Malagipyo Kadi?

Naragsakankayo kadi a nangbasa kadagiti nabiit pay a ruar Ti Pagwanawanan? Kitaentayo no masungbatanyo dagitoy a saludsod:

• Apay a nakapatpateg a taginayonentayo ti kinatarnawtayo kas Kristiano?

No agtalinaedtayo a natarnaw, ipakpakitatayo nga agpaspasakuptayo iti kinasoberano ni Jehova gapu iti panagayattayo kenkuana ken pampaneknekantayo nga ulbod ni Satanas. Ti kinatarnawtayo ti pangibasaran met ti Dios iti panangukomna kadatayo isu a nakapatpateg dayta iti namnamatayo iti masanguanan.​—12/15, panid 4-6.

• Ania ti dadduma a titulo a mangyanninaw iti akem ni Jesus iti panggep ti Dios?

Ti bugbugtong nga Anak. Ti Sao. Ti Amen. Ti Manangibabaet iti baro a tulag. Ti Nangato a Padi. Ti naikari a Bin-i.​—12/15, panid 15.

• Bayat nga ikarkararag ni Elias nga agtudo koma, ania ti ipasimudaag ti panangkiddawna a kumita ti katulonganna iti turong ti baybay? (1 Ar. 18:43-45)

Impakita ni Elias nga ammona ti siklo ti danum. Dagiti ulep a tumaud iti ngatuen ti baybay ket mayangin iti ngatuen ti namaga a daga a sadiay nga agtinnag kas tudo.​—1/1, panid 15-16.

• Kasanotay nga agbalin a naragragsak iti ministeriotayo?

Mabalintay nga isagana ti pusotayo, nga ipamaysatayo ti atensiontayo no kasanotay nga ad-adda a matulongan ti sabsabali. Makapangasabatayo buyogen ti kalat a mangirugi kadagiti panangyadal iti Biblia. No maipasangotayo kadagiti saan nga interesado, mabalintayo nga ibagay ti pamay-antayo tapno maalatayo ti interes dagidiay adda iti teritoriatayo.​—1/15, panid 8-10.

• Ti kadi kukutel a nadakamat iti Biblia isu met la ti sakit a kukutel iti kaaldawantayo?

Idi panawen ti Biblia, addan ti impeksion a gapuanan ti bakteria a maawagan iti kukutel. (Lev. 13:4, 5) Dakamaten met ti Biblia ti kukutel kadagiti kawes ken balay. Dayta a “kukutel” ket nalabit tumukoy iti maysa a kita ti buot. (Lev. 13:47-52)​—2/1, panid 19.

• Kasano koma ti panangapektar dagiti pannursuro ti Biblia kadagiti aramiden ken annuroten ti maysa a Kristiano no maipapan kadagiti mansayag ken pumpon?

Nupay agleddaang ti maysa a Kristiano iti ipapatay dagiti ay-ayatenna, ammona nga awanen ti puot dagiti natay. Uray no isu ket babalawen dagiti dina kapammatian, liklikanna dagiti kostumbre a nainaig iti panamati a kabaelan pay laeng dagiti natay nga impluensiaan dagiti sibibiag. Tapno maliklikan dagiti parikut, ti dadduma a Kristiano isuratda dagiti kayatda nga urnos ti pannakaimansayag ken pannakaipumpondanto.​—2/15, panid 29-31.

• Sigun iti Salmo 1:1, ania ti tallo a banag a masapul a liklikantayo tapno agbalintayo a naragsak?

Ti bersikulo dakamatenna ti “pammatigmaan dagidiay nadangkes,” ti “dalan dagiti managbasol,” ken ti “tugaw dagiti managuy-uyaw.” Wen, tapno agbalintayo a naragsak, nasken a liklikantayo dagidiay manguy-uyaw wenno di mangikankano kadagiti linteg ti Dios. Imbes ketdi, pakaragsakantayo koma ti linteg ni Jehova.​—3/1, panid 17.

• Dagiti aya “libro ni Jasar” ken “libro ti Gubgubat ni Jehova” ket libro iti Biblia a napukaw idi agangay? (Jos. 10:13; Num. 21:14)

Saan. Dagita ket di naipaltiing a dokumento nga adda idi panawen ti Biblia ken nagreperensiaan dagiti nangisurat iti Biblia.​—3/15, panid 32.

• Ania ti naaramid a nakadkadlaw a pannakabalbaliw ti moderno a patarus ti Biblia iti Latin?

Idi 1979, inanamongan ni Pope John Paul II ti Nova Vulgata, maysa a baro a patarus iti Latin. Ti dadduma a paset ti umuna nga edision ket naglaon iti Iahveh a nagan ti Dios. (Ex. 3:15; 6:3) Ngem idi 1986 a pannakaipablaak ti maikadua nga opisial nga edision, ti Iahveh ket nasukatanen iti Dominus [Apo].​—4/1, panid 22.