Umadanika iti Dios
Ti Ama Dagiti Awan Amada nga Ubbing
“MAYSA nga ama dagiti awan amada nga ubbing . . . ti Dios iti nasantuan a pagnaedanna.” (Salmo 68:5) Adda makatukay a maadaltayo kadagita a naipaltiing a sasao maipapan ken Jehova a Dios—ammona ti kasapulan dagiti nakakaasi. Ti pannakaseknanna kadagiti ulila ket nabatad iti Linteg nga intedna iti Israel. Usigentayo ti umuna a panangdakamat ti Biblia iti sasao nga “awan amana nga ubing,” a mabasa iti Exodo 22:22-24.
Namakdaar ti Dios: “Dikay parigaten ti asinoman . . . [nga] awan amana nga ubing.” (Bersikulo 22) Saan laeng a panagpakaasi daytoy para kadagiti ulila no di ket bilin dayta ti Dios. Agpegpeggad ti ubing a naulila iti ama gapu ta awanen ti mangsalaknib ken mangipaay iti kasapulanna. Iti aniaman a pamay-an, awan koma ti asinoman a ‘mangparigat’ iti ulila. Iti dadduma a patarus ti Biblia, ti sao a “parigaten” ket naipaulog kas “panangabuso,” “panangmaltrato,” ken “pananggundaway.” Ti di umiso a panangtrato kadagiti ulila ket serioso a banag iti imatang iti Dios. Kasano ti kaseriosona?
Kuna ti Linteg: “No parigatem latta, ngarud no umkis latta kaniak, di bumurong a denggek ti ikkisna.” (Bersikulo 23) Ti pang-adu a sasao a “dikay parigaten” iti bersikulo 22 ket nagbalin a pangmaysa a sao a “parigatem” iti bersikulo 23. Tunggal indibidual ken ti intero a nasion masapul a tungpalenda ti bilin ti Dios. Kumitkita ni Jehova; iyallingagna ti lapayagna kadagiti awan amada nga ubbing, a sisasagana a mangipangag iti panagpatulongda.—Salmo 10:14; Proverbio 23:10, 11.
Ania ti mapasamak iti maysa no di umiso ti panangtratona iti ulila, a pakaigapuan ti iyaararaw ti ubing iti Dios? “Pudno a gumil-ayabto ti ungetko,” kuna ni Jehova, “ket sigurado a papatayenkayto babaen ti kampilan.” (Bersikulo 24) Sigun iti maysa a reperensia mainaig iti Biblia, ti kaipapanan dayta “ket literal a ‘pumudot ti agongko,’ maysa a pagsasao a tumukoy iti napalalo a pungtot.” Imutektekam ta saan a basta impabiang ni Jehova kadagiti ukom iti Israel ti panangipatungpal iti dayta a linteg. Ti Dios a mismo ti mangukom iti asinoman a manggundaway iti awan gawayna nga ubing.—Deuteronomio 10:17, 18.
Saan a nagbalbaliw ni Jehova. (Malakias 3:6) Maasian kadagiti ulila. (Santiago 1:27) Wen, ti Ama dagiti ubbing nga ulila iti ama ket nainkalintegan nga agpungtot no di umiso ti pannakatrato dagiti inosente nga ubbing. Dagidiay manggundaway kadagiti awan gawayna nga ubbing didanto maliklikan “ti sumsumged nga unget ni Jehova.” (Sofonias 2:2) Dagiti kasta a nadangkes maammuandanto a “nakabutbuteng a banag ti matnag kadagiti ima ti sibibiag a Dios.”—Hebreo 10:31.