Panagprogreso iti Ministerio
1 Adda kadaanan a replan maipapan iti panagprogreso a kunana: “Rugiam manipud iti ayanmo. Ngem dika agsarimadeng iti lugarmo.” Anian nga aplikado daytoy a pagsasao maipapan iti panagprogreso iti ministerio! Idi rinugianyo iti ministerio, mabalin a makaitedkayo laeng iti ababa a panangiparang iti damag ti Pagarian. Ngem no iti kalpasan ti sumagmamanon a tawen ket saankayo pay a rimmang-ay iti dayta a takderyo, nga nagintekkayo iti lugaryo, ania ti aramidenyo?
2 Ti umuna nga addang isu ti panangdawatyo ken Jehova a maipaay iti kasapulanyo a sirib a mangisuro a buyogen iti kinalaing. (Prov. 15:14; Sant. 1:5) Ti maikadua nga addang isut’ panagaramidyo kas maitunos iti kararagyo. Mangitudingkayo iti tiempo a mangsukimat kadagiti presentasion idiay Panakirinnason a libro. Sarakenyo ti maysa a marikna a mausaryo nga epektibo, ket uliten ken iruamyo nga iparang dayta agingga a makabisadoyo. Ti maikatlo nga addang isu ti pannakikuyog kadagiti kakabsatyo idiay tay-ak tapno maipadasyo dagiti presentasion nga insaganayo.
GAGAYYEM A TUMULONG KADAKAYO
3 Nalabit a makunayo, ‘Nalaka a sawen ngem narigat nga aramiden.’ Pudno, ngem dayta ti gapu no apay nga addaankayo iti gagayyem a tumulong kadakayo. No agtutubokayo, makisaokayo kadagiti nagannakyo wenno kadagiti eksperiensiado nga agibumbunannag ken nabunga a ministro. Kiddawenyo kadakuada dagiti singasing no kasano ti makisao kadagiti tattao iti ruruangan. Mabalin nga isingasingda ti sesion iti panaginsayo a sadiay mabalinanyo nga ipadas dagiti panangiparangyo. Mabalinda ti agparang a kas bumalay, a mamataudda iti gagangay a pangontra a masansan a masabet kadagiti ruangan. Babaen iti panagsanay mabalin a maadalyo ti makisao a siaalibtak kadagiti tattao.
4 Addaankayo pay iti sabsabali a gagayyem a makatulong kadakayo. Adda dagiti payunir a nakaadalen kadagiti teknika ti panangasaba babaen iti kapadasan ken babaen iti itatabunoda iti Pioneer Service School. Ti konduktoryo iti panagadal wenno ti manangaywanyo iti serbisio ti mabalinda met a makatulong kadakayo iti ipapan kadagiti ruangan ken maidemostrada pay no kasano ti makisao ken makirinnason kadagiti tattao.
PANANGSARUNO KADAGITI NAIPAKITA NGA INTERES
5 Interesadotayo a mangted iti mainayon nga espiritual a tulong kadagiti tattao a mangawat iti literatura. Kaipapanan dayta ti panagsublitayo a mangtukay iti kanayonan nga interesda. Sakbay a maaramid iti sarungkar, repasuen no ania iti naibaga idi damo nga ipapan tapno mas epektibo a maparayray daydiay suheto a nakaawis iti interesda. Panunotenyo met, a bayat nga agmula ken agsibugtayo, ni Jehova ti mamadakkel. Ikararagyo ti panangidalanna sakbay a sumarungkarkayo. (1 Cor. 3:6; 2 Cor. 9:10) Bayat a tulongan dagiti dadduma a makaadal, maaddaantayo met iti personal a panagprogreso.
6 Ti sumaruno a nasken nga addang isut’ panangirugi ken panangikondukta iti panagadal ti Biblia. No saanyo pay a nagtengan dayta a tukad iti ministerial a panagrang-ayyo, agtultuloykayo nga umararaw ken Jehova tapno tulongannakayo a mangsarak ken mangpakan iti maysa a marakarnero. Masarakanyonto a makatulong iti panangimatang no kasano a maidaulo ti maysa nga epektibo a maestro iti panagadal ti Biblia ket tuladenyo iti metodo ti panangisurona. Repasuenyo met ti impormasion iti panangisuro kas masarakan idiay Ti Pagwanawanan iti Pebrero 1, 1985, pinanid 8-17. Babaen ti kasta a panagsaganayo, mabaelanyo ti mangikondukta iti panagadal no masungbatan dagiti kararagyo.
MANGITUDING KEN RAGPATEN DAGITI KALATYO
7 Ti panangragpat kadagiti kalat nga agbalin a mas epektibo a mangisuro, agsarungkar, ken mangidaulo iti panagadal ket mangala ti tiempo. Mabalinyo kadi ti mangituding manen iti sabali a kalat, kas koma iti auxiliary wenno regular payunir a serbisio? Bayat nga agtultuloykayo nga umabante iti ministerio, dakayo iti taudan ti pammaregta dagiti dadduma. Adu a bendision manipud ken Jehova ti maadda kadakayo no saankayo nga agsarimadeng iti lugaryo ngem agtultuloykayo nga agprogreso.