Saludsod

◼ Ania ti mausig nga umiso a kawes no idatag iti maysa a tao ti bagina iti bautismo?

Bayat a ti pagrukodan a kawes ket naggigiddiat iti nagduduma a paset ti lubong, agtalinaed iti balakad ti Biblia maipapan iti panagkawes a “buyogen ti kinatakneng ken nasimbeng a panunot kadagiti amin a Kristiano, nga uray sadino iti lugarda. (1 Tim. 2:9) Daytoy a prinsipio ti agaplikar met no usigen iti umiso a kawes nga agpaay ti bautismo.

Ti Disiembre 1, 1985, a Pagwanawanan, panid 30, nangted iti balakad nga agpaay ti maysa a tao nga agpabautisar: “Pudno unay a ti kinaemma ti masalimetmetan koma iti kita dagiti mausar a pagbabasa. Nasken unay daytoy ita ta dagiti diseniador ti moda ket kasla kayatda a pagpasikat ti seksualidad ken kayatda a maragpat ti nganngani naan-anay a panaglamolamo. Ti maysa pay a banag a rebbeng nga ikuenta a ta sumagmamano kadagiti pagbabasa nga agparang a kasla naemma no namaga ti saanen a mangipakita ti kinaemma no nabasan. Awan asinoman kadagidiay mabautisaran ti kayatda ti agbalin a pakaigappuan ti pakariribukan wenno pakaitibkolan iti maysa a pasamak a kas kainget ti bautismo.​—Filipos 1:10.”

Maitunos iti daytoy a balakad, dagidiay mabautisaran ti agmayat a mangisuot iti natakneng a kawes, nga adda iti panunotda ti importansia iti okasion. Ngarud, ti maysa a nakipet a kawes a pagdigos wenno saan a natakneng ti panaglugarna iti bagi no mabasa ti saan a rumbeng a pagkawes dagiti Kristiano ket masapul daytoy a liklikan. Kapadana, saan a maiparbeng iti maysa a tao ti nakulkol wenno nakuso iti langana. Mainayon pay, saan a maitutop ti agkawes iti T-shirt wenno kamiseta nga addaan iti nailubongan a pagsasao wenno slogan ti komersio.

No dagiti natudingan a panglakayen ket irepasoda dagiti saludsod a maipaay ti bautismo kadagiti kandidato iti bautismo, nasayaat a tiempo daytoy a mailawlawag ti pateg iti panagkawes ti umiso. Iti kasta a wagas ti dignidad iti okasion ket mataginayon, ken ituloytayo ti agtakder a kas naiduma manipud iti lubong.​—Maidilig iti Juan 15:19.