Paspasardengen ti Vatican ti Pannakausar ti Nagan ti Dios
DAGITI klero ti Katoliko ikagkagumaanda a pasardengen ti panangusar iti nagan ti Dios kadagiti misada. Itay napan a tawen, ti Vatican Congregation for Divine Worship ken ti Discipline of the Sacraments nangipaulogda iti bilin mainaig iti dayta bayat dagiti naangay a komperensia dagiti obispo a Katoliko iti intero a lubong. Dayta ket “maitunos iti bilin” ti papa.
Dayta a dokumento, a napetsaan iti Hunio 29, 2008, kondenarenna ti kinapudno nga iti laksid ti bilin a di mausar ti nagan ti Dios, “iti naglabas a tawtawen maibalbalikas manen ti nagan ti Dios ti Israel a pagaammo kas ti nasantuan wenno nadibinuan a tetragrammaton, a naisurat iti uppat a konsonante ti alpabeto ti Hebreo a יהוה, YHWH.” Kuna ti dokumento a naipatarus dayta a nagan ti Dios iti nadumaduma a porma a kas iti “Yahweh,” “Yahwè,” “Jahweh,” “Jahwè,” “Jave,” “Yehovah,” ken dadduma pay.a Nupay kasta, kayat ti Vatican nga ipasdek ti sigud a takder dagiti Katoliko mainaig iti dayta a nagan. Kayatda a ti Tetragrammaton ket masuktan iti “Apo.” Maysa pay, kayatda a ti nagan ti Dios a “YHWH ket saan a mausar wenno maibalikas” kadagiti misa, kanta, ken lualo dagiti Katoliko.
Tapno pasingkedanda dayta a takderda, ti dokumento ti Vatican dinakamatna ti “nagkauna a pammati” ti Katolisismo. Kunana pay nga uray iti Septuagint a patarus ti Hebreo a Kasuratan, a naisurat sakbay pay ti panawen Kristiano, kanayon a maipatarus ti nagan ti Dios kas Kyʹri·os, ti Griego a sao para iti “Apo.” Gapuna, ipilit ti dokumento nga “uray dagiti Kristiano dida pulos imbalikas ti tetragrammaton a nagan ti Dios.” Ngem dayta a komento ket maisupadi kadagiti nalawag nga ebidensia. Dagiti nagkauna a kopia ti Septuagint ket naglaon iti nagan ti Dios iti porma a יהוה, imbes a Kyʹri·os. Dagiti pasurot ni Kristo idi umuna a siglo ammoda ken imbalikasda ti nagan ti Dios. Inkararag a mismo ni Jesus iti Amana: ‘Impakaammok ti naganmo.’ (Juan 17:26) Ken iti nalatak a pagtuladan a kararagna, insuro ni Jesus nga ikararagtayo: “Amami nga adda iti langlangit, masantipikar koma ti naganmo.”—Mateo 6:9.
Tarigagayan koma ti amin a Kristiano a masantipikar ti nagan ti Dios. Ti panangikagumaan ti Vatican a mangpasardeng iti pannakausar dayta a nagan ket saan a pakaidayawan ni Jehova, daydiay a nagkuna: “Daytoy ti naganko iti agnanayon. Isunto ti pangawag kaniak dagiti amin a kaputotan.”—Exodo 3:15, Ti Baro a Naimbag a Damag Biblia.
[Footnote]
a Iti Iloko, ti porma a “Jehova” ti nabayagen a maus-usar kadagiti patarus ti Biblia.
[Blurb iti panid 30]
“Daytoy ti naganko iti agnanayon.”
—Exodo 3:15, Ti Baro a Naimbag a Damag Biblia
[Ladawan iti panid 30]
Iti pammalubos ti Egypt Exploration Society
[Ladawan iti panid 30]
Kapaset ti “Septuagint” a naisurat idi umuna a siglo K.P. Nasirkuluan ti nagan ti Dios, nga irepresentar ti uppat a Hebreo a letra a gagangay a naipatarus kas YHWH
[Gubuayan]
Iti pammalubos ti Egypt Exploration Society