Siasino ni Jesu-Kristo?

PANUNOTENYO no kasano karagsak ti agtutubo a Judio nga agnagan Andres idi damo a mangngegna ni Jesus a taga-Nazaret! Isalaysay ti Biblia a nagdardaras ni Andres a napan iti kabsatna ket kinunana: “Nasarakanmi ti Mesias [wenno, Kristo].” (Juan 1:41) Kadagiti lenguahe a Hebreo ken Griego, dagiti sasao a kaaduanna a maipatarus a “Mesias” ken “Kristo” ket kaipapananna “Daydiay Napulotan.” Ni Jesus Daydiay Napulotan, wenno Daydiay Pinili ti Dios​—ti naikari a Panguluen. (Isaias 55:4) Naglaon ti Kasuratan kadagiti padto mainaig kenkuana, ken dagiti Judio iti daydi a tiempo pinadpadaananda ti isasangbayna.​—Lucas 3:15.

Kasano nga ammotayo a ni Jesus a talaga Daydiay Pinili ti Dios? Bueno, usigentayo ti napasamak idi 29 K.P. idi agtawen ni Jesus iti 30. Napan ken ni Juan a Mammautisar tapno agpabautisar kenkuana idiay Karayan Jordan. Isalaysay ti Biblia: “Kalpasan a nabautisaran dagus a simmang-at ni Jesus manipud iti danum; ket, adtoy! naluktan ti langlangit, ket nakitana ti espiritu ti Dios a bumabbaba a kasla kalapati nga um-umay kenkuana. Adtoy! Kasta met, adda timek manipud iti langlangit a nagkuna: ‘Daytoy ti Anakko, ti dungdungnguen, nga inanamongak.’” (Mateo 3:16, 17) Kalpasan a mangngegna dagitoy nga ebkas ti anamong, nagduadua pay ngata ni Juan a ni Jesus Daydiay Pinili ti Dios? Babaen ti panangiparukpokna iti nasantuan nga espiritu, ni Jehova a Dios pinulotanna wenno dinutokanna ni Jesus nga agbalin nga Ari ti ipasdekna a Pagarian. Gapuna, ni Jesus nagbalin a ti Kristo, wenno Daydiay Napulotan. Ngem iti ania nga anag a ni Jesus ket Anak ti Dios? Ania ti namunganayanna?

Namunganay “Manipud Kadagiti Immuna a Tiempo”

Ti biag ni Jesus ket mabalin a mabingay iti tallo a paset. Ti umuna a paset ti biagna ket nabayagen a nangrugi sakbay pay ti pannakaipasngayna kas tao. Isu ket namunganay “manipud kadagiti immuna a tiempo, manipud kadagiti aldaw ti tiempo a di nakedngan,” kuna ti Mikias 5:2. Kinuna mismo ni Jesus: “Naggapuak kadagiti lugar sadi ngato”​—wenno, manipud langit. (Juan 8:23) Adda idi ni Jesus idiay langit kas maysa a mannakabalin nga espiritu a persona.

Yantangay adda nangrugian ti amin a naparsua a banag, adda panawen idi nga agmaymaysa ti Dios. Ngem iti di mabilang a panawen, nangrugi a mangparsua ti Dios. Siasino ti immuna a pinarsuana? Ti maudi a libro ti Biblia ipabigbigna ni Jesus kas “ti pangrugian ti panamarsua ti Dios.” (Apocalipsis 3:14) Ni Jesus isu ti “inauna iti isuamin a parsua.” Dayta ket “agsipud ta babaen kenkuana, amin a sabsabali pay a bambanag naparsuada iti langlangit ken iti rabaw ti daga, ti bambanag a makita ken ti bambanag a di makita.” (Colosas 1:15, 16) Wen, ni Jesus isu ti kakaisuna a direkta a pinarsua ti Dios. Gapuna, isu ket naawagan kas ti “bugbugtong nga Anak” ti Dios. (Juan 3:16) Ti inauna nga Anak naawagan met kas “ti Sao.” (Juan 1:14) Apay? Agsipud ta sakbay a nayanak kas tao, isu ket nagserbi idiay langit kas pannakangiwat ti Dios.

“Ti Sao” ket kadua ni Jehova a Dios “idi punganay,” idi naparsua “ti langlangit ken ti daga.” Isu daydiay nagkunaan ti Dios iti: “Aramidenta ti tao iti ladawanta.” (Juan 1:1; Genesis 1:1, 26) Ti inauna nga Anak ni Jehova ket adda iti sibay ti Amana, a siaaktibo a nakipagtrabaho kenkuana. Iti Proverbio 8:22-31, isu nairepresentar a kunkunana: “Addaak idi iti sibay [ti Namarsua] kas nasigo a managobra ket siak daydiay pakaay-ayatanna unay iti inaldaw, yantangay maragragsakanak iti sanguananna iti isuamin a tiempo.”

Nagbalin la ketdi a nakasingsinged ni Jehova a Dios ken ti bugbugtong nga Anakna bayat ti panagbinnuligda! Dayta a nadekket a pannakitimpuyogna ken ni Jehova iti di mabilang a kaunday ti tiempo ket nagbileg ti epektona iti Anak ti Dios. Daytoy a natulnog nga Anak nagbalin a kas ken ni Jehova nga Amana. Kinapudnona, ti Colosas 1:15 awaganna ni Jesus kas “ti ladawan ti di makita a Dios.” Dayta ti maysa a makagapu no apay a ti pannakaammo maipapan ken ni Jesus ket napateg iti panangpennek iti naespirituan a kasapulan ken natural a tarigagaytayo a mangam-ammo iti Dios. Amin nga inaramid ni Jesus bayat ti kaaddana ditoy daga isu a talaga ti ninamnama ni Jehova kenkuana. Gapuna, bayat nga ad-adalentayo ti maipapan ken ni Jesus, umad-adu met ti pannakaammotayo maipapan ken ni Jehova. (Juan 8:28; 14:8-10) Ngem kasano nga immay ni Jesus ditoy daga?

Ti Biagna Kas Tao

Ti maikadua a paset ti biag ni Jesus ket nangrugi idi ti Dios imbaonna ditoy daga ti Anakna. Inaramid dayta ni Jehova babaen ti milagro a panangyakarna iti biag ni Jesus manipud langit iti aanakan ni Maria, maysa a matalek a Judio a birhen. Saan a natawid ni Jesus ti kinaimperpekto agsipud ta awanan iti tao nga ama. Ti nasantuan nga espiritu ni Jehova, wenno ti aktibo a puersana, immapay ken ni Maria, ket isu ‘sinalinongan’ ti pannakabalin ti Dios, isu a simimilagro a nagsikog ti babai. (Lucas 1:34, 35) Nagpasngay ngarud ni Maria iti perpekto nga anak. Kas ti siuman ti karpintero a ni Jose, napadakkel ni Jesus iti nanumo a sangakabbalayan ken isu ti inauna kadagiti annak da Jose ken Maria.​—Isaias 7:14; Mateo 1:22, 23; Marcos 6:3.

Bassit ti naisalaysay maipapan iti kinaubing ni Jesus, ngem adda maysa a pagteng a makapainteres. Idi agtawen ni Jesus iti 12, inkuyog dagiti dadakkelna iti tinawen a panagbisitada idiay Jerusalem maipaay iti Paskua. Bayat ti kaaddana sadiay, nangbusbos iti adu a tiempo iti templo, a “situtugaw iti tengnga dagiti mannursuro ken agim-imdeng kadakuada ken agsalsaludsod kadakuada.” Kanayonanna, “amin dagidiay umim-imdeng kenkuana nagtultuloyda a masmasdaaw iti pannakaawatna ken kadagiti sungbatna.” Wen, saan laeng a mamagpanunot ken naespirituan dagiti saludsod ti agtutubo a ni Jesus no di ket nasaririt dagiti sungbatna a namagsiddaaw kadagiti tattao. (Lucas 2:41-50) Bayat a dimmakkel iti siudad ti Nazaret, nasursurona ti agbalin a karpintero, awan duadua babaen ken Jose a pannakaamana.​—Mateo 13:55.

Nagnaed ni Jesus idiay Nazaret agingga idi agtawen iti 30. Kalpasan ti panagpabautisarna ken ni Juan, rinugian ni Jesus ti narayray a ministeriona. Iti uneg ti tallo ket kagudua a tawen, nagdaliasat iti intero nga ili a nakayanakanna ket impakaammona ti naimbag a damag ti Pagarian ti Dios. Pinaneknekanna nga isu ket imbaon ti Dios. Kasano? Babaen ti panagaramid iti adu a milagro​—mannakabalin nga ar-aramid a di kabaelan ti tao.​—Mateo 4:17; Lucas 19:37, 38.

Nadungngo ken mannakipagrikna met ni Jesus. Ti kinadungngona ket nangruna a makita iti wagas ti panangmatmat ken panangtratona kadagiti tattao. Gapu ta naasi ken nalaka a maasitgan ni Jesus, immadani kenkuana dagiti tattao. Uray dagiti ubbing komportableda kenkuana. (Marcos 10:13-16) Rinaem ni Jesus dagiti babbai, uray nababa ti panangmatmat kadakuada ti dadduma. (Juan 4:9, 27) Tinulonganna dagiti napanglaw ken mairurrurumen tapno ‘makasarakda iti gin-awa maipaay kadagiti kararuada.’ (Mateo 11:28-30) Nalawag, simple, ken praktikal ti wagas ti panangisurona. Ken dagiti isursurona iyanninawda ti naimpusuan a tarigagayna a maipakaammo kadagiti agdengdengngeg kenkuana ti maipapan iti pudno a Dios a ni Jehova.​—Juan 17:6-8.

Babaen ti panangusarna iti nasantuan nga espiritu ti Dios a mangaramid kadagiti milagro, siaasi a pinaimbag ni Jesus dagiti masakit ken marigrigatan. (Mateo 15:30, 31) Kas pagarigan, immasideg ken kinuna kenkuana ti maysa nga agkukutel: “No kayatmo laeng koma, kabaelannak a dalusan.” Ania ti inaramid ni Jesus? Sinagidna ti lalaki, ket kinunana: “Kayatko. Madalusanka koma.” Ket immimbag ti masakit a lalaki!​—Mateo 8:2-4.

Usigenyo met ti pasamak idi nakikuyog ken ni Jesus ti adu a tattao iti uneg ti tallo nga aldaw a dida nangnangan. Naasian kadagiti tattao ket simimilagro a tinaraonanna ti ‘uppat a ribu a lallaki, malaksid kadagiti babbai ken ub-ubbing.’ (Mateo 15:32-38) Iti sabali nga okasion, pinasardeng ni Jesus ti bagyo a namagpeggad kadagiti gagayyemna. (Marcos 4:37-39) Pinagungar wenno insublina ti biag dagidiay natay.a (Lucas 7:22; Juan 11:43, 44) Sidadaan pay nga inted ni Jesus ti perpekto a natauan a biagna tapno maaddaan iti namnama ti imperpekto a sangatauan. Anian a nagdakkel ti panagayat ni Jesus kadagiti tattao!

Ayan Itan ni Jesus?

Natay ni Jesus iti kayo a pagtutuokan iti edadna a 33 1/2.b Ngem saan a nagpatingga ti biagna gapu iti dayta nga ipapatay. Ti maikatlo a paset ti biagna ket nangrugi kalpasan ti agarup tallo nga aldaw idi pinagungar ni Jehova a Dios ti Anakna kas espiritu a persona. Kalpasan ti panagungarna, nagparang ni Jesus iti ginasgasut a tattao idi umuna a siglo K.P. (1 Corinto 15:3-8) Kalpasan dayta, “nagtugaw iti makannawan ti Dios” ken naguray tapno awatenna ti pannakabalinna kas ari. (Hebreo 10:12, 13) Idi dimteng dayta a tiempo, nangrugi nga agturay ni Jesus kas Ari. Gapuna, kasano ti rumbeng a panangmatmattayo ita ken ni Jesus? Rumbeng kadi a matmatantayo kas agsagsagaba a tao a napapatay? Wenno rumbeng kadi a matmatantayo kas maysa a nasken a pagdayawan? Ni Jesus ita ket saan a maysa a tao wenno Mannakabalin-amin a Dios. Imbes ketdi, isu ket maysa a mannakabalin nga espiritu a parsua, nga agturturay kas Ari. Iti din agbayag, ipakatna ti turayna iti nariribuk a lubong.

Iti simboliko a pamay-an, ti Apocalipsis 19:11-16 dineskribirna ni Jesu-Kristo kas maysa nga ari a nakasakay iti puraw a kabalio ken um-umay a mangukom ken mangigannuat iti gubat buyogen ti kinalinteg. Isu ket addaan iti “natarumamis nga atiddog a kampilan, tapno kabilenna dagiti nasion babaen iti dayta.” Wen, usaren ni Jesus ti dakkel a pannakabalinna a mangdadael kadagiti nadangkes. Ngem ania met ti mapasamak kadagidiay mangikagkagumaan a sumurot iti ulidan nga impasdekna ditoy daga? (1 Pedro 2:21) Dagitoy ket ispalento ni Jesus ken ni Amana iti um-umay a “gubat ti naindaklan nga aldaw ti Dios a Mannakabalin-amin”​—a masansan a maawagan Armagedon​—tapno agbiagda nga agnanayon kas naindagaan a masakupan ti nailangitan a Pagarian ti Dios.​—Apocalipsis 7:9, 14; 16:14, 16; 21:3, 4.

Bayat ti natalna a panagturayna, anian a nagadu dagiti milagro nga aramiden ni Jesus maipaay iti sangatauan! (Isaias 9:6, 7; 11:1-10) Paimbagennanto dagiti masakit ken pagpatinggaenna ni patay. Ti Dios usarennanto ni Jesus a mangpagungar kadagiti binilion a tattao, a maipaayan iti gundaway nga agbiag nga agnanayon iti daga. (Juan 5:28, 29) Ditay pay ketdi mailadawan iti panunottayo no kasano karagsak ti biagtayo iti sidong ti turay ti Pagarian. Napateg ngarud nga agtultuloytayo a gumun-od iti pannakaammo iti Biblia tapno ad-adda a nalawag ti pannakaammotayo maipapan ken ni Jesu-Kristo.

[Footnotes]

[Kahon iti panid 7]

NI KADI JESUS MANNAKABALIN-AMIN A DIOS?

Ibaga ti adu a relihioso a tattao a ni Jesus ket Dios. Adda dagiti mangibaga a ti Dios ket maysa a Trinidad. Sigun iti daytoy a sursuro, “ti Ama ket Dios, ti Anak ket Dios, ken ti Espiritu Santo ket Dios, ngem saan a tallo ti Dios no di ket maymaysa.” Maibagbaga a dagiti tallo “ket agpada nga agnanayon ken awan nangatngato.” (The Catholic Encyclopedia) Umiso kadi dagita a panangmatmat?

Ni Jehova a Dios ti Namarsua. (Apocalipsis 4:11) Awan nangrugian wenno panungpalanna, ken mannakabalin-amin. (Salmo 90:2) Ni Jesus, iti sabali bangir, adda nangrugianna. (Colosas 1:15, 16) Iti panangtukoyna iti Dios kas ti Amana, kinuna ni Jesus: “Ti Ama dakdakkel ngem siak.” (Juan 14:28) Inlawlawag pay ni Jesus nga adda dagiti banag a saanna nga ammo ken saan nga ammo dagiti anghel, a ti laeng Ama ti makaammo.​—Marcos 13:32.

Kanayonanna, inkararag ni Jesus ken Amana: “Saan koma a ti pagayatak, no di ket ti pagayatam ti maaramid.” (Lucas 22:42) Siasino koma ti pagkarkararagan ni Jesus no saan nga iti natantan-ok a Persona? Kasta met, ti Dios ti nangpagungar ken ni Jesus, saan ket a ni Jesus ti nangpagungar iti bagina. (Aramid 2:32) Nabatad, ti Ama ken ti Anak saanda nga agpada sakbay ti iyaay ni Jesus ditoy daga wenno bayat ti biagna ditoy daga. Komusta met kalpasan a napagungar ni Jesus idiay langit? Kuna ti 1 Corinto 11:3: “Ti ulo ti Kristo isu ti Dios.” Kinapudnona, ti Anak kanayon nga agpasakup iti Dios. (1 Corinto 15:28) Gapuna, ipakita ti Kasuratan a ni Jesus ket saan a Mannakabalin-amin a Dios. Imbes ketdi, isu ti Anak ti Dios.

Ti makunkuna a maikatlo a persona iti Trinidad​—ti nasantuan nga espiritu​—ket saan a maysa a persona. Idi nagkararag iti Dios, kinuna ti salmista: “No ibaonmo ti espiritum, maparsuada.” (Salmo 104:30) Dayta nga espiritu ket saan a ti Dios mismo; maysa dayta nga aktibo a puersa nga ibaon wenno usaren ti Dios a mangibanag iti aniaman a pagayatanna. Babaen iti dayta nga espiritu, pinarsua ti Dios dagiti pisikal a langlangit, ti daga, ken amin a sibibiag a bambanag. (Genesis 1:2; Salmo 33:6) Inusar ti Dios ti nasantuan nga espirituna a nangpaltiing kadagiti tattao a nangisurat iti Biblia. (2 Pedro 1:20, 21) No kasta, ti Trinidad ket saan a Nainkasuratan a sursuro.c “Ni Jehova a Diostayo ket maymaysa a Jehova.” Kuna ti Biblia.​—Deuteronomio 6:4.

[Footnote]

[Ladawan iti panid 5]

Idi nabautisaran, nagbalin ni Jesus kas Daydiay Pinulotan ti Dios

[Ladawan iti panid 7]

Binusbos ni Jesus ti pigsana iti trabaho nga impabaklay ti Dios kenkuana

[Ladawan iti panid 7]

Ni Jesus ket maysa itan a mannakabalin nga Ari