Sarsarita Wenno Kinapudno?​—Ti Kinapudno Maipapan ken Jesus

ANIA TI PANAGKUNAM? KINAPUDNO KADI WENNO SARSARITA DAGITI SUMAGANAD?

Nayanak ni Jesus iti Disiembre 25.

Idi nayanak ni Jesus, adda tallo a masirib a lallaki a nangbisita kenkuana.

Ni Jesus ti kakaisuna nga anak.

Ni Jesus ti Dios a naglasag laeng.

Ni Jesus ket saan laeng a basta nasingpet a tao.

MABALIN nga adu ti mangibaga a kinapudno amin dagiti nadakamat. Nalabit ibaga met ti dadduma a narigat wenno imposible pay ketdi a maammuan no ania a talaga ti pudno. Mabalin nga ipagarupda a no la ket mamatika ken Jesus, saanen a nasken a maammuam ti sungbat dagita.

Ngem saan a kasta ti ibagbaga ti Biblia. Parparegtaennatayo a maaddaan iti “umiso a pannakaammo ken ni Apotayo a Jesu-Kristo.” (2 Pedro 1:8) Magun-odtayo dayta a pannakaammo babaen ti panangsukimat kadagiti Ebanghelio. Naipalgak kadagita ti kinapudno maipapan ken Jesus a makatulong kadatayo a mangilasin no ania ti sarsarita ken no ania ti kinapudno. Usigentayo ngarud no ania ti ipasimudaag dagiti Ebanghelio mainaig kadagiti patpatien a nadakamat iti ngato.

PATPATIEN: Nayanak ni Jesus iti Disiembre 25.

KLASIPIKASION: SARSARITA.

Awan ti mabasa iti Biblia mainaig iti eksakto a bulan wenno aldaw ti pannakayanak ni Jesus. Sadino ngarud ti naggapuan ti papatien mainaig iti Disiembre 25? Sigun iti The Encyclopædia Britannica, dadduma nga agkunkuna a Kristiano “igiddanda dayta a petsa iti piesta dagiti Romano a mangtanda . . . iti winter solstice, no kaano a mangrugi nga umadayo ti distansia ti init iti daga.” Dinakamat pay dayta a reperensia nga adu kadagiti kostumbre mainaig iti Krismas ti nagtaud kadagiti “pagano a panagngilin mainaig iti agrikultura ken panagdayaw iti init iti ngalay ti kalam-ekna.”

Umanamong ngata ni Jesus iti pannakarambak ti pannakayanakna iti Disiembre 25? Usigem daytoy: Saan a masinunuo no kaano a nayanak ni Jesus. Awan met ti ibaga ti Kasuratan a rambakantayo dayta ken awan ti aniaman a pammaneknek a rinambakan dayta dagiti nagkauna a Kristiano. Imbes ketdi, dakamaten ti Biblia ti eksakto nga aldaw ti ipapatay ni Jesus, ken binilinna dagiti pasurotna a rambakanda dayta nga aldaw.a (Lucas 22:19) Nalawag a kayat ni Jesus a ti pateg ti ipapatayna kas daton ti maipangpangruna saan ket a ti pannakayanakna.​—Mateo 20:28.

PATPATIEN: Idi nayanak ni Jesus, adda tallo a masirib a lallaki (wenno tallo nga ari iti dadduma a tradision) a nangbisita kenkuana.

KLASIPIKASION: SARSARITA.

Nalabit nakakitakayon kadagiti imahen wenno Belen a mangiladladawan ken Jesus kas maladaga a nakaidda iti kulluong, a pinalawlawan ti tallo a masirib a lallaki a nakaiggem kadagiti sagut. Ngem pinarparbo laeng dayta.

Agpayso nga adda grupo a naggapu manipud Daya a napan nangpadayaw iti malaga a ni Jesus. Ngem kinapudnona, dagita a sangaili ni Jesus ket astrologoda. (Mateo 2:1, The New English Bible; The Bible​—An American Translation) Pudno kadi a nasarakanda ni Jesus a nakaidda iti kulluong? Saan; adda ni Jesus iti maysa a balay idi bimmisitada kenkuana. Nabatad a nakasangpetda laengen sumagmamano a bulan kalpasan ti pannakayanak ni Jesus.​—Mateo 2:9-11.

Maysa pay, mano a talaga ti bilang dagiti sangaili ni Jesus? Saan a nadakamat dayta iti Biblia. Ti pagaammo a bilang a tallo ket nalabit a maigapu iti tallo a kita ti sagut.b (Mateo 2:11) Patien pay ti dadduma a ti tunggal maysa kadagiti makunkuna a masirib a lallaki irepresentarna ti maysa a puli ti sangatauan. Ngem awan ti kasta nga idea iti Biblia. Imbes ketdi, sigun iti maysa a libro maipapan iti Ebanghelio, dayta a sarsarita ket pinataud ti “maysa a nabileg ti imahinasionna a historiador idi maikawalo a siglo.”

PATPATIEN: Ni Jesus ti kakaisuna nga anak.

KLASIPIKASION: SARSARITA.

Ibatad dagiti Ebanghelio nga adda kakabsat ni Jesus. Ti Ebanghelio ni Lucas tukoyenna ni Jesus kas “ti inauna” ni Maria, a mangipamatmat a naaddaan ni Jesus iti kakabsat.c (Lucas 2:7) Iti Ebanghelio ni Marcos, adda dadduma idiay siudad ti Nazaret a nangibilang ken Jesus kas gagangay laeng nga anak a kas kadagiti kakabsatna. Inimtuodda: “Saan kadi a kakabsatna da Santiago, Jose, Judas, ken Simon? Ket saan aya nga agnanaed met dagiti kakabsatna a babbai ditoy ilitayo?”​—Marcos 6:3, Contemporary English Version; Mateo 12:46; Juan 7:5.

Iti laksid ti kunaen dagiti Ebanghelio, tagtaginayonen latta ti adu a teologo ti patpatien a ni Jesus ti kakaisuna nga anak. Kuna ti dadduma a kakasinsin kano ni Jesus dagiti nadakamat a kakabsatna a lallaki ken babbai.d Ipagarup ti dadduma a dagiti kakabsat ni Jesus ket siuman ni Maria. Ngem usigem daytoy: No ni Jesus ti kakaisuna nga anak ni Maria, maibaga ngata dagidiay a taga-Nazaret ti nadakamat iti Ebanghelio? Maysa pay, nakita a mismo ti dadduma kadakuada dagiti panagsikog ni Maria. Nasaksianda nga adda pay dadduma nga annak ni Maria malaksid ken Jesus.

PATPATIEN: Ni Jesus ti Dios a naglasag laeng.

KLASIPIKASION: SARSARITA.

Nabayagen a patien ti adu ti idea nga immay ti Dios ditoy daga ken nagbiag kas ti tao a ni Jesus. Dayta ti kangrunaan a paset ti doktrina a Trinidad. Ngem awan ti kasta a sursuro idi panawen ni Jesus. Imbes ketdi, kuna ti The Encyclopædia Britannica: “Saan a nagparang ti sao a Trinidad wenno uray naiparipirip man la koma daytoy a doktrina iti Baro a Tulag . . . Nagin-inut nga immadu ti namati iti dayta a doktrina iti las-ud dagiti sumagmamano a siglo ken iti laksid ti adu a panagsusupiat.”

Kinapudnona, no dagiti relihion isursuroda a ni Jesus ket Dios a naglasag, ibabainda laeng ni Jesus.e Apay? Usigem daytoy. Dadduma a trabahador ti addaan kiddaw iti superbisorda, ngem kuna ti superbisor nga awan ti autoridadna a mangipaay iti kiddawda. No pudno a kasta, sipapakumbaba a bigbigbigen ti superbisor ti limitasionna. Ngem no kabaelanna gayam a patgan ti kiddaw ngem dina la kayat, saan ngarud a napudno.

Ita, ania ti kinuna ni Jesus idi tinarigagayan ti dua kadagiti apostolna ti maaddaan iti nangato a saad? Kinunana kadakuada: “Daytoy panagtugaw iti makannawanko ken iti makannigidko saanko a biang ti mangipaay, no di ket kukua dayta dagidiay nangisaganaan ni Amak.” (Mateo 20:23) No talaga a ni Jesus ti Dios, agul-ulbod kadi ngarud kadagita a sinaona? Imbes ketdi, babaen ti panangbigbigna iti Daydiay addaan iti dakdakkel nga autoridad, nangipasdek ni Jesus iti nagsayaat nga ulidan ti kinaemma ket impakitana nga isu ket saan a pumada iti Dios.

PATPATIEN: Ni Jesus ket saan laeng a basta naimbag a tao.

KLASIPIKASION: KINAPUDNO.

Imbatad ni Jesus nga isu ket saan laeng a basta nasingpet a tao. Kinunana: “Siak ti Anak ti Dios.” (Juan 10:36) Siempre, mabalin nga akuen ti asinoman nga isu ti Anak ti Dios. Ngem no saan a pudno ti imbaga ni Jesus, ania ti pagbalinanna? Saan la ketdi a naimbag a tao no di ket napeklan nga ulbod!

Agtaud iti Dios ti kangrunaan a mapagtalkan a testimonia. Namindua a kinunana maipapan ken Jesus: “Daytoy ti Anakko.” (Mateo 3:17; 17:5) Panunotem laengen: Sigun iti Kasuratan, manmano laeng a gundaway a nangngeg ditoy daga ti timek ti Dios, ngem dua kadagita ti nangpasingked nga Anakna ni Jesus! Dayta pay laeng ti kabilgan a pammaneknek iti kinuna ni Jesus maipapan iti pudno a kinasiasinona.

Adda kadi naammuam a kinapudno iti daytoy nga artikulo a saanmo a dati nga ammo? No kasta, apay a dimo usigen pay nga ad-adda dagiti naipaltiing nga Ebanghelio? Agpada a makaparagsak ken makagunggona ti kasta a panagadal. Kinapudnona, imbaga a mismo ni Jesus a ti panangammo iti kinapudno maipapan kenkuana ken iti Amana “kaipapananna ti biag nga agnanayon.”​—Juan 17:3.

[Footnotes]

[Kahon/Ladawan iti panid 14]

Kanayonan a Kinapudno a Mabalin nga Ita Laeng a Maammuam

Ania ti kababalin ni Jesus? Panatiko kadi, saan a mannakigayyem ken narigat nga asitgan, ket dina ammo ti makibagay? Mabalin a kasta ti panangmatmat ti dadduma. Isu a nalabit masdaawda no maammuanda a ni Jesus . . .

• dimmar-ay kadagiti padaya.​—Juan 2:1-11.

• nangted iti pammadayaw.​—Marcos 14:6-9.

• tinagiragsakna ti makikadua kadagiti ubbing. ​—Marcos 10:13, 14.

• dina minedmedan ti nagsangit.​—Juan 11:35.

• nakarikna iti asi.​—Marcos 1:40, 41.