“Dakayo ti Gagayyemko”

“Dakayo ti gagayyemko no aramidenyo ti ibilbilinko kadakayo.”​—JUAN 15:14.

1, 2. (a) Ania ti nagduduma a nalikudan dagiti gagayyem ni Jesus? (b) Apay a napateg ti agbalin a gayyem ni Jesus?

Nagduduma ti nalikudan dagiti kakadua ni Jesus iti makinngato a siled. Mangngalap idi dagiti agkabsat a Pedro ken Andres. Ni Mateo ket sigud nga agsingsingir iti buis​—maysa a trabaho a lalaisen dagiti Judio. Dadduma, kas kada Santiago ken Juan, am-ammoda ni Jesus manipud kinaubingna. Dadduma met, kas ken Natanael, ti nalabit a sumagmamano pay laeng a tawen nga am-ammoda ni Jesus. (Juan 1:43-50) Kaskasdi, amin a presente iti dayta a nakallalagip a rabii ti Paskua idiay Jerusalem ket kombinsido a ni Jesus ti naikari a Mesias, ti Anak ti sibibiag a Dios. (Juan 6:68, 69) Sigurado a napabilegda idi kinunana kadakuada: “Inawagankay iti gagayyem, agsipud ta amin a bambanag a nangngegko iti Amak impakaammok kadakayo.”​—Juan 15:15.

² Dagita a sasao ni Jesus kadagiti matalek nga apostolna ti agaplikar, no an-anagen, kadagiti amin a napulotan a Kristiano ita ken uray pay kadagiti kakaduada a “sabsabali a karnero.” (Juan 10:16) Aniaman ti nalikudantayo, mabalintayo ti maaddaan iti pribilehio nga agbalin a gayyem ni Jesus. Nakapatpateg ti agbalin a gayyemna yantangay dayta ti mamagbalin met kadatayo a gayyem ni Jehova. Kinapudnona, imposible ti agbalin a nasinged ken Jehova no saantayo nga umuna nga agbalin a nasinged ken Kristo. (Basaen ti Juan 14:6, 21.) Ania ngarud ti masapul nga aramidentayo tapno agbalin ken agtalinaedtayo a gayyem ni Jesus? Sakbay a lawlawagantayo dayta a nagpateg a topiko, usigentayo nga umuna ti mismo nga ulidan ni Jesus kas nasayaat a gayyem ken kitaentayo no ania ti maadaltayo iti reaksion dagiti adalanna iti dayta.

Ni Jesus kas Nasayaat a Gayyem

3. Iti ania a nagdindinamag ni Jesus?

³ “Adu ti gagayyem ti nabaknang a tao,” insurat ti masirib nga ari a ni Solomon. (Prov. 14:20) Dayta a kapaliiwan ipakitana ti pagannayasan dagiti imperpekto a tattao​—makigayyemda sigun iti maalada imbes nga iti maitedda. Awan ti kasta a pagannayasan ni Jesus. Saan a naimpluensiaan iti kinabaknang wenno kinalatak ti maysa. Pudno, impateg ni Jesus ti maysa a nabaknang ken agkabannuag nga agturay ken inawisna nga agbalin nga adalanna. Ngem imbaga kenkuana ni Jesus nga ilakona ti sanikuana ken itedna kadagiti napanglaw. (Mar. 10:17-22; Luc. 18:18, 23) Nagdindinamag ni Jesus kas mannakigayyem kadagiti nanumo ken malalais, saan ket a kas maysa a nadekket kadagiti nabaknang ken prominente.​—Mat. 11:19.

4. Apay a maikunatayo nga adda pagkapuyan dagiti gagayyem ni Jesus?

⁴ Awan duadua nga adda pagkapuyan dagiti gagayyem ni Jesus. Adda dagiti gundaway a saan a naespirituan ti panangmatmat ni Pedro kadagiti bambanag. (Mat. 16:21-23) Nangipakita da Santiago ken Juan iti kinaambisioso idi kiniddawda ken Jesus ti nangato a saad iti Pagarian. Dayta ti namagpungtot kadagiti dadduma nga apostol, ken nagtultuloy a nagriririanda no siasino ti katan-okan. Ngem iti laksid amin dagita, saan a dagus a nagpungtot ni Jesus kadagiti gagayyemna no di ket siaanus nga inaturna ti panagpampanunotda.​—Mat. 20:20-28.

5, 6. (a) Apay a nagtalinaed a gagayyem ni Jesus ti kaaduan nga apostol? (b) Apay a ginuped ni Jesus ti panaggayyemda ken Judas?

⁵ Nagtultuloy a gayyem ni Jesus dagiti imperpekto a tattao saan a gapu ta pampanuynoyanna ida wenno dina makita dagiti pagkapuyanda. Imbes ketdi, dagiti nasayaat a motibo ken galadda ti kinitana. Kas pagarigan, nakaturog da Pedro, Santiago, ken Juan imbes nga agpuyatda a kadua ni Jesus bayat ti karigatan a pannubok a napasaranna. Matarusantayo no kas pagarigan ta nadismaya kadakuada ni Jesus. Kaskasdi, nakitana a nasayaat ti motiboda isu a kinunana: “Ti espiritu, siempre, sigagagar, ngem ti lasag nakapuy.”​—Mat. 26:41.

⁶ Iti kasumbangirna, ginuped ni Jesus ti panaggayyemda ken Judas Iscariote. Nupay intultuloy ni Judas ti pammarang a pannakigayyemna ken Jesus, nakita ni Jesus nga impalubos daytoy sigud a gayyemna nga agtubo ti kinadakes iti pusona. Gapu ta nakigayyem ni Judas iti daytoy a lubong, pinagbalinna ti bagina a kabusor ti Dios. (Sant. 4:4) Gapuna, indeklara ni Jesus a gagayyemna dagiti nabati a 11 a matalek nga apostol kalpasan a pinapanawna ni Judas.​—Juan 13:21-35.

7, 8. Kasano nga impakita ni Jesus ti panagayatna kadagiti gagayyemna?

⁷ Saan a dagiti pagkapuyan dagiti nasungdo a gagayyem ni Jesus ti kangrunaan a kinitana. Imbes ketdi, inaramidna no ania ti pagimbaganda. Kas pagarigan, inkararagna a salakniban ida ni Amana bayat dagiti pannakasuotda. (Basaenyo ti Juan 17:11.) Nangipakita ni Jesus iti konsiderasion kadagiti pisikal a limitasionda. (Mar. 6:30-32) Saan laeng nga interesado a mangyebkas kadakuada iti kapanunotanna no di ket kayatna met nga imdengan ken tarusan no ania ti kapanunotan ken riknada.​—Mat. 16:13-16; 17:24-26.

⁸ Inusarna ti biagna agingga ken patay para kadagiti gagayyemna. Pudno, ammona nga idatonna ti biagna tapno maannurot ti pagalagadan ni Amana mainaig iti hustisia. (Mat. 26:27, 28; Heb. 9:22, 28) Ngem intedna ti biagna gapu iti ayatna. “Awan asinoman nga addaan iti dakdakkel nga ayat ngem iti daytoy,” kinuna ni Jesus, “a ti maysa isukona ti kararuana maigapu kadagiti gagayyemna.”​—Juan 15:13.

Impateg Dagiti Adalan ti Pannakigayyem ni Jesus

9, 10. Kasano a sinubadan dagiti tattao ti kinaparabur ni Jesus?

⁹ Sipaparabur a nangipaay ni Jesus iti tiempo, ayat, ken material a bambanag. Kas resultana, naay-ayo kenkuana dagiti tattao ken naragsakanda a nangsubad iti kinaimbagna. (Luc. 8:1-3) Gapu iti mismo a kapadasanna, naikuna ni Jesus: “Iyugaliyo ti mangted, ket mangtedto kadakayo dagiti tattao. Ibukbokdanto kadagiti saklotyo ti nasayaat a rukod, nasedsed, nayegyeg ken agliplippias. Ta ti rukod a pangrukrukodyo, pangrukoddanto met kadakayo.”​—Luc. 6:38.

¹⁰ Ngem adda dagidiay nakikadua laeng ken Jesus gapu ta ammoda nga adda maalada kenkuana. Isu a dagitoy a sinsinan gagayyem pinanawanda ni Jesus idi adda imbagana a saanda a naawatan. Imbes nga agtalekda ken Jesus, dagus a pinagduaduaanda ket pinanawanda. Ngem nasungdo kenkuana dagiti apostol. Masansan a nasubok ti pannakigayyemda ken Kristo. Nupay kasta, inaramidda ti amin a kabaelanda a mangsuporta kenkuana iti aniaman a kasasaad. (Basaen ti Juan 6:26, 56, 60, 66-68.) Iti maudi a rabii ni Jesus ditoy daga kas tao, inyebkasna ti pammategna kadagiti gagayyemna: “Dakayo dagidiay nagtalinaed kaniak kadagiti pannakasusuotko.”​—Luc. 22:28.

11, 12. Kasano a pinasingkedan ni Jesus ti pannakigayyemna kadagiti adalanna, ken ania ti inaramidda?

¹¹ Di nagbayag kalpasan a kinomendaran ni Jesus dagiti adalanna gapu iti kinasungdoda, isu ket pinanawanda. Temporario nga impalubosda a ti panagbuteng iti tao ti nangringbaw iti ayatda ken Kristo. Kaskasdi a pinakawan ida ni Jesus. Kalpasan ti ipapatay ken panagungarna, nagparang kadakuada ket pinasingkedanna ti pannakigayyemna kadakuada. Intalekna pay kadakuada ti maysa a sagrado nga annongen​—ti panagaramid kadagiti adalan manipud “kadagiti tattao iti amin a nasion” ken ti panangsaksida kenkuana “agingga iti kaadaywan a paset ti daga.” (Mat. 28:19; Ara. 1:8) Ania ti inaramid dagiti adalan?

¹² Inkagumaanda nga insaknap ti mensahe ti Pagarian. Babaen ti tulong ti nasantuan nga espiritu ni Jehova, dagus a nagsaknap ti pannursuroda iti intero a Jerusalem. (Ara. 5:27-29) Uray ti pangta ni patay saan a nakalapped kadakuada a mangitungpal iti bilin ni Jesus a mangaramid kadagiti adalan. Iti sumagmamano laeng a dekada kalpasan nga inawatda ti bilin ni Jesus, naikuna ni apostol Pablo a ti naimbag a damag ket naikasaban “iti isuamin a parsua nga adda iti baba ti langit.” (Col. 1:23) Awan duadua a pinaneknekan dagiti adalan nga impategda ti pannakigayyemda ken Jesus!

13. Kadagiti ania a pamay-an nga impalubos dagiti adalan a maimpluensiaanda iti pannursuro ni Jesus?

¹³ Dagidiay nagbalin nga adalan inyaplikarda iti biagda dagiti pannursuro ni Jesus. Adu kadakuada ti masapul a mangaramid kadagiti dakkel a panagbalbaliw iti kondukta ken personalidadda. Dadduma kadagiti kabbaro nga adalan ti dati a homoseksual, mannakikamalala, mammartek, wenno mannanakaw. (1 Cor. 6:9-11) Adda met dagidiay masapul a mangbaliw iti panangmatmatda kadagiti sabali a puli. (Ara. 10:25-28) Kaskasdi, nagtulnogda ken Jesus. Inuksobda ti daan a personalidadda ken inkawesda ti baro a personalidad. (Efe. 4:20-24) Naammuanda ti “panunot ni Kristo,” kayatna a sawen, natarusan ken tinuladda ti panangmatmat ken panagtigtignayna.​—1 Cor. 2:16.

Pannakigayyem Ita ken Kristo

14. Ania ti inkari ni Jesus nga aramidenna bayat “ti panungpalan ti sistema ti bambanag”?

¹⁴ Adu kadagiti Kristiano idi umuna a siglo ti personal a makaam-ammo wenno nakakita kenkuana kalpasan a napagungar. Siempre, saantay a napadasan dayta a pribilehio. Kasano ngarud nga agbalintayo a gayyem ni Kristo? Ti maysa ket ti panagtulnog iti instruksion ti klase matalek ken masirib nga adipen, a buklen dagiti napulotan iti espiritu a kakabsat ni Jesus a sibibiag pay laeng ditoy daga. Inkari ni Jesus a bayat “ti panungpalan ti sistema ti bambanag,” dutokanna daytoy nga adipen “nga agaywan kadagiti amin a sanikuana.” (Mat. 24:3, 45-47) Iti kaaldawantayo, kaaduan kadagiti agtarigagay a makigayyem ken Kristo ket saan a kameng daytoy a klase adipen. Kasano a ti panagtignayda iti instruksion nga inawatda iti klase matalek ken masirib nga adipen impluensiaanna ti pannakigayyemda ken Kristo?

15. Kasano a maibilang ti maysa kas karnero wenno kalding?

¹⁵ Basaen ti Mateo 25:31-40. Imbilang ni Jesus a kakabsatna dagidiay mangbukel iti klase matalek nga adipen. Iti pangngarig maipapan iti panangilasin kadagiti karnero manipud kadagiti kalding, silalawag a kinuna ni Jesus nga ibilangna a panangtrato kenkuana ti panangtratotayo kadagiti kakabsatna. Kinapudnona, kinuna ni Jesus a maibilang a karnero wenno kalding ti maysa depende iti panangtratona iti ‘kanunumuan kadagiti kakabsatna.’ Gapuna, ti kangrunaan a pamay-an a maipakita dagidiay addaan iti naindagaan a namnama a tarigagayanda ti agbalin a gayyem ni Kristo ket babaen ti panangsuportada iti klase matalek nga adipen.

16, 17. Kasano a maipakitatayo ti pannakigayyemtayo kadagiti kakabsat ni Kristo?

¹⁶ No mangnamnamakayo nga agbiag ditoy daga iti sidong ti Pagarian ti Dios, kasano a maipakitayo a gayyemyo dagiti kakabsat ni Kristo? Usigentayo ti uray tallo laeng a pamay-an. Umuna, babaen ti naimpusuan a pannakiraman iti panangasaba. Imbilin ni Kristo kadagiti kakabsatna nga ikasabada ti naimbag a damag iti intero a lubong. (Mat. 24:14) Ngem dagiti natda a kakabsat ni Kristo ditoy daga marigatanda a mangitungpal iti dayta nga annongen no awan ti tulong dagiti kakaduada a sabsabali a karnero. Gapuna, tunggal mangasaba ti klase sabsabali a karnero, tultulonganda dagiti kakabsat ni Kristo a mangitungpal iti sagrado nga annongenda. Ni Kristo ken ti klase matalek ken masirib nga adipen apresiarenda unay dayta nga ebkas ti pannakigayyem.

¹⁷ Ti maikadua a pamay-an ket babaen ti panangipaay iti pinansial a tulong iti trabaho a panangasaba. Pinaregta ni Jesus dagiti pasurotna a makigayyemda babaen ti “nakillo a kinabaknang.” (Luc. 16:9) Ngem dina kayat a sawen a mapasuksokantayo ni Jesus wenno ni Jehova tapno agbalintayo a gayyemda. Imbes ketdi, usarentayo dagiti sanikuatayo a mangidur-as kadagiti interes ti Pagarian. Iti kasta, mapaneknekantayo ti pannakigayyem ken ayattayo, saan laeng nga iti sao, no di ket “iti aramid ken kinapudno.” (1 Juan 3:16-18) Maipaaytayo dagita a pinansial a tulong no mangasabatayo, agdonartayo para iti panagibangon ken panangmantener kadagiti paggigimongantayo, ken agdonartayo para iti sangalubongan a trabaho a panangasaba. Bassit man wenno dakkel ti kontribusiontayo, sigurado nga ipateg ni Jehova ken ni Jesus ti naragsak a panangtedtayo.​—2 Cor. 9:7.

18. Apay a masapul nga agtulnogtayo kadagiti naibatay iti Biblia nga instruksion dagiti panglakayen?

¹⁸ Ti maikatlo a pamay-an ket babaen ti panagtulnog kadagiti instruksion nga ipapaay dagiti panglakayen. Dagitoy a lallaki ket dinutokan ti nasantuan nga espiritu iti panangiwanwan ni Kristo. (Efe. 5:23) “Agtulnogkayo kadagidiay mangidadaulo kadakayo ket agpasakupkayo,” insurat ni apostol Pablo. (Heb. 13:17) No dadduma, marigatantayo nga agtulnog kadagiti naibatay iti Biblia nga instruksion dagiti panglakayen. Nalabit nga ammotayo ngamin dagiti pagkuranganda ket dayta ti mangapektar iti panangmatmattayo iti balakadda. Kaskasdi a ni Kristo, ti Ulo ti kongregasion, us-usarenna dagitoy nga imperpekto a lallaki. Gapuna, ti reaksiontayo iti autoridadda ket direkta a mangapektar iti pannakigayyemtayo ken Kristo. No palabsentayo dagiti pagkapuyan dagiti panglakayen ken siraragsak a sumurottayo iti instruksionda, mapaneknekantayo nga ay-ayatentayo ni Kristo.

Ti Pakasarakantayo Kadagiti Nasayaat a Gagayyem

19, 20. Ania ti masarakantayo iti kongregasion, ken ania ti usigentayo iti sumaganad nga artikulo?

¹⁹ Agtultuloy nga aywanannatayo ni Jesus saan laeng a babaen ti panangiwanwan dagiti naayat a pastor no di ket babaen ti panangipaayna kadagiti naespirituan nga inna ken kakabsat iti uneg ti kongregasion. (Basaen ti Marcos 10:29, 30.) Ania ti reaksion dagiti kakabagianyo idi damo a nakitimpuyogkayo iti organisasion ni Jehova? Nalabit a sinuportaranda ti panagreggetyo nga umadani iti Dios ken ni Kristo. Ngem namakdaar ni Jesus a no dadduma, “dagiti kabusor ti maysa a tao isudanto dagiti tattao iti bukodna a sangakabbalayan.” (Mat. 10:36) Anian a makaliwliwa a maammuan nga iti uneg ti kongregasion, makasaraktayo kadagiti nasingsinged kadatayo ngem iti kabsattayo iti lasag!​—Prov. 18:24.

²⁰ Kas impamatmat ti kablaaw ni Pablo iti ngudo ti suratna iti kongregasion ti Roma, adu ti nagbalin a nasinged a gagayyemna. (Roma 16:8-16) Kastoy ti panangingudo ni apostol Juan iti maikatlo a suratna: “Idanonmo dagiti kablaawko kadagiti gagayyem nga inaganan ida.” (3 Juan 14) Awan duadua a naaddaan met ni Juan kadagiti nasinged a gagayyem. Kasano a matuladtayo ti ulidan ni Jesus ken dagiti nagkauna nga adalanna no maipapan iti panangpatanor ken panangtaginayon iti makagunggona a pannakigayyem kadagiti kapammatiantayo? Mausig ti sungbat dayta a saludsod iti sumaganad nga artikulo.

Ania ti Sungbatyo?

• Ania nga ulidan ti impasdek ni Jesus kas nasayaat a gayyem?

• Ania ti reaksion dagiti adalan iti pannakigayyem kadakuada ni Jesus?

• Kasano a maipakitatayo a gayyemtayo ni Kristo?

[Ladawan iti panid 14]

Interesado ni Jesus iti kapanunotan ken rikna dagiti gagayyemna

[Dagiti Ladawan iti panid 16]

Kasano a maipakitatayo a kayattayo ti agbalin a gayyem ni Kristo?