Adda Kadi Anghel de la Guardiam?

Saan nga isursuro ti Biblia nga adda anghel de la guardia ti tunggal tao. Agpayso nga imbaga idi ni Jesus: “Siguraduenyo a dikay umsien ti maysa kadagitoy a babassit [dagiti adalan ni Kristo]; ta ibagak kadakayo a dagiti anghelda sadi langit kanayon a makitada ti rupa ni Amak nga adda sadi langit.” (Mateo 18:10) Ngem saan a kayat a sawen ni Jesus nga adda anghel de la guardia ti tunggal tao. Kayatna laeng nga ibaga a talaga nga interesado dagiti anghel iti tunggal adalanna. Isu a saan nga agdarasudos dagiti pudno a Kristiano ken saanda nga irisgo ti biagda, sada ipagarup a protektaran ida dagiti anghel ti Dios.

Kayatna kadi a sawen a didatay tultulongan dagiti anghel? Saan. (Salmo 91:11) Adda dagiti talaga a mamati nga us-usaren ti Dios dagiti anghel a mangprotektar ken mangtarabay kadakuada. Maysa kadakuada ni Kenneth a nadakamat iti immuna nga artikulo. Uray no ditay masigurado, mabalin a husto ti panagriknana. Kanayon a mapampaneknekan dagiti Saksi ni Jehova a tultulongan ida dagiti anghel bayat a mangaskasabada. Ngem gapu ta ditay makita dagiti anghel, saantayo a maibaga no agingga iti ania nga us-usaren ida ti Dios iti panangtulongna kadagiti tattao. Nupay kasta, awan dakesna no agyamantayo iti Mannakabalin-amin iti aniaman a tulong a mabalin nga intedna.—Colosas 3:15; Santiago 1:17, 18.