Umadanika iti Dios

Managayat iti Hustisia

Hebreo 10:26-31

NAPASARAM kadin ti di umiso wenno naulpit a pannakatrato manipud iti maysa a saan a nadusa ken di man la nangipakita iti panagbabawi? Talaga a narigat nga awaten ti kasta a kinaawan hustisia nangnangruna no inaramid dayta ti maysa a namnamaem a mangisakit koma kenka. Nalabit maisaludsodmo, ‘Apay nga ipalubos ti Dios a mapasamak ti kasta?’a Kinapudnona, kagura ni Jehova ti amin a kita ti kinaawan hustisia. Ipasigurado ti Biblia a dusaen ti Dios dagidiay sipapakinakem nga agaramid iti basol. Usigentayo dagiti sasao ni apostol Pablo a nailanad iti Hebreo 10:26-31.

Insurat ni Pablo: “No sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno, awanen ti nabati nga aniaman a sakripisio maipaay iti basbasol.” (Bersikulo 26) Makarimon unay dagiti sipapakinakem nga agbasbasol. Apay? Umuna, ti panagbasolda ket saan a resulta ti apagkanito a kinakapuy​—banag a maar-aramidantayo amin gapu iti kinaimperpekto. Imbes ketdi, inyugalidan ti agaramid iti basol. Maikadua, igaggagarada ti agbasol. Kas ibaga ti The Bible in Basic English, “gaggagaraenda ti agaramid iti dakes.” Rimmamuten ti kinadakes iti pusoda. Maikatlo, saanda nga agbasbasol gapu iti kinaawan iti pannakaammo. Imbes ketdi, addaanda iti “umiso a pannakaammo iti kinapudno” maipapan iti pagayatan ken linlinteg ti Dios.

Ania ti panangmatmat ti Dios kadagiti di agbabawi ken sipapakinakem nga agbasbasol? ‘Awanen ti nabati nga aniaman a sakripisio maipaay iti basbasolda,’ kuna ni Pablo. Ti sakripisio ni Kristo​—ti sagut ti Dios iti sangatauan​—abbonganna dagiti basol a maaramidantayo gapu iti kinaimperpekto. (1 Juan 2:1, 2) Ngem dagidiay awanan panagbabawi nga agar-aramid iti basol ipakpakitada nga awan panangapresiarda iti dayta a napateg a sagut. Iti panangmatmat ti Dios, ‘impayatpayatda ti Anak ti Dios ken imbilangda a kadawyan ti pateg ti dara’ ni Jesus. (Bersikulo 29) Ipakpakita ti aramidda a lalaisenda ni Jesus ken ibilangda ti darana kas “bassit ti pategna,” a kasla kapadana laeng ti pateg dagiti imperpekto a tattao. (Today’s English Version) Dagiti kasta nga awanan panangapresiar a tattao saanda a magunggonaan iti sakripisio ni Kristo.

Ania ti agur-uray kadagiti nadangkes? Ti Dios ti hustisia inkarina: “Kukuak ti pammales; supapakakto.” (Bersikulo 30) Agannad dagidiay sipapakinakem nga agar-aramid iti basol a pakadangran ti dadduma. Madusa amin a mangigaggagara a manglabsing kadagiti linteg ti Dios. Uray ita, masansan nga apitenda ti bunga ti kinadakesda. (Galacia 6:7) Ken no saan man nga ita, lak-amendanto ti panangukom ti Dios iti mabiiten a masanguanan inton ikkatenna ti amin a kinaawan hustisia ditoy daga. (Proverbio 2:21, 22) Namakdaar ni Pablo: “Nakabutbuteng a banag ti matnag kadagiti ima ti sibibiag a Dios.”​—Bersikulo 31.

Makaliwliwa ken makapabileg ti pannakaammo a saan a panuynoyan ni Jehova a Dios ti sipapakinakem a panagbasol, nangnangruna kadagidiay biktima dagiti awanan panagbabawi a managbasol. Yantangay kagura ti Dios ti amin a kita ti kinadakes, naan-anay koma nga ipabiangtayo kenkuana ti panagibales buyogen ti panagtalek.

[Footnote]