Pagalagadan nga Agpadpada Dagiti Agdadamo ken Nasanayen a Ministro
1 Insaludsod ti salmista: “O Jehova, asinonto ti sangaili iti toldam? Asinonto ti agtaeng iti nasantuan a bantaymo?” Sinungbatan ni David: “Daydiay magmagna nga awan tulawna ken mangal-alagad ti kinalinteg ken agsasao ti kinapudno.” (Sal. 15:1, 2) Dagidiay a pagalagadan ti saan a nagbalbaliw. Amin ita dagiti umay agdayaw iti Kristiano a kongregasion masapul nga tallikudanda ti imoral nga ar-aramid ken panagbartek. Awan ti lugar iti tengnga dagiti tattao ni Jehova kadagidiay a mannakiapa, managpungtot, ken nagsanga ti dilada wenno managsao iti allilaw. Agdadamo wenno nasanayen a ministro, masapultayo ti panagmatalek a mangsalimetmet iti nangato a pagalagadan a naiwayat iti Sao ti Dios.—Gal. 5:19-21.
2 Adu ti agdadamo a makitimtimpuyogen iti organisasion ni Jehova. Nagbalbaliw ti pampanunotda tapno maiyataday iti wagas ti panagbiagda kadagiti pagalagadan ti Dios. Maysa nga agtutubo idiay Sud America ti dimmakkel nga awanan naamaan a giya ket nakapatanor iti naproblema unay a personalidad. Idi agtawen pay laeng ti 18, naadikto iti druga ken naibaluden gapu ti panagtakaw tapno masuportaranna iti bisiona. Babaen iti panagadal ti Biblia, sinardenganna daytoy ken pimmanaw iti timpuyog dagiti dati a kakaduana, a nasarakanna dagiti baro a gagayyem kadagiti Saksi ni Jehova, ket idi agtanoy indedikarnan ti biagna iti Dios.
3 Umasping iti daytoy, masapul a determinadotayo koma a maparagsak ti Dios iti amin a konduktatayo, “iti pudno a kinalinteg ken kinasungdo.” (Efe. 4:24) Addaantayo ti obligasion a “manguksob iti daan a kinatao agraman ar-aramidna” ken tapno “makawesan [ti bagbagitayo] iti baro a kinatao, a babaen ti umiso a pannakaammo isut’ maaramid a baro” tapno makapagtalinaedtayo iti umasping ti bantay nga organisasion ti Dios.—Col. 3:9, 10.
4 Sao ti Dios, Mannakabalin nga Impluensia: Ti personalidad ni Jehova kas naiparangarang kadatayo babaen iti Biblia isut’ sibibileg a mangapektar iti panunot ken tignaytayo iti positibo a wagas. (Roma 12:2) Ti Saona addaan iti pannakabalin a mangbaliw iti panunot ken sukisokenna ti puspuso. (Heb. 4:12) Isuro ti Biblia kadatayo a pagayatan ni Jehova a maiturongtayo iti kasapulan a moral a panagbiag, a makiramantayo a naan-anay iti publiko a ministerio, ken ditay liwayan dagiti gimong iti Kristiano.
5 Iti daytoy napeggad a tiempo ti kumakaro a pakagipitan isut’ mangimpluensia ti maysa a Kristiano a manglabsing iti linteg ti Dios. No maliwayan ti personal a panagadal, panagadal iti pamilia, gimong ti kongregasion wenno ti ministerio, uray ti maysa nga [idi naminsan] ket nabileg a Kristiano mabalin nga isu ket maiyanud manipud iti pammati, nalabit a matnag iti dakes a kondukta. Gapuna nga insurat ni Pablo ken Timoteo: “Imutektekam a kanayon ti bagim ken iti isursurom” ken, “Ipaaymo a kanayon ti panangimutektek iti ibagbagak.”—1 Tim. 4:16; 2 Tim. 2:7.
6 Amintayo, masapul a salimetmetantayo dagiti pagalagadan ti Dios a silalawag iti panagkita, a naan-anaytayo a natimbang iti ministerio, a salimetmetan ti namnamatayo a nabileg no kayattayo a masalbar iti biagtayo. (1 Ped. 1:13-16) Ti inaldaw-aldaw a panangsurot kadagiti nalinteg a pagalagadan ti Dios isut’ naan-anay a kasapulan.
7 Determinadokayo koma a rumang-ay iti pammati ken pawadwadenyo ti bunga iti tay-ak ti ministerio. (Roma 1:12) Salimetmetanyo ti pampanunot kadagiti nalinteg a bambanag babaen iti regular a personal a panagadal, panagadal ti pamilia, ken itatabuno iti gimong. (Fil. 4:8) Ti reggetyo a mangparagsak iti Dios babaen ti panagbiag a maitunos kadagiti pagalagadanna ti saanto a di madlaw.—Col. 3:23, 24.