Agrag-okayo iti Trabaho a Panagaramid iti Adalan
“Inkayo ngarud ket mangaramidkayo iti ad-adalan.”—Mat. 28:19.
1-3. (a) Ania ti rikna ti adu maipapan iti panangyadal iti Biblia? (b) Ania dagiti saludsod nga usigentayo?
“I YAD-ADALAK ti maysa a pamilia a taga-Pakistan iti 11 a lawasen,” insurat ti maysa a kabsat a babai a naitimpuyog iti grupo nga agus-usar iti Hindi a lenguahe iti Estados Unidos. “Gapuna, nagbalinkami nga aggagayyem,” kinunana. “Makasangitak no mapanunotko a dandanidan agsubli idiay Pakistan. Saan laeng a gapu ta maladingitanak a saankon a makalangen ida, no di ket gapu iti rag-ok a mangisursuro kadakuada iti maipapan ken Jehova.”
2 Nariknayo met kadin ti kasta a rag-o a resulta ti panangyadalyo iti Biblia kadagiti sabsabali? Ti panagaramid iti adalan ket nangyeg iti dakkel a rag-o kenni Jesus ken kadagiti adalanna idi umuna a siglo. Idi a dagiti 70 nga adalan a sinanay ni Jesus nagsublida nga addaan iti naragsak a damag, ‘naglaplapusanan ti rag-o ni Jesus iti nasantuan nga espiritu.’ (Luc. 10:17-21) Umasping iti dayta, adu met ita ti maragragsakan iti trabaho a panagaramid kadagiti adalan. Kinapudnona, idi 2007, dagiti nagaget ken naragsak nga agibumbunannag nakaikonduktada iti promedio nga innem ket kagudua a milion a panagadal iti Biblia iti kada bulan!
3 Ngem adda dagiti agibumbunannag a saan pay a mangikonkondukta iti panagadal iti Biblia. Dadduma ti saan a nakaikondukta iti panagadal kadagiti naglabas a tawtawen. Ania dagiti karit a pakaipasanguantayo bayat nga ikagkagumaantayo ti mangikondukta iti panagadal iti Biblia? Kasanotayo a mapagballigian dagita a karit? Ken ania dagiti magunggonatayo no aramidentayo ti amin a kabaelantayo a mangtungpal iti bilin ni Jesus nga: “Inkayo ngarud ket mangaramidkayo iti ad-adalan”?—Mat. 28:19.
Dagiti Karit a Mangikkat iti Rag-otayo
4, 5. (a) Ania ti reaksion ti adu a tattao mainaig iti panangasabatayo? (b) Ania dagiti karit a pakaipaspasanguan ti dadduma nga agibumbunannag?
4 Kadagiti dadduma a paset ti lubong, maragsakan dagiti tattao nga umawat iti literaturatayo ken kayatda ti agpayadal iti Biblia. Insurat ti maysa nga agassawa a taga-Australia a temporario nga agserserbi idiay Zambia: “Pudno ti damag. Nabunga a teritoria ti Zambia. Nagsayaat ti mangasaba kadagiti lansangan! Dagiti tattao ti umasideg kadakami, dadduma pay ti agkiddaw kadagiti partikular nga isyu ti magasin.” Iti nabiit pay a tawen, nakaikondukta dagiti kakabsat idiay Zambia iti nasurok a 200,000 a panagadal iti Biblia. Agparang a nasurok a maysa ti iyad-adalan ti tunggal agibumbunannag.
5 Ngem kadagiti dadduma a lugar, marigatan dagiti agibumbunannag a mangipaima kadagiti literatura ken mangikondukta iti regular a panagadal iti Biblia. Apay? Masansan nga awan dagiti bumalay no mangasaba dagiti agibumbunannag. No addada man, saanda nga interesado iti relihion. Nalabit a napadakkelda iti pamilia a saan a relihioso wenno nadismayada iti panaginsisingpet a nabatad kadagiti palso a relihion. Adu a tattao ti nadangran iti naespirituan, nga arigna a nalalatan ken binaybay-an dagiti lider ti palso a relihion. (Mat. 9:36) Gapuna, maawatantayo no apay a saanda nga interesado a makisarita maipapan iti Biblia.
6. Ania dagiti lapped a pakaipaspasanguan ti dadduma?
6 Adda met sabali a karit a pakaipaspasanguan ti dadduma a matalek nga agibumbunannag a mabalin a mangikkat iti rag-oda. Nupay aktiboda idi iti trabaho a panagaramid iti adalan, malapdanda itan gapu iti sakit wenno panaglakay ken panagbaket. Usigentayo met ti dadduma nga ibilangtayo a lapped. Kas pagarigan, mariknayo kadi a dikay kualipikado a mangyadal iti Biblia? Nalabit a maamakkayo kas ken Moises idi binilin ni Jehova a mapan makisarita ken Faraon. Kinuna ni Moises: “Dispensarennak, Jehova, ngem saanak a natalabit a pumapalawag, uray nanipud pay idi kalman wenno nanipud pay kasakbayan dayta.” (Ex. 4:10) Ti pannakarikna a di kualipikado a mangisuro ket nainaig iti panagbuteng a mapaay. Nalabit a pampanunotentayo a saan nga agbalin nga adalan ti maysa gapu ta ditay nalaing a mangisuro. Tapno maliklikantayo dayta, nalabit nga ikeddengtayo a saantay laengen a mangyadal iti Biblia. Kasanotayo a mapagballigian dagita a karit?
Isaganayo ti Pusoyo
7. Ania ti nangtignay ken Jesus iti ministeriona?
7 Kas umuna nga addang, isaganatayo ti pusotayo. Kinuna ni Jesus: ‘Manipud iti naruay iti puso agsao ti ngiwat.’ (Luc. 6:45) Natignay ni Jesus iti ministeriona gapu iti naimpusuan a pannakaseknanna kadagiti sabsabali. Kas pagarigan, idi napaliiwna ti nakaay-ay-ay a naespirituan a kasasaad dagiti padana a Judio, “simnek ti asina kadakuada.” Kinunana kadagiti adalanna: “Dakkel ti anien . . . Ipakaasiyo iti Apo ti panagani a mangibaon kadagiti trabahador iti panaganina.”—Mat. 9:36-38.
8. (a) Ania ti rumbeng a laglagipentayo? (b) Ania ti masursurotayo iti komento ti maysa nga agad-adal iti Biblia?
8 Bayat a makiramramantayo iti trabaho a panagaramid iti adalan, nasayaat a laglagipentayo no kasano kadakkel ti nagunggonatayo gapu ta adda nangyadal kadatayo iti Biblia. Panunotentayo met dagiti makasabaantayo ken no kasanoda a magunggonaan no ipangagda ti mensahe nga iranranudtayo. Maysa a babai ti nagsurat iti sanga nga opisina nga adda iti pagilianda: “Kayatko nga ibaga kadakayo ti napalaus a panagyamanko kadagiti Saksi a mangyad-adal kaniak. Ammok a maumada no dadduma ta nagadu ti saludsodko ken kanayon a lumbes iti oras ti panagadalmi. Ngem an-anusandak ken magagaranda a mangiranud iti naadalda. Agyamanak ken Jehova kasta met ken Jesus ta naam-ammok dagitoy a tattao.”
9. Nangipamaysaan ni Jesus iti atensionna, ken kasanotayo a matulad?
9 Siempre, saan nga amin ket immawat iti tulong nga intukon ni Jesus. (Mat. 23:37) Dadduma ti simmurot kenkuana iti apagbiit ngem kalpasanna, inlaksidda dagiti pannursurona ket ‘saandan a nakipagna kenkuana.’ (Juan 6:66) Kaskasdi, saan a minatmatan ni Jesus nga awan pateg ti mensahena gapu laeng iti saan a panangipangag dagiti dadduma. Nupay saan a nagbunga ti adu kadagiti bin-i nga immulana, impamaysa ni Jesus ti atensionna kadagiti nasayaat a magapgapuananna. Nakitana a purawen ti tay-ak para iti panagani ken dakkel ti rag-ona a nakiraman iti dayta a panagani. (Basaen ti Juan 4:35, 36.) Umasping iti dayta, imbes a kitaentayo dagiti saan a nabunga a teritoriatayo, apay a ditay ipamaysa ti atensiontayo kadagiti paset ti teritoriatayo nga addaan kadagiti posible pay a maani? Usigentayo no kasano a mataginayontayo ti kasta a positibo a panangmatmat.
Agmula ken Mangnamnama nga Agapit
10, 11. Ania ti mabalinyo nga aramiden tapno mataginayon ti rag-oyo?
10 Agibunubon ti maysa a mannalon gapu ta mangnamnama nga agapitto. Umasping iti dayta, mangasabatayo koma nga addaan iti panggep a makairugi iti panagadal iti Biblia. Ngem komusta ngay no regularka a mangaskasaba ngem manmano met ti makasaritam a bumalay wenno saanmo a madanon ti sarsarungkaram? Makapaupay la ketdi dayta. Gapuna, isardengmo kadin ti mangasaba iti binalaybalay? Saan! Adu latta dagidiay damo a makangngeg iti mensahe babaen iti daytoy a nabayagen ken epektibo a pamay-an ti panangasaba.
11 Ngem tapno mataginayon ti rag-oyo, apay a diyo usaren ti dadduma pay a pamay-an ti panangasaba tapno ad-adu pay ti makasaritayo? Kas pagarigan, napadasyo kadin ti nangasaba kadagiti tattao iti lansangan wenno iti pagtrabahuan? Mabalinyo kadi ti mangasaba babaen ti telepono wenno alaenyo ti numero ti telepono dagidiay nakasaritayo maipapan iti mensahe ti Pagarian tapno agtultuloy a makasabaanyo ida? No naanus ken mannakibagaykayo, maragsakankayto a makabirok kadagidiay interesado iti mensahe ti Pagarian.
No Adu ti Saan nga Interesado
12. Ania ti mabalin nga aramidentayo no adu ti kasla saan nga interesado a tattao iti teritoriatayo?
12 No ngay adu a tattao iti teritoriayo ti saan nga interesado iti relihion? Mabalinyo kadi nga ibagay ti pamay-anyo tapno maalayo ti interesda? Insurat ni apostol Pablo kadagiti kapammatianna idiay Corinto: “Kadagiti Judio nagbalinak a kas maysa a Judio . . . Kadagidiay awanan linteg nagbalinak a kas awanan linteg, nupay saanak nga awanan linteg iti Dios.” Ania ti panggep ni Pablo? “Nagbalinak nga amin a bambanag iti amin a kita ti tattao,” kinunana, “tapno iti amin a pamay-an maisalakanko ti sumagmamano.” (1 Cor. 9:20-22) Mabalinyo met kadi ti mangipasdek iti topiko a pagtunosanyo iti kaskasabaanyo? Adu a saan a relihioso a tattao ti agtarigagay a mangpasayaat iti relasion ti pamiliada. Nalabit a kayatda met a maammuan ti panggep ti biag. Mabalin kadi nga idatagtayo ti mensahe ti Pagarian iti wagas a makaay-ayo kadakuada?
13, 14. Kasanotayo a maparayray ti rag-otayo bayat a makiramramantayo iti trabaho a panagaramid iti adalan?
13 Umad-adu nga agibumbunannag ti rumayrayray ti rag-oda bayat a makiramramanda iti trabaho a panagaramid iti adalan, uray kadagiti lugar a ti kaaduan ket agparang a saan nga interesado. Kasano? Babaen ti panagadal iti ganggannaet a lenguahe. Sigun iti maysa a pagassawaan nga agtawen iti nasurok nga 60, nadlawda nga agnanaed iti teritoriada ti rinibu nga estudiante a Tsino ken dagiti pamiliada. “Gapu iti dayta, naparegtakami nga agsursuro iti Tsino a lenguahe,” kuna ti asawa a lalaki. “Nupay ti panangadal iti dayta a lenguahe ket agkalikagum iti adu nga oras iti kada aldaw,” intuloyna, “nagresulta dayta iti adu a panangyadal iti Biblia kadagiti Tsino iti lugarmi.”
14 Uray dika makapagsao iti ganggannaet a lenguahe, mabalinmo nga usaren ti bokleta a Good News for People of All Nations no adda makasaritam a ganggannaet. Masansan nga adda magun-odam a literatura iti lenguahe nga us-usaren ti makasabaam. Pudno nga agkalikagum iti ad-adu a tiempo ken panagregget tapno makasarita dagidiay sabali ti lenguahe ken kulturada. Ngem laglagipenyo ti prinsipio a nailanad iti Sao ti Dios: “Ti agmula a siwawadwad aganinto met a siwawadwad.”—2 Cor. 9:6.
Karaman ti Intero a Kongregasion
15, 16. (a) Apay a ti panagaramid iti adalan ket agpannuray iti intero a kongregasion? (b) Ania ti paset dagiti lallakay ken babbaket iti dayta?
15 Saan nga agpannuray iti maysa laeng nga indibidual ti panagaramid kadagiti adalan. Imbes ketdi, agtitinnulong ti intero a kongregasion. Kasano a kasta? Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Kinapudnona, no makigimong dagiti mayad-adalan iti Biblia, masansan a maay-ayoda iti ayat nga agraraira kadagiti taripnongtayo. Insurat ti maysa a mayad-adalan iti Biblia: “Kaay-ayok ti makigimong. Impariknada kaniak a kasla kamengak ti kongregasionda!” Kinuna ni Jesus a dagidiay agbalin a pasurotna ket busorento dagiti kameng ti pamiliada. (Basaen ti Mateo 10:35-37.) Nupay kasta, inkarina a maaddaanda iti adu a “kakabsat a lallaki ken kakabsat a babbai ken inna ken annak” iti uneg ti kongregasion.—Mar. 10:30.
16 Dakkel ti maitulong dagiti kakabsat a lallakay ken babbaket iti panagrang-ay dagiti mayad-adalan iti Biblia. Iti ania a pamay-an? Uray saanen a kabaelan ti dadduma a nataengan a kakabsat ti mangikondukta iti panagadal iti Biblia, dagiti makaparegta a komentoda kadagiti gimong pabilgenda ti pammati dagiti amin nga agdengdengngeg. Ad-adda a makaay-ayo ti kongregasion gapu iti agtultuloy a pannagnada “iti dalan ti kinalinteg” ken makaguyugoy dayta kadagiti nasingpet-panagpuspusona a tattao tapno kumamangda iti organisasion ti Dios.—Prov. 16:31.
Panangparmek iti Panagamak
17. Ania ti aramidentayo no mariknatayo a ditay kabaelan ti mangyadal?
17 Kasano no mariknam a dimo kabaelan ti mangyadal? Laglagipem a ni Jehova tinulonganna ni Moises babaen ti panangipaayna iti nasantuan nga espiritu ken iti maysa a kadua, ni Aaron a kabsatna. (Ex. 4:10-17) Inkari ni Jesus a tumulong ti espiritu ti Dios iti trabahotayo a panangasaba. (Ara. 1:8) Malaksid iti dayta, sagdudua dagiti mangasaba nga imbaon ni Jesus. (Luc. 10:1) Gapuna, no marigatanka a mangikondukta iti panagadal iti Biblia, ikararagmo ti espiritu ti Dios tapno ikkannaka iti sirib. Kalpasanna, makikaduaka iti maysa nga aduan kapadasan nga agibumbunannag a makatulong kenka nga agbalin a natured a mangasaba. Makapabileg iti pammati no sipapanunottayo a ti pinili ni Jehova nga usaren ket dagiti ordinario a tattao—“ti nakapuy a bambanag ti lubong”—a mangiringpas iti daytoy naisangsangayan a trabaho.—1 Cor. 1:26-29.
18. Ania ti aramidentayo no maamaktayo a mapaay?
18 Ania ti aramidentayo no maamaktayo a mapaay? Nasayaat a laglagipen a ti panagaramid iti adalan ket saan a kas iti panangisagana iti maysa a putahe, nga agpannuray ti pannakalutona iti maysa laeng a tao—ti paraluto. Imbes ketdi, adda tallo a pagpannurayan ti panagaramid iti adalan. Ni Jehova ti addaan iti kadakkelan a paset ta Isu ti mangyadani kenkuana iti maysa nga indibidual. (Juan 6:44) Datayo ken ti dadduma pay a kakabsat iti kongregasion aramidentayo ti amin a kabaelantayo a mangipakat iti arte ti panangisuro tapno matulongantayo a rumang-ay ti mayad-adalan iti Biblia. (Basaen ti 2 Timoteo 2:15.) Ken ti mayad-adalan masapul met nga iyaplikarna ti maad-adalna. (Mat. 7:24-27) Mabalin a makapaupay no agsardeng ti maysa iti panagadalna iti Biblia. Nupay kayattayo nga itultuloyda ti panagadalda iti Biblia, ti tunggal maysa ti “makikuentanto iti Dios maipaay iti bagina.”—Roma 14:12.
Ania Dagiti Gunggona?
19-21. (a) Ania dagiti magunggonatayo no mangyadaltayo iti Biblia? (b) Ania ti panangmatmat ni Jehova kadagiti amin a makipaspaset iti trabaho a panangasaba?
19 Ti panangyadal iti Biblia tulongannatayo nga agtalinaed a mangyun-una iti panangbirok iti Pagarian. Malaksid iti dayta, ad-adda a mayukuok iti isip ken pusotayo dagiti kinapudno a linaon ti Sao ti Dios. Kasano a kasta? Inlawlawag ti maysa a payunir nga agnagan iti Barak: “Ti panangyadal iti Biblia gutugotennaka nga agbalin a naan-anep nga agadal iti Biblia. Nabigbigko a masapul a pabilgek pay ti personal a pammatik sakbay a sieepektibo a maisurok ti sabali.”
20 No awan ti iyad-adalam iti Biblia, kayatna kadi a sawen a ti panagserbim ket awan pategna iti Dios? Saan! Ipatpateg unay ni Jehova dagiti panagreggettayo a mangidayaw kenkuana. Maibilang a ‘katrabahuan ti Dios’ ti amin a makipaspaset iti trabaho a panangasaba. Nupay kasta, mangyeg iti kanayonan a rag-o ti panangyadal iti Biblia bayat a makitkitatayo ti panangpadakkel ti Dios kadagiti bin-i nga immulatayo. (1 Cor. 3:6, 9) “Bayat a makitam a rumangrang-ay ti mayad-adalan iti Biblia,” kuna ti maysa a payunir nga agnagan iti Amy, “mariknam ti napalaus a panagyaman ken Jehova gapu ta us-usarennaka a mangited iti dayta a tao iti maysa a nagsayaat a sagut—ti gundaway a mangam-ammo kenni Jehova ken umawat iti biag nga agnanayon.”
21 Ti panangaramid iti amin a kabaelantayo a mangirugi ken mangikondukta kadagiti panagadal iti Biblia tulongannatayo nga agtalinaed iti panagserbi iti Dios ita ken pabilgenna ti namnamatayo a makalasat nga agturong iti baro a lubong. Iti pannaranay ni Jehova, matulongantayo met a maisalakan dagidiay dumngeg kadatayo. (Basaen ti 1 Timoteo 4:16.) Anian a gubuayan ti rag-otayo!
Malagipyo Kadi?
• Ania dagiti karit a mabalin a manglapped kadagiti dadduma a mangyadal iti Biblia?
• Ania ti mabalin nga aramidentayo no adu ti kasla saan nga interesado a tattao iti teritoriatayo?
• Ania dagiti magunggonatayo no mangyadaltayo iti Biblia?
[Dagiti Ladawan iti panid 9]
Apay a diyo usaren ti dadduma pay a pamay-an ti panangasaba tapno masarakanyo dagiti nasingpet-panagpuspusona a tattao?