Kararag
5 Napateg Kadi no Sadino ken Kaano?
AWAN duadua a napaliiwmo nga ipagpaganetget ti kaaduan a relihion a nasken a nagarbo ti pasdek a pagkararagan ken adda espesipiko nga oras nga ikeddengda no kaano ti maiparbeng a panagkararag. Ibaga kadi ti Biblia nga adda masnup a lugar ken oras ti panagkararag?
Ipakita ti Biblia nga adda dagiti maitutop a gundaway para iti panagkararag. Kas pagarigan, sakbay ti pannangan a kaduana dagiti pasurotna, nagkararag ni Jesus iti Dios tapno agyaman. (Lucas 22:17) Kasta met, idi nagtataripnong dagiti adalanna tapno agdaydayawda, nagkararagda a sangsangkamaysa. Intultuloyda ngarud ti nabayagen a kaugalian kadagiti sinagoga dagiti Judio ken iti templo ti Jerusalem. Panggep ti Dios a mausar ti templo kas “balay a pagkararagan maipaay kadagiti amin a nasion.”—Marcos 11:17.
No agtataripnong ken agkararag a sangsangkamaysa dagiti adipen ti Dios, ad-adda nga epektibo dagiti ararawda. No agkakapanunotan ti grupo ken no maitunos kadagiti Nainkasuratan a prinsipio ti inyebkas ti mangidadaulo iti kararag, maay-ayo ti Dios. Ti kasta a kararag ti mabalin a mangtignay pay ketdi kenkuana a mangaramid iti banag a saanna koma nga aramiden. (Hebreo 13:18, 19) Regular nga agkararag dagiti Saksi ni Jehova kadagiti gimongda. Naimpusuan nga awisendaka a tumabuno iti asideg a Kingdom Hall tapno mangngegmo a mismo dagiti kasta a kararag.
Nupay kasta, saan nga ibagbaga ti Biblia nga adda laeng partikular nga oras wenno lugar para iti panagkararag. Iti Biblia, mabasatayo a nagkararag dagiti adipen ti Dios iti nagduduma nga oras ken lugar. Kinuna ni Jesus: “Inton agkararagka, sumrekka iti pribado a siledmo ket, kalpasan a nairikepmon ti ridawmo, agkararagka ken ni Amam nga adda iti nalimed; iti kasta ni Amam a kumita iti nalimed supapakannakanto.”—Mateo 6:6.
Saan kadi a makaguyugoy dayta nga awis? Talaga a mabalinmo ti umadani a bukbukodmo iti Soberano iti uniberso iti aniaman nga oras, ket manamnamam nga imdengannaka. Saan ngarud a pakasdaawan no apay a masansan a nagsapul ni Jesus iti gundaway a makapagmaymaysa tapno agkararag! Naminsan, nagpatpatnag a nagkararag iti Dios tapno agpaiwanwan iti aramidenna a kapatgan a desision.—Lucas 6:12, 13.
Adda met dagiti lallaki ken babbai a dinakamat ti Biblia a nagkararag idi maipasangoda kadagiti serioso a desision wenno nadagsen a parikut. Adda dagiti gundaway a nagkararagda a sipipigsa ken no dadduma siuulimek; nagkararagda kas grupo ken kas indibidual. Ti napateg ket nagkararagda. Iyaw-awis pay ketdi ti Dios kadagiti adipenna nga ‘agkararagda a di agressat.’ (1 Tesalonica 5:17) Kanayon a sidadaan nga umimdeng ti Dios kadagidiay mangar-aramid iti pagayatanna. Saan kadi a naayat nga awis dayta?
Siempre, iti daytoy awanan pammati a lubong, pagduaduaan ti adu a tattao ti kinapateg ti panagkararag. Mabalin a maisaludsodmo, ‘Talaga kadi a makatulong kaniak ti panagkararag?’
[Blurb iti panid 9]
Mabalintay ti agkararag iti sadinoman ken iti aniaman nga oras