Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Bueno, kitaentayo no masungbatanyo dagiti sumaganad a saludsod:

• Iti ania nga anag a mabalinnakayo a pabaknangen ti Dios?

Iti naglabas, binendisionan ni Jehova iti material a kinabaknang ti dadduma a tattao a kas kada Abraham ken Solomon. Ngem ti kinabaknang a kasapulan unay dagiti Kristiano ken kabaelan nga ipaay ti Dios ket pakairamanan ti pammati, talna, pannakakontento, ken kinaragsak.​—9/1, panid 3-7.

• Ania ti maadaltayo manipud iti panangalaw ni Jesus ken ni Pedro bayat a lumlumned daytoy iti baybay? (Mat. 14:28-31)

No makitatayo a kumapuy ti pammati ti maysa a kabsat, arigna a mabalintayo nga iyawat ti imatayo tapno matulongantayo a mangparayray iti pammatina.​—9/15, panid 8.

• Ania ti insakripisio ni Jehova tapno maisalakantayo?

Inibturan ni Jehova ti pannakaparigat ken pannakaumsi ti Anakna. Ken kas inyanninaw ti kinatulok ni Abraham a mangidaton iti anakna, inibturan ni Jehova ti pannakapapatay ti Anakna kas maysa a kriminal.​—9/15, panid 28-29.

• Apay a maysa a gameng ti Vatican Codex?

Maysa dayta a Griego a manuskrito a napetsaan iti di nasursurok ngem 300 a tawen kalpasan a nakompleto ti Biblia. Naglaon dayta iti dandani kompleto a teksto ti Hebreo a Kasuratan ken Kristiano a Griego a Kasuratan. Maysa dayta a reperensia nga us-usaren dagiti eskolar a mangsigurado iti linaon ti orihinal a teksto ti Biblia.​—10/1, panid 18-20.

• Ania ti maadaltayo iti Proverbio 24:27 maipapan iti ‘panangbangon iti sangakabbalayan’?

Ti maysa nga agngayngayangay a mangasawa masapul a saganaanna dayta a responsabilidad. Nakasagana koma a mangipaay iti material a kasapulan ti pamilia ken agbalin a naespirituan nga ulo ti sangakabbalayan.​—10/15, panid 12.

• Apay a di umiso a maibilang dagiti Saksi ni Jehova kas maysa a Protestante a relihion?

Nabuangay ti Protestantismo idi maika-16 a siglo idiay Europa iti panggep a mangreporma iti Iglesia Katolika Romana. Ti “Protestantismo” ket tumukoy kadagidiay mangitantandudo kadagiti kalat ti Repormasion. Saan a bigbigen dagiti Saksi ni Jehova ti sapasap nga autoridad ti papa ken naimpusuan nga itandudoda ti Biblia kas ti autoridad. Kaskasdi, ilaksidda ti adu a di nainkasuratan a pannursuro ken kaugalian a gagangay kadagiti Protestante a relihion.​—11/1, panid 19.

• Masapul kadi a masursuro ti maysa a tao ti Hebreo ken Griego a lenguahe tapno maawatanna ti Biblia?

Saan. Ti pannakaammo kadagita a lenguahe saanna a pagbalinen ti maysa nga ad-adda a makatarus iti mensahe ti Biblia. Ti maysa a nangadal kadagita a lenguahe ket agpannuray latta kadagiti diksionario ken libro ti gramaria. Gapu ta impaltiing ti Dios ti pannakaitalimeng dagiti sasao ti naindaklan nga Adipenna babaen laeng ti patarus, ipakita dayta a mabalin nga usaren ken adalen ti kinapudno manipud kadagiti patarus ti Biblia a nagusar kadagiti agdama a lenguahe.​—11/1, panid 20-23.

• Kasano a mapagwadan ni Jehova ken ni Jesus no iti nasayaat a kababalin?

Iti laksid ti natan-ok a saad ni Jehova, tratuenna dagiti tattao buyogen ti kinamanangngaasi ken panagraem. Idi nakisarita kada Abraham ken Moises, nagusar iti Hebreo a termino a masansan a maipatarus kas “pangngaasim.” (Gen. 13:14; Ex. 4:6) Ti Dios imdenganna met dagiti tattao. (Gen. 18:23-32) Kasta met ti inaramid ni Jesus. Isu ket sidadaan ken situtulok a timmulong kadagidiay nakalangenna, a masansan nga inawaganna pay ida iti naganda.​—11/15, panid 25.

• Apay a saan a rambakan dagiti pudno a Kristiano ti Lunar New Year?

Ti Lunar New Year ket maysa a napateg a piesta iti kalendario dagiti taga-Asia. Ti selebrasion masansan a ramanenna ti panangsigurado iti suerte ken panangipakita iti panangraem kadagiti espiritu. Padayawan ken raemen dagiti Kristiano ti nagannakda ngem saanda a makiraman kadagiti padaya a nairanta a mangpabaro iti singgalut kadagiti natay nga inapo maipaay iti proteksion wenno pananggun-od iti anamong dagiti didiosen iti pagtaengan.​—12/1, panid 20-23.