“Awan ti Narigat a Dalan Wenno Adayo a Lugar”

IDI Marso 26, 1937, nabuntog ti panagpataray ti dua a nabambannog a lallaki nga agturong idiay Sydney, Australia. Nakataptapoken ti luganda. Pimmanawda iti siudad makatawen sakbayna. Nasurok a 19,300 a kilometro ti biniaheda a napan kadagiti kabambantayan ken kaaadaywan a paset ti kontinente. Saan a nagpaspasiar ti inaramidda. Da Arthur Willis ken Bill Newlands ket dua laeng kadagiti naregta a payunir a nagaget a nangikasaba iti naimbag a damag ti Pagarian ti Dios kadagiti nakalawlawa nga away ti Australia.

Agingga iti maudi a paset ti 1920’s, dagiti siudad ken ili iti igid ti baybay ti kaaduan a nangaskasabaan ti bassit a bilang dagiti Estudiante ti Bibliaa idiay Australia. Masarakan iti makintengnga a paset ti Australia dagiti manmano ti matataona nga away. Nalawlawa pay dayta a nakamagmaga a rehion ngem iti kagudua ti United States. Ngem ammo dagiti kakabsat a masapul nga ikasaba dagiti pasurot ni Jesus ti maipapan kenkuana “agingga iti kaadaywan a paset ti daga.” Karaman dita dagiti nasulinek nga away ti Australia. (Ara. 1:8) Ngem kasano a maitungpalda dayta a nagdakkel a trabaho? Gapu ta agtalekda a bendisionan ni Jehova ti panagreggetda, determinadoda a mangaramid iti amin a kabaelanda.

LINUKTAN DAGITI PAYUNIR TI DALAN

Idi 1929, dagiti kongregasion idiay Queensland ken Western Australia ket nagasembol kadagiti lugan nga usarenda a mangasaba kadagiti teritoriada nga adda iti away. Gapu ta narigat ti dalan, dagiti payunir a nalaing nga agmaneho ti mangiggem iti lugan ken mangtarimaan kadagita. Adu a lugar a saan pay idi a nakasabaan ti nadanon dagitoy a payunir.

Nagbisikleta met dagiti payunir a saan a makagatang iti lugan. Kas pagarigan, idi 1932, kasta ti inaramid ni Bennett Brickell nga agtawen idi iti 23. Manipud Rockhampton, Queensland, lima a bulan a nangasaba agingga kadagiti kasulinekan a lugar iti makin-amianan a paset ti Queensland. Ikargana iti bisikletana dagiti ules, bado, makan, ken adu a libro. Uray no naplat idin ti goma ti bisikletana, nagtultuloy latta ta agtalek a tulongan ni Jehova. Indurduronna ti bisikletana iti 320 a kilometro agingga a nadanonna ti papananna, ket nalabsanna dagiti lugar nga adun ti natay gapu iti waw. Iti simmaruno a nasurok a 30 a tawen, ginasut a ribu a kilometro ti dinaliasat ni Brother Brickell iti intero nga Australia babaen iti bisikleta, motor, ken lugan. Isu ti immuna a nangasaba kadagiti tribu nga Aborigines ken timmulong a nangbukel kadagiti kongregasion. Gapu iti dayta, pagaammo ken raraemen dagiti tattao iti dayta nga away.

PANANGSANGO KADAGITI PAKARIGATAN

Maysa ti Australia kadagiti bassit ti matataona a lugar iti lubong, aglalo kadagiti away. Isu nga inkagumaan dagiti adipen ni Jehova a biroken dagiti tattao iti kaadaywan a paset ti kontinente.

Kasta ti inaramid da Stuart Keltie ken William Torrington. Idi 1933, limmasatda iti nakalawlawa a Simpson Desert tapno mangasabada iti ili ti Alice Springs iti tengnga ti kontinente. Idi naperdi ti bassit a luganda ket masapul nga ibatida, intultuloy ni Brother Keltie​—nga addaan iti kayo nga artipisial a saka​—ti napan ngem nagsakayen iti kamelio. Nagbunga ti panagregget dagiti payunir idi nakasabaanda ti maysa a makinkukua iti hotel idiay William Creek, maysa nga adayo nga estasion ti tren. Idi agangay, inawat ni Charles Bernhardt ti kinapudno, inlakona ti hotel-na, ken agmaymaysa a nagpayunir iti 15 a tawen kadagiti kamagaan ken kaadaywan a lugar iti Australia.

Masapul idi a natured ken saan a nalaka a sumuko dagiti immuna a payunir sadiay tapno maanduranda dagiti pakarigatan. Nangasaba da Arthur Willis ken Bill Newlands, a naibaga itay, kadagiti away ti Australia. Naminsan, dua a lawas a narigatanda a nagbiahe iti 32 a kilometro ta nalubo ti dalan gapu iti tudo. No dadduma, permi ti rigatda ken agkalimduosanda a mangiduron iti luganda iti kadardaratan a turod, kadagiti lasonglasong a dalan, ken nadarat a karayan. No agpalia ti luganda, a masansan a mapasamak, adu nga aldaw a magmagna wenno agbisikletada a mapan iti kaasitgan nga ili ket adu a lawas pay nga urayenda a sumangpet ti piesa a kasapulanda. Ngem nagtultuloyda latta a positibo uray narigat ti kasasaadda. Naminsan, naibaga ni Arthur Willis ti kas iti nadakamat iti magasin a The Golden Age: “Awan ti narigat a dalan wenno adayo a lugar para kadagiti Saksina.”

Imbaga ti nabayagen a payunir a ni Charles Harris a gapu ta agmaymaysa ken napadasanna ti rigat iti away, nagbalin a nadekdekket ken Jehova. Imbagana pay: “No posible, adayo a nasaysayaat ti biag ti maysa no basbassit ti sanikuana. No situtulok ni Jesus a naturog iti kannag no kasapulan, naragsaktayo koma met a mangtulad iti inaramidna no dayta ti kasapulan.” Adu a payunir ti nangaramid iti kasta. Gapu iti kinagaget ken panagreggetda, naidanon ti naimbag a damag iti amin a suli dayta a kontinente, ket adu a tattao ti dimmasig iti Pagarian ti Dios.