatan a kupkupikopanda tapno masuportaranda ti pudno a panagdayaw
[Dagiti Ladawan iti panid 29]
Maparagsaktayo ti Dios babaen ti nainsiriban a panangusartayo iti tiempotayo