Irugi ken Ingudo Dagiti Gimong iti Umiso a Tiempo
1 Amin a gimong iti kongregasion, agraman taripnong sakbay ti panangasaba, ti masapul a mairugi ken maingudo iti umiso a tiempo. Apay? Ti kinaumiso iti tiempo isut’ mangiyanninag iti kinaurnos ken mangipakita ti konsiderasion iti amin a tumabuno. (Ecl. 3:17b; 1 Cor. 14:33) Maipakitatayo iti pannakaseknan babaen ti panangalagad iti pagannurotan a dagiti gimong ti masapul a mairugi ken maingudo iti umiso nga oras.
2 Kanayon nga ikagumaantayo ti sumangpet a nasapa kadagiti gimong tapno makasaotayo dagiti dadduma, mataming dagiti nasken a bambanag, ken mairamantayo iti panglukat a kanta ken kararag. Kaaduanna, lima a minutos iti maipalubos a maipaay iti kanta ken kararag. Dagidiay mangibagi iti kararag ti kongregasion ket sipapanunotda koma iti panggep dagiti gimong ket mabalinda a madakamat daytoy iti panglukat ken pangserra a kararagda. Dagiti kasta a kararag ti saan koma unay nga atiddog.
3 Palawag ti Publiko: Dagiti palawag ti publiko isudat’ nakedngan iti 45 a minutos. Ti panangsubra iti tiempo a naipalubos ket apektaranna iti panagadal ti Pagwanawanan nga isut’ sumaruno. Dagitoy a dua a gimong, agraman kanta ken kararag, ti masapul a mairingpas iti las-ud ti dua nga oras. Dagiti ispiker iti publiko ti masapul a mangannurot iti kapaut ti palawag a naituyang iti pagsurotan ti Sosiedad ket saan a mairaman dagiti kanayonan a bambanag, a kas iti kablaaw.
4 Panagadal ti “Pagwanawanan”: Maysa nga oras ti naikeddeng nga agpaay iti Panagadal ti Pagwanawanan, a mabasa dagiti amin a parapo ken mausig dagiti saludsod iti repaso. Ti ababa, nabatad a pangirugi a komento iti konduktor ti masapul a mangriing iti interes a maipaay iti leksion. Dagiti komentona bayat iti panagadal ti limitado laeng. Ti panangbingay iti material a maiyataday iti oras isut’ tumulong kenkuana a mangliklik iti panangusar ti nawadwad a tiempo iti umuna a kagudua ket agdardaraston a mangiringpas iti sumaruno a kagudua.
5 Teokratiko a Pagadalan iti Ministerio: Maysa daytoy a 45 a minutos a gimong. Nupay ti pangisuro a palawag ken dagiti lawag ti Biblia ket saanda a mapasardeng no lumbes iti orasda, dagiti kakabsat a mangimaton kadagitoy ti masapul nga agtalinaed iti naipalubos a tiempoda. No saan a maaramid daytoy, masapul a maited iti pribada a pammagbaga. Kasta met a ti balakad iti manangaywan ti pagadalan ket masapul nga agintek iti nairanta nga orasna. Makasalbar ti tiempo no amin dagiti estudiante ket agtugawdan iti asideg ti plataporma ken no tunggal maysa ket madagdagus nga ingudona ti palawagna no naibusen iti orasna.
6 Gimong ti Serbisio: Maysa met daytoy a 45 a minutos a gimong. Mairaman ti Teokratiko a Pagadalan iti Ministerio, kanta ken kararag, ti intero a programa isut’ saan a lumbes iti maysa nga oras ken 45 a minutos. Dagiti paset a maisango iti saludsod ken sungbat ti agkasapulan laeng iti ababa nga introduksion. Saan a kasapulan iti nawadwad a kanayonan a panangiruangan nga impormasion. Dagiti demostrasion ti masapul a nainsayo a naimbag ken nakasagana dagiti makipaset tapno nasayaat ti pannakausar iti naikeddeng a tiempo.
7 Panagadal ti Libro iti Kongregasion: Maysa nga oras a gimong daytoy, agraman panglukat ken pangserra a kararag. Mabasa amin a parapo. Bingayen ti konduktor iti material tapno maliklikanna ti panagapura idiay maudi a paset iti leksion. Tarataren ti konduktor no kasano iti kapaut ti tiempo a mausar iti kada parapo. Tapno maaramid daytoy kasapulanna iti arte ti panangisuro.—Tito 1:9.
8 Taripnong Sakbay ti Panangasaba: Saan a lumbes daytoy iti 15 a minutos, agraman panangurnos iti teritoria ken pangserra a kararag. Masapul a rugian ti konduktor iti umiso a tiempo, a saan nga aguray agingga a dumakkel iti presente a grupo. Apaman a naituding iti teritoria ken naidaton ti kararag, madagdagus nga agrubbuat ti grupo a mapan iti tay-ak. Nangruna a nasken daytoy iti biang dagiti payunir.
9 Magunggonaantayo amin kadagiti gimong a mairugi ken maingudo iti umiso a tiempo. Ipateg a nangruna daytoy dagiti addaan iti di mamati nga assawa isuda a mangnamnama nga agawidda iti umiso nga oras. Awan mapagkunaan, ti panangrugi ken panagngudo dagiti gimong iti tumutop a tiempo ket mangted iti konsiderasion kadagiti tumabuno nga addaan kadagiti iskediol a salimetmetanda, ken mangipaay met iti pannakaaramid dagiti bambanag a “sitatakneng ken babaen iti kinaurnos.”—1 Cor. 14:40.