Makipagtrabaho ken Jehova iti Inaldaw

1. Ania dagiti pamay-an a mabalintayo ti makipagtrabaho ken Jehova?

KAYAT ti Namarsua a makitinnulong kenkuana dagiti perpekto a tattao tapno maitungpal dagiti panggepna. Uray imperpekto ita ti tao, mabalin latta a makipagtrabaho ken Jehova iti inaldaw dagiti matalek a tattao. Kas pagarigan, agbalintayo a ‘katrabahuan ti Dios’ no ikasabatayo ti naimbag a damag ti Pagarianna ken agaramidtayo iti ad-adalan. (1 Cor. 3:5-9) Anian a nagsayaat a pribilehio nga ibilangnatayo ti mannakabalin-amin a Namarsua iti uniberso a maikari a makitinnulong iti trabaho a nagpateg kenkuana! Ngem saan laeng a ti panangasaba ken panagaramid iti ad-adalan ti pamay-an a mabalintayo ti makipagtrabaho ken Jehova. Ilawlawag daytoy nga artikulo ti dadduma pay a pamay-an a maaramidtayo dayta​—no tulongantayo ti pamiliatayo ken dagiti kapammatiantayo, no managpadagustayo, no agboluntariotayo kadagiti proyekto ti organisasion, ken no palawaentayo ti sagrado a panagserbitayo.​—Col. 3:23.

2. Apay a saan a nasayaat nga ikompara ti maar-aramidam para iti panggep ni Jehova iti maar-aramidan ti dadduma?

² Bayat nga adalentayo daytoy nga artikulo, saanmo nga ikompara ti maar-aramidam para ken Jehova iti maar-aramidan ti dadduma. Laglagipem a nagduduma ti edad, salun-at, kasasaad, ken paglaingan ti tunggal tao. Kinuna ni apostol Pablo: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.”​—Gal. 6:4.

TULONGAM TI PAMILIAM KEN DAGITI KAPAMMATIAM

3. Apay a maibagatayo a makitintinnulong iti Dios ti asinoman a mangay-aywan iti pamiliana?

³ Namnamaen ni Jehova nga aywanan dagiti adipenna ti pamiliada. Kas pagarigan, mabalin a masapul nga agtrabahoka para iti pinansial a kasapulan dagiti ipatpategmo. Adu nga inna ti agyan iti balay a mangaywan kadagiti ubbing pay nga annakda. Mabalin a kasapulan nga aywanan dagiti adulto nga annak dagiti nakapuyen a nagannakda. Nakapatpateg dagitoy a banag. Kuna ti Sao ti Dios: “No ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” (1 Tim. 5:8) No adda kasta a responsabilidadmo, mabalin a bassit ti panawenmo kadagiti aktibidad ti organisasion uray no kayatmo nga ad-adu koma pay. Ngem dika maupay! Maragsakan ni Jehova no ipaaymo ti kasapulan ti pamiliam.​—1 Cor. 10:31.

4. Kasano a mayun-una dagiti nagannak dagiti interes ti Pagarian, ken ania ti resultana?

⁴ Makitintinnulong ken Jehova dagiti Kristiano a nagannak no paregtaenda dagiti annakda a maaddaan kadagiti nateokratikuan a kalat. Nakita idi agangay ti adu a nagannak a nangaramid iti dayta nga inawat dagiti annakda ti amin-tiempo a panagserbi iti adayo a lugar. Dadduma itan ti misionero, payunir iti lugar nga agkasapulan iti ad-adu nga agibumbunannag, wenno agserserbi iti Bethel. Gapu ta adayoda iti pamiliada, mabalin a saanda unayen a makapagkakadua. Ngem dagiti managsakripisio a nagannak paregtaenda nga agan-anus dagiti annakda iti annongenda. Apay? Maragsakanda ta ammoda nga iyun-una dagiti annakda dagiti interes ti Pagarian. (3 Juan 4) Mabalin a marikna ti adu kadakuada ti kas iti narikna ni Anna, a nangibaga nga ‘impabulodna’ ken Jehova ti anakna a ni Samuel. Ibilang dagitoy a nagannak a nagpateg a pribilehio ti kasta a pannakitinnulong ken Jehova.​—1 Sam. 1:28.

5. Kasano a matulongam dagiti kakongregasionmo? (Kitaen ti ladawan iti rugi ti artikulo.)

⁵ No awan ti naganat a responsabilidadmo iti pamiliam, mabalin kadi a tumulongka kadagiti kapammatiantayo nga agay-aywan ken kadagidiay nakapuyen, nataenganen, wenno asinoman nga agkasapulan iti tulong? Adda kadi makitam iti kongregasionmo nga agkasapulan iti tulong? Baka mabalin a sika pay laeng ti mangkadua iti nataenganen a nagannak ti maysa a sister bayat nga as-asikasuenna ti dadduma a banag. Wenno mabalin a dagasem a makigimong dagidiay agkasapulan iti tulong, ikaduam nga ag-shopping, ikuyogmo a bumisita iti maysa a nayospital, wenno tulongam iti dadduma pay a banag. No aramidem dayta, makipagtrabtrabahoka ken Jehova a mangsungbat iti kararagda.​—Basaen ti 1 Corinto 10:24.

AGBALINKA A MANAGPADAGUS

6. Ania ti ramanen ti kinamanagpadagus?

⁶ Pagaammo a managpadagus dagiti katrabahuan ti Dios. Iti Kristiano a Griego a Kasuratan, ti sao a naipatarus a “kinamanagpadagus” ket kaipapananna ti “kinaimbag kadagiti estranghero.” (Heb. 13:2) Isalaysay ti Sao ti Dios dagiti pasamak a mangisuro no kasano nga ipakitatayo ti kasta nga ayat. (Gen. 18:1-5) Kabaelantayo a tulongan ti sabsabali ken regular koma nga aramidentayo dayta, ‘nainaigda [man] kadatayo iti pammati’ wenno saan.​—Gal. 6:10.

7. Ania ti pagimbagan ti panangpadagus kadagiti bumisbisita nga adda iti amin-tiempo a panagserbi?

⁷ Mabalinmo kadi ti makipagtrabaho iti Dios babaen ti panangpadagusmo kadagiti bumisbisita nga adda iti amin-tiempo a panagserbi? (Basaen ti 3 Juan 5, 8.) Masansan a mangipaay dagita a gundaway iti “panagsisinnukat iti pammaregta.” (Roma 1:11, 12) Kitaentayo ti kapadasan ni Olaf. Malagipna nga idi agtutubo pay, awan iti kongregasionna ti mabalin a pagdagusan ti awan asawana a manangaywan iti sirkito. Dinamag ni Olaf kadagiti saan a Saksi a nagannakna no mabalin nga agdagus iti balayda ti manangaywan iti sirkito. Immanamongda ngem imbagada a maturog ni Olaf iti sofa. Saanna a nagbabawyan dayta. “Nagsayaat dayta a lawas!” inyestoria ni Olaf. “Binigat a nasapakami nga agriing ket pagsaritaanmi ti adu a makapainteres a topiko bayat ti pamigat. Ti pammaregta a naawatko ti nakatignayak a sumrek iti amin-tiempo a panagserbi.” Iti napalabas nga 40 a tawen, nagduduma a teritoria ti nagserbian ni Olaf kas misionero.

8. Ania dagiti rason nga ipakitatayo ti kinaimbag uray no saan a dagus a maapresiar dayta? Mangted iti pagarigan.

⁸ Maipakitam ti ayat kadagiti estranghero iti adu a pamay-an uray no saanda a dagus a maapresiar dayta. Kitaentayo daytoy a pagarigan. Bayat a mangyad-adal iti Biblia ti maysa nga agibumbunannag idiay Spain, nadlawna ti iyad-adalanna a ni Yesica, a taga-Ecuador, a saanna a malapdan ti agsangit. Dinamagna no apay. Inyestoria ni Yesica a nakapangpanglaw idi sakbay a nagpa-Spain. Maysa nga aldaw, awanen ti kanenda. Danum laeng ti maitedna iti bassit pay nga anakna. Bayat a patpaturogenna ti anakna, ikarkararagna ti tulong. Idi kuan, immay ti dua a Saksi, ngem saan a nasayaat ti panangtrato ni Yesica kadakuada ken pinigisna ti magasin nga inyawat dagiti sister. “Daytoy kadi ti kayatyo nga ipakanko iti anakko?” imbagana. Inkagumaanda a liwliwaen, ngem saan a dimngeg. Kalpasan dayta, nangibati dagiti sister iti sangabasket a taraon iti ridawna. Natukay ti rikna ni Yesica iti kinaimbagda ket makonkonsiensia ta mabigbigna a saanna nga inkankano ti sungbat ti Dios iti kararagna. Ngem ita, determinadon ni Yesica nga agserbi ken Jehova. Nagsayaat dayta nga epekto ti kinaparabur dagiti sister!​—Ecl. 11:1, 6.

AGBOLUNTARIOKA KADAGITI PROYEKTO TI ORGANISASION

9, 10. (a) Ania dagiti gundaway idi tiempo ti Biblia a kasapulan ti ili ti Dios dagiti boluntario? (b) Ania ti dadduma a trabaho a gagangay nga as-asikasuen dagiti managsakripisio a lallaki iti kongregasion ita?

⁹ Iti pakasaritaan ti nagkauna nga Israel, adda dagiti gundaway a kasapulan dagiti boluntario. (Ex. 36:2; 1 Cron. 29:5; Neh. 11:2) Ita, adu met ti gundawaymo a mangusar iti tiempo, material, ken abilidadmo a tumulong kadagiti kakabsat. No agboluntarioka, mariknamto ti dakkel a rag-o ken umawatka iti adu a bendision.

¹⁰ Paregtaen ti Sao ti Dios dagiti lallaki iti kongregasion a makipagtrabahoda ken Jehova babaen ti panangragpatda iti pribilehio kas ministerial nga adipen ken panglakayen. (1 Tim. 3:1, 8, 9; 1 Ped. 5:2, 3) Dagidiay mangaramid iti dayta ipakpakitada a kayatda a tulongan ti sabsabali iti praktikal ken naespirituan a pamay-an. (Ara. 6:1-4) Dinamag kadin dagiti panglakayen no kayatmo ti agserbi kas attendant wenno tumulong a mangasikaso iti literatura, teritoria, panagmantener, wenno dadduma pay? Ibaga kenka dagidiay mangas-asikaso kadagita a trabaho a nakaragragsak ti tumulong iti sabsabali.

11. Kasano a nagunggonaan ti maysa a sister kadagiti nagbalin a gagayyemna kadagiti proyekto ti organisasion?

¹¹ Masansan a maaddaan iti baro a gagayyem dagidiay agbolboluntario kadagiti proyekto ti organisasion. Alaentay a pagarigan ti kapadasan ni Margie, a 18 a tawenen a boluntario iti panagibangon iti Kingdom Hall. Kadagita a proyekto, nangipakita iti interes kadagiti ub-ubing a sister ket sinanayna ida. Nakitana a nagsayaat dayta a pamay-an a mangparegta iti sabsabali iti naespirituan. (Roma 1:12) No adda problema ni Margie, paregtaen dagiti nagbalin a gagayyemna kadagiti proyekto a panagibangon. Nakapagboluntarioka kadin iti kasta a panagibangon? Adda man paglaingam wenno awan, mabalin kadi nga agboluntarioka?

12. Kasano a matulongam dagiti kakabsat kalpasan ti kalamidad?

¹² No adda kalamidad, gundaway ti ili ti Dios ti makipagtrabaho kenkuana babaen ti panangtulong kadagiti kakabsatda iti praktikal a pamay-an. Kas pagarigan, mangtedda iti pinansial a tulong kadagidiay apektado. (Juan 13:34, 35; Ara. 11:27-30) Ti sabali pay a pamay-an ket ti itutulongda iti panagdalus wenno panagtarimaan. Ni Gabriela, a maysa a sister a taga-Poland a naperdi ti balayna gapu iti layus, ket naragsakan idi tinulongan dagiti kakabsat kadagiti kaarrubada a kongregasion. “Diak kayat a pagsaritaan dagiti napukawko​—material laeng dagita,” kunana. “Ngem kayatko nga estoriaen ti adu a nagun-odko. Gapu iti daytoy a kapadasak, nariknak a nagpaiduma a pribilehio ti panagbalinko a paset ti kongregasion Kristiano ken mangted daytoy iti rag-o ken ragsak.” Imbaga ti adu a natulongan kalpasan ti kalamidad a nariknada a rimmagsakda. Ken nagpaiduma a pannakapnek ti marikna dagidiay makipagtrabaho ken Jehova a mangipaay iti kasta a tulong.​—Basaen ti Aramid 20:35; 2 Corinto 9:6, 7.

13. Kasano a mapabileg ti relasiontayo ken Jehova no agboluntariotayo? Mangted iti pagarigan.

¹³ Naragsakan ni Stephanie ken ti dadduma pay nga agibumbunannag a nakipagtrabaho iti Dios babaen ti panangtulongda kadagiti Saksi a nagkamang idiay United States. Timmulongda nga agbirok ken mangisagana kadagiti pagtaengan dagiti pamilia nga immakar gapu iti gubat. “Natukay ti riknami iti ragsak ken apresasionda iti nariknada nga ayat ti sangalubongan a panagkakabsat,” kuna ni Stephanie. “Narikna dagidiay a pamilia a tinulonganmi ida, ngem kinapudnona, ad-adu ti naitulongda kadakami.” Innayonna, “Bimmileg ti ayatmi ken Jehova gapu iti nakitami nga ayat, panagkaykaysa, pammati, ken panagpannuray ken Jehova, ket daytoy ti nangpauneg iti apresasionmi iti amin a maaw-awatmi babaen ti organisasionna.”

PALAWAEM TI PANAGSERBIM

14, 15. (a) Ania a kababalin ti impakita ni propeta Isaias? (b) Kasano a matulad ita dagiti mangikaskasaba iti Pagarian ti kababalin ni Isaias?

¹⁴ Kayatmo kadi ti naan-anay a makipagtrabaho ken Jehova? Nakasaganaka kadi nga umakar iti lugar a dakdakkel ti panagkasapulanna? Siempre, saan a kasapulan nga umadayo dagiti adipen ti Dios tapno maipakitada ti kinaparabur. Ngem ipalubos ti kasasaad ti dadduma a kakabsat a makapagboluntarioda iti adayo a lugar. Kas ken propeta Isaias ti kababalinda. Idi insaludsod ni Jehova, “Siasinonto ti ibaonko, ket siasinonto ti mapan a maipaay kadakami?” insungbat ni Isaias: “Adtoyak! Ibaonnak.” (Isa. 6:8) Kasta kadi met ti riknam ken ipalubos kadi ti kasasaadmo ti sumungbat iti kasta iti organisasion ni Jehova? Ania dagiti maitulongmo?

¹⁵ Maipapan iti trabaho a panangasaba ken panagaramid iti ad-adalan, kinuna ni Jesus: “Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mat. 9:37, 38) Mabalinmo kadi ti agserbi iti lugar a dakdakkel ti panagkasapulanna iti agibumbunannag, nalabit kas payunir? Wenno mabalinmo kadi a suportaran ti maysa a mangaramid iti dayta? Narikna ti adu a kakabsat a ti kasayaatan a pamay-an a maipakita ti ayat iti Dios ken iti kaarruba ket ti panagpayunir iti lugar wenno teritoria a dakdakkel ti panagkasapulanna iti paraani. Adda kadi pay mapanunotmo a pamay-an a mapalawa wenno maparang-aymo ti panagserbim? No aramidem dayta, makariknaka iti dakkel a rag-o.

16, 17. Ania pay dagiti pamay-an a mapalawam ti panagserbim ken Jehova?

¹⁶ Nakasaganaka kadi nga agserbi iti Bethel wenno tumulong iti panagibangon kadagiti pasilidad ti organisasion, temporario man wenno commuter? Kanayon a kasapulan dagiti situtulok nga agserbi ken Jehova iti sadinoman a lugar wenno aniaman ti maipaaramid kadakuada. Mabalin a maibaonda nga agtrabaho iti maysa a proyekto, uray no sabali ti paglainganda ken awan kapadasanda iti dayta a trabaho. Ngem apresiaren ni Jehova ti kinamanagsakripisio ti tunggal indibidual a boluntario nga agserbi iti sadinoman nga adda panagkasapulan.​—Sal. 110:3.

¹⁷ Kayatmo kadi ti kanayonan a panagsanay tapno naan-anay a maitungpalmo ti sagrado a panagserbim? No kasta, mabalin a kualipikadoka nga agadal iti School for Kingdom Evangelizers. Masanay iti daytoy nga eskuelaan dagiti naespirituan ti panagpampanunotna a lallaki ken babbai nga adda iti amin-tiempo a panagserbi, tapno ad-adu pay ti maaramidanda iti ministerio. Dagidiay agaplay iti daytoy nga eskuelaan ket masapul a sidadaan nga umawat iti aniaman a pakaibaonanda inton aggraduarda. Kayatmo kadi a gundawayan daytoy nga oportunidad a rumagpat iti dakdakkel a pribilehio?​—1 Cor. 9:23.

18. Ania dagiti gunggona iti pannakipagtrabaho ken Jehova iti inaldaw?

¹⁸ Kas ili ni Jehova, matignaytayo nga agbalin a naparabur​—a pakakitaan iti kinaimbag, kinamanangngaasi, ken ayat​—ken mangaywan iti sabsabali iti inaldaw. No aramidentayo dayta, maadda ti rag-o, talna, ken ragsak. (Gal. 5:22, 23) Aniaman ti kasasaadmo, agbalinka a naragsak no tuladem ti kinaparabur ni Jehova ken no agtalinaedka a maysa kadagiti maipatpateg a katrabahuanna!​—Prov. 3:9, 10.