Apay a Rumbeng nga Agkararagtayo a Di Agressat?
“Agkararagkayo a di agressat. Mainaig iti isuamin agyamankayo.”—1 Tesalonica 5:17, 18.
1, 2. Kasano nga impakita ni Daniel ti panangipategna iti pribilehio nga agkararag, ket ania ti epekto dayta iti relasionna iti Dios?
UGALI idi ni propeta Daniel ti agkararag iti Dios iti mamitlo iti maysa nga aldaw. Agparintumeng iti sanguanan ti nakalukat a tawa ti siledna iti pangatepan, a sumango iti siudad ti Jerusalem, ket agkararag. (1 Ar-ari 8:46-49; Daniel 6:10) Uray no adda naipaulog a naarian a bilin a mangiparit iti panagkararag iti asinoman malaksid ken ni Dario nga ari ti Media, saan pulos a nagpangadua ni Daniel. Agpeggad man ti biagna wenno saan, daytoy managkararag a tao di agressat nga immararaw ken ni Jehova.
2 Ania ti panangmatmat ni Jehova ken ni Daniel? Idi dimteng ni anghel Gabriel a mangsungbat iti maysa kadagiti kararag ni Daniel, inawaganna ti propeta kas “makaay-ayo unay” wenno “maysa a lalaki a maipatpateg unay.” (Daniel 9:20-23; The New English Bible) Iti padto ni Ezequiel, ni Jehova imbilangna ni Daniel a kas maysa a nalinteg a tao. (Ezequiel 14:14, 20) Iti unos ti panagbiagna, naaddaan ni Daniel iti nasinged a relasion iti Diosna gapu kadagiti kararagna, banag a binigbig uray ni Dario.—Daniel 6:16.
3. Kas ipakita ti kapadasan ti maysa a misionero, kasano a ti kararag matulongannatayo nga agtalinaed a matalek?
3 Ti regular a panagkararag matulongannatayo met a mangdaer kadagiti nakaro a pakasuotan. Alaentayo a pagarigan ni Harold King, maysa a misionero idiay China a nasentensiaan a maibalud nga agmaymaysa iti selda iti lima a tawen. Maipapan iti kapadasanna, kinuna ni Kabsat King: “Naisinaak kadagiti padak a tattao, ngem awan ti makaisina kaniak iti Dios. . . . Isu nga uray no makitanak ti asinoman a lumabas iti seldak, agparintumengak iti uneg ti seldak iti mamitlo iti maysa nga aldaw ket agkararagak iti napigsa, a silalagipak ken ni Daniel a naisalaysay iti Biblia. . . . Kadagita a gundaway, ti espiritu ti Dios kasla inturongna ti panunotko kadagiti makagunggona unay a banag ken pinatalingenngenna ti riknak. Anian a naespirituan a kired ken liwliwa ti impaay kaniak ti kararag!”
4. Aniada a saludsod maipapan iti kararag ti usigentayo iti daytoy nga artikulo?
4 Kuna ti Biblia: “Agkararagkayo a di agressat. Mainaig iti isuamin agyamankayo.” (1 Tesalonica 5:17, 18) Gapu iti daytoy a balakad, usigentayo dagitoy a saludsod: Apay a rumbeng a maseknantayo kadagiti kararagtayo? Ania dagiti makagapu nga umadanitayo a kanayon ken ni Jehova? Ken ania ti aramidentayo no mariknatayo a saantayo a maikari nga agkararag iti Dios gapu kadagiti pagkurangantayo?
Makigayyem Babaen ti Kararag
5. Ti kararag tulongannatayo a mangtagiragsak iti ania a naisangsangayan a panaggayyem?
5 Kayatyo kadi nga ibilangnakayo ni Jehova a kas gayyemna? Kasta ti awagna ken ni patriarka nga Abraham. (Isaias 41:8; Santiago 2:23) Kayat ni Jehova a patanorentayo ti kasta a relasion kenkuana. Kinapudnona, aw-awisennatayo nga umadani kenkuana. (Santiago 4:8) Saan kadi a ti kasta nga awis rumbeng a pagpanunotennatayo a naimbag maipapan iti kararag, a maysa a naisangsangayan a probision? Nagrigat ti makitulag a makisao iti nangato nga opisial ti gobierno, ket sigurado a narigrigat pay ti makigayyem kenkuana! Ngem ti Namarsua iti uniberso aw-awisennatayo nga umadani kenkuana a siwayawaya babaen ti kararag, kaanoman a kayat wenno kasapulantayo nga aramiden dayta. (Salmo 37:5) Dagiti di agressat a kararagtayo tulongannatayo nga agbalin a nasinged a gayyem ni Jehova.
6. Ania ti maadaltayo iti ulidan ni Jesus maipapan iti kinapateg ti ‘panagkararag nga agpatpatuloy’?
6 Ngem anian a naglaka a maliwayantayo ti agkararag! Mabalin a makumikomtayo kadagiti inaldaw a pakaringgoran iti biag a ditay payen maiwayaan ti makisao iti Dios. Indagadag ni Jesus kadagiti adalanna nga ‘agkararagda nga agpatpatuloy,’ ket inaramidna a mismo dayta. (Mateo 26:41) Nupay kanayon nga adu ti aramidenna manipud agsapa agingga iti rabii, inwayaanna ti makisao iti nailangitan nga Amana. Adda dagiti tiempo a ni Jesus bumangon a “nasapa iti bigat, bayat a nasipnget pay laeng,” tapno agkararag. (Marcos 1:35) No dadduma, mapan iti naulimek a lugar no rumabiin tapno makisao ken ni Jehova. (Mateo 14:23) Ni Jesus kanayon nga inwayaanna ti agkararag, ket kastatay met koma.—1 Pedro 2:21.
7. Kadagiti ania a kasasaad a rumbeng nga agkararagtayo nga inaldaw iti nailangitan nga Amatayo?
7 Adu dagiti maitutop a kanito a mabalintay ti agkararag a bukbukod iti tunggal aldaw bayat a maipasangotayo kadagiti parikut, sulisog, ken no agdesisiontayo. (Efeso 6:18) No agpaiwanwantayo iti Dios iti amin a benneg ti biagtayo, sigurado a suminged ti pannakigayyemtayo kenkuana. No pagtinnulongan ti aggayyem a risuten dagiti problema, saan kadi a suminged ti panaggayyemda? (Proverbio 17:17) Kasta met no agpannuraytayo ken ni Jehova ket mariknatayo ti tulongna.—2 Cronicas 14:11.
8. Kadagiti ulidan da Nehemias, Jesus, ken Anna, ania ti maadaltayo maipapan iti kaatiddog dagiti personal a kararagtayo?
8 Anian a ragsaktayo ta saan a kedngan ti Dios ti kaatiddog wenno kasansan ti pannakisaotayo kenkuana babaen ti kararag! Sakbay a nagdawat iti ari ti Persia, ni Nehemias apagbiit a nagkararag a siuulimek. (Nehemias 2:4, 5) Ni Jesus nagkararag met iti apagbiit idi dimmawat ken ni Jehova iti pannakabalin a mangpagungar ken ni Lazaro. (Juan 11:41, 42) Iti sabali a bangir, ni Anna ‘nagkararag iti napaut iti sango ni Jehova’ idi inyebkasna ti linaon ti pusona. (1 Samuel 1:12, 15, 16) Mabalin nga ababa wenno atiddog dagiti personal a kararagtayo, depende iti kasapulantayo ken kadagiti kasasaad.
9. Apay a rumbeng a mairaman kadagiti kararagtayo ti panangidayaw ken panagyaman ken ni Jehova gapu kadagiti amin nga inaramidna a maipaay kadatayo?
9 Adu dagiti kararag a nailanad iti Biblia a mangyeb-ebkas iti naimpusuan a panangapresiar iti kangatuan a saad ni Jehova ken kadagiti nakaskasdaaw nga aramidna. (Exodo 15:1-19; 1 Cronicas 16:7-36; Salmo 145) Nasirmata ni apostol Juan dagiti 24 a panglakayen—ti naan-anay a bilang dagiti napulotan a Kristiano iti nailangitan a saadda—a mangidaydayaw ken ni Jehova, a kunkunada: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” (Apocalipsis 4:10, 11) Addaantay met iti rason a mangidayaw a kanayon iti Namarsua. Anian a ragsak dagiti nagannak no naimpusuan a pagyamanan ida ti anakda gapu iti inaramidda a maipaay kenkuana! Ti siyayaman a panangutob kadagiti kinaimbag ni Jehova ken ti panangyebkas iti naimpusuan a panagyaman kadagita ket nasayaat a pamay-an tapno sumayaat dagiti kararagtayo.
“Agkararagkayo a Di Agressat”—Apay?
10. Kasano a ti kararag pabilgenna ti pammatitayo?
10 Napateg iti pammatitayo ti regular a panagkararag. Kalpasan nga inyilustrar ni Jesus no apay a masapul ti ‘kanayon a panagkararag ken saan a sumuko,’ insaludsodna: “Inton dumteng ti Anak ti tao, pudno aya a masarakannanto ti pammati ditoy daga?” (Lucas 18:1-8) Ti napasnek ken naimpusuan a kararag patanorenna ti pammati. Idi lumakayen ni patriarka nga Abraham ngem awan pay ti putotna, nakisao iti Dios maipapan iti dayta a banag. Kas sungbat, ni Jehova kiniddawna nga umuna ken ni Abraham a tumangad iti langit ket bilangenna dagiti bituen, no kabaelanna a bilangen. Kalpasanna, ti Dios impanamnamana ken ni Abraham: “Kasta ti pagbalinanto ti bin-im.” Ania ti resultana? Ni Abraham “naaddaan iti pammati ken Jehova; ket imbilangna dayta kenkuana kas kinalinteg.” (Genesis 15:5, 6) Ni Jehova pabilgenna ti pammatitayo no naimpusuan nga umadanitayo kenkuana babaen ti kararag, awatentayo dagiti pammatalgedna a masarakan iti Biblia, ken no agtulnogtayo kenkuana.
11. Kasano a ti kararag matulongannatayo a mangrisut kadagiti problema?
11 Ti kararag matulongannatayo met a mangrisut kadagiti problema. Adda kadi dagiti pakadagsenantayo iti biag ken narigat dagiti kasasaad a pakaipaspasanguantayo? Ti Biblia kunaenna kadatayo: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.” (Salmo 55:22) No adda dagiti narigat a desisionantayo, mabalintay a tuladen ti inaramid ni Jesus. Nagpatpatnag a nagkararag nga agmaymaysa sakbay a pinilina dagiti 12 nga apostolna. (Lucas 6:12-16) Ket iti rabii sakbay ti ipapatayna, ni Jesus nagkararag a sipapasnek unay nga uray la a “ti ling-etna nagbalin a kas kadagiti tedted ti dara nga agtinnag iti daga.” (Lucas 22:44) Ti resulta? “Naipangag buyogen ti pannakaanamong gapu iti nadiosan a butengna.” (Hebreo 5:7) Dagiti napasnek ken di agressat a kararagtayo tulongannatayo a mangdaer kadagiti narigat a kasasaad ken nakaro a pakasuotan.
12. Kasano a ti kararag ipamatmatna ti pannakaseknan ni Jehova a mismo kadatayo?
12 Ni Jehova ad-adda a suminged met kadatayo no umadanitayo kenkuana. Dayta ti maysa pay a rason no apay nga umadanitayo kenkuana babaen ti kararag. (Santiago 4:8) No naimpusuan nga umadanitayo ken ni Jehova babaen ti kararag, saan kadi a mariknatayo a maseknan ni Jehova kadagiti kasapulantayo ken sidudungngo nga aywanannatayo? Mariknatayo a mismo ti ayat ti Dios. Ni Jehova dina inted iti siasinoman ti responsabilidad nga umimdeng iti tunggal kararag nga iturong kenkuana dagiti adipenna kas nailangitan nga Amada. (Salmo 66:19, 20; Lucas 11:2) Ket iyaw-awisna nga ‘iyallatiwtayo ti isuamin a pakaringgorantayo, agsipud ta isu maseknan kadatayo.’—1 Pedro 5:6, 7.
13, 14. Ania dagiti makagapu nga agkararagtayo a di agressat?
13 Ti kararag maparayrayna ti regtatayo iti ministerio iti publiko ken mapabilegnatayo no kasla makasarsardengtayon gapu ta iyaleng-aleng wenno busorendatayo. (Aramid 4:23-31) Ti kararag masalaknibannatayo met kadagiti “pangallilaw a pamuspusan ti Diablo.” (Efeso 6:11, 17, 18) Iti panangikarigatantayo a mangrisut kadagiti inaldaw a parikut, mabalintay nga idawat a kanayon iti Dios a pakirdennatayo. Karaman iti modelo a kararag ni Jesus ti panagdawat ken ni Jehova nga ‘ispalennatayo iti daydiay nadangkes,’ ni Satanas a Diablo.—Mateo 6:13.
14 No itultuloytayo ti agkararag a dumawat iti tulong tapno maparmek dagiti dakes a tarigagaytayo, tulongannatayo ni Jehova. Addaantayo iti daytoy a pammatalged: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” (1 Corinto 10:13) Ni apostol Pablo a mismo nariknana ti panangpabileg ni Jehova kenkuana iti nagduduma a kasasaad. “Ta iti amin a bambanag addaanak iti bileg gapu iti daydiay mangmangted kaniak iti pannakabalin,” kinunana.—Filipos 4:13; 2 Corinto 11:23-29.
Reggetan ti Agkararag iti Laksid Dagiti Pagkurangan
15. Ania ti mabalin a mapasamak no masalungasingtayo dagiti pagalagadan ti Dios?
15 Tapno maipangag dagiti kararagtayo, masapul a ditay laksiden ti balakad ti Sao ti Dios. Insurat ni apostol Juan: “Aniaman a dawatentayo awatentayo kenkuana, agsipud ta tungtungpalentayo dagiti bilinna ken ar-aramidentayo ti bambanag a makaay-ayo kadagiti matana.” (1 Juan 3:22) Ngem ania ti mabalin a mapasamak no masalungasingtayo dagiti pagalagadan ti Dios? Naglemmeng da Adan ken Eva idiay minuyongan ti Eden kalpasan a nagbasolda. Mabalin nga agannayastayo met nga aglemmeng “manipud iti sanguanan ni Jehova” ket sumardengtayon nga agkararag. (Genesis 3:8) “Napaliiwko a ti nganngani kanayon nga umuna nga aramiden dagidiay umadayo ken ni Jehova ken iti organisasionna ket sumardengdan nga agkararag, ngem saan nga umiso dayta,” kinuna ni Klaus, maysa a nabayagen nga agdaldaliasat a manangaywan. (Hebreo 2:1) Napasamak daytoy ken ni José Ángel. Kinunana: “Iti agarup walo a tawen, manmano a nagkararagak ken ni Jehova. Nariknak a saanak a maikari a makisao kenkuana, nupay imbilangko pay latta a kas nailangitan nga Amak.”
16, 17. Mangtedkayo kadagiti ehemplo no kasano a ti kanayon a panagkararag matulongannatayo a mangparmek iti naespirituan a pagkapuyan.
16 Mabalin a marikna ti dadduma kadatayo a saantayo a maikari nga agkararag gapu iti naespirituan a pagkapuyan wenno gapu ta nakabasoltayo. Ngem daytoy ti nangruna a maitutop a tiempo a masapul nga agkararagtayo. Ni Jonas intarayanna idi ti annongenna. Ngem ‘gapu kadagiti rigatna, ni Jonas immawag ken ni Jehova, ket sinungbatanna. Manipud iti tian ti Sheol, nagpatulong ni Jonas, ket ni Jehova dimngeg iti timekna.’ (Jonas 2:2) Nagkararag ni Jonas, sinungbatan ni Jehova ti kararagna, ket ni Jonas nakaungar iti naespirituan.
17 Ni José Ángel sipapasnek met a nagkararag a dimmawat iti tulong. Kinunana: “Naimpusuan nga impakaasik iti Dios a pakawanennak. Ket pudno a tinulongannak. Panagkunak, saanak koma a nakasubli iti kinapudno no saan a gapu iti tulong ti kararag. Kanayon itan nga agkarkararagak nga inaldaw, ket segseggaak dagitoy a kanito.” Kanayon koma a ditay bumdeng a makisao a siwayawaya iti Dios maipapan kadagiti bidduttayo ken sipapakumbaba a dawatentayo ti pammakawanna. Idi impudno ni Ari David dagiti salungasingna, pinakawan ni Jehova dagiti basolna. (Salmo 32:3-5) Kayatnatayo a tulongan ni Jehova, a dinatay kondenaren. (1 Juan 3:19, 20) Ket dagiti kararag dagiti panglakayen iti kongregasion matulongannatayo iti naespirituan, ta dagiti kasta a kararag “aduan iti puersa.”—Santiago 5:13-16.
18. Ania ti mainanama dagiti adipen ti Dios uray kasano kadagsen ti basolda?
18 Adda aya ama a mangilaksid iti anakna a sipapakumbaba a dumawat kenkuana iti tulong ken balakad kalpasan a nagbiddut? Ti pangngarig maipapan iti barayuboy nga anak ipakitana nga uray kasano kadagsen ti basoltayo, maragsakan ti nailangitan nga Amatayo no agsublitayo kenkuana. (Lucas 15:21, 22, 32) Ni Jehova idagdagadagna kadagiti amin a nakabasol nga umawagda kenkuana, “ta dakkelto ti pammakawanna.” (Isaias 55:6, 7) Nupay nadagsen dagiti basol ni David, immawag ken ni Jehova, a kunkunana: “Umimdengka, O Dios, iti kararagko; ket dika aglemmeng manipud panagkiddawko iti parabur.” Kinunana pay: “Rabii ken bigat ken agmatuon awan mabalinko no di mangipakita iti pannakaseknan ket umasugak, ket [ni Jehova] mangngegna ti timekko.” (Salmo 55:1, 17) Anian a makaliwliwa!
19. Apay a ditay koma ipato a dagiti kasla di masungsungbatan a kararag ket pammaneknek ti di pananganamong ti Dios?
19 No ngay saan a masungbatan a dagus ti kararagtayo? Masapul a siguraduentayo a ti dawattayo ket maitunos iti pagayatan ni Jehova ken ipadalantayo iti nagan ni Jesus. (Juan 16:23; 1 Juan 5:14) Ni adalan a Santiago tinukoyna dagiti dadduma a Kristiano a di masungsungbatan dagiti kararagda gapu ta “agdawdawatda maipaay iti dakes a panggep.” (Santiago 4:3) Iti sabali a bangir, ditay koma ipato a dagus a dagiti kasla di masungsungbatan a kararag ket pammaneknek ti di pananganamong ti Dios. No dadduma, sakbay a sumungbat ni Jehova, mabalin a palubosanna dagiti matalek nga agdaydayaw kenkuana nga agtultuloy nga agkararag maipapan iti maysa a banag iti sumagmamano a tiempo. “Itultuloyyo ti agdawat, ket maitedto dayta kadakayo,” kinuna ni Jesus. (Mateo 7:7) Gapuna, nasken a ‘reggetantayo ti agkararag.’—Roma 12:12.
Agkararag a Kanayon
20, 21. (a) Apay a nasken nga agkararagtayo a di agressat kadagitoy “maudi nga aldaw”? (b) Ania ti magun-odtayo no inaldaw nga umadanitayo iti trono ti di kaikarian a kinamanangngaasi ni Jehova?
20 Umad-adu dagiti pakarigatan ken parikut kadagitoy “maudi nga aldaw,” kadagitoy “napeggad a tiempo a narigat a pakilangenan.” (2 Timoteo 3:1) Ket mabalin a nalaka a mariribukantayo gapu kadagiti pakasuotan. Nupay kasta, dagiti di agressat a kararagtayo tulongannatayo a mangipamaysa kadagiti naespirituan a banag iti biagtayo nupay adda a kanayon dagiti problema, sulisog, ken pakaupayan. Dagiti inaldaw a kararagtayo ken ni Jehova maitedna ti napateg a tulong a kasapulantayo.
21 Ni Jehova, ti “Managdengngeg iti kararag,” kanayon a madadaan nga umimdeng kadatayo. (Salmo 65:2) Saantayo koma nga okupado unay nga awan payen ti panawentayo a makisao kenkuana. Ti pannakigayyemtayo iti Dios ti kapatgan a banag a mabalintay nga ikutan. Ditay koma tagtagibassiten dayta. “Ngarud, buyogen ti wayawaya nga agsao umadanitay koma iti trono ti di kaikarian a kinamanangngaasi, tapno makagun-odtayo iti asi ken makasaraktayo iti di kaikarian a kinamanangngaasi kas tulong iti umiso a tiempo.”—Hebreo 4:16.
Ania ti Sungbatyo?
• Ania ti maadaltayo ken ni propeta Daniel maipapan iti pateg ti kararag?
• Kasanotayo a mapabileg ti pannakigayyemtayo ken ni Jehova?
• Apay a rumbeng nga agkararagtayo a di agressat?
• Apay a ditay koma bumdeng nga agkararag ken ni Jehova no mariknatayo a saantayo a maikari a makisao kenkuana?
[Ladawan iti panid 16]
Apagbiit a nagkararag a siuulimek ni Nehemias sakbay a nakisao iti ari
[Ladawan iti panid 17]
Ni Anna ‘nagkararag iti napaut iti sango ni Jehova’
[Dagiti Ladawan iti panid 18]
Nagpatpatnag a nagkararag ni Jesus sakbay a pinilina dagiti 12 nga apostolna
[Dagiti Ladawan iti panid 20]
Adu dagiti gundaway a mabalintay ti agkararag iti kada aldaw