Urnos iti Panagadal ti Libro iti Kongregasion
Paset 4: Itultuloyyo ti Panagpipinnabileg iti Maysa ken Maysa
1 Tunggal maysa iti grupo ti Panagadal iti Libro ti Kongregasion isut’ addaan papel a dakkel iti kaeskanna nga agpaay ti espiritual a panagrang-ay dagiti dadduma iti grupo. Kayattayo amin a tungpalen iti Nainkasuratan a bilin a ‘pabilegn dagiti sasabali iti ayat ken naimbag nga aramid, nangruna ta umadanin ti panungpalan.’—Heb. 10:24, 25.
2 Panagbibinnadang iti Maysa ken Maysa: No tunggal maysa kadatayo ket mangipakita ti personal nga interes iti dadduma a miembro, ti maysa a nabara, naingayyeman nga espiritu isut’ maadda iti grupo. Iti Galacia 6:10 naiwardastayo nga “agaramid iti naimbag kadagiti amin, ngem nangnangruna kadagiti kapammatiantayo.” Kas ehemplo, nadlawyo kadi a dadduma iti grupo ti panagadal ket masakit ken awanda iti gimong? Nalabit a makasaoyo ida babaen ti telepono wenno personal a bisitaenyo ida. Ti kasta nga espiritu iti grupo ti panagadal iti libro isut’ mamagsinged kadagiti kakabsat.
3 Kasapulan aya dagiti dadduma ti pammaregta gapu iti inaldaw a pakarigatan, responsabilidad ti pamilia, wenno dadduma a problema? Ania ti maitulongyo? Ipamuspusanyo koma a makasarita dagiti dadduma kadagiti gimong, saan a kablaawan laeng ida. Mabalin a managbabain dagiti dadduma ngem agsapsapulda ti makisao kadakuada. (uw p. 137-8) Pinaregta ni apostol Pablo dagiti Kristiano iti “agsaokayo ti makaliwliwa kadagidiay maupay, patalgedanyo dagiti nakapoy, ken managibtorkayo kadagiti amin.” (1 Tes. 5:14) No adda masakit wenno naupay, anian a makaliwliwa no ti maysa a gayyem ket dumagas a bumisita wenno mangitukon iti saranay kadakuada! Masansan, ti laeng pannakaammo nga adda maysa a mannakipagrikna kadakuada ket umdasen.
4 Kayattayo met ti makidanggay iti urnos ti serbisio idiay tay-ak. Ikagumaantayo ti makikuyog kadagiti nagduduma iti grupo. (2 Cor. 6:11-13; 12:15) No dadduma kiddawen kadatayo ti konduktor iti panagadal ti libro a tumulongtayo iti sabali. Kasano ti panangipangagtayo? Ti grupo iti panagadal ti mapabileg unay no dagiti agibumbunannag ken payunir ket agdadagnggayda nga agtrabaho iti ministerio.
5 Personal nga Ehemplo: Adda sabsabali a wagas a makaipaaykayo ti tulong iti urnos ti panagadal iti libro. Ti naimbag nga ulidanyo ket nasken. Kas pangarigan, no agkaweskayo a kas iti itatabunoyo ti gimong idiay Kingdom Hall, ipakpakitayo ti panagraem. Maipakitayo ti positibo nga ehemplo kadagidiay nairuamen nga agkawes iti pagbugar laeng. Aramidenyo kadi nga ugali iti kaaddayo a nasapa tapno saan a makasinga iti gimong?
6 Idiay Panagadal iti Libro ti Kongregasion isut’ lugar a pakaalaan ti personal a tulong ken kasta met a pakaipaayan iti espiritual a bang-ar dagiti dadduma. Amintayo ngarud ti “agtultuloy nga aglinniwanliwa iti maysa ken maysa ken agpipinnabileg iti maysa ken maysa” babaen ti naan-anay a panangsuportar iti daytoy nga urnos.—1 Tes. 5:11.