Awisendakayo!
ANIA dayta nga awis? Ti panagpasiar iti maysa kadagiti sanga nga opisina dagiti Saksi ni Jehova, a gagangay a maawagan iti Bethel. Adda 118 a sanga nga opisina iti nagduduma a pagilian. Masansan nga iyebkas dagiti bisita ti naimpusuan a panangapresiarda iti mapaliiwda a maar-aramid iti Bethel.
Kalpasan a ti maysa nga agtutubo a mayad-adalan iti Biblia nakitana dagiti nagaget ken naragsak nga agserserbi ken Jehova iti sanga nga opisina ti Mexico, naay-ayo unay ket insaludsodna: “Ania ti masapul nga aramidek tapno makapagtrabahoak met ditoy?” Naibaga kenkuana: “Masapul a mabautisaranka pay nga umuna. Kalpasanna, masapul nga agbalinka a payunir wenno amin-tiempo a manangiwaragawag iti Pagarian.” Impangag ti agtutubo dagita a singasing. Kalpasan ti dua a tawen, naawis iti Bethel ti Mexico, ket 20 a tawenen nga agserserbi sadiay.
Ania ti Bethel?
Iti Hebreo a lenguahe, ti “Bethel” kaipapananna “Balay ti Dios.” (Gen. 28:19) Dagiti pasilidad iti nadumaduma a sanga nga opisina ti mangyim-imprenta ken mangipabpablaak kadagiti Biblia ken literatura a naibatay iti Biblia ken mangipapaay iti naespirituan a tulong iti nasurok a 100,000 a kongregasion dagiti Saksi ni Jehova iti intero a lubong. Agarup 20,000 nga agtartrabaho iti Bethel—lallaki ken babbai manipud iti nadumaduma a kultura ken kasasaad iti biag—ti amin-tiempo nga agserserbi ken ni Jehova ken kadagiti naespirituan a kakabsatda buyogen ti panagsakripisio. Agdadanggay nga agtrabaho dagiti nabayagen iti dayta a Nakristianuan a pribilehio ken dagiti napipigsa nga agtutubo. Kadagiti rabii ken ngudo ti lawas, tagtagiragsaken dagiti kameng ti pamilia ti Bethel ti makitimpuyog kadagiti kabangibang a kongregasion dagiti Saksi ni Jehova babaen kadagiti gimong ken panangasaba. Iwayaanda met ti agadal iti Biblia, agaliwaksay, ken mangasikaso kadagiti personal a bambanag.
Tunggal bulan, umawat dagiti miembro ti pamilia ti Bethel iti bassit a gatad a pangsupusop kadagiti gastosda. Tagtagiragsakenda dagiti naimas ken nasustansia a taraon, agraman dagiti nadalimanek ken komportable a kuarto. Nupay saan a naluho dagiti pagtaengan a Bethel, addaan met dagita kadagiti kangrunaan a kasapulan. Malaksid kadagiti nasayaat ti pannakamantenerna a pasdek ken aglawlaw ken ti naannayas a panagtrabaho dagiti adda sadiay, makaay-ayo met kadagiti bisita ti nasayaat a kababalin ken panagtutunos nga agraraira iti Bethel. Mannakigayyemda uray okupadoda iti trabahoda. Awan kadakuada ti makarikna a nangatngatoda ngem iti sabsabali maigapu iti kasasaadda iti biag wenno iti inawatda nga annongen. Napateg ti tunggal trabaho sadiay, panagdalus man dayta, panaghardin, panagluto, wenno panagtrabaho iti pagimprentaan wenno opisina. Dagiti agserserbi iti Bethel, wenno pagaammo kas Bethelite, agtartrabahoda a sangsangkamaysa kas panangsuporta iti ministerio dagiti Saksi ni Jehova.—Col. 3:23.
Am-ammuenyo ti Dadduma a Bethelite
Am-ammuentayo man dagiti mangbukel iti daytoy internasional a pamilia. Ania ti nangtignay kadakuada nga agserbi iti Bethel? Usigentayo ti pagarigan ni Mario. Idi nagbalin a Saksi ni Jehova, napintas ti trabahona iti prestihioso nga Aleman a kompania ti lugan ken adda oportunidadna a bumaknang. Di nagbayag kalpasan a nagpabautisar, makalawas a nagboluntario iti Bethel iti pagilianda. Nadutokan a tumulong iti pagimprentaan. Nakita ni Mario ti dakkel a nagdumaan dagiti nakatrabahuanna iti Bethel ken iti pagtartrabahuanna a kompania. Isu a nagaplay iti amin-tiempo a panagserbi iti Bethel. Nupay saan a maawatan ti adu a kabagian ken katrabahuanna ti desisionna, siraragsak itan nga agserserbi ni Mario iti Bethel ti Alemania.
Adu ti simrek iti Bethel nga awanan iti naisangsangayan nga abilidad wenno saan a nagkolehio. Kasta ni Abel, a 15 a tawenen nga agserserbi iti Bethel ti Mexico. “Nagadu ti naadalko iti Bethel,” kinunana. “Nasursurok a paandaren ti narikut ken moderno a pagimprentaan. Ammok a mabalinko nga usaren dayta a nagun-odko a pannakasanay kas dakkel a panguartaan iti ruar ti Bethel, ngem mapukawko met ti agdama a tagtagiragsakek ditoy—ti natalna, makapnek a biag a nawaya manipud kadagiti pakaburiboran ken panagsasalisal a nasaknap kadagiti sekular a panggedan. Para kaniak, nagun-odkon ti kasayaatan nga edukasion, nga ad-adda a namagsirib kaniak ken nangpabileg iti espiritualidadko. Saanko a magun-od ti kasta a naespirituan a gunggona uray pay iti kasayaatan nga unibersidad.”
Makapabileg a Panagpasiar
Adda positibo nga epekto iti espiritualidad ti maysa uray ti panagpasiar laeng iti Bethel. Kasta ti napasamak ken Omar a taga-Mexico. Insuro idi kenkuana ni nanangna dagiti kinapudno iti Biblia. Ngem idi agtawenen iti 17, simmardeng ni Omar a makigimong ken mangasaba. Naigamer idi agangay kadagiti bisio ken nagbalin a materialistiko. Di nagbayag, kabayatan nga agtartrabaho iti maysa a kompania, karaman ni Omar iti grupo a napan iti Bethel ti Mexico tapno mangidemostra iti sumagmamano nga alikamen. Kuna ni Omar: “Kalpasan ti demostrasionmi, impasiardakami kadagiti pasilidad. Gapu kadagiti naimatangak ken ti naimbag a pannakilangenda kaniak, naamirisko no ania ti pagturturongan ti biagko a naisina ken Jehova. Dagus a rinugiak manen ti makigimong ken agadal iti Biblia. Innem a bulan kalpasan ti panagpasiarko iti Bethel, nagpabautisarak. Agyamanak ken Jehova gapu iti pannakapabilegko idi nagpasiarak iti Bethel.”
Napadakkel met iti Saksi a pamilia ni Masahiko a taga-Japan. Nupay kasta, matmatanna a nainget unay ti panagbiag dagiti Kristiano. Nagbalin nga okupado kadagiti aktibidad ti eskuelaan ken nagsardengen a makigimong ken mangasaba. Malagip ni Masahiko: “Maysa nga aldaw, implano ti pamiliami ken sumagmamano a kakabsat ti agpasiar iti Bethel. Simmurotak kas pammagusto iti pamiliak. Napabilegak unay iti dayta a panagpasiarmi iti Bethel. Pudno a makaparagsak ti pannakilangenko kadagiti kakabsat kabayatan ti biahe, banag a diak pulos napadasan kadagiti gagayyemko a saan a Saksi. Rimmayray ti tarigagayko nga agbiag kas Kristiano, ken inkeddengko ti agpayadal iti Biblia.” Agserserbi itan ni Masahiko kas amin-tiempo a ministro iti kongregasionda.
Maysa a Saksi a taga-Francia ti immakar idiay Moscow tapno agtrabaho. Awan ti nasarakanna a Saksi sadiay isu a kimmapuy ti espiritualidadna. Nakiraman kadagiti dakes nga aramid ken nakiasawa idi agangay iti saan a Saksi. Idi binisita ti kabsat a babai manipud Francia, nagpasiarda iti Bethel idiay St. Petersburg, Russia. Insuratna: “Natukay ti riknak gapu iti nabara a panangabrasada kadakami iti Bethel. Natalna ti kasasaad sadiay. Nariknak ti espiritu ni Jehova. Anian a kamalik nga immadayo iti organisasion ni Jehova! Kalpasan ti panagpasiarmi iti Bethel, inkararagko ti tulong ni Jehova ken rinugiak nga iyadalan iti Biblia ti dua a babbalasangko buyogen ti napabaro a determinasion.” Malaksid kadagiti sabali pay a naespirituan a tulong nga inawat daytoy kimmapuy idi ti espiritualidadna a Saksi, napatibker unay gapu iti panagpasiarna iti Bethel ket nagbanag dayta iti irarang-ayna.
Ania met ti mabalin nga epektona kadagiti saan a pamiliar kadagiti Saksi ni Jehova no agpasiarda iti Bethel? Ti aktibo iti politika a ni Alberto ket nagpasiar iti Bethel idiay Brazil idi 1988. Nagamanga unay iti kinadalus, kinadalimanek, ken nangruna iti saan a nalimed a trabaho sadiay. Sakbay ngamin a pimmasiar iti Bethel, bimmisita met ni Alberto iti seminario a pagserserbian ti padi a kayongna. Nadlaw ni Alberto ti nagdumaanda. “Nalimed ti amin nga aktibidad iti seminario,” kuna ni Alberto. Di nagbayag kalpasan ti ibibisitana iti Bethel, immanamong nga agadal iti Biblia, tinallikudanna ti politika, ken agserserbi itan kas panglakayen iti kongregasionda.
Pasiarenyo ti Bethel!
Adu ti nangaramid iti dakkel a panagregget tapno mapasiarda ti sanga nga opisina iti pagilianda. Kas pagarigan idiay Brazil, uppat a tawen nga inyurnongan da Paulo ken Eugenia tapno mapasiarda dagiti pasilidad iti Bethel iti pagilianda nupay agkalikagum daytoy iti dua nga aldaw a panagbiahe a 3,000 a kilometro ti kaadayona. Kinunada: “Saan a nasayang ti panagreggetmi. Ad-adda a maawatanmi itan ti panagandar ti organisasion ni Jehova. Tunggal ilawlawagmi kadagiti iyad-adalanmi iti Biblia ti trabaho iti Bethel, isaludsodda no dadduma, ‘Nakapasiarkayo kadin sadiay?’ Ita, maikunamin ti wen.”
Adda met kadi sanga nga opisina ken pagtaengan a Bethel iti pagilianyo wenno iti kabangibangyo a pagilian? Awisendakayo a mangpasiar kadagita a pasilidad. Manamnamayo ti nabara a panangabrasada kadakayo ken sigurado a magun-odyo ti naespirituan a gunggona nga itden ti panagpasiar iti Bethel.
[Ladawan iti panid 18]
Mario
[Ladawan iti panid 18]
Abel
[Ladawan iti panid 18]
Alemania
[Ladawan iti panid 18]
Japan
[Ladawan iti panid 18]
Brazil