Leksion 7
Iyaadani iti Dios Babaen ti Kararag
Apay a napateg ti regular a panagkararag? (1)
Siasino ti rumbeng a pagkararagantayo, ken kasano? (2, 3)
Ania dagiti banag a maitutop nga ikararag? (4)
Kaano a rumbeng nga agkararagkayo? (5, 6)
Ipangag kadi ti Dios amin a kararag? (7)
1. Ti kararag ket napakumbaba a pannakisao iti Dios. Regular koma nga agkararagkayo iti Dios. Iti kasta sumingedkayo kenkuana a kas maysa a patpatgen a gayyem. Naindaklan ken mannakabalin unay ni Jehova, ngem ipangagna dagiti kararagtayo! Regular kadi nga agkarkararagkayo iti Dios?—Salmo 65:2; 1 Tesalonica 5:17.
2. Paset ti panagdayawtayo ti kararag. Gapuna, ni laeng Jehova a Dios ti rumbeng a pagkararagantayo. Idi adda ni Jesus ditoy daga, kanayon a nagkararag ken Amana, saan nga iti sabali. Kasta met koma ti aramidentayo. (Mateo 4:10; 6:9) Nupay kasta, rebbeng a mayebkas amin a kararagtayo iti nagan ni Jesus. Ipakita daytoy a raraementayo ti saad ni Jesus ken addaantay iti pammati iti datonna a pangsubbot.—Juan 14:6; 1 Juan 2:1, 2.
3. No agkararagtayo, makisaotay koma iti Dios manipud pusotayo. Saantay koma nga ikabesa dagiti kararagtayo wenno basaen iti libro a pagkararagan. (Mateo 6:7, 8) Mabalintay ti agkararag iti aniaman a nadayaw a posision, iti aniaman a kanito, ken iti uray sadinoman. Mangngeg ti Dios uray dagiti naulimek a kararag nga agaon iti pusotayo. (1 Samuel 1:12, 13) Nasayaat ti sumapul iti naulimek a lugar nga adayo iti dadduma a tattao tapno mayebkastayo dagiti personal a kararagtayo.—Marcos 1:35.
4. Ania dagiti banag a mabalinyo nga ikararag? Aniaman a banag a mangapektar iti pannakigayyemyo kenkuana. (Filipos 4:6, 7) Ipakita ti modelo a kararag a rebbeng nga ikararagtayo ti maipapan iti nagan ken panggep ni Jehova. Mabalintay met nga idawat nga ipaayna dagiti material a kasapulantayo, pakawanenna dagiti basoltayo, ken tulongannatayo a mangsaranget iti sulisog. (Mateo 6:9-13) Saan koma nga agimbubukod dagiti kararagtayo. Dagiti laeng banag a maitunos iti pagayatan ti Dios ti rebbeng nga ikararagtayo.—1 Juan 5:14.
5. Mabalinyo ti agkararag iti kaanoman a tignayennakay ti pusoyo nga agyaman wenno mangidayaw iti Dios. (1 Cronicas 29:10-13) Rebbeng nga agkararagkayo no addaankay kadagiti parikut ken no masuot ti pammatiyo. (Salmo 55:22; 120:1) Maitutop ti agkararag sakbay a mangankayo. (Mateo 14:19) Aw-awisennatay ni Jehova nga agkararag “iti isuamin a gundaway.”—Efeso 6:18.
6. Nangnangruna a kasapulan nga agkararagtayo no nakaaramidtayo iti nadagsen a basol. Iti kakasta a kanito rebbeng a dumawattay iti asi ken pammakawan ni Jehova. No ipudnotay kenkuana dagiti basoltayo ken ikagumaantay a saanen nga uliten ida, ‘sisasagana a mamakawan’ ti Dios.—Salmo 86:5; Proverbio 28:13.
7. Dagiti laeng kararag ti nalinteg a tattao ti ipangag ni Jehova. Tapno ipangag ti Dios dagiti kararagyo, masapul nga ikagumaanyo ti agbiag a mayannurot kadagiti lintegna. (Proverbio 15:29; 28:9) Masapul a napakumbabakayo no agkararagkayo. (Lucas 18:9-14) Masapul nga aramidenyo ti ikarkararagyo. Iti kasta pampaneknekanyo nga adda pammatiyo ken pudno a napasnekkayo iti ibagbagayo. Sungbatan laeng ni Jehova dagiti kararagyo no aramidenyo dagitoy.—Hebreo 11:6.