Apay nga Agkararag Dagiti Tattao?

Kanayonka kadi nga agkararag? Adu a tattao ti agkararag, uray ti dadduma nga ateista. Ngem apay nga agkararagda? Sigun iti surbey, kagudua kadagiti umili ti France ti agkararag wenno agmennamenna no dadduma tapno “sumayaat ti riknada.” Kas kadagiti taga-Europa, agkararagda iti Dios tapno “mabang-aranda.” Agkararag met ti dadduma a manamati no adda laeng kasapulanda ken namnamaenda a sungbatan a dagus ti Dios ti kiddawda.​—Isaias 26:16.

Sika met ngay? Ti kadi kararag ket maysa laeng a pamay-an tapno makapanunotka a naimbag? No mamatika iti Dios, makatulong kadi kenka ti kararag? Wenno kasla saan a masungsungbatan dagiti kararagmo? Makatulong kenka ti Biblia tapno ibilangmo ti kararag a napateg a pamay-an tapno sumingedka iti Dios a saan laeng a mangbang-ar iti rikna.