Rumbeng Kadi nga Ipilitmo ti Kaykayatmo?

ADDA dua nga ubbing nga agay-ay-ayam. Inagaw ti maysa ti magusgustuanna unay nga abalbalay manipud iti kaay-ayamna sana imbugkaw, “Kukuak dayta!” Wen, kas imperpekto a tattao, ti kinamanagimbubukodan ket agminaren sipud pay kinaubing. (Gen. 8:21; Roma 3:23) Maysa pay, itantandudo ti kaaduan iti lubong ti kinamanagimbubukodan. Ngem tapno maliklikantayo dayta, nasken a sipipinget nga ikagumaantayo a parmeken ti kasta a pagannayasan. Ta no saan, nalaka laeng a maitibkoltayo ti sabsabali ken kumapuy ti relasiontayo ken Jehova.​—Roma 7:21-23.

Tapno maparegtanatayo a mangusig iti epekto dagiti kababalintayo iti sabsabali, kastoy ti insurat ni apostol Pablo: “Amin a bambanag nainkalintegan; ngem saan nga amin a bambanag makapasayaat. Amin a bambanag nainkalintegan; ngem saan nga amin a bambanag makapabileg.” Kinunana pay: “Liklikanyo ti agbalin a pakaigapuan ti pannakaitibkol.” (1 Cor. 10:23, 32) No maipapan kadagiti banag a kaykayattayo, nainsiriban ngarud nga isaludsodtayo daytoy iti bagitayo: ‘Situtulokak kadi a mangisakripisio iti kalintegak tapno laeng mataginayon ti talna iti kongregasion? Sisasaganaak kadi a mangannurot iti prinsipio ti Biblia uray no nalabit narigat nga aramiden dayta?’

Iti Panagpili iti Panggedan

Para iti kaaduan a tattao, ti panagpili iti panggedan ket personal a pangngeddeng a bassit laeng​—no adda man​—ti epektona iti sabsabali. Ngem usigem ti kapadasan ti maysa a negosiante iti bassit nga ili iti Abagatan nga America. Pagaammo kas sugador ken mammartek. Ngem gapu iti pannakipagadalna iti Biblia kadagiti Saksi ni Jehova, inyaplikarna dagiti naadalna ken binalbaliwanna ti kabibiagna. (2 Cor. 7:1) Idi imbagana a kayatnan ti mangasaba a kadua ti kongregasion, sitataktika a ginutugot ti maysa a panglakayen nga usigenna ti kita ti panggedanna. Ngamin, iti ilida, nabayagen nga isu ti kangrunaan nga aglaklako iti puro a basi​—maysa a produkto nga adu ti usarna ngem iti dayta a lugar, kadawyanna nga ilaokda kadagiti soft drink sada inumen a pagbartek.

Naamiris ti lalaki a no mangasaba iti publiko ngem kaskasdi nga aglaklako iti kasta a produkto, madadaelna ti reputasion ti kongregasion ken uray ti relasionna iti Dios. Nupay dakkel ti supsuportaranna a pamilia, insardengna ti aglako iti arak. Mangmangged itan babaen ti panaglakona iti pappapel. Ita, bautisadodan ken baketna agraman ti dua kadagiti lima nga annakda. Sireregta nga ikaskasabadan ti naimbag a damag buyogen ti wayawaya nga agsao.

Iti Panagpili iti Kakadua

Iti pannakitimpuyogtayo kadagiti ditay kapammatian, ti laeng kadi kaykayattayo ti masurot, wenno adda prinsipio ti Biblia a rumbeng nga ikabilangantayo? Adda pasken a kayat a dar-ayan ti kabsat a babai a kaduana ti maysa nga agtutubo a lalaki a dina kapammatian. Nupay naballaagan maipapan kadagiti peggad, impapanna nga adda kalinteganna a dumar-ay isu a napan latta. Di nagbayag apaman a nakadanon, pinasanguanda iti mainum a nalaokan iti nabirtud a pangpaturog. Idi nakariing sumagmamano nga oras kalpasanna, naduktalanna a rinames gayamen ti lalaki nga impagarupna a gayyemna.​—Idilig ti Genesis 34:2.

Nupay ti pannakitimpuyog kadagiti di kapammatian ket saan met a kanayon nga agbanag iti kasta a nakalkaldaang a pasamak, namakdaar ti Biblia: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Prov. 13:20) Awan duadua a napeggad ti makitimpuyog iti dakes a kakadua! “Nasaldet daydiay nakakita iti didigra ket rugianna ti aglemmeng,” kuna ti Proverbio 22:3, “ngem daydiay awanan kapadasan limmasat ket masapul a sagabaenna ti pannusa.” Dagiti katimpuyogtayo apektarandatayo ken ti relasiontayo iti Dios.​—1 Cor. 15:33; Sant. 4:4.

Iti Panagkawkawes ken Panaglanglanga

Agbaliwbaliw dagiti estilo ken uso. Ngem saan nga agbaliw dagiti prinsipio ti Biblia maipapan iti panagkawkawes ken panaglanglanga. Indagadag ni Pablo kadagiti Kristiano a babbai nga “arkosanda ti bagbagida iti naimbag-pannakaurnosna a kawes, buyogen ti kinaemma ken kinasimbeng ti panunot.” Agaplikar met daytoy a prinsipio kadagiti lallaki. (1 Tim. 2:9) Ni Pablo saanna nga irekrekomenda ti simple unay nga estilo ti kawes ken dina met ibagbaga nga agpapada koma ti kayat ti amin a Kristiano. No ngay maipapan iti kinaemma? Dinepinar dayta ti maysa a diksionario kas “kinanakman iti panagkawkawes, panagsasao, wenno kondukta . . . saan a kinatangsit wenno kinapalangguad.”

Nasken nga isaludsodtayo iti bagitayo: ‘Makuna kadi a talaga a naemmaak no ipilitko ti kalintegak nga agkawes iti wagas a maatrakarko ti di maiparbeng nga atension ti sabsabali? Ti kadi panagkawkawesko ket mangyeg iti di nasayaat nga impresion maipapan iti kinataok ken iti moralidadko? Maliklikantayo ti agbalin a “pakaigapuan ti pannakaitibkol” maipapan iti daytoy a banag no ‘itultuloytayo a kitaen, saan a ti personal a panaginteres iti laeng bukodtayo a bambanag, no di ket kasta met ti personal a panaginteres iti bambanag ti sabsabali.’​—2 Cor. 6:3; Fil. 2:4.

Iti Bambanag Maipapan iti Negosio

Idi rimsua dagiti nakaro nga isyu mainaig iti di nasayaat wenno sinasaur a panaglalangen dagidiay kameng ti kongregasion idiay Corinto, nagsurat ni Pablo: “Apay a dikay koma lattan baybay-an a maranggasankayo? Apay a dikay koma lattan baybay-an a masaurkayo?” Binalakadan ni Pablo dagiti Kristiano a masindadaanda koma laengen nga agpabus-oy wenno agsakripisio imbes nga idarumda ti kabsatda iti pangukoman. (1 Cor. 6:1-7) Maysa a kabsat a lalaki idiay Estados Unidos ti nangsurot iti dayta a balakad. Adda dida nagkinnaawatan iti kapammatianna nga amona maipapan iti sueldo a di pay naited kenkuana. Namin-adun a pinagsaritaanda dayta kas panangsurotda iti Kasuratan ngem kaskasdi a dida narisut. Kamaudiananna, indatagda dayta “iti kongregasion,” kas irepresentar dagiti Kristiano a panglakayen.​—Mat. 18:15-17.

Ngem nakalkaldaang ta saan latta a narisut. Kalpasan ti masansan a panagkarkararag, inkeddeng ti empleado a kabsat a baybay-annan ti kaaduan iti gatad nga iti panagkunana ket agpaay koma kenkuana. Apay? Kinunana idi agangay, “Dayta a parikut ti mangkiskissay iti rag-ok ken mangib-ibus iti napateg a tiempok a mausar koma para kadagiti naespirituan nga aktibidad.” Kalpasan dayta a pangngeddengna, rimmayray ti rag-ona ken nariknana a bembendisionan ni Jehova ti panagserbina.

Uray Kadagiti Babassit a Banag

Adda met dagiti pagsayaatan ti ditay panangipilit iti kaykayattayo uray kadagiti babassit a banag. Iti umuna nga aldaw iti maysa a kombension distrito, nasapa a simmangpet ti agassawa a payunir ket inreserbada ti kayatda a pagtugawan. Idi mangrugin ti programa, maysa a dakkel a pamilia nga addaan kadagiti annak ti nagdardaras a simrek iti napnon nga istadium. Gapu ta nadlawda nga agbirbirok ti pamilia iti umdas a pagtugawan, intukon ti agassawa a payunir ti tugawda a dua isu a nakapagaabay ti intero a pamilia. Sumagmamano nga aldaw kalpasan ti kombension, nakaawat ti agassawa iti surat ti panagyaman manipud iti dayta a pamilia. Inlawlawagda a mababainda idi naladawda a simmangpet iti pagkombensionan. Ngem naragsakan ken agyamyamanda gapu iti konsiderasion nga impakita ti agassawa a payunir.

No addaantayo iti gundaway, masindadaantayo koma nga agpabus-oy wenno agsakripisio para iti sabsabali. No ipakitatayo ti ayat a “saanna a sapulen dagiti bukodna a pagimbagan,” makatulongtayo a mangtaginayon iti talna iti uneg ti kongregasion ken kadagiti padatayo a tattao. (1 Cor. 13:5) Ngem kangrunaan iti amin, makapagtalinaedtayo a gayyem ni Jehova.

[Ladawan iti panid 20]

Situtulokka kadi a mangisakripisio iti kaykayatmo no maipapan iti uso?

[Ladawan iti panid 20, 21]

Situtulokka kadi a mangitukon iti tugawmo para kadagiti kapammatiam?