Urnos iti Panagadal ti Libro iti Kongregasion
Paset 2: Kasapulan a Panagsagana ken Pannakipaset
1 Dakkel ti gunggona daydiay tao a makasarak iti sirib ken pannakaawat. (Prov. 3:13, 14, 16-18) Ti espiritual a kinasirib isut’ mangkabal iti maysa a Kristiano a mangusar iti pannakaammo manipud iti Sao ti Dios iti aktibo a panagdayaw, a mangsolbar iti inaldaw a problema, ken mangaramid iti desision maipapan kadagiti kalat ti biag.
2 Daytoy Panagadal ti Libro iti Kongregasion isut’ nadisenio a tumulong kadatayo a dumakkel iti sirib ken espiritual a pannakaawat. Ti regular nga itatabuno iti daytoy isut’ maysa a nasken a paset ti bukodtayo a programa iti pananggun-od ti kinasirib.—Prov. 4:7-9.
AGSAGANAKAYO A NAAN-ANAY
3 Dadduma idi immuna a siglo ti saan a napasnek iti panagadalda ti kinapudno ken saanda a nagabante a kadua iti lawag. Nagtalinaedda a tagibi ken Kristo ken saanda a nairuam iti sao. (Heb. 5:11-13) Indarirag ni Pablo iti kongregasion nga “agtultuloyda nga agmataengan.” (Heb. 6:1) Kasapulanna daytoy iti nasursurok pay ngem ti gagangay a panagdengngeg laeng iti sabsabali a mangilawlawag ti kinapudno. Sapulenna daytoy ti panagpanunot ken panagsukimat tapno mariing iti “narayray a panagpanunot,” ken aggarasugastayo a sibibileg iti dayta.—2 Ped. 3:1, 2; Luc. 13:24.
4Ti panagsagana a naan-anay a maipaay iti panagadal ti libro isut’ mangparayray iti pannakaawat ken panangipateg ti material. Ngem kaipapananna daytoy iti nasursurok pay ngem ti basta agbasa iti parapo ken ti sidadaras a pananguged iti sungbat. Kasapulantayo ti agutob iti kababagas ken pategda kadatayo a mismo. Kitaenyo dagiti naisitar a kasuratan ken panunotenyo no kasanoda a naisinggalut iti parapo.
5 Ti personal a panagadal ket saan a nalaka, ngem intudo ni Pablo iti gunggona ti kasta a naregget a panagadal, a kunana: “Ti solido a taraon isut’ agpaay kadagiti nataengan a tattao, kadagidiay a gapu ti pannakairuamdan iti kabaelanda nga agpanunot ket nasanayda a mangilasin nga agpadpada iti naimbag ken dakes.” (Heb. 5:14) Ti kasta a panagadal isut’ tumulong kadatayo a rumang-ay iti kinanataengan, nga iti dayta makaaramidtayo ti umiso a desision iti biag.
MAKIPASETKAYO
6 Ikagumaantayo ti makipaset iti kada gimong. Apay? Dagiti komentotayo iyebkasda ti pammatitayo nga isudat’ mangparegta ken mangpabileg met iti kakabsattayo. (Roma 10:10; Heb. 10:23-25) Ti aktibo a pannakipaset isut’ tumulong pay iti espiritual a panagmataengantayo. No dagiti napnuan kapadasan, agtutubo, ken interesado nga agdadamo ket parehoda nga agkomento, masagrap ti grupo iti nagduduma nga ebkas, a daytoy ket agbanag nga edukasional ken makapresko iti amin.
7 No sipipingettayo nga agsagana a maipaay iti Panagadal ti Libro iti Kongregasion, regular a tabunuan, ken siwayawaya a makipaset, ti panangsukimattayo a maipaay iti sirib isut’ agballigi ken “masarakantayo iti mismo a pannakaammo iti Dios.”—Prov. 2:4, 5.