Theocratic Ministry School
Panggep: Sanayen dagiti agibumbunannag nga agbalin nga epektibo iti panangikasaba ken panangisuro iti naimbag a damag.
Kapaut: Agpatpatuloy.
Lokasion: Kingdom Hall.
Kualipikasion: Amin a regular a makitimtimpuyog iti kongregasion nga umanamong kadagiti sursuro ti Biblia, ken mangan-annurot kadagiti Nakristianuan a prinsipio.
Panagaplikar: Umasideg iti manangaywan iti eskuelaan dagiti mayat nga agbalin nga estudiante.
Kuna ni Sharon a maysa a baldado gapu iti amyotrophic lateral sclerosis (ALS): “Insuronak ti Theocratic Ministry School nga ag-research ken mangipresenta kadagiti impormasion iti lohikal a pamay-an. Nasursurok met a panunoten ti naespirituan a kasapulan ti sabsabali imbes a dagiti laeng kasapulak.”
Kinuna ni Arnie a nabayag a nagserserbi kas agdaldaliasat a manangaywan: “Agbeddal ti panagsaok idi ubingak ken diak maiperreng ti matak iti sabsabali. Daytoy nga eskuelaan sinuruannak a maaddaan iti kompiansa iti bagik. Iti tulong ni Jehova babaen itoy a pannakasanay, nasursurok ti umiso a pamay-an ti panaganges ken panangipamaysa iti atension. Agyamanak unay iti pasetko a mangidayaw iti Dios iti kongregasion ken iti ministeriok.”
Bethel Entrants’ School
Panggep: Tulongan dagiti kabbaro a Bethelite nga agballigi iti panagserbida.
Kapaut: 45 a minuto iti tunggal lawas iti las-ud ti 16 a lawas.
Lokasion: Bethel.
Kualipikasion: Masapul a permanente a miembro ti pamilia ti Bethel wenno temporario a boluntario a naaprobaran nga agserbi iti Bethel iti makatawen wenno nasursurok pay.
Panagaplikar: Automatiko a karaman dagiti baro a miembro ti pamilia ti Bethel.
Kinuna ni Demetrius a nakapagadal iti daytoy nga eskuelaan idi dekada 1980: “Daytoy a kurso ti nangpasayaat iti personal a panagadalko ken nangisagana kaniak para iti napaut a panagserbik iti Bethel. Dagiti instruktor, kurikulum, ken praktikal a balakad ti nangkombinsir kaniak a naayat ken maseknan ni Jehova ket kayatna nga agballigiak iti panagserbik kas Bethelite.”
Kuna ni Kaitlyn: “Tinulongannak ti Entrants’ School a mangipamaysa iti banag a kapatgan—ti panagbalin a nataengan iti naespirituan. Natulonganak met a mangparayray iti apresasionko ken Jehova, iti balayna, ken iti organisasionna.”
Kingdom Ministry School
Panggep: Sanayen dagiti agdaldaliasat a manangaywan, panglakayen, ken no dadduma dagiti ministerial nga adipen a mangibaklay kadagiti responsabilidadda iti organisasion ni Jehova. (Ara. 20:28) Mausig dagiti agdama a situasion, pagrangrang-ayan, ken naganat a kasapulan dagiti kongregasion. Maangay daytoy nga eskuelaan iti tunggal sumagmamano a tawen sigun iti ikeddeng ti Bagi a Manarawidwid.
Kapaut: Iti napalabas a tawtawen a panagadal iti daytoy nga eskuelaan, 2 agingga iti 2 1⁄2 nga aldaw ti para kadagiti agdaldaliasat a manangaywan, 1 1⁄2 nga aldaw para kadagiti panglakayen, ken 1 nga aldaw para kadagiti ministerial nga adipen.
Lokasion: Kaaduanna nga iti Kingdom Hall wenno Assembly Hall.
Kualipikasion: Masapul a maysa nga agdaldaliasat a manangaywan, panglakayen, wenno ministerial nga adipen.
Panagaplikar: Adda imbitasion nga ited ti manangaywan iti sirkito kadagiti panglakayen ken ministerial nga adipen. Imbitaran ti sanga nga opisina dagiti agdaldaliasat a manangaywan.
“Nupay adu nga impormasion ti mapagadalan iti ababa laeng a tiempo, mapabileg dagiti panglakayen ken matulonganda a mangtaginayon iti rag-oda ken ‘agtalinaed a malalaki’ iti serbisioda ken Jehova. Dagiti kabbaro ken nabayagen a panglakayen agpadpada a masursuroda ti epektibo a panangipastor ken naan-anay a panagtutunos.”—Quinn (baba).
“Daytoy a balanse a pannakasanay patanorenna ti naun-uneg a panangapresiar iti naespirituan a bambanag, mamakdaar kadagiti peggad, ken mangipaay kadagiti praktikal a singasing iti panangaywan iti arban. Anian a kinamanangngaasi ni Jehova ta tultulongannakami!”—Michael.
Pioneer Service School
Panggep: Tulongan dagiti payunir a ‘naan-anay a mangitungpal iti ministerioda.’—2 Tim. 4:5.
Kapaut: Dua a lawas.
Lokasion: Ikeddeng ti sanga nga opisina; kaaduanna nga iti Kingdom Hall.
Kualipikasion: Masapul nga agserserbin kas regular pioneer iti makatawen wenno nasursurok pay.
Panagaplikar: Automatiko a karaman dagiti kualipikado a payunir ket ipakaammo dayta kadakuada ti manangaywan iti sirkito.
“Natulongannak dayta nga eskuelaan tapno mapagballigiak dagiti tubeng,” kuna ni Lily (kannawan). “Dakkel ti rimmang-ayan ti pamay-an ti panagadalko, panangisurok, ken panangusarko iti Biblia. Mas nakasaganaak itan a tumulong iti sabsabali, mangsuporta kadagiti panglakayen, ken mangiranud iti kabaelak para iti irarang-ay ti kongregasion.”
Imbaga ni Brenda a naminduan a nakapagadal iti dayta nga eskuelaan: “Natulonganak a mangipamaysa iti naespirituan a bambanag, mangsanay a naimbag iti konsiensiak, ken ad-adda a makatulong iti sabsabali. Talaga a nakaparparabur ni Jehova!”
School for Congregation Elders
Panggep: Tulongan dagiti panglakayen a mangibaklay iti responsabilidadda iti kongregasion ken mangpabileg iti espiritualidadda.
Kapaut: Lima nga aldaw.
Lokasion: Ikeddeng ti sanga nga opisina; kaaduanna nga iti Kingdom Hall wenno Assembly Hall.
Kualipikasion: Masapul a maysa a nadutokan a panglakayen.
Panagaplikar: Imbitaran ti sanga nga opisina dagiti panglakayen.
Paliiwem ti dadduma a komento dagiti nagadal iti maika-92 a klase iti Estados Unidos:
“Nagunggonaanak unay iti daytoy nga eskuelaan, natulonganak a mangusig iti bagik ken no kasano a maaywanak dagiti karnero ni Jehova.”
“Sisasaganaak nga agbalin nga ad-adda pay a makaparegta iti amin babaen ti panangipaganetgetko kadagiti napateg a punto iti Kasuratan.”
“Kanayonto nga iyaplikarko dagiti naadalko iti daytoy nga eskuelaan.”
School for Traveling Overseers and Their Wives
Panggep: Tulongan dagiti manangaywan iti sirkito ken distrito nga agbalin nga ad-adda nga epektibo iti panagserbida kadagiti kongregasion bayat nga “agtrabaho[da] a sipipinget iti panagsao ken panangisuro.”—1 Tim. 5:17; 1 Ped. 5:2, 3.
Kapaut: Dua a bulan.
Lokasion: Ikeddeng ti sanga nga opisina.
Kualipikasion: Masapul a ti kabsat a lalaki ket manangaywan iti sirkito wenno distrito.
Panagaplikar: Imbitaran ti sanga nga opisina dagiti agdaldaliasat a manangaywan agraman dagiti assawada.
“Immuneg ti panangapresiarmi iti kinaulo ni Jesus iti kongregasion. Nakitami a masapul a paregtaenmi dagiti kakabsat a pagserbianmi ken pabilgenmi ti panagkaykaysa ti tunggal kongregasion. Impaganetget daytoy a kurso a no mangbalakad wenno mangkorehir ti maysa nga agdaldaliasat a manangaywan, ti koma kangrunaan a panggepna ket ti panangiparikna kadagiti kakabsat nga ay-ayaten ida ni Jehova.”—Joel, Umuna a klase, 1999.
Bible School for Single Brothers
Panggep: Maisagana dagiti awanan asawa a panglakayen ken ministerial nga adipen a mangibaklay iti kanayonan a responsabilidad iti organisasion ni Jehova. Kaaduan kadagiti agturpos ket madutokan nga agserbi iti sadinoman a paset ti pagilianda nga agkasapulan iti tulong. Mabalin a maibaon ti dadduma iti sabali a pagilian no sisasaganada nga agpausar. Sumagmamano kadagiti agturpos ti agserbi kas temporario nga special pioneer a manglukat ken mangpalawa iti trabaho iti nasulinek wenno naiputputong a luglugar.
Kapaut: Dua a bulan.
Lokasion: Ikeddeng ti sanga nga opisina; kaaduan nga iti Kingdom Hall wenno Assembly Hall.
Kualipikasion: Kakabsat a lallaki nga agtawen iti 23 agingga iti 62 a nasayaat ti salun-atda ken agtarigagay nga agserbi iti sadinoman nga addaan dakdakkel a panagkasapulan. (Mar. 10:29, 30) Masapul a di kumurang a dua a tawenen nga agserserbida kas panglakayen wenno ministerial nga adipen.
Panagaplikar: Adda maangay a miting iti asamblea sirkito a mangipaay iti impormasion kadagiti interesado nga agadal.
“Gapu iti panangigaedko nga agadal, natulongannak ti espiritu ni Jehova a mangpasayaat iti kinataok,” kuna ni Rick, iti maika-23 a klase idiay Estados Unidos. “No mangted ni Jehova iti annongen, tulongannaka a mangitungpal iti dayta. Naadalko a pabilgennak ti Dios no ipamaysak nga aramiden ti pagayatanna imbes a ti pagayatak.”
“Nasursurok a bigbigen ti organisasion ti Dios kas moderno a milagro,” kinuna ni Andreas, nga agserserbi idiay Germany. “Daytoy a pannakasanay ti nangisagana kaniak iti dakdakkel a trabaho. Nasursurok met kadagiti adu nga ehemplo iti Biblia daytoy a pamunganayan a kinapudno: Ti panagserbi ken Jehova ken kadagiti kakabsat ket mangibunga iti pudno a kinaragsak.”
Bible School for Christian Couples
Panggep: Sanayen dagiti naasawaan a kakabsat tapno ad-adda a mausar ida ni Jehova ken ti organisasionna. Adu kadagiti agturpos ti maibaon nga agserbi iti paset ti pagilianda nga addaan dakdakkel a panagkasapulan. Maibaon ti dadduma iti sabali a pagilian no awatenda dayta. Mabalin nga agserbi ti dadduma kas temporario nga special pioneer a manglukat ken mangpalawa iti trabaho iti nasulinek ken naiputputong a luglugar.
Kapaut: Dua a bulan.
Lokasion: Maang-angay iti Estados Unidos, ken mangrugi iti Setiembre 2012, maangayto met kadagiti napili a sanga nga opisina iti intero a lubong, kaaduanna nga iti Kingdom Hall wenno Assembly Hall.
Kualipikasion: Agassawa nga agtawen iti 25 agingga iti 50, nasayaat ti salun-atda, ken sidadaanda nga agserbi iti sadinoman nga addaan iti dakdakkel a panagkasapulan ken addaan iti kababalin nga, “Adtoyak! Ibaonnak.” (Isa. 6:8) Masapul a di kumurang a dua a tawenen nga agassawada ken di kumurang a diretso a dua a tawenen nga agserserbida iti amin a tiempo. Masapul a panglakayen ti asawa a lalaki wenno ministerial nga adipen iti di kumurang a diretso a dua a tawen.
Panagaplikar: Adda miting a maangay iti kombension distrito a mangipaay iti impormasion kadagiti agtarigagay nga agadal. No awan ti miting kadagiti kombension iti pagilianyo ket kayatyo ti agaplay, mabalinyo ti agsurat iti sanga nga opisina para iti kanayonan nga impormasion.
“Walo laeng a bulan dayta ngem binalbaliwanna ti biagmi ken impaayanna dagiti padami nga addaan assawa iti ad-adu a gundaway nga agserbi! Kayatmi a pagtalinaeden a balanse ti biagmi tapno mausarmi a nainsiriban ti tiempomi.”—Eric ken Corina (baba), Umuna a klase, 2011.
Watchtower Bible School of Gilead
Panggep: Sanayen dagiti estudiante nga agserbi kas misionero kadagiti aduan populasionna a luglugar, kas agdaldaliasat a manangaywan, wenno kas Bethelite. Tumulongda a mangpasayaat ken mangpabileg iti pannakaorganisar ti trabaho iti tay-ak ken iti sanga nga opisina.
Kapaut: Lima a bulan.
Lokasion: Watchtower Educational Center, Patterson, New York, Estados Unidos ti America.
Kualipikasion: Agassawa nga agserserbin iti aniaman a kita ti amin-tiempo a panagserbi, kas kadagiti misionero a di pay nakapagadal iti Gilead, special pioneer, agdaldaliasat a manangaywan, wenno Bethelite. Masapul a di kumurang a tallo a tawen a nakapagkaduadan iti dayta a pribilehio. Masapul a nalaingda nga agsao, agbasa, ken agsurat iti Ingles.
Panagaplikar: Mabalin nga imbitaran ti Komite ti Sanga nga agaplay dagiti kualipikado nga agassawa.
Agserserbi itan idiay Africa da Lade ken Monique a taga-Estados Unidos. “Insagananakami ti Gilead School a mapan iti sadinoman a paset ti lubong tapno makaduami nga agtrabaho dagiti patpatgentayo a kakabsat,” kuna ni Lade.
Innayon ni Monique: “Bayat nga iyap-aplikarko ti naadalko iti Sao ti Dios, ad-adda a mariknak ti rag-o iti annongek. Ibilangko dayta a rag-o kas kanayonan a pammaneknek ti ayat ni Jehova.”
School for Branch Committee Members and Their Wives
Panggep: Matulongan dagiti Komite ti Sanga a mangimaton kadagiti pagtaengan a Bethel, mangasikaso iti bambanag a mainaig iti serbisio dagiti kongregasion, ken mangiwanwan kadagiti sirkito ken distrito. Adda met masursuroda mainaig iti panagipatarus, panagimprenta, ken panagipatulod kadagiti literatura.
Kapaut: Dua a bulan.
Lokasion: Watchtower Educational Center, Patterson, New York, Estados Unidos ti America.
Kualipikasion: Masapul a ti kabsat a lalaki ket miembro ti Komite ti Sanga nga Opisina, wenno Komite ti Pagilian, wenno nadutokan iti umasping nga annongen.
Panagaplikar: Imbitaran ti Bagi a Manarawidwid dagiti kakabsat a lallaki agraman dagiti assawada.
Agserserbi itan idiay Nigeria da Lowell ken Cara a nagturpos iti maika-25 a klase. “Naipalagip kaniak a kasanoman ti kinaokupadok wenno aniaman ti naited a trabahok, ti espiritualidad ti kapatgan tapno agbalin a makaay-ayo ti maysa a tao ken Jehova,” kuna ni Lowell. “Impaganetget met ti kurso a tuladentayo ti panagayat ni Jehova kadagiti adipenna bayat a makilanglangentayo iti sabsabali.”
“Daytoy ti maysa a komento a minennamennak,” innayon ni Cara. “No diak mailawlawag ti maysa a punto iti simple a pamay-an, masapul nga adalek dayta sakbay nga isurok iti sabsabali.”