Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Bueno, kitaentayo no masungbatanyo dagiti sumaganad a saludsod:

• Posible kadi a mapagungar ti natay a sikog?

Mangrugi ti biag bayat ti pannakayinaw. Kabaelan ni Jehova a pagungaren ti indibidual iti aniaman a benneg ti biag gapu ta “amin a bambanag mabalin iti Dios.” (Mar. 10:27) Ngem awan ti direkta nga ibaga ti Biblia a pagungarenna ti natay a sikog.​—4/15, panid 12, 13.

• Ania ti maadaltayo kadagiti kuton, koneho iti kabatuan, dudon, ken tekka?

Dagita nga uppat a parsua iparparangarangda ti naikasigudan a sirib. Gapuna, itandudoda ti kinasirib ti Dios. (Prov. 30:24-28)​—4/15, panid 16-19.

• Ania ti maysa a napateg a pagteng iti pakasaritaan dagiti Saksi ni Jehova a napasamak 100 a tawen ti napalabasen?

Idi 1909, ti hedkuarter ti Watch Tower Bible and Tract Society (ti rehistrado nga organisasion nga us-usaren dagiti Saksi ni Jehova nga agipablaak) nga adda iti Pittsburgh, Pennsylvania ket nayakar iti Brooklyn, New York, nga ayanna agingga ita.​—5/1, panid 22-24.

• Apay nga iparegta ti Biblia ti panagulimek?

Tanda dayta ti panagraem, makatulong iti panagmennamenna, ken pakakitaan iti kinaannad ken nauneg a pannakaawat. (Sal. 37:7; 63:6; Prov. 11:12)​—5/15, panid 3-5.

• Ania ti nagpapadaan da John Wycliffe, William Tyndale, Robert Morrison, ken Adoniram Judson?

Agpapadada a mangipatpateg iti Sao ti Dios ken impatarusda dayta kadagiti lenguahe a mabasa dagiti ordinario a tattao. Ni Wycliffe ken ni Tyndale impatarusda dayta iti Ingles, ni Morrison iti Tsino, ken ni Judson iti Burmese (Myanmar).​—6/1, panid 8-11.

• Mano nga ari ti Juda ti nangipakita iti naisangsangayan a kinaregta iti balay ti Dios?

Sangapulo ket siam nga ari ti nagturay iti abagatan a pagarian ti Juda ngem uppat laeng ti addaan iti naisangsangayan a kinaregta​—da Asa, Jehosafat, Ezekias, ken Josias.​—6/15, panid 7-11.

• Amin kadi a napulotan a Kristiano ditoy daga ket makiramraman iti panangipaay iti naespirituan a taraon?

Saan. Amin a napulotan iti espiritu ti Dios ket paset ti matalek ken masirib a klase adipen ngem dagidiay laeng mangbukel iti Bagi a Manarawidwid ti mangimatmaton iti naespirituan a panagpakan.​—6/15, panid 22-24.

• Apay a dagiti Romano a soldado tinarigagayanda ti makin-uneg a kawes ni Jesus?

Ti kawes ni Jesus bayat ti pannakailansana ket saan a pinagguguduaan dagiti soldado. Masansan a ti kasta a kawes ket dua a nagsaip a tela. Ngem ti kawes ni Jesus ket awan nagsaipanna isu a nanginngina.​—7/1, panid 22.

• Apay a maibaga nga ayat ti kangrunaan a nagdumaan ti pamay-an ni Jesus ken ti pamay-an dagiti lider ti relihion?

Imbes nga ayatenda dagiti ordinario a tattao, inumsi ida dagiti lider ti relihion. Maysa pay, saanda nga ay-ayaten ti Dios. Ni Jesus ay-ayatenna ni Amana ken naasian kadagiti tattao. (Mat. 9:36) Isu ket nadungngo, mannakipagrikna, ken naasi kadakuada.​—7/15, panid 15.

• Apay a maysa a karit kadagiti agassawa ti panagbadyet, ken ania ti makatulong kadakuada nga agballigi iti dayta nga aspeto?

Masansan a ti makagapu iti di pagkinnaawatan maipapan iti kuarta ket mainaig iti panagtalek wenno panagamak, ken mabalin a nagduma ti nalikudan dagiti agassawa. Dagiti uppat a tulbek tapno agballigi ket: Agtalinaedkayo a kalmado no pagsaritaanyo ti maipapan iti kuarta, tinongenyo no kasanoyo nga usaren ti masapulanyo, isuratyo ti badyet ti pamiliayo, ken pagnumuanyo no asino ti mangaramid iti maysa a banag.​—8/1, panid 10-12.