Agtalinaedkayo a Natibker iti Naespirituan Bayat nga Ay-aywananyo ti Masakit a Kabagianyo

KALPASAN a natakuatan ti tumor iti asideg ti duri ni Kim a maysa a Saksi, nadayagnos nga adda kanserna.a “Apaman a naikkat ti tumor babaen ti operasion,” kuna ti lakayna a ni Steve, “limmasat ni Kim iti radiotherapy ken chemotherapy. Kas resulta dagita, kimmapuy ti bagina ket marigatanen nga aggaraw.”

Mailadawanyo kadi ti saem a narikna ni Steve bayat a buybuyaenna ti dungdunguenna nga asawa a mangdadaer iti dayta a nakaro a sakit? Nalabit nga adda nasinged a kapamiliayo nga agsagsagaba iti kumarkaro a sakit wenno kadagiti epekto nga itden ti panaglakay wenno panagbaket. (Ecl. 12:1-7) No kasta, ammoyo a tapno maaywananyo a naimbag ti ipatpategyo, masapul nga aywananyo met ti bagiyo. No kumapuy ti espiritualidadyo, maapektaran ti emosional ken pisikal a salun-atyo ket mabalin a diyon maipaay ti suporta a kasapulan ti kapamiliayo. Kasanoyo a sititimbeng a maibaklay dagiti Nakristianuan nga obligasionyo bayat nga ay-aywananyo ti masakit wenno nataengan a kabagianyo? Ania ti mabalin a maitulong dagiti miembro ti kongregasion Kristiano tapno maipakitada ti pannakaseknanda kadagiti masakit?

Taginayonenyo ti Kinatimbeng​—Kasano?

Tapno mataginayonyo ti pisikal a salun-at ken naespirituan a kinatimbengyo bayat nga ay-aywananyo ti masakit a kabagianyo, sursuruenyo koma ti makibagay iti situasion ken usarenyo a nainsiriban ti tiempo ken pigsayo. “Ti sirib adda kadagidiay naemma,” kuna ti Proverbio 11:2. Sigun iti kontekstona, ti sao a “naemma” kaipapananna nga ammo ti maysa dagiti limitasionna. Tapno masiguradoyo a diyo maabuso ti bagiyo, masapul a sukimatenyo ti eskediul ken dagiti responsabilidadyo.

Nangipakita ni Steve iti kinasirib ken kinaemma babaen ti panangsukimatna manen kadagiti obligasionna. Malaksid iti sekular a trabahona, isu ket agserserbi kas koordineytor ti bagi dagiti panglakayen ken kas manangaywan iti serbisio iti maysa a kongregasion dagiti Saksi ni Jehova idiay Ireland. Miembro pay iti Hospital Liaison Committee iti lugarda. “Di pulos nagreklamo ni Kim nga isu ket nabaybay-ak gapu iti adu unay a panawenko kadagitoy a responsabilidad,” kuna ni Steve. “Nupay kasta, ammok a nalablabes ngem iti kabaelak ti ar-aramidek.” Kasano a tinaming dayta ni Steve? “Kalpasan nga inusigko dagiti bambanag buyogen ti panagkararag,” kinunana, “inkeddengko ti aglusulos kas koordineytor. Nagtultuloyak a nagserbi kas panglakayen, ket gapu ta impabiangkon kadagiti padak a panglakayen ti dadduma nga annongek iti kongregasion, naipaayko ken Kim ti tiempo ken atension a kasapulanna.”

Idi agangay, simmayaat ti salun-at ni Kim. Sinukimat manen da Steve ken Kim ti kasasaadda, ket babaen ti tulong ni baketna, naibaklay manen ni Steve dagiti dati nga annongenna iti kongregasion. “Nasursuromi nga aramiden no ania laeng ti ipalubos ti kasasaad bayat ti panagsakitna,” kuna ni Steve. “Agyamanak unay ken Jehova iti tulongna, kasta met iti suporta ni baketko gapu ta saan a pulos a nagreklamo uray nakapuy ti salun-atna.”

Usigenyo met ti kapadasan ti maysa nga agdaldaliasat a manangaywan a ni Jerry ken ti baketna a ni Maria. Binalbaliwanda dagiti kalatda tapno maaywananda dagiti nataenganen a nagannakda. “Kalatmi ken lakayko ti agserbi kas misionero iti sabali a pagilian,” kuna ni Maria. “Ngem maymaysa nga anak ni Jerry, ken kasapulan dagiti nagannakna ti panangaywanna. Inkeddengmi ngarud ti agtalinaed iti Ireland tapno maaywananmi ida. Iti kasta, naaywananmi ti katugangak a lalaki bayat ti kaaddana iti ospital sakbay a natay. Inaldaw a makasaritami ti katugangak a babai, ken nalakanakami laeng nga ayaban no kasapulanna ti tulong. Kasta unay ti panangsuporta dagiti kakongregasion ti ina ni Jerry isu a nakapagtalinaedkami iti trabaho a panagdaliasat.”

No Kasano a Makatulong ti Sabsabali

Idi dinakamatna no ania dagiti material a probision a masapul a maipaay kadagiti nataengan a balo iti kongregasion, insurat ni apostol Pablo: “No ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” Impalagip ni Pablo kadagiti pada a Kristiano a tapno ‘makaay-ayo iti imatang ti Dios’ dagiti aramidda, masapul nga ipaayda ti pinansial a kasapulan dagiti mismo a nagannakda ken apongda. (1 Tim. 5:4, 8) Ngem mabalin ken masapul a mangipaay iti praktikal a tulong dagiti sabsabali iti kongregasion.

Imutektekanyo ti kapadasan da Hakan ken Inger, nataenganen nga agassawa nga agnanaed idiay Sweden. “Idi natakuatan nga adda kanser ni baketko,” kuna ni Hakan, “naklaatkami a dua. Nakasalsalun-at met ni Inger. Ita, masapul nga inaldaw a kaduaek a mapan iti ospital tapno agpaagas, ken nakaro ti epekto kenkuana dagiti agas. Kabayatan dagita, masapul nga aginana ni Inger iti pagtaenganmi, ken masapul met nga addaak iti dennana a mangaywan kenkuana.” Kasano a nakatulong kada Hakan ken Inger dagiti kakongregasionda?

Inyurnos dagiti panglakayen a mangngegan dagitoy nga agassawa dagiti Nakristianuan a gimong babaen ti telepono. Kanayonanna, kanayon a sumarungkar ken agtelepono kadakuada dagiti kakabsat. Nagipatulodda pay kadagiti surat ken kard. “Nariknami ti suporta ti amin a kakabsat kasta met ti tulong ni Jehova,” kuna ni Hakan. “Nakatulong dagita iti panagtalinaedmi a natibker iti naespirituan. Agyamankami ta simmayaat ti salun-at ni Inger isu a makatabunokami manen kadagiti gimong idiay Kingdom Hall.” No aramiden dagiti kakabsat ti amin a kabaelanda a mangtulong iti masakit wenno nataengan a kakongregasionda, maipakitada a ‘pudnoda a kakadua nga agayat iti isuamin a tiempo, ken kakabsatda a nayanak no adda rigat.’​—Prov. 17:17.

Ipatpateg ni Jehova ti Panagreggetyo

Pudno a makabannog ti agaywan iti masakit a kabagian. Kaskasdi, insurat ni Ari David: “Naragsak ti asinoman nga agtigtignay a buyogen ti konsiderasion iti daydiay nanumo,” kas iti maysa nga agkasapulan iti tulong gapu iti sakit.​—Sal. 41:1.

Apay a naragsak dagidiay mangaywan iti masakit wenno agsagsagaba? “Daydiay mangipakpakita ti pabor iti daydiay nanumo agpapautang ken Jehova,” kuna ti Proverbio 19:17, “ket ti panangtratona Isu supapakannanto kenkuana.” Maseknan unay ti pudno a Dios kadagiti matalek nga adipenna nga agsagsagaba iti sakit ken bendisionanna daydiay mangipakpakita kadakuada iti asi. Inkanta ni salmista a David: “[Dayta a tao ket] saranayento ni Jehova a mismo iti idda ti panagsakit; isuamin a pagiddaanna pudno unay a baliwamto bayat ti panagsakitna.” (Sal. 41:3) Masiguradotayo a no agpasar iti rigat wenno didigra daydiay mangipapaay iti naayat a panangaywan, isu ket tulongan ni Jehova.

Anian a nagragsak a maammuan a makitkita ken makaay-ayo ken ni Jehova a Dios ti panangaywantayo iti masakit a kabagiantayo! Nupay ti kasta a panangipaay iti tulong ket mabalin nga agkasapulan iti panagregget, ipanamnama ti Kasuratan nga iti “kakasta a sakripisio maay-ayo a naan-anay ti Dios.”​—Heb. 13:16.

[Footnote]

[Dagiti Ladawan iti panid 18]

Sititimbeng nga ibaklayyo dagiti Nakristianuan nga obligasionyo ken awatenyo ti tulong ti sabsabali