Positibo a Tignay nga Agturong iti Mainayon a Panagrang-ay
1 Iti saanen a mabayag maadaltayo ti sangalubongan a report iti 1992 a tawen ti serbisio. Awan duadua a mangted manen iti nalawag nga ebidensia a binendisionan ni Jehova dagiti tattaona ti nagpaiduma a panagrang-ay. Ti awis a makitimpuyog iti sangalubongan a panagkakabsat ket agtultuloy. Ipakita ti bilang dagiti timmabuno iti Memorial a minilion pay laeng a tattao ti dumngeg iti damag ti Pagarian. Manipud amin a nasnasion, ipangpangagda iti naipaltiing nga awis a nagkuna: “Umaykayo, dakayo a tattao, ket sumang-attayo iti bantay ni Jehova, idiay balay ti Dios ni Jacob; ken iwardasna kadatayo dagiti dalanna, ken magnatayo kadagiti danana.”—Isaias 2:2-4 ken Mikias 4:1-4.
2 Determinadokayo a Rumang-ay: Umab-abante ti organisasion ni Jehova. Gapu ti kaadu dagiti sumang-at iti bantay ti pudno a panagdayaw ken Jehova, nasken iti tunggal maysa ti agtultuloy iti mainayon pay a panagrang-ay ken tulongan dagiti agdadamo a mangaramid met iti dayta. Ti panagkasapulan a rumang-ay isut’ ipamatmat iti sasao a dagidiay a mangipangag ti awis a sumang-at iti bantay ni Jehova ket kunaenda met kadagiti sabsabali, “Umaykayo.” Inreport ni apostol Juan iti maysa a banag a kaasping ti Apocalipsis 22:17: “Ket ti espiritu ken iti nobia agtultuloy ti panagkunada: ‘Umayka!’ Ket siasinoman a dumngeg kunaenna: ‘Umayka!’”
3 Indemostra ni Jesus no kasano a maited daytoy nga awis. No ipangag dagiti tattao ti sursurona, awisenna ida a makiraman iti ministerio ken suruanna ida no kasano a maaramidda dayta. (Mat. 4:19; 10:5-7, 11-14) Nakasuro dagiti disipulona iti epektibo a metodo nga inusarna babaen ti panangkuyog ken panangpaliiwda no kasanona nga aramiden dagiti bambanag. Kalpasanna ipadronda ti ministerioda a mairukod iti wagasna. Naadalda a naimbag dagiti metodona nga uray dagiti kabusor ket nabatad a nabigbigda nga isuda dagiti disipulo ni Jesus. Inreport ti Aramid 4:13: “Itan idi makitada ti kinatured da Pedro ken Juan, . . . nangrugida a nabigbig maipapan kadakuada a masansan a nakikuyogda ken Jesus.”
4 Sakbay a nagsubli sadi langit, nangted ni Jesus iti bilin a dagiti disipulona ket masapul nga agaramidda ti baro a disipulo, a suruanda ida a kas met iti pannakaisuroda. Iti Mateo 28:19, 20, imbilin ni Jesus: “Mapankayo ngarud ken agaramidkayo iti disipulo kadagiti tattao ti amin a nasnasion, . . . a suruanyo ida a mangalagad kadagiti amin a bambanag nga imbilinko kadakayo.” Ket kas pammatalged ti panagtultuloy daytoy agingga iti daytoy aldawtayo, innayonna: “Adtoy! Addaak kadakayo iti amin nga al-aldaw agingga ti panungpalan iti sistema dagiti bambanag.”
5 Dagiti pudno a disipulo ni Kristo Jesus saanda a natungday a nagtulnog iti pammilinna a suruan dagiti baro a disipulo ti amin a bambanag nga imbilinna. Nupay kasta, ti naisalsalumina a progreso iti biang dagiti Saksi ni Jehova kasapulanna ti panangusigtayo iti nagpaiduma a kasapulan dagiti baro a bautisado a miembro ti kongregasion ken dagiti dipay bautisado nga agibumbunannag agraman tattao a makiad-adal iti Biblia kadatayo a nalabit a nangrugidan a tumabuno kadagiti gimongtayo.
6 Idi rugi iti 1992 a tawen ti serbisio, agarup a 1 iti 9 nga agibumbunannag ti aktibo iti ministerio ti makatawen pay laeng. Mainayon pay, 1 manipud iti 6 ti nagibunannag iti tallo a tawen wenno kurang pay; ken 1 kadagiti 4 ti nakiraman iti ministerio ti nasurok a lima a tawen. Nupay adu dagiti agdadamo iti nasayaat ti panagrang-ayda manipud idi nagbalinda a miembro iti kongregasion, ti mainayon a tulong iti nagduduma a benneg isut’ awan duadua a mangpapardas ti espiritual a panagrang-ayda.
7 Ti Hebreo 6:1 paregtaenna dagiti amin iti “panagtultuloy nga agmataengan.” Ti Kristiano a kinanataengan ket makagteng pay iti labes ti basta makareport laeng iti serbisio. Ramanenna ti panagrang-ay iti personal a panagadal ken regular a pannakigimong agraman napinget a pannakipaset idiay tay-ak ti ministerio. Ti panangtulong iti dadduma a dumteng ti pannakaammo iti kinapudno a maipaay ti pannakaisalakan ket saklawenna met. Masapul nga agtrabahotayo a mangpatadem ti laingtayo a ‘makirinnason manipud iti Kasuratan.’ (Ara. 17:2) Ti panagmataengan ket kasapulanna iti tiempo, ken agpannuray iti nadiosan a debosiontayo ken ti pananggun-od iti kapadasan idiay tay-ak. Agpapan pay matengngeltayo ti kauneg iti bukodtayo a nadiosan a debosion, siempre a nainsiriban no ipalubos kadagiti nataengan a kakabsat a lallaki ken babbai a tulongandatayo a gumun-od iti praktikal a kapadasan. Makaadaltayo kadagiti kapadasanda, nangruna iti tay-ak ti ministerio. Ditay kayat ti makaadal iti amin a bambanag babaen ti bukodtayo a panangpalaran.
8 Tulong Kadagidiay Kurang ti Kapadasanda: Ti padron iti pannangted iti tulong isut’ naituyang idi karrugi ti Kristiano a kongregasion. Inwardas ni Jesus dagiti disipulona. (Mar. 3:14; Luc. 9:1; 10:1) Kalpasanna, insuroda met dagiti dadduma. Immawat ni Timoteo iti nagpaiduma a pammaregta ken tulong manipud ken apostol Pablo, ket ni disipulo nga Apolos nagprogreso babaen ti badang da Aquila ken Priscilla. (Ara. 18:24-27: 1 Cor. 4:17) Dagiti nataengan a miembro ti Kristiano a kongregasion isudat’ sumurot kadagitoy nga ehemplo ita, a suruan ken paregtaenda dagiti kurang pay ti kapadasanda, nangruna dagiti agdadamo ken agtutubo. Kas kunaen ti Roma 15:1, 2, “Datayo, ngarud, a napigsa ti rumbeng a mangawit iti kinakapoy dagidiay a nakapoy.”
9 Rebbengen dagiti nagannak a tulongan dagiti annakda a rumang-ay iti naespirituan. Iramanna daytoy iti panagadal ti pamilia, a suruan dagiti annak no kasano ti panagadal a personal, tumabuno iti gimong ken makipaset, ken alagaden no ania iti naadalda. (Efe. 6:4; 1 Tim. 5:8) Dagiti konduktor ti Panagadal iti Libro ti Kongregasion ti nangruna a mangurnos no kasano a matulongan dagiti amin idiay grupoda ti panagadal tapno rumang-ayda iti espiritual a wagas. Ti manangaywan iti serbisio ken dadduma a panglakayen agraman dagiti ministerial nga adipen ken dadduma a miembro ti kongregasion ket makatulongda met.
10 Ipaay No Ania ti Kasapulan: Nalabit a ti kasapulan isut’ panangtulong iti maysa laeng a benneg ti Kristiano a trabaho, kas iti personal a panagadal. Mabalin a kasapulan iti maysa a tao ti singasing a maipaay iti maipasdek nga iskediol ti panagadal. Mabalin nga adda makatulong iti panagsagana ti komento wenno naituding a paset. Nalabit a kasapulan met dagiti dadduma a maadal no kasano iti panagsukimat kadagiti suheto ti Biblia.
11 Adu dagiti agdadamo iti agkasapulan ti tulong iti tay-ak ti ministerio. Nalabit a kayat iti maysa nga agibumbunannag ti agbalin a mas epektibo iti panagbalaybalay a trabaho, panagsarungkar, wenno mangirugi ken mangidaulo iti panagadal ti Biblia. Umdasen iti sumagmamano a sesion ti panaginsayo a mausar dagiti introduksion ken presentasion idiay Panakirinnason a libro wenno manipud Ti Ministeriotayo iti Pagarian. Iti dadduma a tiempo, nalabit a kasapulan a maisingasing dagiti praktikal nga iskediol a maipaay iti tay-ak ti serbisio. Ti masinnunuo nga urnos iti panangkuyog kadagiti agkasapulan ti tulong isut’ bumadang kadakuada a rumang-ay kadagiti masnop a kalat.
12 Paregtaennatayo iti Sao ti Dios nga agminar koma ti espiritual a panagabantetayo kadagiti dadduma. (1 Tim. 4:15) Maiyataday iti dayta a pammaregta, impaganetget ti apostol iti kasapulan a mangsanay ti bagitayo a kas iti maysa a makisalip nga atleta wenno maipaay ti naballigi a pannakirupak iti espiritual a dangadang. (1 Cor. 9:24-27; 2 Cor. 10:5, 6) Masapul a nasiglattayo a mangalagad iti amin a naadaltayo maipapan ti pagayatan iti Dios tapno dagiti agpalpaliiw ket makitada kadatayo ti sibibiag nga ehemplo iti pudno a Kristiano a pammati. Kapadpadna, masapul nga agprogresotayo iti arte ti panangisuro iti sabsabali nga agbalin a dedikado a disipulo ni Jesu-Kristo.—Sant. 1:22-25; 1 Tim. 4:12-16.
13 Ti Panagrang-ay Ramanenna ti Panagibtor iti Suot: Uray ni Kristo Jesus ket naadalna ti pateg iti leksion manipud kadagiti bambanag a sinagabana. (Heb. 5:8) Kasta met kadatayo. Maitunos iti daytoy, ti espiritual a panagabante isut’ maparayray no alaentayo iti positibo a kababalin a nairekomenda ti Santiago 1:2, 3: “Ibilangyo amin a rag-o, kakabsatko, ti panaglak-amyo iti nagduduma a suot, nga ammoyo a no aramidenyo dayta ti nasuot a kalidad iti pammatiyo ket pataudenna ti panagibtor.” Iti kasta, uray no maipasango kadatayo ti di maagasan a sakit, kinarigat iti biag, panagbiag iti nabingay a sangakabalayan, ibubusor idiay teritoria, wenno dadduma pay a napeggad a sirkumstansia, adda saranay ni Jehova kadatayo a maparukmatayo dagitoy ken agtultuloytayo nga agrang-ay iti panagdayaw kenkuana. (1 Cor. 10:13; 2 Cor. 12:9; 1 Ped. 5:8-11) Ti balligi isut’ maragpat babaen iti panagtibker iti amin a kasasaad, a ‘sawen dagiti sagrado a sasao ti Dios ken agministro kas managpannuray iti bileg nga ipaay ti Dios, tapno iti amin a bambanag ti Dios isut’ mapadayag babaen ken Kristo Jesus.’—1 Ped. 4:11.
14 Awaten ti Tulong a Maipaay iti Mainayon a Panagrang-ay: No maysakayo nga agkasapulan iti tulong tapno manayonan pay ti espiritual a progresoyo, situtulokkayo koma nga umawat iti dayta manipud kadagiti mas nasanay a miembro ti kongregasion. Uray no saandakayo pay a naasitgan a matukonan iti tulong, dikay koma agbain wenno bumdeng nga agkiddaw iti dayta. Riknaenyo a siwayawaya iti panangsapul ti tulong manipud siasinoman nga aduan kapadasan iti kongregasion. Wenno mabalinyo a kiddawen iti konduktor ti Panagadal iti Libro ti Kongregasion, ti manangaywan iti serbisio, wenno siasinoman kadagiti panglakayen ti kasapulan a panangbadang.—Maidilig iti Genesis 32:26; Mateo 7:7, 8.
15 Manamnama, maysa a nakaskasdaaw a pribilehio ti mairaman iti awan sardayna a panagadu ti internasional a “dakkel nga umariwekwek” a sumangsang-at iti bantay ti nadalus a panagdayaw ken Jehova. (Apoc. 7:9) Maysa met a pribilehio ti mangawis iti dadduma a makikuyog kadatayo. Babaen iti napusuan a panangipateg, itultuloytayo koma ti positibo a tignay a maipaay iti mainayon a panagrang-ay, a pabilgen ti espiritualidadtayo ken aramidentayo iti amin a kabaelantayo a tumulong ti sabsabali a kaduatayo nga agprogreso iti serbisio ni Jehova.