Panangsuportar iti Programa a Panagbangon ti Kingdom Hall

¹ Ita dagiti Kristiano itultuloyda ti mangtaming iti maysa a naespirituan a panagbangon a trabaho nga inyussuat ni Jesus agarup 1,900 a tawen ti napalabasen idi inrugina ti agurnong kadagiti adalan. (Mat. 4:17; 7:24, 25, 28; Juan 7:46) Aglaplapusanan unay ti panangbendision ni Jehova iti daytoy a trabaho. (Prov. 10:22) Bayat a mapantay iwaragawag ti Pagarian ti Dios, agbangbangontayo met tapno tamingen ti masanguanan nga irarang-ay.​—Ecl. 11:6.

² Tunggal tawen ditoy Pilipinas agarup 100 a baro a kongregasion ti mabuangbuangay, ket kasapulan dagitoy dagiti paggigimonganda a Kingdom Hall. Mainayon pay, adu a Kingdom Hall ti nakipet unay wenno daanen wenno nabangon kadagiti narukop a material ket kasapulanda ngarud a masukatan. Iti las-ud ti napalabas a lima a tawen, nasurok nga 600 a baro a Kingdom Hall ti naibangon ditoy Pilipinas gapu iti Kingdom Hall loan nga urnos. Maipaay daytoy babaen ti Kingdom Hall Fund, a daytoy kasapulanna ti pannaranay dagiti kakabsat iti intero a lubong. Ti makomendaran a positibo a kababalin dagiti kakabsat iti panangpunno iti daytoy a kasapulan ket sibabaknang a nagunggonaan.​—Sal. 41:1; Prov. 19:17; Ecl. 11:1; Luc. 14:13, 14.

NAAYAT A TULONG NGA IMPAAY DAGITI ADU

³ Ti Kingdom Hall Fund ti sosiedad ket agan-andar kas maysa nga “agtultulid a pundo.” Kayatna a sawen, a dagiti kontribusion a maaw-awat ket maipanda iti maysa a kuenta a maus-usar laeng para iti panagaramid kadagiti loans tapno matulongan dagiti kongregasion iti busbusenda kadagiti proyektoda a Kingdom Hall. Matarigagayan ngarud, ti kuarta a naipautang iti kongregasion ket rebbeng a mabayadan. Bayat a maar-aramidan daytoy dagiti magupgupgop a maibaybayad agraman dagiti agtultuloy a kontribusion manipud kadagiti kongregasion ket maipautang kadagiti sabsabali pay a kongregasion para kadagiti proyektoda a panagibangon.

⁴ Maitunos iti suratmi kadagiti amin a kongregasion idi Enero 1, 1991, adun a kongregasion ti timmulong a regular babaen ti panangiyawatda kadagiti resolusion a mangipalpalubos a dagiti pundoda ket mainayon koma iti Kingdom Hall Fund. Uray dagiti dadduma nga agbaybayad kadagiti utangda kadagiti Kingdom Hallda ket agipatpatulodda met kadagiti kanayonan pay a kontribusion iti Kingdom Hall Fund, ngarud, ‘kitkitaenda, saan a ti personal a pagimbaganda wenno saan laeng dagiti kukuada, no di ket uray met ti personal a pagimbagan dagiti dadduma.’ (Fil. 2:4) Makomendaran ken maapresiar unay daytoy. Ket uray no nakaipatuloden ti resolusion ti maysa a kongregasion, ti maysa a kahon a pagitinnagan kadagiti kontribusion a nalaka a masarakan iti uneg ti Kingdom Hall ti mamagbalin kadagiti indibidual nga agtarigagay a mangaramid ti kasta a mangited kadagiti boluntario a kontribusion maipaay iti pundo. Dagiti kuarta a maitinnag iti daytoy a kahon ti rebbeng a maipatulod iti Sosiedad mainayon kadagidiay saklawen ti resolusion ti kongregasion.

PANANGSUNGBAT KADAGITI MAGASTO ITI PANAGBANGON TI KINGDOM HALL

⁵ No usigen ti maysa a kongregasion ti panangipatakder ti baro a Kingdom Hall, rebbeng a mangipaay dagiti panglakayen ti naannad a panangusig iti kabaelan ti kongregasion nga agbayad kadagiti nainaig a gatad. (Luc. 14:28-30) Saan a nainsiriban nga utangen ti intero a kantidad manipud iti Sosiedad no di ket rebbeng a masirpat pay nga umuna tapno maikeddeng no (1) kasano kaadu ti maitulong dagiti kakabsat iti pannakibinnadang iti pananggatang ti daga ken kadagiti magasto iti panagbangon, (2) kasano kaadu ti mautang kadagiti kakabsat iti dayta a kongregasion ken kasanonto kabayag ti panagpaut dagiti pundo, ken (3) kasano kaadu ti itulongto dagiti agibumbunannag iti binulan tapno mabayadan ti aniaman a kasapulan a mautang mainayon iti panangtaming kadagiti gagangay a paggastuan.

⁶ Laglagipenyo a no ad-adu ti magupgop iti dayta a kongregasion, basbassit met ti kasapulanyo nga utangen manipud Sosiedad ket ngarud basbassit ti kasapulanyo nga ibayad iti binulan. No maibaklay ti kongregasion ti bukodna a pananggatang ti daga ket sana kiddawen ti tulong ti Sosiedad para iti patakder, ad-adda a matarigagayan daytoy. Nupay kasta, dikam iparegta ti iyuutang kadagiti kakabsat, a namnamaen a mabayadan daytoy inton maaprobaranen ti iyuutang iti Sosiedad.

⁷ Kalpasan a maikeddeng dagiti punto iti ngato, rebbeng a pagsasaritaan dagiti panglakayen ti naidatag a proyektoda a kaduada ti manangaywan sirkito, a mabalin a makaited ti balakad ken singasing maipapan iti proyekto. No agsuraten ti kongregasion iti Sosiedad para iti tulong a maipautang, rebbeng nga inayon ti manangaywan sirkito ti maysa a surat ti rekomendasion maipapan iti pakasapulan ken kinapraktikal ti proyekto. Maitedto ti pinansial a tulong inton addan pundo ken daytat’ sigun iti pakasapulan. Pangngaasiyo ta siputanyo: Manipud Setiembre 1, 1991 kinednganen ti Bagi a Manarawidwid ti gatad dagiti pudno a mausartayo kadagiti Kingdom Hall loan gapu kadagiti pinansial a pakasapulan iti dadduma a lugar. Kaipapanan daytoy a dagiti laeng kiddaw ti iyuutang a talaga a kasapulan ti maaprobaran, ket uray dagitoy kasapulanda ti aguray iti mabayag bassit sakbay a mapaadda dagiti umdas a pundo.

NAINSIRIBAN A PANANGUSAR KADAGITI NAITED A PUNDO

⁸ Iti kanito a naawaten ti gatad a nautang, rebbeng a maorganisar ti maysa a building committee ket masapul a maidulin dagiti pinansial a listaan dagiti amin a transaksion. Rebbeng a maaramid dagiti assitgan a report iti kongregasion no kasano ti pannakaigasto dagiti pundo ken ti irarang-ay ti maipatpatakder. Ti kuarta a maawat manipud Sosiedad rebbeng a saan a mausar maipaay iti aniaman a panggep maipapan ti negosio wenno panagpautang kadagiti kakabsat. Daytoy a kuarta ket nailasin para iti maysa a sagrado a panggep ket rebbeng a saan a mausar kadagiti sabsabali a pamay-an.

⁹ Adu a kuarta ti masalimetmetan babaen ti boluntario a panagtrabaho no adda la ketdi dayta. Kadagiti lugar a sadiay adu a kakabsat iti kongregasion ket karpenteroda, mason, elektrisian, kdp., ti panangiboluntarioda iti panawenda ken lalaingda dakkel unay maitulongna iti pannakakissay ti magasto iti proyekto. Natakkuatanen a dagidiay kongregasion nga adut’ tinangdananna a trabahador masansan a dagdagus a nagkurang ti kuartada sakbay a nakumpleto ti proyekto a rinuggianda.

¹⁰ Sabali pay a pamay-an tapno a makasalimetmet iti kuarta ket babaen ti panangpili iti maysa a simple a disenio a saan a nangina ken dina kasapulan ti adu a trabaho. Saan nga irekomendar ti Sosiedad ti kaadda ti nalawa a ruangan a pakaipatakderan ti disenio ti pagwanawanan, yantangay nagastos daytoy ken saan met a napateg. Uray no adda umdas a kuarta ti kongregasion, saan a nainsiriban a maaddaan kadagiti naranga a dekorasion wenno nangina a disenio. Saan nga agbalin a praktikal ti maaddaan ti nakadakdakkel a parupa ti Kingdom Hall ket santo iyan-anay ti kuarta kadagiti napatpateg a banag, kas kadagiti banyo, lamisaan ti literatura, tugtugaw, kdp.​—Fil. 1:10.

¹¹ Addaan ti Sosiedad kadagiti sumagmamano a simple a disenio a mabalinyo a kiddawen no tarigagayanyo ket makatulong daytoy iti panagbangonyo ti Kingdom Hallyo. No manangdankayo ti maysa nga arkitekto iti lugaryo a mangdisenio iti patakder, siguraduenyo a surotenna dagiti panangiwanwan ti building committee, yantangay masansan a ti disenio a mismo ket napateg iti panangikeddeng iti gatad ti patakder. Babaen ti panangikkat kadagiti di met nasken a disenio ken panangaramid a simple dayta, mabalin a maibangon ti maysa a nalapsat a Kingdom Hall nga awan dakkel a gastos.

KINAMATALEK ITI PANANGSUPORTAR KADAGITI UTANG

¹² Maipakita dagidiay kongregasion nga awan utangda ti panangsuportarda iti daytoy a sangalubongan nga urnos babaen ti panangaramidda kadagiti regular a kontribusion iti Kingdom Hall Fund. Kas nadakamaten iti ngato, uray dagiti dadduma nga agbaybayad kadagiti utangda ket mangmangtedda kadagiti kanayonan a kontribusion iti sangalubongan a pundo. Ngem gapu kadagiti dadakkel a gatad a maipapautang itan kadagiti kongregasion, ti kapapatgan a kontribusion a maaramid ti maysa a kongregasion nga immutang ket babaen ti panagbalin a matalek iti regular a panangipatulod kadagiti binulan a pagbayadda iti Sosiedad. Gapu ta naitalek iti kongregasiontayo dagiti pundo tapno temporario nga usarenna, pudno a mayordomo[tayo] iti dayta a kuarta, ket kas kunaen ti 1 Corinto 4:2: “Masapul a dagiti agaywan tattaoda koma a matalek.”

¹³ Sadiay a ti maysa a kongregasion inawatna ti utang manipud Sosiedad sa kalpasanna liwayanna ti agbayad kas napagnunumuan, talaga a saan a panangipakita daytoy iti naayat nga espiritu, yantangay dagiti pundo ket saanda a maisubsubli iti Sosiedad tapno mausar iti panangtulong kadagiti sabsabali pay a kongregasion. Ammomi nga isuamin kayatda nga ipakita ti panangapresiarda babaen ti regular nga itutulongda maipaay iti pannakabayad ti utang.

¹⁴ Nainkasuratan ti panangted ti pinansial a tulong. Ti sao a Hebreo a naipatarus a “kontribusion” kaipapananna ti “sagrado a bingay.” (Ex. 25:2, Reference Bible, footnote) Ditay pabpabaknangen ni Jehova babaen kadagiti kontribusiontayo iti trabahona, ngem iti daytoy a pamay-an maipakitatayo ti ayattayo kenkuana ken kadagiti kakabsattayo, ket bendisionannatayo.​—1 Cron. 29:14-17; Prov. 3:9.

¹⁵ Nagsurat ni Pablo idiay 2 Corinto 8:12: “Ta no sisasagana ti pakinakem, ti sagut makaay-ayo no maiyannugot iti kupkupikupan ti maysa a tao, a saan a kas iti awan kenkuana.” Nasayaat no amin idiay kongregasion ket maparegta a mangilasin iti maysa a gatad a regular sigun iti kabaelanda ken tarigagayda. (Idiligyo ti 1 Corinto 16:1-4.) Insurat ni Tertullian maipapan iti immuna a kongregasion Kristiano: “Tunggal tao iti kada bulan mangiyeg kadagiti sumagmamano a sinsilio​—wenno kaanoman a tarigagayanna, ken no laeng tarigagayanna, ken no kabaelanna; ta awan ti mapilit; boluntario dayta a panagdaton.” Siempre, no nagkari ti maysa a tao ken Jehova iti pusona nga isut’ mangited iti maysa a gatad iti tunggal bulan tapno tumulong iti panagbayad ti utang iti Kingdom Hall, rebbeng ngarud nga “aramidenna kas pinanggep ti pusona,” a simamatalek a tungpalenna ti karina.​—2 Cor. 9:7.

TAGINAYONEN TI NAREGTA NGA ESPIRITU

¹⁶ Makomendaran ti isuamin gapu iti kinamanagparaburda iti panangsuportar iti Kingdom Hall Fund. Adu nga ebkas ti apresasion ti naawat manipud kadagiti kongregasion a natulonganen, ket naitan-ok ti nagan ni Jehova idiay komunidad a nakaipatakderan dagiti baro a Kingdom Hall. Gapu iti daytoy nga urnos, adda maar-aramid a “panagpapada” kadagiti kongregasion. (2 Cor. 8:14) Adu a babassit ken nakurkurapay a kongregasion ti nakabalin a nagbangon kadagiti Kingdom Hall, a nalabit imposible no awan ti urnos a panagpautang.

¹⁷ Kabayatan ti pannakaibangon ti baro a Kingdom Hall, ti kinarayray, regta, ken maysa a positibo nga espiritu ket tumulong iti balligi ti proyekto. Ti isu met laeng nga espiritu ti rebbeng nga agtultuloy bayat a pagreggetantayo a tulongan ti ad-adu pay tapno makitimpuyogda kadatayo idiay Kingdom Hall. Ti kasta a regta agbunga kadagiti iyaadu iti bilang dagiti tumabtabuno iti gimong ken iti idadakkel ti kongregasion.

¹⁸ Bayat nga itultuloytayo ti panangpalawa iti ministeriotayo, nga iyagawatayo a sipipigsa dagiti bagbagitayo, awan duadua nga addanto kadatayo ti bendision ni Jehova. (Luc. 13:24) Ditay ammo no ania nga irarang-ay ti agur-uray kadatayo iti masanguanan. Ngem kasapulantayo ti agbalin a sisasagana a mangabrasa iti aniaman a masanguanan nga iseserrek dagiti managdaydayaw. Sapulen dayta ti panagsagana iti biangtayo itan. Gapuna nga ikararagtayo ti agtultuloy a bendision ken panangiwanwan ni Jehova. Iti panagbangon para iti masanguanan, sapay koma ta agbalintayo amin a makipagtrabaho ken Jehova​—iti pisikal, material, ken espiritual. Sigurado a bendisionannatayo bayat a siuumiso a maseknantayo kadagidiay aggarasugas a sumrek iti uneg ti organisasion ti Pagarianna kabayatan ti maudi a paset dagiti maudi nga al-aldaw.​—Isa. 60:8, 10, 11, 22.