Sipapanunotkayo Koma iti Gunggona

“Agregreggetak nga agturong iti kalat maipaay iti gunggona.”​—FIL. 3:14.

1. Ania a gunggona ti naitukon ken apostol Pablo?

NI APOSTOL Pablo, a pagaammo met kas Saulo iti Tarso, ket naggapu iti prominente a pamilia. Nasursuruan iti relihion dagiti ammada babaen iti nalatak a mannursuro iti Linteg a ni Gamaliel. (Ara. 22:3) Agur-uray idi ken Pablo ti maibilang a nasayaat a karera, ngem kaskasdi a tinallikudanna ti relihionna ket nagbalin a maysa a Kristiano. Iti kasta, sinegseggaanna ti gunggona a biag nga agnanayon a naitukon kenkuana​—ti panagbalinna nga imortal nga ari ken padi iti nailangitan a Pagarian ti Dios. Dayta a Pagarian ti mangituray iti maysa a paraiso a daga.​—Mat. 6:10; Apoc. 7:4; 20:6.

2, 3. Kasano kadakkel ti panangipateg ni Pablo iti gunggona a nailangitan a biag?

² Kas panangipakita iti dakkel a panangipategna iti dayta a gunggona, kinuna ni Pablo: “Ti bambanag a gunggona kaniak idi, dagitoy imbilangko kas pukaw maigapu iti Kristo. Ay ket, maipapan iti dayta a banag, pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok. Maigapu kenkuana inawatko ti pannakaipukaw ti amin a bambanag ket ibilangko ida kas adu a basura.” (Fil. 3:7, 8) Dagiti bambanag nga ipatpateg ti kaaduan a tattao​—saad, kinabaknang, karera, dayaw​—ket imbilang ni Pablo a basura kalpasan a naammuanna ti kinapudno maipapan iti panggep ni Jehova agpaay iti sangatauan.

³ Sipud idin, ti kapatgan ken Pablo ket ti arig gameng a pannakaammo maipapan ken Jehova ken ni Kristo. Mainaig iti dayta, inkararag ni Jesus iti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Ti napasnek a tarigagay ni Pablo a manggun-od iti agnanayon a biag ket nabatad kadagiti sasaona iti Filipos 3:14: “Agregreggetak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus.” Wen, sipapanunot ni Pablo iti gunggona a biag nga agnanayon idiay langit kas paset ti Pagarian ti Dios.

Biag nga Agnanayon Ditoy Daga

4, 5. Ania a gunggona ti naitukon iti minilion nga agar-aramid iti pagayatan ti Dios ita?

⁴ Para iti kaaduan nga agar-aramid iti pagayatan ti Dios, ti gunggona a masapul nga igaedda a gun-oden ket ti biag nga agnanayon iti baro a lubong ti Dios. (Sal. 37:11, 29) Pinasingkedan ni Jesus a sigurado daytoy a namnama. Kinunana: “Naragsak dagiti naalumamay ti kababalinda, yantangay tawidendanto ti daga.” (Mat. 5:5) Ni Jesus a mismo ti kangrunaan nga agtawid iti daga kas ipakita ti Salmo 2:8, ket adda 144,000 a makipagturay kenkuana idiay langit. (Dan. 7:13, 14, 22, 27) Dagiti marakarnero nga agbiag ditoy daga ‘tawidendanto’ ti naindagaan a masakupan ti Pagarian a ‘naisagana kadakuada manipud iti pannakabangon ti lubong.’ (Mat. 25:34, 46) Ken naipasigurado kadatayo a matungpal amin dagita yantangay ti Dios a nagkari ket “saanna a mabalin ti agulbod.” (Tito 1:2) Makapagtalektayo met iti pannakatungpal dagiti kari ti Dios kas ken Josue idi a kinunana kadagiti Israelita: “Awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.”​—Jos. 23:14.

⁵ Saan a kas iti agdama a makaupay a kasasaad, naidumanto ti biag iti baro a lubong ti Dios yantangay awanto ti gubat, krimen, kinapanglaw, kinaawan hustisia, sakit, ken ipapatay. Agbalinto a perpekto ti salun-at dagiti tattao ken agnaedda iti daga a mapagbalinto a paraiso. Saantayo a mailadawan ti naragsak ken makapnek a biag sadiay. Wen, inaldaw a napalausto ti ragsakda. Anian a nagsayaat a gunggona!

6, 7. (a) Kasano nga impakita ni Jesus no ania dagiti namnamaentayo a mapasamak iti baro a lubong ti Dios? (b) Kasano a maikkan iti gundaway a mangabaruanan uray dagiti natay?

⁶ Idi adda ni Jesus ditoy daga, inikkan ti Dios iti pannakabalin babaen ti nasantuan nga espiritu tapno ipakitana no ania dagiti nakaskasdaaw a mapasamak iti baro a lubong. Kas pagarigan, kinuna ni Jesus a magna ti maysa a lalaki a paralisado iti 38 a tawen. Ibaga ti Biblia a nakapagna ti lalaki. (Basaen ti Juan 5:5-9.) Iti sabali pay a gundaway, nakita ni Jesus ti “maysa a lalaki a bulsek nanipud pannakayanakna” ket pinaimbagna. Kalpasanna, napagsaludsodan ti sigud a bulsek no asino Daydiay nangpaimbag kenkuana. Kinunana: “Manipud idi ugma saan a pulos nangngegan a ti asinoman linuktanna dagiti mata ti maysa a nayanak a bulsek. No daytoy a tao saan a naggapu iti Dios, awan a pulos ti mabalinna nga aramiden.” (Juan 9:1, 6, 7, 32, 33) Kabaelan ni Jesus nga aramiden amin dagitoy gapu iti pannakabalin nga inted kenkuana ti Dios. Sadinoman a napananna, “pinaimbagna dagidiay agkasapulan iti pannakaagas.”​—Luc. 9:11.

⁷ Saan laeng a pinaimbag ni Jesus dagiti masakit ken baldado no di ket pinagungarna pay dagiti natay. Kas pagarigan, natay ti maysa a balasitang a 12 ti tawenna, isu a nakaro ti panagleddaang dagiti nagannakna. Ngem kinuna ni Jesus: “Balasang, kunak kenka, Bumangonka!” Ket bimmangon ti balasitang! Mailadawanyo kadi ti reaksion dagiti nagannakna ken ti dadduma pay a nakaimatang iti dayta? (Basaen ti Marcos 5:38-42.) Iti baro a lubong ti Dios, addanto “dakkel a panagsiddaaw” inton agungar ti binilion, yantangay “addanto panagungar agpadpada dagiti nalinteg ken dagiti nakillo.” (Ara. 24:15; Juan 5:28, 29) Dayta ti mangted kadakuada iti gundaway a mangabaruanan buyogen ti namnama nga agbiag nga agnanayon.

8, 9. (a) Bayat ti Milenio a Panagturay ni Kristo, ania ti mapasamak iti natawidtayo a basol ken Adan? (b) Ania ti pakaibatayan ti pannakaukom dagiti mapagungar?

⁸ No kasta, adda namnama dagiti mapagungar nga agbiag nga agnanayon. Saandanto a maukom maibatay kadagiti basolda sakbay a natayda. (Roma 6:7) Bayat ti Milenio a Panagturay ni Kristo ken bayat a mayaplikar dagiti gunggona nga itden ti pangsubbot a datonna, in-inutto nga agbalin a perpekto dagiti natulnog nga iturturayan ti Pagarian ket naan-anaydanto a mawayawayaan iti amin nga epekto ti basol ni Adan. (Roma 8:21) Ni Jehova “pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.” (Isa. 25:8) Ibaga pay ti Sao ti Dios a ‘maukradto dagiti lukot,’ a mangipakita a dagidiay sibibiag iti dayta a tiempo maipaayandanto kadagiti baro nga impormasion. (Apoc. 20:12) Bayat nga agbalin a paraiso ti daga, “ti kinalinteg isu ti sigurado a masursuronto dagiti agnanaed iti nabunga a daga.”​—Isa. 26:9.

⁹ Maukomto dagiti mapagungar, saan a maibatay iti basol a natawidda ken Adan no di ket maibatay iti pinilida nga aramiden. Kuna ti Apocalipsis 20:12: “Naukom dagiti natay manipud kadagidiay banag a naisurat kadagiti lukot sigun kadagiti aramidda,” kayatna a sawen, dagiti aramidda kalpasan a mapagungarda. Anian a nagsayaat nga ulidan ti kinahustisia, asi, ken ayat ni Jehova! Malaksid iti dayta, dagiti nasaem a kapadasanda iti daytoy daan a lubong “saandanto a maipalagip, saandanto met a tumpuar iti puso.” (Isa. 65:17) Saandanton a maburiboran kadagiti naglabas a dakes a bambanag gapu kadagiti makapabileg a baro nga impormasion ken iti biag a napno kadagiti naimbag a bambanag. Malipatandanton dagiti nasaem a kapadasanda. (Apoc. 21:4) Kastanto met ti mapasamak iti “dakkel a bunggoy,” a makalasat iti Armagedon.​—Apoc. 7:9, 10, 14.

10. (a) Anianto ti kasasaad ti biag iti baro a lubong ti Dios? (b) Ania ti makatulong kadakayo nga agbalin a sipapanunot iti gunggona?

¹⁰ Iti baro a lubong ti Dios, saanton nga agsakit wenno matay dagiti tattao. “Awanto ti agtataeng nga agkuna: ‘Masakitak.’” (Isa. 33:24) Inton agangay, dagiti agnanaed iti baro a lubong inaldaw nga agriingdanto nga addaan iti perpekto a salun-at, a magagaranda a mangpadaan iti nasalsalun-at nga aldaw. Segseggaanda ti makapnek a trabaho ken pannakilangen kadagiti tattao a pudno a maseknan iti pagimbaganda. Talaga a nakaskasdaaw a gunggona ti kasta a biag! Apay a diyo ukagen ti Bibliayo ket basaenyo dagiti padto iti Isaias 33:24 ken 35:5-7? Darepdepenyo a karamankayo iti eksena. Dayta ti makatulong kadakayo nga agbalin a sipapanunot iti gunggona.

Pananglipat iti Gunggona

11. Iladawanyo ti nagsayaat a panangrugi ti panagturay ni Solomon.

¹¹ Apaman a naammuantayo ti gunggona, masapul nga ikagumaantayo ti agtalinaed a sipapanunot iti dayta yantangay posible a malipatantayo. Kas pagarigan, idi nagari ni Solomon iti nagkauna nga Israel, sipapakumbaba a nagkararag iti Dios maipaay iti pannakaawat ken panangilasin tapno umiso ti panangukomna iti ili ti Dios. (Basaen ti 1 Ar-ari 3:6-12.) Kas resultana, kuna ti Biblia a “ti Dios nagtultuloy a nangted ken Solomon iti sirib ken pannakaawat iti dakkel unay a rukod.” Kinapudnona, “ti sirib ni Solomon dakdakkel unay ngem ti sirib dagiti amin a taga Daya ken ti isuamin a sirib ti Egipto.”​—1 Ar. 4:29-32.

12. Ania ti impakdaar ni Jehova kadagidiay agbalin nga ari iti Israel?

¹² Ngem sakbay dayta, namakdaar ni Jehova nga asinoman nga agbalin nga ari “rebbeng a saan a mangpaadu kadagiti kabalio maipaay iti bagina” ken “saan met a mangpaadu iti assawa maipaay iti bagina, tapno saan a sumiasi ti pusona.” (Deut. 17:14-17) No paaduenna ti kabaliona, ipakpakita ti ari nga isu ket agpannuray iti bileg ti buyotna a mangsalaknib iti nasion imbes nga agpannuray ken Jehova, ti Manangsalaknib. Ken napeggad no paaduenna ti assawana gapu ta dadduma kadakuada ti mabalin a naggapu kadagiti pagano a nasion a makipaspaset iti palso a panagdayaw, ken mabalin a pagtallikudenda ti ari manipud iti pudno a panagdayaw ken Jehova.

13. Kasano a nalipatan ni Solomon dagiti pakdaar ti Dios?

¹³ Saan nga impangag ni Solomon dagita a pakdaar. Imbes ketdi, inaramidna dagiti espesipiko nga imparit ni Jehova para kadagiti ari. Nagurnong iti rinibu a kabalio ken kabaliero. (1 Ar. 4:26) Naaddaan pay iti 700 nga asawa ken 300 a kamalala, a kaaduan ti naggapu kadagiti kabangibang a pagano a nasion. “Pinagannayasda ti pusona a sumurot kadagiti sabali a didios; ket ti pusona saan idi a naan-anay ken Jehova.” Nakipaset ni Solomon iti makarimon a palso a panagdayaw dagiti pagano a nasion nga an-annuroten dagiti ganggannaet nga assawana. Kas resultana, kuna ni Jehova a ‘di bumurong a pisangenna nga iyadayo ti pagarian’ manipud ken Solomon.​—1 Ar. 11:1-6, 11.

14. Ania ti nagbanagan ti kinasukir ni Solomon ken ti nasion ti Israel?

¹⁴ Saanen a sipapanunot ni Solomon iti nagpateg a pribilehiona a mangibagi iti pudno a Dios. Naigamer ti ari iti palso a panagdayaw. Idi agangay, nagapostata ti intero a nasion, a nagbanag iti pannakadadaelna idi 607 K.K.P. Uray no insubli dagiti Judio ti pudno a panagdayaw, kinuna ni Jesus sumagmamano a siglo kalpasanna: “Ti pagarian ti Dios maikkatto kadakayo ket maited iti nasion a mangpatpataud kadagiti bungana.” Kasta ti napasamak. Kinuna ni Jesus: “Adtoy! Ti balayyo mabaybay-an kadakayo.” (Mat. 21:43; 23:37, 38) Gapu iti saanna a panagtalinaed a matalek, napukaw ti nasion ti naindaklan a pribilehiona a mangibagi iti pudno a Dios. Idi 70 K.P., dagiti buyot ti Roma dinadaelda ti Jerusalem ken ti templo, ken nagbalin nga adipen ti adu a natda a Judio.

15. Mangted kadagiti pagarigan dagidiay saan a nagtalinaed a sipapanunot no ania ti pudno a napateg.

¹⁵ Maysa ni Judas Iscariote kadagiti 12 nga apostol ni Jesus. Nangngegna dagiti agkakaimbag a pannursuro ni Jesus ken naimatanganna dagiti inaramidna a milagro babaen ti tulong ti nasantuan nga espiritu ti Dios. Kaskasdi, saan a sinaluadan ni Judas ti pusona. Naitalek kenkuana ti kahon nga ayan ti kuarta ni Jesus ken dagiti 12 nga apostol. Ngem isu ket “maysa a mannanakaw . . . [nga] al-alaenna dagiti kuarta a naikabil iti dayta.” (Juan 12:6) Impakitana ti nakaro a kinaagumna idi nakikomplot kadagiti managinsisingpet a panguluen a papadi tapno liputanna ni Jesus kasukat ti 30 a kapisi a pirak. (Mat. 26:14-16) Ti maysa pay a saan a nagtalinaed a sipapanunot iti pudno a napateg isu ni Demas, a dati a kadua ni apostol Pablo. Saan a sinaluadan ni Demas ti pusona. Kinuna ni Pablo: “Binaybay-annakon ni Demas agsipud ta inayatna ti agdama a sistema ti bambanag.”​—2 Tim. 4:10; basaen ti Proverbio 4:23.

Ti Masursurotayo

16, 17. (a) Kasano kabileg ti ibubusor a maipaspasango kadatayo? (b) Ania ti makatulong kadatayo a mangdaer iti aniaman nga ipasango kadatayo ni Satanas?

¹⁶ Masapul nga ipapuso ti amin nga adipen ti Dios dagiti pagarigan a nailanad iti Biblia, ta naibilin kadatayo: “Ita dagitoy a banag napagteng kadakuada kas pagulidanan, ket naisuratda a pammakdaar kadatayo a nadatngan dagiti panungpalan dagiti sistema ti bambanag.” (1 Cor. 10:11) Agbibiagtayon iti maudi nga al-aldaw daytoy agdama a dakes a sistema dagiti bambanag.​—2 Tim. 3:1, 13.

¹⁷ Ni Satanas a Diablo, “ti dios daytoy a sistema ti bambanag,” ammona nga “ababan ti periodo ti tiempona.” (2 Cor. 4:4; Apoc. 12:12) Aramidenna ti amin a kabaelanna a mangguyugoy kadagiti adipen ni Jehova tapno agtignayda a maikaniwas iti takderda kas Kristiano. Ni Satanas ti mangkonkontrol iti daytoy a lubong agraman dagiti propagandana. Ngem adda nabilbileg nga amang nga ik-ikutan ti ili ni Jehova​—“ti pannakabalin a nalablabes ngem ti gagangay.” (2 Cor. 4:7) Makapagpannuraytayo iti dayta a bileg manipud iti Dios a tumulong kadatayo a mangdaer iti aniaman nga ipasango kadatayo ni Satanas. Gapuna, naidagadag kadatayo a kanayontayo koma nga agkararag, nga agtalek a ni Jehova “mangtedto iti nasantuan nga espiritu kadagidiay agdawdawat kenkuana.”​—Luc. 11:13.

18. Ania ti rumbeng a panangmatmattayo iti daytoy agdama a lubong?

¹⁸ Makapabileg met kadatayo ti pannakaammo nga asidegen a madadael ti intero a sistema ni Satanas ngem maisalakan dagiti pudno a Kristiano. “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Maitunos iti dayta, anian a kinamaag no ti maysa nga adipen ti Dios panunotenna nga adda banag iti daytoy agdama a sistema a napatpateg ngem iti relasionna ken Jehova! Kasla lumlumned a barko daytoy lubong nga iturturayan ni Satanas. Ni Jehova impaayna ti kongregasion Kristiano kas “pangispal a bilog” agpaay kadagiti matalek nga adipenna. Bayat nga agturturongda iti baro a lubong, makapagtalekda iti daytoy a kari: “Magessatto dagiti mismo a managaramid iti dakes, ngem dagidiay mangin-inanama ken Jehova isuda ti mangtagikuanto iti daga.” (Sal. 37:9) Gapuna, agtalinaedkayo a sipapanunot iti dayta a naisangsangayan a gunggona!

Malagipyo Kadi?

• Ania ti panangmatmat ni Pablo iti gunggona a naitukon kenkuana?

• Ania ti pakaibatayan ti pannakaukom dagidiay agbiag nga agnanayon ditoy daga?

• Ania ti nainsiriban nga aramidem ita?

[Ladawan iti panid 12, 13]

Bayat a basbasaem dagiti salaysay iti Biblia, mailadawanmo kadi ti bagim a nakagun-oden iti gunggona?