Panagpayunir—Maysa nga Ebkas ti Ayat
1 Ti ayat ken Jehova ken iti kapadatayo a tao isut’ nangtignay kadatayo a makipaset a naan-anay iti panangasaba a trabaho. Bayat a dumakkel ti ayattayo ken Jehova ken kadagiti tattao, maparegtatayo nga agplano a maipaay iti ad-adu pay a pannakiraman iti ministerio. Lumawa ti panagayattayo bayat a rumang-aytayo iti “umiso a pannakaammo” iti Sao ti Dios. (Fil. 1:9, 10) Bayat nga umadu ti maadaltayo maipapan iti pagayatan ni Jehova, mas ipategtayo met ti kinaganat iti tiempo a pagbibiagantayo. Daytoy ti mangdegdeg iti pannakaseknantayo iti sabsabali. Adu ti mangiyebkas iti naayat a pannakaseknanda babaen ti panagpayunirda.
2 Makaaramidkayo kadi iti maitutop a panangihusto tapno maka-auxiliary payunir wenno regular payunirkayo? Ibilangtayon, saan nga amin ket makapayunir. Ngem tunggal maysa ti masapul a manganalisar iti kasasaadna a sikakararag. Ti panag-auxiliary wenno regular payunir ket saan a mapasamak a palpalaran. Agtaud daytoy iti positibo a regget nga agubbog manipud umiso a motibo ti puso a mangyeg iti bendision ni Jehova. Ipuderyo ken Jehova daytoy a buyogen iti kararag. Iyebkasyo kenkuana iti tarigagay ti pusoyo. (1 Juan 5:14; 2 Tes. 3:1) Aramidenyo ti mapiar a panangkuenta iti kasasaadyo ket kitaenyo no ania ti maaramid a panangritubar tapno masabet dagiti kasapulan.
3 Manmano dagiti Kristiano ti makasarak a nawadwad iti tiempoda nga agpayunir; gapuna, kasapulan a ‘gatangenda iti nagundawayan a tiempo’ manipud kadagiti saan unay a nasken a bambanag a mangagaw ti agdama a tiempoda. (Efe. 5:15-17) Ti ayattayo iti Dios ken ti pada a tao isu koma iti mangaramid kadatayo a mangisakripisio kadagiti bukodtayo a tarigagay ken nam-ay tapno maanaytayo nga iyebkas ti ayattayo. (Mar. 12:33) Adu kadagiti bambanag a naparnuaytayo, a nalabit ket gagangay laeng kadatayo, ti matmatan iti dadduma ditoy lubong a kas kinaluho.
4 Ania ti maaramid dagiti nagannak a pangtulong iti annakda nga agpanunot ti kastoy a maitunos iti wagas ti Dios? Masapul a mangituding dagiti nagannak kadagiti teokratiko a kalat iti saklang dagiti annakda manipud kinaganusda. Bayat nga aggraduardan manipud iti pagadalan, pampanunotenda kadi dagiti sekular a kalat wenno espiritual a kalat? Kayattayo a tulongan dagiti agtutubotayo a kumita iti agnanayon a gunggona nga agtaud ti panagpayunirda bayat iti kinaagtutuboda. Panagurnong iti gameng sadi langit daytoy. (Mat. 6:19-21) Paragsakenna ti Dios ken mangted iti ebidensia ti kinasungdo ken debosion kenkuana. Ken salbarenna iti biag dagiti dadduma.
5 Ti pranka a diskusion a kadua dagiti dadduma a payunir, ti manangaywan iti serbisio, wenno ti konduktor iti Panagadal ti Libro ket makaited iti makatulong a singasing kadakayo. (Prov. 15:22; 16:3) Dagiti miembro ti pamilia ket makaparegta ken makasuportada met iti tarigagayyo nga agpayunir.
6 Pagayatan ti Dios nga ‘amin a kita dagiti tattao ket maisalakan.’ (1 Tim. 2:4) Maipakitatayo aya daytoy nga isu met ti pagayatantayo? Mabaelan dayta no situtuloktayo nga unaen iti interes ti Pagarian. Maaramidtayo met daytoy babaen ti panagtalek ken Jehova nga ipaayna amin dagiti nasken a kasapulan iti biag. (Mat. 6:31-33) Mabalin a rumigat iti ekonomia, ngem ti kari ni Jehova a mangtaripato kadatayo ket saan nga agbalbaliw.—Sal. 37:25.
7 Ti panangigarangan iti bagitayo a makiraman iti tay-ak ti ministerio kas ipalubos iti kasasaadtayo isut’ maysa nga ebkas ti ayat. Iti dadduma kaipapananna daytoy iti panagbalinda a regular payunir. Apay a dikay aramiden iti amin a kabaelanyo a mangrugi inton Setiembre 1, 1992?