Ammoyo Kadi?
Apay a nadumaduma a lugar ti pagnanaedan idin dagiti Judio idi adda ni Jesus ditoy daga?
Idi kinuna ni Jesus iti maysa a grupo a dumdumngeg kenkuana a saanda a makapan iti papananna, nagsisinnaludsod dagiti Judio: “Sadino ti panggep daytoy a tao a papanan . . . ? Panggepna aya ti mapan kadagiti Judio a naiwarawara kadagiti Griego . . . ?” (Juan 7:32-36) Di nagbayag, inkasaba dagiti misionero a Kristiano ti naimbag a damag kadagiti Judio iti intero a lugar iti aglawlaw ti Baybay Mediteraneo.—Aramid 2:5-11; 9:2; 13:5, 13, 14; 14:1; 16:1-3; 17:1; 18:12, 19; 28:16, 17.
Nangrugi a nagnaed dagiti Judio iti nadumaduma a lugar gapu ta nakautiboda idi a ti pagilianda ket sinakup dagiti manangparmek a nasion—umuna, dagiti Asirio idi 740 K.K.P., sa kalpasanna, dagiti taga-Babilonia idi 607 K.K.P. Sumagmamano laeng kadagiti nakautibo ti nagsubli iti Israel. (Isaias 10:21, 22) Ti kaaduan ket nagtalinaeden iti sadinoman a pagnanaedanda.
Gapuna, idi maikalima a siglo K.K.P., addan komunidad dagiti Judio iti 127 a distrito a sakup ti Imperio ti Persia. (Ester 1:1; 3:8) Inkagumaan dagiti Judio a kombertien dagiti sabsabali iti Judaismo isu nga idi agangay, adu a tattao ti naaddaan iti pannakaammo maipapan ken Jehova agraman iti Linteg nga intedna kadagiti Judio. (Mateo 23:15) Adu a Judio manipud iti nadumaduma a lugar ti adda idiay Jerusalem tapno dumar-ayda iti Piesta ti Pentecostes idi 33 K.P., a nakangngeganda iti naimbag a damag maipapan ken Jesus. Ti ngarud panagnaed dagiti Judio iti nadumaduma a lugar a masakupan ti Imperio ti Roma ket nakatulong iti napartak a panagsaknap ti Kristianidad.
Kasano kaadu ti balitok ni Ari Solomon?
Sigun iti Biblia, ni Hiram nga ari ti Tiro ket nangipatulod ken Solomon iti uppat a tonelada a balitok. Kasta met la a kaadu ti inted ti reyna ti Sheba. Nasurok met a 15 a tonelada a balitok ti inyawid dagiti bunggoy ni Solomon manipud Ofir. Kuna ti salaysay a “ti dagsen ti balitok a dimteng ken Solomon iti maysa a tawen ket nagdagup iti innem a gasut innem a pulo ket innem a talento a balitok,” wenno nasurok a 25 a tonelada. (1 Ar-ari 9:14, 28; 10:10, 14) Agpayso kadi dayta? Kasano kaadu ti nakadulin a balitok dagiti ari kadagita a tiempo?
Sigun iti nagkauna a sursurat a patien ken us-usaren dagiti eskolar a mangad-adal iti biag ken kultura idi ugma, ni Faraon Thutmose III iti Egipto (maikadua a milenio K.K.P.) ket nangted iti agarup 13.5 a tonelada a balitok iti templo ni Amun-Ra idiay Karnak. Bayat ti maikawalo a siglo K.K.P., ti ari ti Asiria a ni Tiglath-pileser III ket immawat iti nasurok nga 4 a tonelada a balitok kas impuesto manipud Tiro. Kasta met la a kaadu ti balitok nga insagut ni Sargon II kadagiti didiosen ti Babilonia. Naipadamag idi a kada tawen ket makaala ni Ari Philip II ti Macedonia (359-336 K.K.P.) iti nasurok a 28 a tonelada a balitok kadagiti pagminasan idiay Pangaeum, Thrace.
Naipadamag met nga idi a ti anak ni Philip a ni Alejandro a Dakkel (336-323 K.K.P.) sinakupna ti Susa a siudad ti Persia, nakaala sadiay iti agarup 1,180 a tonelada a balitok, ken gistay 7,000 a tonelada manipud iti intero a Persia. Isu a no maidilig kadagitoy a report, saan nga aglablabes ti dinakamat ti Biblia maipapan iti balitok ni Ari Solomon.