Panangiparang ti Naimbag a Damag—Babaen ti Panangitukon a Situtured iti Suskripsion
1 Ti Pagwanawanan isut’ kasayaatan a magasina iti panagadal ti Biblia ditoy rabaw ti daga! Kumbensidokayo kadi a pudno daytoy? No kasta, saan aya a tunggal maysa ket masapul a maikkan ti gundaway nga agsuskribe iti dayta?
2 Kasanonakayo a natulongan a personal daytoy Ti Pagwanawanan? Kunaen dagiti dadduma nga isut’ namagridam kadakuada iti kaipapanan dagiti “pagilasinan ti panawen” nga isut’ namagsiddaaw iti sangatauan ita. (Mat. 16:3) Kunaen met iti sabsabali nga isudat’ naliwliwa babaen iti naimbag a damag nga ti Pagarian iti Dios ket dadaelennan iti mabiit dagidiay a manangirurumen iti padada a tao. Awan duadua a kunaentayo amin a nakatulong daytoy kadatayo a namatanor iti pammati iti naiparabor a subbot. Kasapulan met a maadal dagiti dadduma dagitoy a kinapudno.
AGPOSITIBOKAYO ITI PANANGMATMAT
3 Ti sirib iti Dios, saan a natauan a panagrasrason, ti naigunamgunam iti Ti Pagwanawanan. (Isa. 55:8, 9) Ti kasta a sirib isut’ desperado unay a kasapulan iti tunggal maysa kadagitoy nga aldaw. Pasayaatenna ti panagbiag ken tumulong iti pannakapatanor iti umiso a motibo. (Prov. 9:1-6) Kas kumbensido iti dayta, masapul nga itukontayo iti suskripsion a sipopositibo. Siaannad nga adalen iti kada isyu tapno saraken dagiti sasao a makatulong kadagiti bumalay. Ti kasta a nasakbay a panagsagana isut’ tumulong kadakayo nga agpositibo a mangidatag kadagitoy a magasina iti ministerio.
4 Agnegatibo dagiti dadduma a mangitukon kadagiti suskripsion. Nalabit nga ilawlawagda ti Topiko a Pagsasaritaan iti bumalay, kalpasanna itukondan dagiti dua a magasina imbes nga itukonda iti suskripsion. Apay? Ti bayadna? No kasta, saan a praktikal dayta a panagrason. Kalalainganna laeng iti bayadna no maidilig kadagiti nailubongan a publikasion, ngem ti balorna iti managbasa ket nakankantidad ngem iti prisiona. Gapuna a positibokayo koma a mangitukon iti suskripsion a sirarayray kabayatan iti Abril ken Mayo.
5 Maysa a kabsat a babai ti nangikeddeng iti 50 a suskripsion a kas kalatna iti dua a bulan a periodo. Nakagun-od iti 31 iti umuna a bulan ken 19 iti maikadua a bulan. Kunana a no dagiti dadduma ket awananda ti kuarta isut’ agsubli iti tallo wenno uppat a daras tapno maalana laeng ti suskripsion. Idiay Japan, nakapaima dagiti kakabsat iti nasurok a 71,000 a suskripsion iti maysa a bulan idi napan a tawen, a daytoy ket 57-porsiento a panagrang-ay manipud iti napalabas a tawen daytoy.
6 Addaantayo iti kada rason nga agtured iti ministeriotayo—ta adda ni Jehova iti likudantayo. (Ara. 14:3) No makaipaimatayo kadagiti suskripsion ken sarunuen ida a buyogen iti pammaregta a basaenda dagitoy a magasina, mabalin a ti kinapingettayo ket mangsalbar iti biag dagiti tattao. Gapuna a sirarayray ken situturedtayo a mangitukon kadagiti suskripsion kadagiti amin nga am-ammotayo ken kadagidiay a madanontayo iti tay-ak ti ministerio.