Ti Panagturpos ti Maika-126 a Klase ti Gilead

No Kasano ti Agbalin a Naballigi a Misionero

MAGAGARAN dagiti nagtataripnong iti Watchtower Educational Center idiay Patterson, New York para iti espesial nga okasion. Dayta ti panagturpos ti maika-126 a klase ti Watchtower Bible School of Gilead idi Sabado, Marso 14, 2009. Dagiti agturpos dandanidan maibaon iti 22 a pagilian tapno ikasabada ti naimbag a damag ti Pagarian ti Dios.​—Mateo 24:14.

Dagiti estudiante kalkalpasda nga inadal a naimbag ti Biblia iti lima a bulan tapno matulonganda nga agballigi kas Kristiano a misionero. Ti aldaw ti panagturposda ti maudi a gundawayda kas maysa a klase a dumngeg kadagiti nainsiriban a balakad no kasanoda nga agballigi.

Idi 1943, nangrugi ti Eskuelaan ti Gilead a mangsanay kadagiti misionero, kinuna ni Anthony Morris a tserman ti programa ken kameng ti Bagi a Manarawidwid dagiti Saksi ni Jehova. Sipud idin, nagdakkel ti naaramidanen dagiti nagturpos para iti sangalubongan a trabaho a panangasaba.

Kinuna ti ispiker a nupay dagiti eskriba ken Fariseo tinagibassitda dagiti apostol ni Jesus kas “awan adalna ken gagangay,” kapilitan a binigbig dagidiay a bumusbusor a ti kinaprangka dagiti apostol ket resulta ti pannakikuykuyogda ken Jesus. (Aramid 4:13) Gapu iti pannakasanay dagiti estudiante, nagbalinda a natured a mangasaba.

“Saan a Dagiti Rupa ti Kitaenyo” ti tema nga impalawag ni Robert Ciranko, a katulongan ti Writing Committee ti Bagi a Manarawidwid. Impaganetgetna kadagiti estudiante a maam-ammodanto dagiti tattao a naiduma unay ti kultura ken kostumbreda. Ngem didanto marigatan a mangasaba kadakuada no tuladenda ti kababalin ni Jehova. Sigun iti literal a patarus ti Aramid 10:34, “Saan a dagiti rupa ti kitkitaen ti Dios,” kayatna a sawen, “ti Dios saan a mangidumduma.” (Aramid 10:35) Kinuna ni Kabsat Ciranko: “No tuladenyo ti kababalin ti Dios ken no matmatanyo ti tunggal maysa iti pakaidestinuanyo kas potensial nga anamongan ti Dios, sigurado nga agballigikayo kas misionerona.”

“Nakabalankayon nga Agballigi”

Kastoy ti panglukat a sasao ni Samuel Herd a miembro ti Bagi a Manarawidwid: “Ibilang ti dadduma a nalaad ti kamelio, ngem kabaelanna ti agbiag iti desierto.” Umasping iti dayta, kabaelan dagiti kabbaro a misionero ti agballigi iti pakaidestinuanda. Lima a banag ti makatulong kadakuada.

1. Panagayat ken Jehova. (Mateo 22:37, 38) Naipakitan dagiti estudiante ti determinasionda nga agserbi ken Jehova.

2. Naipempen a pannakaammo iti Sao ti Dios. Ti kamelio ket agipempen iti taraon iti taba ti bungkatolna. Ngem saan a sumardeng a mangan gapu ta addan reserbana a taraon. Dagiti misionero nasken met a dida agpannuray lattan kadagiti impormasion a naadalda iti Gilead no di ket agtultuloyda a gumun-od iti naespirituan a taraon.

3. Panagayat kadagiti tattao. (Mateo 22:39) Dagiti estudiante ket mannakipagrikna kadagiti tattao.

4. Natulok a kababalin. (Salmo 110:3) No mapaksuyan ti maysa misionero, isu ket pabilgento ni Jehova.​—Isaias 40:29.

5. Kired ti agkabannuag. No kasano a ti kamelio iballasiwna iti desierto ti nakasakay kenkuana, mabalin met nga adda kapammatian a marigrigatan iti naespirituan nga arigna sumakay iti maysa a misionero. Agkasapulan dayta iti kasta unay a bileg, ngem dagiti misionero ket addaan iti kired ti agkabannuag.

Dadduma Pay a Paset ti Programa

Karaman dagiti almendro kadagiti kasayaatan a bunga nga impatulod ni Jacob kas sagut iti panguluen ti Egipto, kinuna ti maysa nga instruktor ti Gilead a ni Michael Burnett. (Genesis 43:11) Bassit ti almendro ngem nasustansia. Adu a naespirituan nga almendro ti impauneg dagiti estudiante bayat ti panagadalda. Karaman kadagiti nasursuro dagiti misionero a nasken a balonenda ket ti kinapateg ti panagbalinda a kontento kadagiti probision ni Jehova ken panagsursuroda a mangipateg iti baro a pagyananda.

Ni Mark Noumair nga instruktor met iti Gilead inlawlawagna a ti Sao ti Dios ket kasla “sangasupot a sirib.” (Job 28:18) Masapul a luktantayo daytoy a supot ken usarentayo dagiti linaonna. No ti panagserbi kas misionero ket saan a kas iti ninamnama dagiti estudiante, mabalin a lagipenda ni apostol Pablo. Dagiti adalan ni Jesus imbaonda ni Pablo iti mismo nga ilina a nagyananna iti siam a tawen. Imbes a panunotenna a kas “napili a basehas” rumbeng nga isu ket agserbi iti sabali a lugar, inggaed ni Pablo ti nagserbi iti sadinoman nga ayanna. (Aramid 9:15, 28-30) No dadduma, mabalin a narigat nga akseptaren dagiti pangngeddeng ni Jehova. Ni Jonatan ti sabali pay a nangaramid iti kasta. Gapu ta binigbigna a ni David ti pinili ni Jehova nga ari, naragsakan ni Jonatan a nangsuporta kenkuana.

Iti paset a “Situtured nga Agsao Dagiti Agserserbi iti Dios,” inyakto dagiti estudiante dagiti kapadasanda iti pangasabaan bayat ti panagadalda. Adu kadakuada ti nakairugi iti panangyadal iti Biblia. Iti simmaganad a paset nga “Insagana ti Organisasion ni Jehova,” nainterbiu ti tallo a nabayagen a misionero. Inlawlawag ti tunggal maysa no kasano ti pannakasanayna a makitinnulong iti organisasion ti Dios.

“Agbalinkayo a Naragsak a Misionero”

Ni Gerrit Lösch a maysa pay a kameng ti Bagi a Manarawidwid, imparangna ti kangrunaan a paset ti programa a napauluan iti “Agbalinka a Naragsak a Misionero.” Kinunana nga awan ti pudno a kinaragsak nga iyeg ti adu nga aktibidad a maibilbilang a “makaparagsak.” (Proverbio 14:13; Eclesiastes 2:10, 11) Ti manayon a kinaragsak ket resulta ti panagaramid iti pagayatan ti Dios uray no saan a kanayon a nalaka dayta. Narigat ti agadal iti Gilead ngem mangyeg iti kasta unay a pannakapnek.

Adda sumagmamano a banag a makatulong tapno agbalin a naragsak dagiti pudno a Kristiano. Agdaydayawda iti naragsak a Dios. (Salmo 33:12; 1 Timoteo 1:11) Agbibiagda iti naespirituan a paraiso, ken ikarkari ti Biblia a ti daga ket asidegen nga agbalin a literal a paraiso. Naammuandan ti panggep ti biag​—agserbi ken agdayaw ken Jehova. Kanayonanna, ay-ayaten ida da Jehova ken Jesus.

“Agbalinkayto a naragsak a misionero,” innayon ti ispiker, “no masursuroyo ti agbalin a kontento.” Ti panagayattayo iti sabsabali ken ti panagayatda met kadatayo ti maysa pay a pakaigapuan ti kinaragsak. Gapuna, abbongantayo dagiti biddut ti sabsabali imbes a padakkelentayo dagita. Agaramidtayo iti naimbag kadagiti sabsabali, tulongantayo dagiti nakapuy, iranudtayo dagiti nagsasayaat a kapadasan. (Salmo 41:1, 2; Aramid 20:35) Mangyeg iti kinaragsak ti pannakiraman iti trabaho a panangasaba.​—Lucas 11:28.

“Inkayo kas naragsak a misionero,” inngudo ni Kabsat Lösch, “agragragsakkayo iti kalkalainganna ngem ipangpangrunayo ti panangidaydayaw iti naragsak a Diostayo a ni Jehova, ken iti panangparagsakyo iti adu a sabsabali pay.”

Kalpasan ti panangidanonna iti kablaaw manipud iti adu a pagilian, inyawat ni Anthony Morris ti diploma dagiti nagturpos. Kalpasanna, ti pannakabagi ti maika-126 a klase binasana ti surat para iti Bagi a Manarawidwid. Iti dayta a surat, inyebkas dagiti estudiante ti panagyamanda iti panagadalda iti Eskuelaan ti Gilead.

Kas pangserra a sasao, kinuna ti tserman a dagiti pamay-an ken urnos nga us-usaren ti “matalek ken masirib nga adipen” tapno mataraonan ken maiwanwan ti ili ni Jehova ket kas kadagiti ‘nagsusuopan ken ur-urat’ a namagsasangal iti bagi. (Colosas 2:18, 19; Mateo 24:45) No dagiti nagturpos iti Gilead ket naan-anay a makikooperar kadagiti tinudingan ti Dios a pannakabagina, agballigidanto iti panangitungpalda a naan-anay iti ministerioda.​—2 Timoteo 4: 5.

[Kahon iti panid 30]

ESTADISTIKA TI KLASE

Bilang dagiti pagilian a nairepresentar: 6

Bilang dagiti pagilian a pakaibaonan: 22

Bilang dagiti estudiante: 56

Bilang dagiti agassawa: 28

Promedio nga edad: 32.8

Promedio a tawen iti kinapudno: 17.9

Promedio a tawen iti amin-tiempo a ministerio: 13.5

DAGITI PAKAIBAONANDA

Dagiti nagturpos ket maibaon idiay Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, ken Uganda.

[Ladawan iti panid 31]

Maika-126 a Klase a Nagturpos iti Watchtower Bible School of Gilead

Nanumeruan dagiti intar manipud iti sango nga agpalikud, ken iti kada intar, nailista dagiti nagan manipud kannigid nga agpakannawan.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.