Salsaludsod Dagiti Agbasbasa

Maiparbeng kadi nga agdalungdong dagiti kakabsat a babbai a paraipatarus (interpreter) iti naibatay-Biblia a palawag babaen ti sign language kadagiti Nakristianuan a gimong, asamblea, wenno kombension?

Gagangay nga agdalungdong ti Kristiano a babai no agakem kadagiti annongen nga agpaay iti asawana wenno iti maysa a kabsat a lalaki iti kongregasion. Maitunos dayta iti prinsipio a kinuna ni apostol Pablo a ti “tunggal babai nga agkararag wenno agipadto a ti ulona di nadalungdongan ibabainna ti ulona” gapu ta “ti ulo ti babai isu ti lalaki.” (1 Cor. 11:3-10) No agusar iti nanakman ken maitutop a dalungdong kadagita a kasasaad, ipakpakita ti babai ti panagpasakupna iti teokratiko nga urnos ti kongregasion Kristiano.​—1 Tim. 2:11, 12.a

Komusta ngay no ti kabsat a babai ipatarusna ti palawag ti kabsat a lalaki babaen ti sign language? Pudno, agipatpatarus laeng ti kabsat a babai. Kayatna a sawen a saan nga isu ti mangisursuro no di ket ti lalaki. Ngem dakkel ti nagdumaan ti panagipatarus babaen ti sign language ken ti berbal a panagipatarus. Iti berbal a panagipatarus, ti tallaong maisentroda ti atensionda iti agpalpalawag bayat a dengdenggenda ti paraipatarus. Kasta met, saan a kas kadagiti paraipatarus iti sign language, dagiti kakabsat a babbai a berbal a paraipatarus ket agplastarda iti lugar a saan a maisentro kadakuada ti atension ti tallaong. No dadduma, mabalin nga agtugawda bayat nga agipatpatarusda. No kayatda ti nakatakder, sanguenda ti agpalpalawag imbes a dagiti agdengdengngeg. Iti kasta, saanen a masapul nga agdalungdong dagiti kakabsat a babbai a berbal a paraipatarus.

Malaksid kadagita, gapu iti narang-ay a teknolohia a mausar no maipatarus dagiti palawag iti sign language, masansan a ti laeng paraipatarus ti maipakita iti monitor isu a maisentro kenkuana ti atension. Gapuna, maitutop laeng a ti kabsat a babai a paraipatarus iti sign language ket agdalungdong kas panangipakita iti panangbigbigna a segundario ti akemna.

Kasano a daytoy a baro nga instruksion apektaranna ti panagipatarus babaen ti sign language mainaig kadagiti paset iti Teokratiko nga Eskuelaan ti Panagministro, demostrasion, ken komento bayat ti Panagadal ti Kongregasion iti Biblia, Gimong ti Serbisio, ken Panagadal iti Pagwanawanan? Masapul met kadi nga agdalungdong ti paraipatarus a kabsat a babai kadagiti kasta a kasasaad? Agparang a saan a kasapulan nga agdalungdong iti dadduma a kasasaad yantangay ammo dagiti timmabuno nga isu ket saan met nga aktual a mangikonkondukta iti gimong. Pudno dayta no isu ket agipatpatarus iti komento ti tallaong, paset ti babbai, wenno demostrasion. Ngem rumbeng nga agdalungdong ti babai no ipatarusna ti palawag ti kabsat a lalaki bayat kadagita a gimong, no ipatarusna ti panangikondukta ti mangidadaulo iti Panagadal iti Pagwanawanan wenno iti Panagadal ti Kongregasion iti Biblia, wenno no mangidaulo kadagiti senias a panagkanta. Yantangay ti kabsat a babai ket mabalin nga agserbi a paraipatarus kadagiti lallaki, babbai, ubbing, ken panglakayen bayat ti gimong, nasaysayaat laengen nga agdalungdong kabayatan ti intero a gimong.

[Footnote]