Malagipyo Kadi?

Natagiragsakyo kadi a binasa dagiti nabiit pay a ruar Ti Pagwanawanan? Kitaentayo no masungbatanyo dagiti sumaganad a saludsod:

• Ania ti makatulong kadakayo a mangpadakkel kadagiti annakyo nga agbalin a responsable?

‘Mangipasdekkayo iti pagtuladan’ dagiti annakyo no kasano ti agbalin a responsable. (Juan 13:15) Rasonable koma dagiti namnamaenyo. Bayat a dumakdakkel ti anakyo, ad-adda a manamnamayo nga agbalin a responsable iti kinadalus, kinamanagsapsapa, ken kadagiti asaynmentna iti eskuelaan. Mangted kadagiti espesipiko nga instruksion tapno masanayyo ti annakyo a mangitungpal kadagiti responsabilidadna.​—5/1, panid 19-20.

• Apay a ti Dios saanna a dinusa ni Aaron gapu iti panangaramidna iti balitok a baka?

Linabsing ni Aaron ti linteg ti Dios mainaig iti idolatria. (Ex. 20:3-5) Ngem nagpakaasi ni Moises iti Dios maipaay ken Aaron, ket “aduan puersa” ti pakaasina. (Sant. 5:16) Adu a tawen a matalek ni Aaron iti Dios. Ken nupay isu ket napilit dagiti tattao a mangaramid iti balitok a baka, impakitana idi agangay a saanna nga inanamongan ida yantangay nakikadua kadagiti annak ni Levi iti dasig ni Jehova. (Ex. 32:25-29)​—5/15, panid 21.

• Pakasarakan iti Ofir a nadakamat iti Biblia kas gubuayan iti balitok?

Tapno makaala iti balitok manipud Ofir, nagaramid ni Solomon kadagiti barko idiay Ezion-geber. (1 Ar. 9:26-28) Masarakan dayta a sangladan iti surong ti Gulf of Aqaba iti asideg ti agdama nga Elat ken Aqaba, iti Nalabaga a Baybay. Gapuna, nalabit a masarakan ti Ofir idiay Arabia iti asideg ti Nalabaga a Baybay wenno iti kosta ti Africa wenno India.​—6/1, panid 15.

• Ania ti tuktukoyen ti “balsamo idiay Galaad”? (Jer. 8:22)

Ti balsamo a lana ket nabanglo ken napigket a lana a tutot ti nagduduma a mula, a masarakan iti nadumaduma a lugar kas iti Galaad, iti daya ti Karayan Jordan. Gapu ta makaagas, maisapsapo dayta kadagiti sugat. Ti nakaay-ay-ay a kasasaad ti Israel ti nangtignay koma iti nasion nga agbirok iti agas, ngem saan nga inaramid dayta dagiti umili. (Jer. 8:9)​—6/1, panid 21-22.

• Ania ti makatulong iti maysa a Kristiano a mangdaer iti pannakikamalala ti asawana?

No ti saan a nakabasol nga asawa ikagkagumaanna nga annuroten dagiti prinsipio ti Biblia, awan ti rason a panunotenna nga adda nagkuranganna isu a liniputan ti asawana. Ammo ti Dios a kasapulam ti liwliwa ken pammabileg. Ipaayna dayta babaen kadagiti padatayo a Kristiano.​—6/15, panid 30-31.

• Ania ti maitulongyo iti maysa a masakit?

Umimdengkayo a naimbag. (Ecl. 3:1, 7) Makipagrikna ken mangipakitakayo iti konsiderasion. (Roma 12:15) Makapabileg ken nakasaganakayo koma a tumulong. (Col. 4:6; 1 Juan 3:18) Itultuloyyo ti makikomunikar. (Prov. 17:17)​—7/1, panid 10-13.

• Kasanotayo nga ammo nga awan ti nangrugian ti Dios?

Impasimudaag dayta ni Moises iti kararagna. (Sal. 90:2) Maitunos iti dayta, addaan ni Jehova iti naisangsangayan a titulo kas “Ari ti kinaagnanayon.” (1 Tim. 1:17)​—7/1, panid 28.

• Kasanoyo a matulongan dagiti annakyo a mangipateg iti panagbasa ken panagadal?

Ti panagayat ken ulidan dagiti nagannak ket makatulong tapno maipategda ti panagbasa. Kanayonanna, ikkanyo dagiti annakyo kadagiti libro. Ibasaanyo ida. Paregtaenyo ida a makiraman ken pagsaritaanyo ti nabasayo. Kiddawenyo nga ibasaandakayo ken paregtaenyo ida nga agsaludsod.​—7/15, panid 26.

• Apay a saan a nagdardaras a napan ni Jesus iti masakit a gayyemna a ni Lazaro tapno paimbagenna?

Idi nakasangpet ni Jesus, uppat nga aldawen a natay ni Lazaro. Babaen ti panagtaktakna, ad-adda a nakaipaay ni Jesus iti pammaneknek maipapan ken Amana. Iti kasta, adu ti nagbalin a manamati. (Juan 11:45)​—8/1, panid 14-15.

• Ania dagiti ‘nangato a disso’?

Kaaduanna a tumukoy dagita iti nawayang a tuktok ti turod wenno dadduma pay a lugar a pakaang-angayan ti palso a panagdayaw. No dadduma, tumukoy dagita kadagiti altar, sagrado a munmon wenno teddek, ken narelihiosuan a bambanag a naikabil iti pakaar-aramidan dagiti aktibidad a kondenaren ti Dios. (Num. 33:52)​—8/1, panid 23.