Dakayo a Kristiano a Pamilia—Tuladenyo ti Ulidan ni Jesus!
“Ni Kristo . . . nangibati kadakayo iti pagwadan tapno sisisinged a surotenyo dagiti addangna.”—1 PED. 2:21.
1. (a) Ania dagiti akem ti Anak ti Dios iti panamarsua? (b) Kasano ti panagrikna ni Jesus iti sangatauan?
IDI inaramid ti Dios ti langit ken daga, ti inauna nga Anakna ket adda iti sibayna “kas nasigo a managobra.” Ti Anak ti Dios ket nakitinnulong met iti Amana idi a dinisenio ken pinarsua ni Jehova ti nagadu ken nadumaduma a kita ti animal ken mula ditoy daga. Timmulong pay idi insagana ni Amana ti Paraiso a pagtaengan dagiti tattao a naparsua iti ladawan ken langa ni Jehova. Ti Anak ti Dios, a naawagan iti Jesus idi agangay, ket dakkel ti panagayatna iti sangatauan ta kuna ti Biblia a “ti bambanag a pakaay-ayata[nna] mainaig iti annak ti tattao.”—Prov. 8:27-31; Gen. 1:26, 27.
2. (a) Ania dagiti impaay ni Jehova iti imperpekto a sangatauan? (b) Ania ti maysa a benneg ti biag a mangipapaay ti Biblia iti panangiwanwan?
2 Kalpasan a nagbasol ti immuna a pagassawaan, nagbalin a napateg a paset iti panggep ni Jehova ti pannakasubbot ti managbasol a sangatauan. Tapno maibanag dayta, impaay ni Jehova ti pangsubbot a sakripisio ni Kristo. (Roma 5:8) Kasta met nga impaayna ti Biblia a Saona, a mangiwanwan iti tao tapno agballigi iti biag iti laksid ti natawidna a kinaimperpekto. (Sal. 119:105) Babaen iti Saona, mangipapaay ni Jehova iti panangiwanwan a makatulong kadagiti tattao tapno agtalinaed a natibker ken naragsak dagiti pamiliada. Maipapan iti panagasawa, kuna ti libro a Genesis a ti lalaki ket masapul a “makitipon iti asawana ket masapul nga agbalinda a maymaysa a lasag.”—Gen. 2:24.
3. (a) Ania ti insuro ni Jesus maipapan iti panagasawa? (b) Ania ti usigentayo iti daytoy nga artikulo?
3 Bayat ti ministeriona ditoy daga, impaganetget ni Jesus a ti panagasawa ket nairanta a manayon. Insurona dagiti prinsipio a no mayaplikar, makatulong kadagiti miembro ti pamilia tapno maliklikanda dagiti kababalin ken kondukta a mamagpeggad iti panagasawada wenno iti kinaragsak ti pamiliada. (Mat. 5:27-37; 7:12) Trataren daytoy nga artikulo no kasano a ti inyulidan ni Jesus babaen iti sao ken aramidna idi adda ditoy daga ket makatulong kadagiti assawa a lallaki, assawa a babbai, nagannak, ken annak tapno agbalin a naragsak ken makapnek ti panagbiagda.
No Kasano a Mapadayawan ti Kristiano nga Asawa a Lalaki ni Baketna
4. Ania ti pagpadaan ti akem ni Jesus ken ti akem dagiti Kristiano nga assawa a lallaki?
4 Ti Dios dinutokanna ti asawa a lalaki kas ulo ti pamilia, no kasano a ni Jesus ket Ulo ti kongregasion. Kinuna ni apostol Pablo: “Ti lalaki isu ti ulo ti asawana a kas met ti Kristo isu ti ulo ti kongregasion, yantangay isu ti manangisalakan iti daytoy a bagi. Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” (Efe. 5:23, 25) No kasta, ti panangtrato ni Jesus kadagiti pasurotna ti pagwadan no kasano ti rumbeng a panangtrato ti Kristiano a lalaki iti asawana. Usigentayo ti sumagmamano a wagas nga inusar ni Jesus ti autoridad nga inted ti Dios kenkuana.
5. Kasano ti panangipakat ni Jesus iti autoridadna kadagiti adalanna?
5 Ni Jesus ket ‘naalumamay ti kababalinna ken napakumbaba ti pusona.’ (Mat. 11:29) Naalibtak met nga agtignay. Pulos a di nagliway kadagiti responsabilidadna. (Mar. 6:34; Juan 2:14-17) Siaasi a binalakadanna dagiti adalanna, ken maulit-ulit no kasapulan. (Mat. 20:21-28; Mar. 9:33-37; Luc. 22:24-27) Kaskasdi a saanna ida a tinagibassit wenno pinabainan. Dina met imparikna a saanda a maay-ayat wenno dida kabaelan nga iyaplikar ti insurona nga aramidenda. Imbes ketdi, pinadayawan ken pinaregtana dagiti adalanna. (Luc. 10:17-21) Di ngarud pakasdaawan a nagun-odan ni Jesus ti panagraem dagiti adalanna babaen ti naayat ken naasi a panangtratona kadakuada!
6. (a) Ania ti masursuro ti asawa a lalaki iti wagas ti panangtrato ni Jesus kadagiti adalanna? (b) Ania ti imparegta ni Pedro kadagiti assawa a lallaki?
6 Ti ulidan ni Jesus isurona kadagiti assawa a lallaki a ti kinauloda dina kaipapanan ti naulpit a panangdominar iti asawada. Imbes ketdi, dayta ket panangtrato a nabuyogan iti panagraem ken managsakripisio nga ayat. Pinaregta ni apostol Pedro dagiti assawa a lallaki a tuladenda dagiti naayat a wagas ti pannakilangen ni Jesus babaen ti ‘pannakipagtaengda iti umasping a pamay-an’ wenno panangipakitada iti pannakaawat iti assawada nga ‘itudinganda ida iti dayaw.’ (Basaen ti 1 Pedro 3:7.) Kasano ngarud a mausar ti asawa a lalaki ti autoridadna ken maigiddato iti dayta, matratona ti asawana kas maysa a maikari iti pammadayaw?
7. Kasano a mapadayawan ti asawa a lalaki ni baketna? Iyilustrar.
7 Ti maysa a wagas a mapadayawan ti asawa a lalaki ni baketna ket babaen ti panangikabilanganna a naimbag iti panangmatmat ken rikna ni baketna sakbay a mangaramid kadagiti desision a mangapektar iti pamilia. Nalabit ti desision ket maipapan iti iyaakar wenno panagbalbaliw iti trabaho, wenno maipapan iti inaldaw a pakaseknan, kas koma no sadino ti pagbakasionan wenno no kasano a baliwan ti badyet ti pamilia tapno maitunos dayta iti ingingina dagiti gagatangen. Gapu ta maapektaran ti pamilia, makagunggona ken kinaasi iti biang ti asawa a lalaki no usigenna ti opinion ni baketna, ta mabalin a makatulong dayta kenkuana a mangaramid iti balanse ken naan-annad a desision. Makatulong met dayta tapno nalaklaka a suportaran ni baketna dagiti desisionna. (Prov. 15:22) Ti Kristiano nga asawa a lalaki a mangpadpadayaw iti asawana saanna laeng a magun-odan ti ayat ken panagraem ni baketna no di pay ket ti napatpateg nga isu ti anamong ni Jehova.—Efe. 5:28, 29.
No Kasano a Mapadayawan ti Kristiano nga Asawa a Babai ni Lakayna
8. Apay a saan a mapagwadan ni Eva?
8 Ni Jesus ket perpekto nga ulidan kadagiti Kristiano nga assawa a babbai maipapan iti panagpasakup iti autoridad. Anian a naiduma ti panangmatmatna iti autoridad no idilig iti kababalin nga impakita ti immuna a tao nga asawa a babai! Saan a mapagwadan ni Eva kadagiti assawa a babbai. Isu ket addaan iti ulo a dinutokan ti Dios a nangibagaan ni Jehova iti bilin. Ngem dina rinaem dayta nga urnos. Dina tinungpal ti bilin nga impakaammo kenkuana ni Adan. (Gen. 2:16, 17; 3:3; 1 Cor. 11:3) Agpayso a naallilaw ni Eva; ngem inyumanna koma ken lakayna no rumbeng a patienna ti timek a mangibagbaga maipapan kano iti “ammo ti Dios.” Nupay dina karbengan, isun ti nagdesision imbes a ni lakayna.—Gen. 3:5, 6; 1 Tim. 2:14.
9. Ania ti inyulidan ni Jesus maipapan iti kinamanagpasakup?
9 Naiduma ni Jesus ta naan-anay nga inyulidanna ti panagpasakup iti Ulona. Ipakita ti kababalin ken panagbiagna a “saanna a pinanunot ti panangagaw, kayatna a sawen, nga isu makipada koma iti Dios.” Imbes ketdi, “inuksobanna ti bagina ket innalana ti langa ti maysa nga adipen.” (Fil. 2:5-7) Ita, kas agturturayen nga Ari, ipakpakitana pay laeng dayta a kababalin. Supsuportaranna ti kinaulo ni Amana ken sipapakumbaba nga agpaspasakup kenkuana kadagiti amin a banag.—Mat. 20:23; Juan 5:30; 1 Cor. 15:28.
10. Kasano a masuportaran ti asawa a babai ti kinaulo ni lakayna?
10 Ti Kristiano nga asawa a babai rumbeng a tuladenna ni Jesus babaen ti panangsuportarna iti kinaulo ni lakayna. (Basaen ti 1 Pedro 2:21; 3:1, 2.) Usigem ti maysa a situasion a maipakitana dayta. Ipakpakada ti anakna a lalaki no mabalin nga aramidenna ti maysa a banag a kasapulan ti pammalubos dagiti nagannakna. Gapu ta dida pay nagsaritaan dayta nga agassawa, maitutop laeng a saludsoden ti ina, “Imbagam kadin dayta ken tatangmo?” No saan pay, rumbeng nga iyumanna dayta ken lakayna sakbay nga agdesision. Kasta met a rumbeng a saan a kontraen wenno kuestionaran ti Kristiano nga asawa a babai ti pangngeddeng ni lakayna iti imatang dagiti annakda. No adda dina anamongan a nasao ni lakayna, isu ket makisarita kenkuana nga is-isuda a dua.—Efe. 6:4.
Ti Inyulidan ni Jesus Kadagiti Nagannak
11. Ania ti inyulidan ni Jesus kadagiti nagannak?
11 Nupay ni Jesus ket saan a nangasawa wenno naaddaan iti annak, isu ti kasayaatan nga ulidan kadagiti Kristiano a nagannak. Kasano? Siaayat ken siaanus a sinuruanna dagiti adalanna babaen iti sao ken aramid. Insurona kadakuada no kasano nga itungpal ti imbilinna. (Luc. 8:1) Nasursuro dagiti adalan no kasano ti rumbeng a panangtratoda iti maysa ken maysa babaen iti mapagwadan a panangtrato ken kababalin ni Jesus kadakuada.—Basaen ti Juan 13:14-17.
12, 13. Ania ti kasapulan tapno makapadakkel dagiti nagannak iti annak a managbuteng iti Dios?
12 Gagangay a tuladen dagiti annak ti ar-aramiden dagiti nagannakda, naimbag man dayta wenno dakes. Isu a dakayo a nagannak, saludsodanyo ti bagiyo: ‘Ania ti isursuromi kadagiti annakmi no maipapan iti kapaut ti panaglinglingay ken panagbuyami iti TV no idilig iti kapaut ti panagadalmi iti Biblia ken pannakiramanmi iti tay-ak ti serbisio? Ania a talaga dagiti ipangpangruna ti pamiliami? Mangipakpakitakami kadi iti nasayaat nga ulidan babaen iti panangipangpangrunami iti pudno a panagdayaw iti biagmi ken kadagiti desisionmi?’ Ti linteg ti Dios ket masapul nga itukit nga umuna dagiti nagannak iti mismo a pusoda no kayatda a makapadakkelda iti annak a managbuteng iti Dios.—Deut. 6:6.
13 No inaldaw nga ikagumaan dagiti nagannak nga iyaplikar dagiti prinsipio ti Biblia, sigurado a makita dayta dagiti annakda. Ti ibagbaga ken isursuro dagiti nagannak ket dakkel ti impluensiana kadagiti annak. Ngem no madlaw dagiti annak a saan a sursuroten dagiti nagannak dagiti pagalagadan nga isursuroda kadakuada, nalabit panunotenda a saan met a talaga a napateg ken makatulong dagiti prinsipio ti Biblia. Kas resultana, mabalin a nalaklaka a tumulok dagiti annak kadagiti nailubongan nga impluensia.
14, 15. Ania ti rumbeng nga itukit dagiti nagannak kadagiti annakda, ken ania ti maysa a pamay-an a maaramidda dayta?
14 Maamiris dagiti Kristiano a nagannak a saan laeng a ti panangipaay kadagiti material a kasapulan ti nasken iti panangpadakkel iti anak. No kasta, saan a nainsiriban ti panangisuro iti anak a ragpatenna dagiti kalat a mangparang-ay laeng kenkuana iti material a pamay-an. (Ecl. 7:12) Insuro ni Jesus kadagiti adalanna nga ipangpangrunada ti Pagarian ken ti kinalintegna. (Mat. 6:33) Gapuna, kas panangtuladda ken Jesus, dagiti Kristiano a nagannak ikagumaanda met nga itukit kadagiti annakda ti tarigagay a mangparang-ay iti panagserbida iti Dios.
15 Ti maysa a pamay-an a maaramid dayta dagiti nagannak ket ti panangyurnosda iti adu a gundaway tapno makalangen ti annakda dagidiay adda iti amin-tiempo a serbisio. Panunotenyo no kasano a maparegta dagiti agtutubo no maam-ammoda dagiti payunir wenno ti manangaywan iti sirkito ken ti asawana, no kasado. Dagiti agbakbakasion a misionero, Bethelite, ken dagidiay naggapu iti nadumaduma a paset ti lubong a tumultulong iti trabaho a panagibangon kadagiti pasdek nga agpaay ken Jehova, adu la ketdi ti maibagada maipapan iti rag-oda nga agserserbi ken Jehova. Sigurado a nagadu ti makapainteres a kapadasan a mayestoria dagita a kakabsat. Ti mapagwadan a managsakripisio a serbisioda ket makatulong unay iti annakyo tapno makaaramidda kadagiti nainsiriban a desision, makaikeddengda kadagiti kalat a mainaig iti panagserbi iti Dios, ken makapilida iti maitutop a kurso nga alaenda tapno masuportaranda ti bagida iti amin-tiempo a serbisio.
Annak—Ania ti Makatulong Kadakayo a Mangtulad iti Ulidan ni Jesus?
16. Iti ania a wagas a dinayaw ni Jesus dagiti nagannakna ditoy daga ken ti nailangitan nga Amana?
16 Kadakayo nga annak, nangipaay met ni Jesus iti nagsayaat nga ulidan para kadakayo. Dimmakkel ni Jesus iti poder da Jose ken Maria ket nagtulnog kadakuada. (Basaen ti Lucas 2:51.) Iti laksid ti kinaimperpektoda, binigbigna a ti Dios ti nangted kadakuada iti responsabilidad a mangaywan kenkuana. Maigapu iti dayta, maiparbeng laeng a dayawenna ida. (Deut. 5:16; Mat. 15:4) Kas agkabannuag, kanayon nga inaramid ni Jesus dagiti makaay-ayo iti nailangitan nga Amana. Kaipapanan dayta ti panangsarangetna iti sulisog. (Mat. 4:1-10) Dakayo nga ubbing ken agtutubo, nalabit namin-adun a nasulisogkayo a mangsukir kadagiti nagannakyo. Ania ngarud ti makatulong kadakayo a mangsurot iti ulidan ni Jesus?
17, 18. (a) Ania a kita ti pannulisog ti maipaspasango kadagiti ubbing ken agtutubo idiay eskuelaan? (b) Ti pananglaglagip iti ania ti makatulong kadagiti agtutubo tapno masarangetda dagiti pakasuotan?
17 Kaaduan kadagiti kaeskuelaanyo ti nalabit bassit wenno awan pay ketdi ti panangikabilanganda kadagiti pagalagadan ti Biblia. Mabalin a sulisogendakayo a makiraman kadagiti dakes nga aramid ken katkatawaandakayo no diyo kayat. Adda kadi makapasair nga ipampanaganda kadakayo gapu ta diyo kayat ti makiraman kadagiti ar-aramidenda? No adda, ania ti reaksionyo? Ammoyo a no pagustuanyo ida, mapagladingityo dagiti nagannakyo agraman ni Jehova. Ania ngay ti mapasamak kadakayo no surotenyo dagiti kaeskuelaanyo? Nalabit addan dagiti inkeddengyo a kalat a kas iti panagpayunir wenno panagbalin a ministerial nga adipen, panagserbi iti lugar nga agkasapulan iti ad-adu nga agibumbunannag iti Pagarian, wenno panagbalin a Bethelite. Maragpatyo ngata dagita a kalatyo no makibarbarkadakayo kadagiti kaeskuelaanyo?
18 Dakayo nga agtutubo iti kongregasion Kristiano, napasaranyo kadin dagiti situasion a nakasuotan ti pammatiyo? Ania ti inaramidyo? Panunotenyo ti ulidanyo a ni Jesus. Sinarangetna ti sulisog ken sititibker nga intakderanna ti ammona nga umiso. No laglagipenyo dayta, tumured ti pakinakemyo a mangilawlawag kadagiti kaeskuelaanyo a diyo kayat ti makikadua kadakuada a mangaramid iti ammoyo a di umiso. Kas ken Jesus, kanayon a panunotenyo ti namnama a mabalinyonto ti siraragsak nga agserbi ken agtulnog ken ni Jehova iti agnanayon.—Heb. 12:2.
Ti Tulbek ti Naragsak a Biag ti Pamilia
19. Ania a wagas ti panagbiag ti mangyeg iti pudno a kinaragsak?
19 Da Jehova a Dios ken ni Jesu-Kristo kayatda ti kasayaatan para iti sangatauan. Uray no imperpektotayo, posible nga agbalintayo a naragsak. (Isa. 48:17, 18; Mat. 5:3) Insuro ni Jesus dagiti kinapudno maipapan iti Dios a nakaibasaran ti kinaragsak ti sangatauan. Ngem saan la a dayta ti insurona kadagiti adalanna. Insuro met ni Jesus ti kasayaatan a wagas ti panagbiag. Kanayonanna, nangipakita iti nagsayaat nga ulidan iti balanse a panagbiag ken kababalin. No surotentayo ti ulidanna, magunggonaantayo amin, aniaman ti akemtayo iti pamilia. Gapuna, dakayo nga assawa a lallaki, assawa a babbai, nagannak, ken annak, surotenyo ti ulidan ni Jesus! Ti panangyaplikar kadagiti insuro ni Jesus ken panangtulad iti ulidanna ti talaga a tulbek tapno maaddaantayo iti makapnek ken naragsak a biag ti pamilia.
Ania ti Sungbatyo?
• Kasano ti rumbeng a panangipakat dagiti assawa a lallaki iti inted-Dios nga autoridadda?
• Kasano a matulad ti asawa a babai ti ulidan ni Jesus?
• Ania ti masursuro dagiti nagannak iti wagas ti panangtrato ni Jesus kadagiti adalanna?
• Ania ti masursuro dagiti ubbing ken agtutubo iti ulidan ni Jesus?
[Ladawan iti panid 8]
Sakbay a mangaramid iti desision a mangapektar iti pamilia, ania ti aramiden ti nadungngo nga asawa a lalaki?
[Ladawan iti panid 9]
Ania a situasion a maipakita ti asawa a babai a supsuportaranna ti kinaulo ni lakayna?
[Ladawan iti panid 10]
Tuladen ti annak dagiti nasayaat nga ugali ti nagannakda