Apay nga Iyebkastayo ti Apresasiontayo?

1. Kasano nga impakita ti Samaritano ti apresasionna ken Jesus?

DESPERADO ti 10 a lallaki. Agkukutelda ken kumarkaro pay ti kasasaadda. Ngem maysa nga aldaw, nakitada iti adayo ni Jesus, ti Naindaklan a Mannursuro. Nangngegda a pinaimbag ni Jesus ti amin a kita ti sakit, ket kombinsidoda a mapaimbagna met ida. Isu nga impukkawda: “Jesus, Mannursuro, kaasiannakami!” Immimbag ti 10 a lallaki. Sigurado nga agyamyamanda iti kinaimbag ni Jesus. Ngem saan la a narikna ti maysa kadakuada ti panagyaman​—inyebkasna pay ti apresasionnab ken Jesus. Natignay dayta a Samaritano a mangidayaw iti Dios iti “napigsa a timek.”​—Luc. 17:12-19.

2-3. (a) Apay a saantayo a maipakita ti apresasion no dadduma? (b) Ania ti usigentayo iti daytoy nga artikulo?

² Kas iti Samaritano, kayattayo nga iyebkas ti panagyaman kadagiti naimbag a tattao. Ngem no dadduma, malipatantayo nga iyebkas ti apresasiontayo iti sao wenno iti aramid.

³ Usigentayo iti daytoy nga artikulo no apay nga importante nga iyebkastayo ti apresasiontayo iti sao ken aramid. Makasursurotayo iti ulidan ti dadduma a karakter ti Biblia a managyaman ken saan a managyaman. Sa pagsasaritaantayo dagiti espesipiko a pamay-an a mayebkastayo ti apresasiontayo.

APAY A MASAPUL NGA IYEBKASTAYO TI APRESASIONTAYO?

4-5. Apay a masapul nga iyebkastayo ti apresasiontayo?

⁴ Inyulidan ni Jehova ti panangipakita iti apresasion. Ti maysa a pamay-anna ket ti panangbendisionna kadagidiay mangparparagsak kenkuana. (2 Sam. 22:21; Sal. 13:6; Mat. 10:40, 41) Ken iparparegta ti Kasuratan a “kas annak a dungdungnguen, tuladen[tayo] ti Dios.” (Efe. 5:1) Isu a ti kapatgan a rason nga iyebkastayo ti apresasiontayo ket gapu ta kayattayo a tuladen ti ulidan ni Jehova.

⁵ Usigentayo ti maysa pay a rason nga iyebkastayo ti apresasiontayo iti sabsabali. Ti apresasion ket kas iti naimas a makan​—naragragsaktayo no adda kaduatayo a mangan. Naragsaktayo no mariknatayo nga ap-apresiarendatayo. Maparagsaktayo met ti sabsabali no iyebkastayo ti apresasiontayo. No pagyamanantayo ti tao a nangikagumaan a tumulong wenno nangipaay iti kasapulantayo, mariknana a talaga nga adda naitulongna. Kas resultana, tumibker ti panaggayyemtayo.

6. Ania dagiti nagpadaan ti apresasion ken mansanas a balitok?

⁶ Nagpateg nga iyebkastayo ti panagyamantayo. Kuna ti Biblia: “Ti sao a naibaga iti umiso a tiempo ket kas kadagiti mansanas a balitok iti nakitikitan a pirak.” (Prov. 25:11) Panunotem no kasano kapintas ti mansanas a balitok a naiparabaw iti pirak! Sigurado a nagpateg dayta! Ania ti mariknam no maregaluanka iti kasta? Mabalin a kasta kapateg ti panangyebkas iti panagyaman iti sabsabali. Ken panunotem daytoy: Ti mansanas a balitok ket agpaut. Kasta met, ti inyebkastayo nga apresasion ket mabalin a dinto malipatan ti immawat iti dayta iti intero a panagbiagna.

INYEBKASDA TI APRESASIONDA

7. Kas makita iti Salmo 27:4, kasano nga inyebkas ni David ken ti dadduma a nangisurat kadagiti salmo ti apresasionda?

⁷ Adu nga agserserbi iti Dios idi un-unana ti nangipakita iti panagyamanda. Maysa kadakuada ni David. (Basaen ti Salmo 27:4.) Impateg wenno inapresiarna unay ti nadalus a panagdaydayaw ken impakitana dayta babaen ti aramid. Intedna ti adu a kinabaknangna para iti pannakaibangon ti templo. Inyebkas dagiti kaputotan ni Asaf ti apresasionda babaen ti panagsuratda kadagiti salmo, wenno kanta ti panangidaydayaw. Iti maysa a kanta, nagyamanda ken Jehova ken inyebkasda ti apresasionda iti “nakaskasdaaw nga aramid[na].” (Sal. 75:1) Nalawag a kayat ni David ken dagiti kaputotan ni Asaf nga ipakita a talaga nga ap-apresiarenda ti amin a bendision nga inawatda ken Jehova. Adda kadi mapanunotmo a pamay-an tapno matuladmo dagidiay a salmista?

8-9. Kasano nga impakita ni apostol Pablo ti apresasionna kadagiti kakabsat, ket ania ti sigurado a resulta dayta?

⁸ Inapresiar ni apostol Pablo dagiti kakabsat ket makita dayta iti imbagana maipapan kadakuada. Kadagiti pribado a kararagna, kanayon a nagyaman iti Dios gapu kadakuada. Inyebkasna met ti apresasionna idi sinuratanna ida. Iti umuna a 15 a bersikulo ti Roma 16, innagananna ti 27 a padana a Kristiano. Espesipiko a dinakamat ni Pablo da Prisca ken Aquila a ‘nangirisgo iti biagda’ para kenkuana, ken ni Febe nga “adun ti sinalsalaknibanna,” a pakairamanan ni Pablo. Kinomendaranna dagitoy a maipatpateg ken nagaget a kakabsat.​—Roma 16:1-15.

⁹ Ammo ni Pablo a saan a perpekto dagiti kakabsatna, ngem iti maudi a paset ti suratna kadagiti taga-Roma, nagpokus kadagiti nasayaat a kualidadda. Sigurado a naparegta dagidiay a kakabsat idi nangngegda a naibasa iti kongregasion dagiti insurat ni Pablo! Isu a bimmileg ti pannakigayyemda ken Pablo. Kanayonmo kadi nga ap-apresiaren dagiti nasayaat nga ibagbaga wenno ar-aramiden dagiti kakongregasionmo?

10. Ania ti masursurotayo iti pamay-an ni Jesus a nangyebkas iti apresasionna kadagiti pasurotna?

¹⁰ Iti mensahe ni Jesus iti dadduma a kongregasion iti Asia Menor, inyebkasna ti apresasionna iti naaramidan dagiti pasurotna. Kas pagarigan, kastoy ti panangirugina iti mensahena iti kongregasion ti Tiatira: “Ammok dagiti aramidmo, ti ayatmo, ti pammatim, ti panagserbim, ken ti panagibturmo, ken ad-adu ti inaramidmo iti naud-udi ngem iti immun-una.” (Apoc. 2:19) Saan laeng a dinakamat ni Jesus nga immadu ti naaramidanda, kinomendaranna pay dagiti kualidad a nakatignayanda nga agaramid iti naimbag. Uray no masapul a balakadanna ti dadduma a taga-Tiatira, makaparegta latta ti sasaona iti rugi ken ngudo ti mensahena. (Apoc. 2:25-28) Panunotem ti autoridad ni Jesus kas ulo ti amin a kongregasion. Saanna a kasapulan a pagyamanan dagiti maar-aramidantayo para kenkuana. Ngem ipakpakitana latta ti apresasionna kadatayo. Nakasaysayaat nga ulidan para kadagiti panglakayen!

SAANDA NGA IMPAKITA TI APRESASION

11. Kas naipakita iti Hebreo 12:16, ania ti kababalin ni Esau maipapan kadagiti sagrado a bambanag?

¹¹ Makapaladingit ta adda dagiti karakter ti Biblia a saan a nangipakita iti apresasion. Kas pagarigan, uray no ni Esau ket pinadakkel dagiti nagannak a mangay-ayat ken mangresrespeto ken Jehova, dina inapresiar dagiti sagrado a bambanag. (Basaen ti Hebreo 12:16.) Kasano a rimmuar ti kaawan apresasionna? Sidadarasudos nga insukatna ti kalinteganna kas inauna iti adingna a ni Jacob para iti sangamalukong laeng a diniguan a lentehas. (Gen. 25:30-34) Idi agangay, nagbabawyan ni Esau ti inaramidna. Ngem dina inapresiar ti adda idi kenkuana, isu nga awan ti rasonna nga agreklamo idi saanna a naala ti bendision para iti inauna.

12-13. Kasano nga impakita dagiti Israelita ti kaawan apresasionda, ken ania ti resultana?

¹² Adu ti rason dagiti Israelita a mangipakita iti apresasionda. Nawayawayaanda iti pannakaadipenda idiay Egipto kalpasan nga inyeg ni Jehova ti Sangapulo a Didigra. Insalakanna pay ida idi dinadaelna ti intero nga armada ti Egipto iti Nalabaga a Baybay. Kasta unay ti panagyaman dagiti Israelita nga uray la nangkantada iti kanta ti panagballigi a mangidaydayaw ken Jehova. Ngem nagtalinaedda kadi a managyaman?

¹³ Idi naipasango dagiti Israelita kadagiti sabali a pakarigatan, nalipatanda a dagus ti amin a nasayaat nga inaramid kadakuada ni Jehova. Rimmuar ti kaawan panagyamanda. (Sal. 106:7) Kasano? “Nagtanabutob dagiti Israelita maibusor kada Moises ken Aaron”​—ngem ti agpayso, nagtanabutobda maibusor ken Jehova. (Ex. 16:2, 8) Naladingitan iti kaawan panagyaman ti ilina. Impakpakaunana a madadaelto idiay let-ang daytoy a henerasion dagiti Israelita malaksid kada Josue ken Caleb. (Num. 14:22-24; 26:65) Kitaentayo no kasano a maliklikantay a tuladen dagitoy a dakes nga ehemplo no di ket matuladtayo dagiti nasayaat nga ehemplo.

IPAKITAM TI APRESASIONMO

14-15. (a) Kasano a maipakita ti agassawa nga ap-apresiarenda ti maysa ken maysa? (b) Kasano a maisuro dagiti nagannak dagiti annakda a mangipakita iti apresasion?

¹⁴ Iti pamilia. Magunggonaan ti intero a pamilia no manangapresiar ti tunggal miembrona. No kanayon nga agyaman ti agassawa iti maysa ken maysa, agbalinda a nadekdekket ken nalaklakada nga agpinnakawan. Ti asawa a lalaki a mangap-apresiar ken baketna saanna laeng a madmadlaw ti nasayaat nga ibagbaga ken ar-aramiden ni baketna no di pay ket “tumakder . . . a mangpadayaw kenkuana.” (Prov. 31:10, 28) Ken ti masirib nga asawa a babai ibagana ken lakayna ti espesipiko nga ap-apresiarenna.

¹⁵ Nagannak, kasanoyo a maisuro dagiti annakyo a mangipakita iti apresasionda? Laglagipenyo a tultuladenda ti ibagbaga ken ar-aramidenyo. Ipakitayo ti nasayaat nga ulidan babaen ti panangibagayo iti “thank you” no adda nasayaat nga inaramidda para kadakayo. Isuroyo met ida a mangibaga iti “thank you” no adda inaramid ti dadduma para kadakuada. Tulonganyo ida a mangtarus a ti panagyaman ket masapul a naimpusuan ken dakkel ti epektona no ibagada dayta. Kas pagarigan, kuna ni Clary: “Idi 32 ti tawen ni nanangko, agmaymaysa laengen a nangaywan kadakami a tallo nga annakna. Idi agtawenakon iti 32, nariknak no kasano karigat ti situasion ni nanangko idi kastoy ti edadna. Isu nga imbagak nga ap-apresiarek unay ti amin a sakripisiona a nangpadakkel kadakami nga agkakabsat. Iti nabiit pay, imbagana a nagpateg dagiti imbagak, ket kanayon a naragsak ti aldawna no malagipna dagita.”

16. Mangted iti pagarigan no kasano a mapabileg ti dadduma iti apresasiontayo.

¹⁶ Iti kongregasion. Maparegtatayo dagiti kakabsat no apresiarentayo ida. Kasta ti napasamak ken Jorge, a panglakayen nga agtawen iti 28. Nagsakit iti nakaro isu a makabulan a dina kabaelan ti makigimong. Uray idi makagimongen, dina latta kabaelan nga iparang dagiti pasetna. Inaminna: “Panagriknak, awan ti serserbik gapu kadagiti limitasionko ken gapu ta diakon maaramid dagiti responsabilidadko iti kongregasion. Ngem kalpasan ti maysa a gimong, imbaga kaniak ti maysa a brother: ‘Agyamanak iti nagsayaat nga ulidanmo iti pamiliak. Nagusgustuanmi dagiti palawagmo iti napalabas a tawtawen, ket bimmileg ti pammatimi.’ Diak nakasao, ken nakasangitak. Dagita a sasao ti kasapulak a mangngeg.”

17. Kas nadakamat iti Colosas 3:15, kasanotayo a maipakita ti apresasiontayo iti kinaparabur ni Jehova?

¹⁷ Iti naparabur a Diostayo. Ipapaayannatayo ni Jehova iti aglaplapusanan a naespirituan a taraon. Kas pagarigan, makaaw-awattayo kadagiti instruksion kadagiti gimong, magasin, ken iti website-tayo. Naibagam kadin, ‘Daytoy ti eksakto a kasapulak,’ idi nangngegmo ti maysa a palawag, nabasam ti maysa nga artikulo, wenno nabuyam ti maysa a broadcasting? Kasanotayo a maipakita ti apresasiontayo ken Jehova? (Basaen ti Colosas 3:15.) Ti maysa a pamay-an ket ti kanayon a panagyamantayo iti kararag gapu kadagita a nagsasayaat a sagutna.​—Sant. 1:17.

18. Kadagiti ania a pamay-an a maipakitatayo ti apresasiontayo iti Kingdom Hall-tayo?

¹⁸ Maipakitatayo met ti apresasiontayo ken Jehova no pagtalinaedentayo a nadalus ken naurnos ti lugar a pagdaydayawantayo. Kanayontayo a dalusan ken manteneren ti Kingdom Hall-tayo, ken agan-annad dagiti mangas-asikaso kadagiti elektroniko nga alikamen ti kongregasion. No nasayaat ti pannakamantener dagiti Kingdom Hall, agpaut dagita ken bassitto laeng ti masapul a matarimaan. Iti kasta, ad-adu a pondo ti mausar iti panagibangon ken panagtarimaan iti dadduma a Kingdom Hall iti intero a lubong.

19. Ania ti nasursurom iti kapadasan ti maysa a manangaywan iti sirkito ken ni baketna?

¹⁹ Kadagiti agsaksakripisio para kadatayo. No iyebkastayo ti apresasiontayo, mabalin a mabalbaliwan ti panangmatmat ti maysa kadagiti problema a sangsanguenna. Kitaentayo ti kapadasan ti maysa a manangaywan iti sirkito ken ni baketna. Nakalamlam-ek idi ket nagmalmalemda iti ministerio, isu a nabambannogdan a nakasangpet iti dagusda. Gapu ta nakalamlamiis, nakaturog ti sister a naka-winter coat. Kabigatanna, imbagana ken lakayna a kasla dinan kabaelan ti trabaho a panagdaliasat. Iti dayta met la a bigat, adda surat a naggapu iti sangay a para iti sister. Naibaga iti surat a makomendaran ti ministeriona ken ti panagibturna. Naibaga pay nga ammoda a narigat ti linawas nga agakar-akar iti pagdagusan. Kuna ni lakayna: “Naragsakan iti dayta a komendasion, ket dinan pulos imbaga a sumardengkami. Ti agpayso, namin-adu a pinaregtanak nga agtultuloy no mapampanunotko ti sumardeng.” Nagserbi dagita nga agassawa iti trabaho a panagdaliasat iti dandani 40 a tawen.

20. Ania ti ikagumaantayo nga aramiden iti inaldaw, ken apay?

²⁰ Ikagumaantayo koma nga ipakita iti inaldaw a managyamantayo iti sao ken aramid. Mabalin a dagiti naimpusuan a sasao ken ar-aramidtayo ti eksakto a kasapulan ti maysa tapno mapagballigianna dagiti problema ken dagiti pakadanaganna iti inaldaw iti daytoy di managyaman a lubong. No iyebkastayo ti panagyamantayo, tumibker ken agpaut iti agnanayon ti pannakigayyemtayo iti sabsabali. Kapatgan iti amin, matuladtayo ti naparabur ken manangapresiar nga Amatayo, ni Jehova.