Tuladenyo ni Jesus—Mangisuro Buyogen iti Ayat
“Awan pay a pulos sabali a tao a nagsao iti kastoy.”—JUAN 7:46.
1. Ania ti reaksion dagiti tattao iti wagas ti panangisuro ni Jesus?
NAGRAGSAK ket ngatan ti dumngeg ken Jesus bayat a mangisursuro! Mangted ti Biblia iti pamalatpatan iti impluensiana kadagidiay nakangngeg kenkuana. Kas pagarigan, ni Lucas a nangisurat iti Ebanghelio kinunana a dagiti umili ti Nazaret “nangrugida [nga] . . . agsiddaaw iti makaay-ayo a sasao a rumrummuar iti ngiwatna.” Impadamag ni Mateo a dagidiay dimngeg ken Jesus bayat nga insurona ti Sermon iti Bantay ‘nagsiddaawda unay iti wagas ti panangisurona.’ Napaliiw met ni Juan a dagiti opisial a naibaon a mangaresto ken Jesus ket nagsubli nga ima-ima a kunkunada: “Awan pay a pulos sabali a tao a nagsao iti kastoy.”—Luc. 4:22; Mat. 7:28; Juan 7:46.
2. Ania dagiti inusar ni Jesus a wagas ti panangisuro?
2 Saan a nagkamali dagidiay nga opisial. Awan duadua a ni Jesus ti katan-okan a Mannursuro a nagbiag ditoy daga. Nalawag, simple, ken di mabalusingsing ti panangisurona. Sisisigo a nagusar kadagiti ilustrasion ken saludsod. Imbagayna ti panangisurona kadagiti kinasaritana, nangato man wenno nababa ti saadda. Nalaka a maawatan ngem talaga a nabagas dagiti kinapudno nga insurona. Nupay kasta, saan la a dagita ti namagbalin ken Jesus a natan-ok a Mannursuro.
Ayat—Ti Kangrunaan a Galad
3. Kas mannursuro, kasano a naiduma ni Jesus kadagiti panguluen ti relihion idi kaaldawanna?
3 Kadagiti eskriba ken Fariseo, awan duadua nga adda mamasirib kadakuada a nalaing ken makabael a mangisuro. Ania ti nakaidumaan ti panangisuroda iti wagas ti panangisuro ni Jesus? Dagiti panguluen ti relihion kadagidi a tiempo awan panagayatda kadagiti ordinario a tattao. Imbes ketdi, lalaisen ken matmatanda ida kas ‘nailunod a tattao.’ (Juan 7:49) Naiduma ni Jesus ta naasian kadakuada, yantangay “nalalatan ken naiwarawarada a kasla karkarnero nga awanan pastor.” (Mat. 9:36) Ni Jesus ket nadungngo, mannakipagrikna, ken naasi. Kanayonanna, dagiti panguluen ti relihion ket awan ti pudno a panagayatda iti Dios. (Juan 5:42) Ngem ni Jesus ay-ayatenna ni Jehova ken nagragsakanna nga inaramid ti pagayatan ti Amana. Dagiti panguluen ti relihion tiniritirda ti sao ti Dios para iti bukodda a pagimbagan ngem ni Jesus inayatna ti “sao ti Dios”—insurona, inlawlawagna, inkalinteganna, ken nagbiag a maitunos iti dayta. (Luc. 11:28) Wen, ti ayat ket naibinggas iti mismo a personalidad ni Kristo. Makita dayta iti insurona, iti pannakilangenna kadagiti tattao, ken iti wagas ti panangisurona kadakuada.
4, 5. (a) Apay a napateg ti naayat a panangisuro? (b) Iti panangisuro, apay a nagpateg met ti pannakaammo ken kinasigo?
4 Datayo met ngay? Kas pasurot ni Kristo, isu ket kayattayo a tuladen iti ministerio ken iti biagtayo. (1 Ped. 2:21) Gapuna, ti panggeptayo ket saan la a mangiranud iti pannakaammo manipud iti Biblia no di ket mangiparangarang pay kadagiti galad ni Jehova, nangnangruna iti ayat. Adu man wenno bassit laeng ti pannakaammotayo, nasigotay man a mangisuro wenno saan unay, ti ayat nga iparangarangtayo ti tumulong kadatayo a mangdanon iti puso dagiti kasabaantayo. Tapno agbalintayo a pudpudno nga epektibo iti trabaho a panangaramid iti adalan, nasken a tuladentayo ti naayat a panangisuro ni Jesus.
5 Siempre, tapno agbalintayo a nalaing a mannursuro, masapul nga ammotayo ti isursurotayo ken nasigotayo a mangiranud iti dayta. Tinulongan ni Jesus dagiti adalanna tapno agpada a magun-odanda dagita. Ita, tultulongannatay met ni Jehova babaen iti organisasionna tapno makagun-odtayo iti pannakaammo ken agbalintayo a nasigo a mannursuro. (Basaen ti Isaias 54:13; Lucas 12:42.) Kaskasdi, kalattay koma ti agbalin a naayat—saan la a basta nalaing—a mannursuro. No naayat, nasigo, ken adda pannakaammotayo, naballigi ken makapnek unay ti panangisurotayo. No kasta, kadagiti ania a pamay-an a maipakitatayo ti ayat no mangisurotayo? Kasano a naaramidan dayta ni Jesus ken dagiti adalanna? Kitaentayo.
Masapul nga Ayatentayo ni Jehova
6. Kasano ti panangisarsaritatayo iti maysa nga ay-ayatentayo?
6 Kaay-ayotayo nga isarsarita dagiti napateg kadatayo. No es-estoriaentayo ti banag a pagay-ayattayo, agminar iti rupa ken tigtignaytayo ti ragsak ken kinaganaygaytayo. Agpayso dayta nangruna no ti ay-ayatentayo ti isarsaritatayo. Masansan a magagarantayo a mangipakaammo iti sabsabali ti ammotayo maipapan kenkuana. Isu ket padayawan, ipagpannakkel, ken isakittayo. Aramidentayo dayta gapu ta kayattayo a kas kadatayo met a magustuanda isuna ken dagiti galadna.
7. Gapu ta ay-ayatenna ti Dios, natignay ni Jesus a mangaramid iti ania?
7 Nasken nga am-ammo ken ay-ayatentayo a mismo ni Jehova sakbay a matulongantayo ti sabsabali nga agayat kenkuana. Ti ngamin panagayat iti Dios ti nakaibasaran ti pudno a panagdayaw. (Mat. 22:36-38) Impakita ni Jesus ti kasayaatan nga ulidan. Ay-ayatenna ni Jehova buyogen ti intero a puso, panunot, kararua, ken pigsana. Am-ammo la unay ni Jesus ti nailangitan nga Amana gapu ta nalabit binilion a tawen a nagkaduada idiay langit. Ania ti resultana? “Ay-ayatek ti Ama,” kinuna ni Jesus. (Juan 14:31) Agminar dayta nga ayat iti amin nga imbaga ken inaramid ni Jesus. Dayta ti nangtignay kenkuana a kanayon a mangaramid kadagiti makaay-ayo iti Dios. (Juan 8:29) Nagutugot a nangkondenar kadagiti panguluen ti relihion, a naginkukuna nga ireprepresentarda ti Dios. Dayta pay ti makagapu nga insarsaritana ni Jehova ken tinulonganna ti sabsabali a mangammo ken agayat iti Dios.
8. Ania ti inaramid dagiti adalan ni Jesus gapu iti panagayatda iti Dios?
8 Kas ken Jesus, dagiti adalanna idi umuna a siglo ay-ayatenda ni Jehova, ket dayta ti nangtignay kadakuada a situtured ken sireregta a mangikasaba iti naimbag a damag. Pinunnoda ti Jerusalem iti sursuroda nupay binusor ida dagiti naturay a panguluen ti relihion. Saan a maisardeng dagiti adalan ti panagsaoda maipapan kadagiti nakita ken nangngegda. (Aramid 4:20; 5:28) Ammoda a tulongan ken bendisionan ida ni Jehova—ket kasta a talaga ti inaramidna! Kinapudnona, awan pay 30 a tawen kalpasan ti ipapatay ni Jesus, insurat ni apostol Pablo a ti naimbag a damag ket naikasaban “iti isuamin a parsua nga adda iti baba ti langit.”—Col. 1:23.
9. Kasanotayo a mapabileg ti panagayattayo iti Dios?
9 No kayattayo ti agbalin a pudpudno nga epektibo a mannursuro, masapul a siertuentayo nga agtultuloy ti panangpabilegtayo iti ayattay iti Dios. Kasano? Babaen ti masansan a panagkararagtayo iti Dios. Mapabileg met ti panagayattayo iti Dios babaen ti panangadaltayo iti Saona, panangbasa kadagiti naibatay-Biblia a publikasion, ken pannakigimong. Bayat nga umad-adu ti pannakaammotayo iti Dios, umun-uneg met ti panagayattayo kenkuana. Ket bayat nga ipakpakitatayo ti ayattayo iti Dios babaen ti sasao ken ar-aramid, mapaliiwto dayta ti sabsabali ken magutugotda nga umadani ken Jehova.—Basaen ti Salmo 104:33, 34.
Masapul nga Ayatentayo ti Isursurotayo
10. Ania ti pakailasinan ti nalaing a mannursuro?
10 No ti maysa ay-ayatenna ti isursurona, pagilasinan dayta nga isu ket nalaing a mannursuro. Masapul a patienna a ti isursurona ket nasken, pudno, ken napateg. No importante iti mannursuro ti isursurona, nabatad ti kinapositibona a mangimpluensia kadagiti estudiantena. Maisupadi iti dayta, no saan nga ipatpateg ti mannursuro ti isursurona, kasanona a mainanama nga ipateg dagiti estudiantena ti ibagbagana kadakuada? Pulos a dimo tagibassiten ti kinapateg ti ulidanmo kas mannursuro iti Sao ti Dios. Kinuna ni Jesus: “Tunggal maysa a naan-anay a nasursuruan agbalinto a kas iti mannursurona.”—Luc. 6:40.
11. Apay nga inayat ni Jesus dagiti insurona?
11 Inayat ni Jesus ti insurona. Ammona nga adda napateg nga iranudna—ti kinapudno maipapan iti nailangitan nga Amana, ti mismo a “sasao ti Dios,” ken ti “sasao ti agnanayon a biag.” (Juan 3:34; 6:68) Kas iti naraniag a lawag, dagiti kinapudno nga insuro ni Jesus imbutaktakda ti dakes ken intampokda ti naimbag. Nangipaay dagita iti namnama ken liwliwa kadagiti napakumbaba nga inallilaw dagiti palso a panguluen ti relihion ken inrurumen ti Diablo. (Ara. 10:38) Agminar ti panangipateg ni Jesus iti kinapudno saan la a kadagiti insurona no di ket iti amin nga inaramidna.
12. Kasano ti panagrikna ni apostol Pablo maipapan iti naimbag a damag?
12 Kas ken Jesus, impateg unay dagiti adalanna ti kinapudno maipapan kada Jehova ken Kristo ta uray la a dagiti bumusbusor dida malapdan ida a mangiranud iti dayta. Insurat ni Pablo kadagiti padana a Kristiano idiay Roma: “Adda kinagagar iti biangko a mangideklara ti naimbag a damag . . . Ta diak ibain ti naimbag a damag; iti kinapudnona, dayta ti pannakabalin ti Dios a pakaisalakanan ti tunggal maysa nga addaan pammati.” (Roma 1:15, 16) Imbilang ni Pablo a pakaidayawanna ti mangideklara iti kinapudno. Kinunana: “Kaniak, . . . naited daytoy di kaikarian a kinamanangngaasi, tapno ideklarak kadagiti nasion ti naimbag a damag maipapan kadagiti di matukod a kinabaknang ti Kristo.” (Efe. 3:8) Saan a narigat a panunoten no kasano ti kinagagar ni Pablo a nangisuro iti sabsabali maipapan ken Jehova ken kadagiti panggepna.
13. Ania dagiti panggapuantayo a mangipateg iti naimbag a damag?
13 Gapu iti naimbag a damag iti Sao ti Dios, maam-ammotayo ti Namarsua ken mabalintay ti maaddaan iti nasinged a relasion kenkuana. Mangipaay dayta a naimbag a damag kadagiti makapnek a sungbat iti napapateg a saludsodtayo maipapan iti biag ken addaan dayta iti bileg a mangbalbaliw iti biagtayo, mangted iti namnama, ken mangpabileg kadatayo iti tiempo ti rigat. Kanayonanna, iturongnatayo iti makapnek a biag a dinto agpatingga. Awanen ti pannakaammo a napatpateg ngem iti naimbag a damag. Dayta ket di magatadan a sagut a naited kadatayo a pakaigapuan ti kasta unay a panagrag-otayo. Ken naragragsaktay manen no iranudtayo dayta a sagut iti sabsabali.—Ara. 20:35.
14. Kasano nga ad-adda a maipategtayo ti isursurotayo?
14 Ania ti mabalinmo nga aramiden tapno ad-adda pay a maipategmo ti naimbag a damag? Bayat a basbasaem ti Sao ti Dios, agsardengka sagpaminsan tapno utobem ti nabasam. Kas pagarigan, panunotem a makikuykuyogka ken Jesus kabayatan ti ministeriona ditoy daga wenno makikadkaduaka ken apostol Pablo iti panagdaliasatna. Iladawanmo iti panunotmo nga addakan iti baro a lubong, ken panunotem no kasano a naiduma ti biag sadiay. Utobem dagiti bendision a naawatmo gapu iti panagtulnogmo iti naimbag a damag. No pagtalinaedem a nasged ti panangipategmo iti naimbag a damag, marikna dayta dagiti iyad-adalam. Adda ngarud nagsayaat a rasontayo a siaannad a mangutob kadagiti naadaltayon ken mangasikaso iti isursurotayo.—Basaen ti 1 Timoteo 4:15, 16.
Masapul nga Ayatentayo Dagiti Tattao
15. Apay a masapul nga ayaten ti mannursuro dagiti estudiantena?
15 Ti nalaing a mannursuro dina pagalusiisen dagiti estudiantena tapno magagaranda nga agsursuro ken maragsakanda a mangyebkas iti rikriknada. Ti naayat a mannursuro ket mangiranud iti pannakaammo gapu ta talaga a maseknan kadagiti estudiantena. Ibagayna ti isurona sigun iti kasapulan ken iti kaadu ti kabaelanda a tarusan. Isu ket sipapanunot iti abilidad ken kasasaad dagiti estudiantena. No addaan dagiti mannursuro iti kasta nga ayat, madlaw dayta dagiti estudiante isu a makaparagsak ti panangisuro ken panagsursuro.
16. Kadagiti ania a wagas nga impakita ni Jesus ti panagayatna kadagiti tattao?
16 Imparangarang ni Jesus ti kasta a kita ti ayat. Ti katan-okan nga ebkas ti ayatna ket ti panangisukona iti perpekto a biagna kas tao tapno maisalakan ti sabsabali. (Juan 15:13) Kabayatan ti ministeriona, kanayon a sidadaan ni Jesus a tumulong kadagiti tattao ken mangisuro kadakuada maipapan ken Amana. Imbes nga urayenna dagiti tattao nga umasideg kenkuana, ni Jesus ket nagna iti ginasut a kilometro tapno maikasabana ti naimbag a damag kadakuada. (Mat. 4:23-25; Luc. 8:1) Isu ket naanus ken mannakaawat. Idi kasapulan nga ilintegna dagiti adalanna, siaayat nga inaramidna dayta. (Mar. 9:33-37) Pinaregtana ida babaen ti panangyebkasna iti panagtalekna nga agbalindanto nga epektibo a manangaskasaba iti naimbag a damag. Awan ti tao a nadungdungngo a mangisuro ngem ni Jesus. Ti impakitana nga ayat kadagiti adalanna ti nangtignay kadakuada a mangipateg met kenkuana ken mangtungpal kadagiti bilinna.—Basaen ti Juan 14:15.
17. Kasano nga impakita dagiti adalan ni Jesus ti panagayatda iti sabsabali?
17 Kas ken Jesus, impakita dagiti adalanna ti kasta unay a panagayat ken panangipategda kadagiti kinasabaanda. Nakapagserbida iti sabsabali ken nagballigida a nangikasaba iti naimbag a damag bayat nga inibturanda dagiti panangidadanes ken inrisgoda ti biagda. Anian a panangipategda kadagiti tinulonganda iti naespirituan! Makatukay la ketdi dagitoy nga insurat ni apostol Pablo: “Nagbalinkami a naalumamay iti tengngayo, a kas met laeng no ti agtagtagibi nga ina taripatuenna dagiti bukodna nga annak. Gapuna, yantangay adda kinalailomi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdungnguenmi.”—1 Tes. 2:7, 8.
18, 19. (a) Apay a situtuloktayo nga agsakripisio tapno maaramidtayo ti trabaho a panangasaba? (b) Mangted iti pagarigan a mangpaneknek a makita ti sabsabali ti ayat nga iparparangarangtayo.
18 Kasta met laeng ita. Mangaskasaba dagiti Saksi ni Jehova iti intero a lubong tapno masarakanda dagiti agtarigagay a mangammo iti Dios ken agserbi kenkuana. Kinapudnona, iti nagsasaruno a 17 a tawen, tinawen a nangbusbostayo iti nasurok a maysa a bilion nga oras iti trabaho a panangasaba ken panangaramid iti adalan—ket agtultuloy pay laeng dayta a trabahotayo. Situtulok nga aramidentay dayta nupay ti trabaho a panangasaba kaipapananna ti panangisakripisiotayo iti panawen, pigsa, ken ik-ikutantayo. Kas ken Jesus, maawatantayo a ti nailangitan nga Amatayo kayatna a magun-odan ti amin a tattao ti pannakaammo a mangiturong iti biag nga agnanayon. (Juan 17:3; 1 Tim. 2:3, 4) Ayat ti mangtignay kadatayo a tumulong kadagiti nasingpet ti panagpuspusoda a tattao tapno kas kadatayo a maam-ammo ken maipategda ni Jehova.
19 Makita dagiti sabsabali ti ayat nga iparparangarangtayo. Kas pagarigan, ti maysa a payunir iti Estados Unidos sursuratanna dagiti natayan tapno maliwliwada. Kastoy ti subalit ti maysa a lalaki: “Idi damo, nasdaawak ta adda tao nga agregget nga agsurat iti dina am-ammo tapno laeng tulonganna nga agibtur kadagiti naladingit a kasasaad. Mamatiak a talaga nga ay-ayatenyo ti padayo a tao ken ti Dios a mangiwanwanwan kadagiti tattao iti dana ti biag.”
20. Kasano kapateg ti naayat a panangisuro?
20 Adda nagkuna a ti resulta ti kinasigo a nabuyogan iti ayat ket maysa nga obra maestra. No mangisurotayo, pagreggetantayo a tulongan ti iyad-adalantayo a mangpatanor iti panagpampanunot a makaam-ammo ken Jehova ken panagpuspuso nga agayat kenkuana. Wen, tapno talaga nga agbalintayo nga epektibo a mannursuro, kasapulantayo ti nagkatlo nga ayat—ayat iti Dios, ayat iti kinapudno, ken ayat kadagiti tattao. Bayat a patpatanorentayo ti kasta nga ayat ken iparparangarangtayo dayta iti ministerio, saantay laeng a marikna ti ragsak iti panangted no di ket mapnektay pay ta ammotayo a tultuladentayo ni Jesus ken maparparagsaktay ni Jehova.
Ania ti Sungbatmo?
• Bayat nga isursurotayo ti naimbag a damag kadagiti sabsabali, apay a napateg ti . . .
panagayat iti Dios?
panagayat iti isursurotayo?
panagayat kadagidiay sursuruantayo?
[Ladawan iti panid 15]
Ania ti nakaidumaan ti wagas ti panangisuro ni Jesus iti wagas dagiti eskriba ken Fariseo?
[Ladawan iti panid 18]
Ti nasayaat a panangisuro ket agkalikagum iti pannakaammo, kinasigo, ken kangrunaan iti amin, ayat