Saludsod

● Kasano ti panangmatmat dagiti Saksi ni Jehova kadagiti tape recordings a nagtaud iti dadduma a gubuayan a saan a kukua ti Sosiedad?

Mangmangted ti Sosiedad iti nawadwad a naespirituan a taraon iti nagduduma a porma, agraman dagiti cassette tape recordings. Ramanenna daytoy dagiti recordings ti Biblia, melodia ti Pagarian ken adu a drama. Nupay kasta, masapul nga agannadtayo kadagiti pribada a tape recordings a maiwarwaras nga agparang a kaaspingda met laeng iti langa.

No dadduma dagiti nairekord a palawag a maiwarwaras ket naglaonda kadagiti pagpagarup wenno aramatenda a kas pangparayray nga impormasion. Saan kadi a nainsiriban no suroten iti balakad ni Pablo idiay 2 Timoteo 3:14? Sadiay ni Pablo, kalpasan a namakdaar maipapan kadagiti impostor wenno manglimlimo, ingunamgunamna iti importansia ti panangammo kadagiti tattao a denggentayo. Masapul a siguruentayo a ditay dumngeg iti aniaman a banag nga “lumbes iti bambanag a naisurat” iti Nasantuan a Kasuratan ken iti espiritual a taraon nga ipapaay iti “matalek ken naannad nga adipen.”—1 Cor. 4:6; Mat. 24:45-47.

Adda dagiti sumgmamano a mangaramat iti tape recordings kadagiti programa iti gimong ti kongregasion wenno asamblea ken kombension nga agpaay iti bukodda a pangusaran. Dagita a recordings ti mabalin met nga ipateg dagiti miembro ti kongregasion a gapu iti umiso a rason ket saanda a nakatabuno iti gimong. Nupay kasta, saan koma a maaramid dagitoy a maiwaras kadagiti adu a kakabsat wenno itukon ida a kas tagilako kadagiti dadduma. Aramatentayo ngarud a naan-anay dagiti ipapaay ni Jehova babaen ti organisasionna nga agpaay iti espiritual a pammabileg ken pammaregta.